1. Ka ikyav i nyi Yesu ver mbadondon unu, man yange ve er nena? (Nenge foto u sha igbende la.)

YESU yange za hemen u eren tom na u pasen kwagh saan saan shighe u lu shin tar la cii. Shi a soo ér mbadondon un kpa ve eren tom ve u pasen kwagh la saan saan. (Yoh. 4:35, 36) Shighe u Yesu lu vea mbahenen nav la, yange ve er tom u pasen kwagh la sha gbashima. (Luka 10:1, 5-11, 17) Kpa, mba va ker Yesu mba woo un yô, mbahenen nav kera lu a isharen i pasen kwagh ga hen anshighe kpuaa. (Yoh. 16:32) Mba va nderen Yesu shin ku kera yô, a taver ve ishima ér ve ver ishima sha tom u pasen kwagh la. Sha nahan yô, shighe u Yesu hide kôndo yem sha la, ve pase kwagh sha gbashima je yô, mbahyomov vev gba ahon ér: “Nenge! Ne iv Yerusalem a ityesen yen ne.”—Aer. 5:28.

2. Yehova ver tom wase u pasen kwagh ne doo doo nena?

² Yesu yange hemen Mbakristu mba sha ayange a tsuaa mbara ken tom ve u pasen kwagh la, nahan Yehova ver ve doo doo, ior kpishi kegh ato a ve. Ikyav i tesen yô, sha iyange i Pentekosti u inyom i 33 la, iorov 3,000 nahan er batisema. (Aer. 2:41) Shi iyenge i mbahenen mbara za hemen u seer. (Aer. 6:7) Shi Yesu yange tsenga ôron je ér ior kpishi vea kegh ato a loho u dedoo ne ken ayange a masejime ne.—Yoh. 14:12; Aer. 1:8.

3-4. Alaghga tom u pasen kwagh ne ua lu mbagenev ican sha ajiir agen sha ci u nyi, man ka nyi se lu timen sha mi ken ngeren nee?

³ Se cii ka se nôngo ser, se eren tom wase u pasen kwagh ne saan saan. Ken ityar igen yô, ka kwagh u ican ga cii. Sha ci u nyi? Sha ci u ior kpishi ka ve soo ér ma i va hen Bibilo a ve, kpa Orshiada nan lu u nana hen Bibilo a ve hen shighe la ga, nahan i gba u a nger ati ve, vea kegh shighe u a zua a or u nana hen Bibilo a ve la! Nahan kpa, sha ajiir agen di yô tom u pasen kwagh ne ka u lu mbapasenkwagh ican kpen kpen, sha ci u mba fe zuan  a ior hen ya ga. Shi ior mba ka a lagh a zua a ve la kpa, ve soo u ungwan loho u Bibilo ga.

⁴ Aluer u ngu hen ijiir i tom u pasen kwagh ne u lu ican u eren her kpishi yô, mbamhen mba i due a mi ken ngeren ne la vea fatyô u wasen we. Se time sha kwagh u mbagenev ve er sha er vea seer zuan a ior ken kwaghpasen yô. Shi se time se fa er i hii ve i gbe u se eren tom wase u pasen kwagh la saan saan aluer ior soo u ungwan loho wase shin soo ga kpaa yô.

5. Ka mbamtaver mba nyi Mbashiada kpishi ka ve tagher a mi?

⁵ Ka hemban taver Mbashiada kpishi u zuan a ior sha uya vev lamen a ve hegen cii. Mbapasenkwagh mbagenev mba sha ajiir a i maa uya i we ugyeeti shi ka i kuran ajiir shon kpoghuloo yô. Alaghga uya mba hen ajiir ne vea lu a mbakuran mba ve lumun ér or môm nana nyôr her ga, saa orya nan kaa ér nana va yô. Sha ajiir agen di yô, mbapasenkwagh ka ve zaan sha uya uya a kwagh u tagher ve shio, nahan kpa, ka i lu di sha uya kpuaa tseegh ve zua a ior ye. Shi mbapasenkwagh mbagenev di yô, mba ken agar sha ajiir a ior ve lu kpishi ga yô. Alaghga vea zende a yem ica sha u za lamen a or môm tseegh shi alaghga vea kohol orya shon her kpaa ga! Aluer se tagher a mbamtaver mban kpa, mayange se gba uwer ga. Ka nyi se er ve se hemba mbamtaver mbara shi se fatyô u lamen a ior kpishi ken tom wase u pasen kwagha?

6. Mbapasenkwagh mba er mbakôronishu nahan nena?

⁶ Yesu yange tôô tom u pasen kwagh ne kar sha tom u kôron ishu. (Mar. 1:17) Alaghga mbakôronishu mbagenev vea yar ikyôr ayange imôngo kpa vea lu a kôr kwagh ga. Nahan kpa mba gbe uwer ga, ka ve gema gbenda u ve yaren ikyôr la. Ka ve gema shighe u zan ikyôr kua ijiir i vea za yar ikyôr la man gbenda u vea kar ve, vea kôr ishu la kpaa. Se kpa, se fatyô u sôron akaa ken tom wase u pasen kwagh la. Se time ase sha akaa agen a se fatyô u karen iyol u eren yô.

7. Aluer se mba pasen kwagh sha ashighe kposo kposo yô, alaghga ka nyi ia due kere?

⁷ Kar iyol u za lamen a ior sha ashighe kposo kposo. Aluer se due kwaghpasen hen shighe u ior vea lu sha uya vev yô, se hemba zuan a ior kpishi mba se lam a ve yô. Ior ka vea yem eren akaa a ve kpa, ve va hide hen ya keng! Anmgbianev kpishi ka ve nenge ér hemba doon u vea due kwaghpasen atetan gayô aikighe sha ci u ka shighe u ior ve hembe lun her je la. Heela tseegh ga, mbayaav kpa shighe la ka ve hemba memen shi ve hemba keghen iyol u lamen. Gayô u fatyô u karen iyol u eren kwagh u ortamen ugen u i yer un ér David yô, ka a er ne. A kaa ér, ka una pasen kwagh vea ikyartom na deghôô yô, ve hide shi ve za sha uya mba ashen ve nyer kpa ve zua a or her ga la. A kaa ér: “Ka sea hide a za yô, se zua a mbayaav her kpishi sha uya mba ashen se nenge a or her sha kwa hiihii ga la.” *

8. Se fatyô u dondon kwaghwan u ken Orpasenkwagh 11:6 la ken tom wase u pasen kwagh nena?

⁸ Gba u se za hemen u nôngon sha er se zua a ior sha uya vev yô. Ivur i itinekwagh yase ne i har sha mi ne umbur se er i hii ve i doo u mayange se gba uwer ga yô. (Ôr Orpasenkwagh 11:6.) David u se vande teren kwagh na la, yange gba uwer ga. Yange va mase zuan a orya ugen zum u vande zan her kwa imôngo kpa kohol un ga yô. Or la yange lu a isharen i lamen sha akaa a ken Bibilo shi kaa ér: “M tsa heen nôngo u kuman anyom anigheni, man i lu je Orshiada u Yehova nan ngu a va hen hunda wam ga.” David kaa ér, “M nenge yô, ka wea  va mase zuan a ior mba u zough a ve hen ya ga yô, ashighe kpishi ve kegh ato a loho u se pasen la.”

9. Ka nyi Mbashiada mbagenev ve er sha er vea pase ior mba ka i taver u zuan a ve sha uya vev la kwagha?

⁹ Kar u zan hen ijiir igen. Mbapasenkwagh mbagenev gema zan hen ajiir agen sha er vea zua a ior mba ka i taver u zuan a ve hen ya la yô. Ikyav tesen yô, ka ve due kwaghpasen u sha godobi shi ve due kwaghpasen a ikyekye i tuur ityakeda shimi. Kwagh la wase ve u zuan a ior mba ve lu sha ajiir a i maa uya mba vesen ape i lumun kwaghpasen u sha uya uya ga yô. Igbenda i pasen kwagh ne ka i wase Mbashiada mban u zuan ishigh a ishigh a ior mba ve lu sha uya mba vesen mban ne la. Shi mbapasenkwagh kpishi nenge ér ior ka ve hemba keghen iyol u lamen shin ngohol ityakeda shighe u i za u lamen a ve hen ajiir a memen shin ken kasua shin sha ajiir agen a eren ikpenga yô. Anmgbian ugen u a lu ortamen u sôron atôônanongo ken tar u Bolivia yô, mba yer iti na ér Floiran, a kaa ér: “Ka se za sha ukasua man ajiir a eren ikpenga er ihwa 1:00 zan zan ahwa 3:00 atetan nahan. Shighe la, kasua ka a kera yamen kpishi ga nahan mbakasua ve wa lun a ian. Ka se lam a ior shi ve kegh ato tsembelee shi se hii Bibilo i henen a ve je kpaa.”

10. Ka nyi igen kpa u fatyô u eren sha er u zua a ioro?

¹⁰ Kar iyol sha gbenda ugen kpaa. Tôô wer u nôngo sha afatyô wou cii wer u zua a or ishigh a ishigh u lam a nan. U za hen ya u nan sha ashighe kposo kposo kpa u kohol nan ga. Ka igbenda igen i nyi nahan u fatyô u karen sha er u zua a imbaor laa? Anmgbian u kwase ugen u i yer un ér Katarína yô, kaa wener, “Ka m nger  ior mba i gbe je m kohol ve hen ya ga la washika, m ôr ve kwagh u mea zough a ve ishigh a ishigh ve ma m ôr ve la.” Ka nyi se hen ken kwagh u Katarína laa? Kar igbenda kposo kposo sha er u zua a hanma or hen ijiir i u pasen kwagh la yô.

11. Er nan mbagenev ve soon u keghen ato a loho wase ga?

¹¹ Ior mbagenev mba soon u keghen ato a loho wase ga. Ka ve nenge ér gba u vea fa kwagh u Aôndo shin Bibilo ga. Ve na Aôndo jighjigh ga, sha ci u ve nenge ican i ngee shin tar yum. Kwagh gbe ve u keghen ato a Bibilo ga, sha ci u ka ve nenge er mbahemenev mba kwaghaôndo mba ka ve kaa ér mba kuran atindi a Bibilo la ka ve gema ve eren akaabo kpishi yô. Mbagenev ka ve henen sha kwagh u ityom ve man icombor ve kua uzayol vev hanma shighe, nahan ve kera hen er Bibilo ia fatyô u wasen ve la ga. Aluer ior mba nengen ér loho u se pasen la ngu a inja ga kpa, se er nan ve a za hemen u saan se iyolo?

12. Aluer se mba dondon kwaghwan u ken Mbafilipi 2:4 la yô, kwagh la una wase se ken kwaghpasen nena?

¹² Tese wer kwagh u ior mbagenev gba u ishima. Ior mba sha hiihii yange ve venda u keghen ato a vese la va hingir u keghen ato a loho wase sha ci u ve nenge ér kwagh ve gba se ishima. (Ôr Mbafilipi 2:4.) U tesen ikyav yô, David u se vande ôron kwagh na la kaa wener, “Shighe u or nan kaa ér m soo u ungwan ga yô, ka se hide a Bibilo gayô ityakeda yase se wa shin ikpa maa se pine nan ser: ‘Er nan ve u soo u ungwan ga?’ ” Hanma or cii ka a wa nan ikyo yô, nan fa. Alaghga kwagh u se ôr ve la jighilii yô, una hungur ve, kpa gbenda u se er kwagh a ve la ua hungur ve ga cii. Aluer mbayaav lumun ér se lam a ve ga je kpa, se fatyô u tesen ser kwagh ve gba se ishima sha ieren yase man gbenda u se lu a ve sar sar la.

13. Se fatyô u geman a loho wase sha er ua hemba wasen hanma orya nena?

¹³ Ka se tese ser kwagh u ior gba se ishima sha u geman a loho wase sha er ua hemba wasen or u se lu lamen a nan la jighilii yô. Ikyav i tesen yô, se nenge a ma kwagh u tesen ér orya la ngu a mbayeve? Alaghga a doo mbamaren mbara u ungwan kwagh u Bibilo i we sha kwagh u yesen mbayev shin kwagh u vea er ve a hemba saan tsombor ve iyol yô. Shin ve gesa ihinda aa ugbôulô? Aluer ka nahan yô, se fatyô u lamen a ve sha kwagh u ifer i i dumbur ken tar nyian shi ior ka ve lu ken mcie la. Alaghga a doo orya la u ungwan er i lu u a va bee a ifer kera yô. Hanma kwa u u zua a ior mba ve soo u keghen ato a we cii, nôngo ve nenge er kwaghwan u Bibilo una fatyô u wasen ve yô. Katarína u se  vande ôron kwagh na la kaa ér, “Ka m umbur er Bibilo yange i wasem yô.” Sha nahan yô, Katarína ka a lam a ior sha gbenda u tesen ér a na jighjigh a kwagh u a lu ôron ve la, shi ve kpa ve nenge er a ne jighjigh a kwagh shon yô.

14. Anzaakaa 27:17 tese ér mba ve dugh kwaghpasen imôngo vea fatyô u wasen ayol a ve nena?

¹⁴ Ker iwasen hen mbagenev. Sha ayange a mbaapostoli la, Paulu tese Timoteu igbenda i pasen kwagh shi tesen ior shi taver Timoteu ishima ér a er tom a igbenda shon u wasen ior. (1 Kor. 4:17) Se kpa se fatyô u henen kwagh hen anmgbianev mba ken tiônnongo mba ve er tom ne ica i gbe yô, er Timoteu nahan. (Ôr Anzaakaa 27:17.) Nenge ase ikyav i anmgbian ugen u i yer un ér Shawn yô. Yange er pania hen an-jiir ugen ken agar shighe wa karen kpa ior kpishi hen an-jiir ne ve nenge ér mba a adua ve nahan kwagh gba ve a kwaghaôndo ugen ga. Yange er nan ve za hemen u saan un iyolo? A kaa wener: “Yange a gba sha mi yô, m due kwaghpasen vea orgen. Nahan shighe u se due hen ya ugen u yemen hen ugen yô, se lamen sha akaa a aa wase se, se seer fan u tesen ior yô. Ikyav i tesen yô, shighe ugen se lamen sha kwagh u se ze hen ma ya ve orya nan ôr man er se lam sha kwagh shon la. Maa se lam sha kwagh u se tagher a imbakwagh la kwagen ve se er yô.”

15. Er nan ve msen a lu hange hange ken tom wase u pasen kwagha?

¹⁵ Sôn Yehova a wase u. Hanma shighe u u dugh kwaghpasen yô, de Yehova a hemen we. A iwasen i icighan jijingi na u a hembe tahav la shio yô, se fatyô u eren kwagh môm ga. (Ps. 127:1; Luka 11:13) Zum u u lu sônon Yehova iwasen yô, ôr un kwagh u u soo la jighilii. U tesen ikyav yô, sôn un wer a hemen we a za a we hen or u a sar nan u henen kwagh na shi nana kegh iyol u ungwan yô. Maa er kwagh u zuan sha msen wou la, sha u pasen hanma or u u zough a nan cii kwagh.

16. Er nan i gbe hange hange u se henen kwagh sha tseeneke wase sha er se hemba eren tom wase u pasen kwagh la tsembelee?

¹⁶ Tôôn shighe henen kwagh sha tseeneke wou. Mkaanem ma Aôndo kaa ér: “Ne gema ne hingir u fan kwagh u a doo Aôndo man u a lumun a mi shi a lu u vough sha ishigh nagh” yô. (Rom. 12:2) Ka sea faan kwagh u Aôndo a seer yô, se hemban pasen ior kwagh na vangertiôr, shi ve nenge er se ne jighjigh a kwagh u se lu ôron ve la yô. Katarína u se vande ôron kwagh na la kaa ér: “Yange m va mase kaven mer gba u me seer taver jighjigh u m ne atesen a Bibilo a vesen agen la. Nahan m tôô shighe m time sha akav a a tese ér or ngu u nan gbe akaa la vindi vindi, kua er mimi je Bibilo i lu Mkaanem ma Aôndo shi A lu a nongo u a eren kwagh a u nyian yô.” Katarína kaa ér, kwaghhenen u sha tseeneke la yange seer taver jighjigh na shi un seer zuan a iember ken tom na u pasen kwagh la kpaa.

17. Er nan ve Yesu za hemen u pasen kwagh saan saana?

¹⁷ Yesu yange za hemen u lun saan saan shi pasen kwagh shin er mbagenev soo u ungwan loho u lu pasen la ga nahan kpaa. Sha ci u nyi? Sha ci u fa er gba u ior vea fa mimi yô, shi soo wener una wase ior kpishi ve ungwa loho u Tartor la. Shi fa er ior mbagenev mba ve soo u keghen ato sha hiihii ga la ken masejime yô, vea va ungwa yô. Nenge kwagh u za hemen hen tsombor na ne. Yesu yange pase kwagh kuma anyom atar man tiôn, kpa hen shighe la cii anmgbian na môm nan hingir orhenen na ga. (Yoh. 7:5) Nahan kpa, ka va nderen un kera yô, ve hingir Mbakristu.—Aer. 1:14.

18. Er nan se gbe uwer u pasen kwagh ga?

¹⁸ Se mba fe or u iyange igen nana va hingir or u civir Yehova ga. Mbagenev shighe ka a kar cii ve, ve va hen mimi ye, mbagenev di yô ka  ngôôr ga. Mba ve soon u keghen ato a vese ga je kpa, mba nengen a ieren yase man inja yase i dedoo la, nahan alaghga ken masejime vea va hingir u “wuese Aôndo.”—1 Pet. 2:12.

19. Er i pase ken 1 Mbakorinte 3:6, 7 nahan, ka nyi i gbe u se fa?

¹⁹ Er ka se lôô shi se ur nahan kpa, doo u se fa tom u Aôndo a eren yô. (Ôr 1 Mbakorinte 3:6, 7.) Anmgbian ugen u a pasen kwagh ken tar u Etiopia i yer un ér Getahun yô, kaa ér: “Yange m lu hen ijiir igen i i fe pasen kwagh her ga yô, man m lu Orshiada her tswen je hemba anyom 20. Hegen ne mbapasenkwagh mba hen ijiir la 14. Mbapasenkwagh mban 13 er batisema, kwase wam kua mbayev av utar kpa mba ken iyenge ne. Aluer i kar kwar yô, hanma mkombo ior ka ve va i kuma iorov 32.” Ka i doo Getahun kpishi er yange un wa ishima un pase kwagh zan zan Yehova kar urugh mbaasemaamimi mban van a mi ken nongo na yô!—Yoh. 6:44.

20. Se mba er mbaeren tom u waren ior nahan sha nyi gbenda?

²⁰ Yehova yô, uma u hanma or cii gba un kwagh. A na se ian i icivirigh i eren tom imôngo vea Wan na, u kohol ior ken akuraior cii man mkur una va ye. (Hag. 2:7) Tom wase u pasen kwagh ne ngu er tom u yiman ior mba kwagh a tser ve nahan. Se di se mba er ior mba i tindi ve ér ve za yima ior mba tso a ur a ve nahan. Shin er alaghga a lu iorov kpuaa tseegh a zua a ve uma nahan kpa, tom u mbawaren ior mbara cii ve er la ngu a inja. Tom wase u pasen kwagh ne kpa kape u lu vough je la. Se fa iyenge i ior mba a mase waren ve ken tar u Satan ne ga. Kpa Yehova una fatyô u eren tom a hanma wase cii u wasen ve. Anmgbian ugen u a lu ken tar u Bolivia i yer iti na ér Andreas yô, kaa wener, “M nenge mer hanma or u nan hen mimi shi nan er batisema cii, ka ior kpishi ve er tom imôngo sha u wasen nan ve kwagh a lu nahan ye.” Yô se kpa se za hemen u eren tom u pasen kwagh ne saan saan. Aluer se er nahan yô, Yehova una ver se doo doo shi a hemba saan se iyol ken tom wase u pasen kwagh ne.