1. Ino ty modely nengà i Jesosy hoahy o mpanonjohy ty lia’eo, le ino ty natao iareo? (Henteo ty sare amy ty fogno ty gazete toy.)

NANAGNE toe-tsaigne soa avao ty Jesosy tamy i reke nanao ty fanompoa’e tan-tane etoỳ, le tea’e naho managne ze toe-tsaigne zay ka o mpanonjohy ty lia’eo naho fa mitory. (Jaona 4:35, 36) Nafana fo tamo o asa fitoriagneo i mpiana i Jesosy rey naho fa nitory niarake tama’e. (Lioka 10:1, 5-11, 17) Faie nihegne ze zotom-po iareo zay naho fa nitsepahegne ty Jesosy sady nivonoegne. (Jaona 16:32) Nandrisike iareo hifantoke amy i asa fitoriagney areke ty Jesosy tafara ty namelomagne aze tamy ty mate. Trea tie nazoto vata’e iareo tafara ty nandehana i Jesosy tan-dagnitse agne, kanao hoe o fahavalo iareò tamy iareo: ‘Henteo’areo fa fineno’areo ty fampianara’areo ty Jerosalema!’​—Asa. 5:28.

2. Akore ty ahatreavagne fa nitahy i asa fitoriagney ty Jehovah?

² Nitarike ty asa fitoriagne natao o Kristiana tamy ty taonjato voaloha’eo ty Jesosy, le nitahy ty asa natao iareo ty Jehovah. Tamy ty Pentekosta taogne 33 ohatse, le nisy ndaty 3000 teo ho eo natao badisa. (Asa. 2:41) Nihanitombo avao ty isa ty ndaty nanjare Kristiana nanomboke tamy izay. (Asa. 6:7) Toe fa nirehafe i Jesosy ka, fa ho maro ty ndaty hagneke i talily soay amy ty andro fara’e.​—Jaona 14:12; Asa. 1:8.

3-4. Nagnino ro va’e ho sarotse amy ty mpitory ila’e ty manao i asa fitoriagney, le ino ty hodinehentikagne ato?

³ Maro amantika ty fa mikezake hanagne toe-tsaigne soa naho fa mitory. Tsy sarotse zay hoahy ty mpitory amy ty tane ila’e agne. Fa nagnino? Tena maro ty ndaty liagne amy iareo agne. Ty ila’e aza mila mandigne heike amparake ty hisia ty mpitory hampianatse aze. Faie tena sarotse hoahy ty mpitory amy ty tane ila’e agne ty manao i asa fitoriagney, satria tsy le zoegne an-tragno  ty ndaty amy iareo agne, ndra ze zoegne an-tragno tsy te hitsanogne i hafatse torientikagney.

⁴ Naho hoe izay ty ndaty amy ty faritane misy azo, le va’e hagnampe azo ty soso-kevetse horehafegne amy ty lahatsoratse toy. Hodinehentika ato ty raha natao ty mpitory ila’e mba hirehafagne amy ty ndaty fara’e ze maro naho fa nanompo. Hodinehentika ato ka tie ino ty hagnampe antikagne hanagne toe-tsaigne soa avao ndra mitsanogne i hafatsey o ndatio ndra tsy mitsanogne.

5. Ino ty olagne atrehe ty ankamaroa o mpitorio?

⁵ Sarotse amy ty ankamaroa o mpitorio ty mahatrea ndaty hirehafagne naho fa mitory isan-tragno. Ty anto’e, tsy afake mizilike amy i tragno bey misy ndaty mpagnofa maro rey, ndra amy i tragno misy manda abo bey rey iareo. Ze ndaty nahazo alalagne boake amy i tompon-tragnoy avao ka ro engà ty mpiambegne i tanàgney handeha mbeo. Ty amy ty tane ila’e agne ka azo izilihagne avao ty amy ty tokotane iareo ao, faie tsy ampe avao ty ndaty zoegne ao. Ty mpitory ila’e ka mitory ambanevolo agne, ndra amy ty tanàgne mitokagne agne. Faie mateteke tsy ampe avao ty ndaty amy i tanàgne rey agne. Va’e tena handeha lavitse ka ty mpitory ila’e mba hahafaha iareo hitory amy ty ndaty raike, faie va’e tsy ho zoegne an-tragno ao i ndatỳ. Naho hoe izay ty raha misy amy ty faritanentikagne, le tsy toko’e ho kivy tika. Ino ty azontika atao naho fa miseho ty raha hoe ireo sady mba hahavita hitory amy ty ndaty maro?

6. Nagnino o mpitorio ro azo ampitoviegne amo o mpagnaratò?

⁶ Nampitovie i Jesosy amo o asa fagnaratoagneo ty asa fitoriagne. (Mar 1:17) Misy mpagnarato ila’e va’e hagnarato agnate ty andro maromaro, faie tsy mahazo fiagne ndra raike. Ndra tie eo zay, le tsy kivy iareo. Ty lera naho ty toeragne vaho ty fomba fagnaratoa iareo ro ovà iareo mba hahavy iareo hahazo fiagne. Hoe izay ka ty toko’e hataontika naho fa mitory. Andao tika handineke ty soso-kevetse retoagne.

7. Ino ty va’e ho voka’e naho ovaovantikagne ty lera itoriantikagne?

⁷ Ovaovao ty lera itoria’o. Ho maro ty ndaty afake hifampirehake amantika naho amy ty lera ahatraragne iareo an-tragno ao tika ro mitory. Maregne fa tsy zoegne an-tragno o ndatio kindraike, faie tsy maintsy mbe holy avao iareo. Maro areke ty mpitory mahatrea tie ndra aleo folakandro ndra takariva ro mitory, satria maro ty ndaty zoegne an-tragno amy igne. Mitofatofa an-tragno ao o ndatio amy igne sady vognogne hirehake. Ndra va’e ho azo’o ampiharegne ka ty raha natao ty androanavi-pagnahy raike atao tihoe Davida toy. Nirehake reke tie naho fa vita i fitoriagney, le miheregne amy ze tragno tsy nisy ndaty nizoegne ty tao rey agne, iareo amy ty nama’e. Hoe ty Davida: “Gaga raho fa tena maro ty ndaty zoe’ay ao naho fa miheregne agne zahay.” *

8. Akore ty azontikagne ampiharagne ty Mpitoriteny 11:6 naho fa mitory?

⁸ Tsy toko’e ho kivy tika. Mandrisike antika hanagne ze toe-tsaigne zay i andinin-teny fototse ty fianaragne toỳ. (Vakio ty Mpitoriteny 11:6.) Nanagne ze toe-tsaigne zay ty Davida, i nirehafegne taloha teoy. Nahatrea ze lahilahy raike zay avao iareo tamy ty fara’e naho fa niheregne tamy i tragno nitoria iareo rey. Liagne amy ty Baiboly o lahilahy iohoe, sady nirehake tie: “Fa valo taogne zay ty nitobohako eto, faie mbe liako naho nahatrea Vavolombelo i Jehovah niavy amako ato.” Hoe ty Davida: “Mateteke ro mitsanogne ty hafatse torientika i ndaty  tsy zoegne an-tragno rey naho fa iheregnagne agne.”

9. Ino ty natao ty mpitory ila’e mba hirehafagne amy i ndaty tsy le zoegne an-tragno rey?

⁹ Ovaovao ty toeragne itoria’o. Novà ty mpitory ila’e ty toeragne nitoria iareo mba hahafaha iareo mirehake amy i ndaty tsy zoegne an-tragno rey. Mitory an-dalagne naho manao fampirantiagne ohatse iareo, amy izay afake mitory amy ty ndaty mitoboke amy i tragno bey tsy azo izilihagne rey. Magnampe o mpitorio hifampirehake mivantagne amy i ndaty rey zay. Misy mpitory ila’e ka mahatrea tie vognogne hirehake ndra vognogne handrambe i boke naho i gazetentikagne rey o ndatio naho fa mitory ama’e amy i toeragne fitobotobohagne rey, ndra a bezara ey, ndra amy i toeragne maro birò rey tika. Hoe ty Floiran, mpiandraikitse faritse a Bolivia agne: “Mitory amo o toeragne maro labodikeo naho amo o mpivarotseo zahay naho fa amy 1.00 hatrake amy 3.00 folakandro, satria tsy le maro ndaty mivily raha ty amy igne. Mateteke zahay ro afake mifampirehake soa amy iareo. Ty ila’e ama’ay aza afake manomboke fampianaragne Baiboly.”

10. Ino ka ty azo’o atao mba hitoriagne amo o ndatio?

¹⁰ Mipaliava fomba hafa. Akore naho fa niherekeregne amy i tragno tsy nahatraragne ndaty rey rehe, sady fa nagnovaova ty lera nandehana’o agne, faie mbe tsy zoe’o avao ty ndaty toboke ao? Mipaliava fomba hafa hifampirehafagne ama’e. Hoe ty Katarína: “Anoratako taratasy i ndaty tsy mete zoegne an-tragno ao rey, le rehafeko ao ze raha niteàko ho nirehafegne tamy iareo mivantagne.” Ino ty lesogne? Naho fa mitory rehe, le mikezaha hipay fomba sambe karaza’e mba hahafaha’o mifampirehake amy ze ndaty amy ty faritane’areo ey.

11. Nagnino ty ndaty ila’e ro tsy te hitsanogne ty hafatse torientikagne?

¹¹ Tsy te hitsanogne ty hafatse torientika ty ndaty ila’e. Ty anto’e, mieretseretse iareo tie tsy misy ipalià iareo an’Andrianagnahare ndra o Baibolio. Tsy mino an’Andrianagnahare iareo, satria maro ty fijaleagne trea iareo amy ty tontolo toy eto. Mahatrea ty raha tsy mete anoe o mpitarike fivavahagneo ka ty ndaty ila’e, le tsy te hitsanogne antika. Ty ila’e lava miasa saigne miomba ty asa iareo naho ty keleia iareo vaho ty olagne atrehe iareo, le mieretseretse tie tsy afake magnampe iareo o Baibolio. Faie ino ty hagnampe antika ho fale avao ndra tie eo zay?

12. Nagnino ty raha rehafe ty Filipianina 2:4 ro afake magnampe antika naho fa mitory?

¹² Atorò fa mihevetse ze hahasoa aze rehe. Maro amy i ndaty tsy te hitsanogne antika tamy ty voaloha’e rey ro nagneke i talily soay naho fa nitsapa iareo tie nihevetse ze hahasoa iareo o mpitorio. (Vakio ty Filipianina 2:4.) Hoe ty Davida, i nirehafegne taloha teoy: “Naho misy ndaty mirehake tie: ‘I raho tsy te hitsanogne o raha torie’areo zao’, le mila apontikagne heike i Baibolintikagney ndra i gazetentikagney, le afake mirehake tika tie: ‘Mba teako ho hay tie fa ela vao rehe ro nalaigne ty raha rehafe o Baibolio?’” Ho tsapa o ndatio amy izay tie mihevetse ze hahasoa iareo tika. Va’e tsy hisy ho tadidy iareo ndra raike ty raha nirehafentikagne tamy iareo, faie tsy ho haligno iareo ty hasoa fagnahy nasehontikagne tamy iareo. Faie ndra tie tsy te hitsanogne antika aza o ndatio, le toko’e hatorontikagne amy ty rehantikagne naho amy ty tarehentika fa mihevetse ze hahasoa iareo tika.

13. Ino ty azontika atao mba hahavy o ndatio hahatsapa tie mahasoa iareo ty hafatse torientika?

¹³ Atorontika tie mihevetse ze hahasoa ty ndaty itoriantikagne tika naho ataontika mifagnarake amy ze raha paliae iareo naho mahaliagne iareo ty hafatse torientika. Akore zao naho treantika amy ty raha magnodidigne eo tie managne anake i tompon-tragnoy? Va’e hahaliagne iareo zao naho toroheve ty Baiboly miomba ty fitezagne anake, ndra torohevetse miomba ze toko’e hatao mba hahasambatse o keleiagneo ro rehafentika amy iareo. Akore ka naho tsikari’o tie misy mpiambegne ty amy i tanàgney eo? Va’e hirehake amy ty ndaty ao miomba ty fisia o alio naho o korontagne magneran-taneo tika. Naho fa avy eo tika, le afake mirehake amy i ndatỳ tie tsy hitohy nainai’e o raha rehoe. Va’e ho tea iareo ty hahafantatse izay. Ndra inogn’ino raha misy eo, le mikezaha avao hagnampe ze ndaty vognogne hitsanogne mba hahatsapà iareo tie tena afake magnampe iareo ty toroheve o Baibolio. Hoe ty Katarína, i nirehafegne taloha teoy: “Ataoko an-tsaigne avao tie tena nagnasoa ty fiaignako ty Baiboly.” Ty voka’e, mafana fo ty Katarína  naho fa mitory, le tsapa ty ndaty itoria’e tie inoa’e vata’e ty raha rehafe’e.

14. Nagnino o mpitory namantikagneo ro afake magnampe antika naho fa itika mitory, arake ty Ohabolana 27:17?

¹⁴ Mangataha fagnampeagne amy ty mpitory hafa. Nampianatse i Timoty hahay hitory naho hampianatse ty Paoly, sady nandrisike i Timoty mba hampianatse ty hafa ka. (1 Kor. 4:17) Afake miana-draha amo o ndaty za-draha amo o fiangonagneo eò ka tika, manahake i Timoty. (Vakio ty Ohabolana 27:17.) Mareho ohatse ty raha natao i Shawn. Nitory ambanevolo agne reke tagnate ty fotoagne kedekede. Fa managne ty fivavaha’e ty ankamaroa ty ndaty agne, le tsy nitsanogne naho fa nitoriagne. Ino ty nagnampe aze ho falefale avao? Hoe reke: “Tsy mandeha raike raho naho fa mitory, naho mbe azo atao avao. Mifampirehake ty raha azo’ay agnasoagne ty fahaia’ay mampianatse zahay amy i namakoy naho fa handeha hitory amy ty tragno hafa. Rehafe’ay ohatse ty raha nirehafe i tompon-tragnoy naho ty fomba namalea’ay aze. Dinehe’ay naho fa avy eo tie ino ty toko’e ho rehafe’ay naho tendreke raha hoe igne indraike zahay.”

15. Nagnino ty vavake ro tena ilaegne naho fa mitory?

¹⁵ Mivavaha amy i Jehovah. Mangataha fagnampeagne amy i Jehovah isake tie hitory. Ty anto’e, tsy misy raha ho vitantikagne naho tsy ampea ty fagnahy masy i Jehovah tika. (Sal. 127:1; Lioka 11:13) Naho fa mivavake rehe, le anò voafaritse soa ty raha angatahe’o. Mangataha ama’e ohatse mba hitariha’e azo amy ty ndaty tso-po naho vognogne hitsanogne i talily soay. Manoa raha mifagnarake amy i vavake nanoe’oy naho fa avy eo, le itorio iaby ze kila ndaty trea’o.

16. Nagnino ty fanoagne fianaragne raike ro magnampe antika amy ty fanompoagne?

¹⁶ Manoa fianaragne raike. Hoe ty Baiboly: ‘Fantaro’areo ty zoton’arofon’Andrianagnahare, satria fanjaka sady ankasitrahagne ro tsy misy tsiko’e.’ (Rom. 12:2) Hitombo ty fahafantarantika an’Agnahare arakarake ty ianarantikagne ty miomba aze. Ie naho fa mitory tika, le ho trea o ndatio tie inoantika vata’e i hafatse torientika rey. Hoe ty Katarína, i nirehafegne taloha teoy: “Vaho tsiela zay, le nitsapako tie tena mila mampitombo ty finoako ty fampianaragne fototse ila’e amy Baiboly ao raho. Nianarako tamy ty pitsopitso’e areke ty porofo magnamaregne fa misy i Mpamorogney, Saontsin’Andrianagnahare vata’e ty Baiboly, naho tihoe managne fandaminagne misolo tegna aze ty Andrianagnahare amy izao.” Nirehafe i Katarína fa tena nagnamafe ty finoa’e naho nagnampe aze ho falefale naho fa manompo ty fanoa’e fianaragne raike.

17. Nagnino ty Jesosy ro nanagne toe-tsaigne soa avao naho fa nanompo?

¹⁷ Nanagne toe-tsaigne soa ty Jesosy sady nitory i talily soay avao ndra tie tsy te hitsanogne ty hafatse nitorie’e aza ty ndaty ila’e. Fa nagnino? Satria nihai’e tie mila mianatse ty hamarenagne o ndatio, sady tea’e naho mba maro ty ndaty magneke ty hafatse miomba i Fanjakagney. Nihai’e ka tie va’e hiova avao o ndaty tsy mitsanogne azeo naho fa afara agne. Dineho ohatse ty raha nisy tamo o keleia’eo. Tsy nisy nanjare mpiana’e ndra raike o rahalahi’e naho o rahavave’e niharo troke tama’eo, tagnate i telo taogne tsy tapa’e nanompoa’e tan-tane etoỳ. (Jaona 7:5) Faie nanjare Kristiana avao iareo tafara ty namelomagne aze tamy ty mate.​—Asa. 1:14.

18. Nagnino tika ro toko’e hitory avao?

¹⁸ Tsy haintika tie ia amy i ndaty itoriantikagne rey ro hanjare mpanompo i Jehovah. Misy ndaty ila’e elaela vaho izay magneke i hamarenagne ampianarentika rey. Ndra o ndaty tsy te  hitsanogne antikagneo aza, le va’e hanjare ho mpanompo i Jehovah avao naho fa mahatrea ty findesam-batagne soa naho ty toe-tsaigne soa anagnantika.​—1 Pet. 2:12.

19. Ino ty ianarantika boake amy ty 1 Korintianina 3:6, 7?

¹⁹ Mila tadidientika fa mambole naho manondrake avao ty ataontika, fa Andrianagnahare ro mampitombo. (Vakio ty 1 Korintianina 3:6, 7.) Hoe ze rahalahy raike a Etiopia agne zay: “I raho avao ty ni-Vavolombelo i Jehovah tamy ty tanàgne misy ahike, tagnate ty 20 taogne mahery. Faie amy izao, le fa misy mpitory 14 ty eto. Fa vita badisa iaby ty 13 amy iareo, agnisa izay ty valiko naho i ana’ay telo rey. Le roe amby telopolo eo ho eo ty isa ty ndaty magnatreke fivoriagne.” Tena fale o rahalahy iohoe, satria nitory avao sady nandigne i Jehovah hitaogne ze ndaty tso-po mba ho agnisa i fandamina’e.​—Jaona 6:44.

20. Nagnino tika ro mitovy amo o ndaty mpandrombake aigneo?

²⁰ Sarobily amy i Jehovah iaby ze kila ndaty. Nimei’e tombotsoa hiara-hiasa amy i Ana-dahi’e areke tika mba hamory ndaty boake amy ty firenena iaby, aloha ty hiavia ty fara ty tontolo toy. (Hag. 2:7) Azo ampitoviegne amo o asa mandrombake aigneo ty asa fitoriagne ataontikagne. Le itika azo ampitoviegne amy ty ekipa mpandrombake aigne irahegne hipay ndaty mpihaly safira nihomaha ty tane. Va’e ty ila’e amy iareo avao ty hahatrea ndaty mpihaly safira mbe velogne. Faie sambe tena ilaegne iaby ty asa nanoe i ekipay. Hoe izay ka i asa fitoriagney. Tsy haintika tie fire amy ty ndaty amy ty tontolo i Satana toy eto ro mbe ho avotse. Faie azo i Jehovah atao ty mampiasa antika tsikiraidraike mba hagnampe iareo. Hoe ty Andrés, mitoboke a Bolivia agne: ‘Kanao ty mpianatse Baiboly raike mandroso naho atao badisa, le noho ty fiaraha-miasa ty mpitory iaby nagnampe aze.’ Lonike areke tika mba hikezake hanagne toe-tsaigne soa hoe izay avao ka naho fa mitory. Naho itika manao izay, le hitahy antika ty Jehovah sady tena ho fale tika naho fa manao i asa fitoriagney.