1. Giyeyedzo muni egi Jesu a tshiyedego vapizane vaye nigu avo ginani va giredego? (Wona foto avba nya kapa.)

TEPO Jesu a nga ba ari mafuni, uye simamide gu tshumayela vathu a bwe a manega ni gutumba nya gu khuye avo va na mu engiseya, khu kharato, a di gu vbweta gu vapizane vaye va manega ni mawonelo ya mamowo. (Joh. 4:35, 36) Tepo vapizane va nga ba vari ni Jesu, avo va tshumayede khu sighingi. (Luka 10:1, 5-11, 17) Ganiolu, tepo Jesu a nga modwa a bwe a songwa, vapizane vaye va vbeledwe khu sighingi nyo tshumayele khu tepo nyo khaguri. (Joh. 16:32) Hwane nya gu ba wusidwe, Jesu kutside vapizane vaye gu vega gupima avba nya thumo nyo tshumayele. Khu kharato, tepo Jesu a nga bweleya ndzadzini avo va di pheya gu tshumayela khu sighingi nyo bwe valala vawe va didza, khavo: “Enu mu tadzile Jerusalema khu sihevbudzo sanu.” — Mith. 5:28.

2. Jehovha kategiside kharini thumo nyo tshumayele?

² Jesu thangede Makristo nyo pheye avba nya thumo nyo tshumayele nigu Jehovha va phaside. Khu kharato, vathu nya vangi va dzumede mahungu yawe. Khu giyeyedzo, khu pentekoste nya mwaga nya 33 matshiguni yathu, tanga nya 3.000 vathu va bhabhatisidwe. (Mith. 2:41) Khu ndziya yoyo tengo nya vapizane wu di engedzeya khu ndziya nyo samadzise. (Mith. 6:7) Ganiolu, Jesu a di profetide gu khuye vathu nya vangi va di hadzi dzumeya mahungu nya yadi matshiguni nyo hegise. — Joh. 14:12; Mith. 1:8.

3-4. Khu ginani vambe si va garadzeyago gu tshumayela nigu ginani hi na bhulago khigyo avba nya ndrima yeyi?

³ Hatshavbo hi ngu dzi garadzeya gu simama gu manega ni mawonelo nya yadi khu thumo nyo tshumayele. Ga mambe malanga  si ngu vbevbuga gu gira isoso. Khu ginani? Kholu vathu nya vangi va ngu tsakeya gu hevbula Bhibhiliya. Ganiolu, ga mambe malanga vahuweleyi si ngu va garadzeya gu tshumayela, si ngu kala gu mana vathu mudzidrangani nigu wa gu va mana kha va tsakeyi gu hevbula Bhibhiliya.

⁴ Wa gu ba wu vbanya ga wulanga si si vbevbugigo gu tshumayela, mawonelo ma gomogo umo nya ndrima yeyi ma na gu phasa. Hi na wona esi vambe vandriyathu va girago gasi gu mana vathu nya vangi thumoni nyo tshumayele. Gani vathu va ngu engisa esi hi va hevbudzago gani kha va engisi.

5. Sigaradzo muni esi Dzifakazi nya dzingi dza Jehovha dzi tshanganago naso?

⁵ Si ngu garadzeya Dzifakazi nya dzingi gu mana vathu mudzidrangani gasi gu bhula navo. Vahuweleyi nya vangi va gu vbanya ga malanga umo dzinyumba dzi khalago na dzi segidwe nigu dzipredhiyu dzakone dzo khala na dzi ri ni dzighadhi. Adzina ghadhi yi nga himbedzeya ni wevbini a vbwetago gu beya na sa ranwa khu moyo nya ava va vbanyago ndrangani momo. Vambe vahuweleyi va ngu tshumayela khu ndranga ni ndranga na va tshulegide, ganiolu kha va mani muthu mudzidrangani. Vambe vahuweleyi va ngu tshumayela ga malanga gu vbanyago vathu nya vadugwana. Avo va ngu gimbiya mipfhuka nyo laphe gasi gu mana muthu moyo nigu dzimbe dzitepo kha va mu mani! Wa gu ba u tshangana ni gimwegyo nya sigaradzo sesi, u nga vbeyi tshivba. Ginani u nga girago gasi gu pala sigaradzo soso u bwe u dugeleya thumoni nyo tshumayele?

6. Vahuweleyi ni vagogi nya dzindzandzi vo fana khu ndziya muni?

⁶ Jesu fananiside thumo nyo tshumayele ni thumo wu girwago khu mugogi nya dzindzandzi. (Marko 1:17) Vambe vagogi va ngu vbedza matshigu nya mangi na va si moli ne ndzandzi mweyo. Ganiolu, avo khava tsukuli, wulangani nya isoso, va gu vbindrugedza mathumelo. Avo va gu vbindrugedza tepo, wulanga, ni magirelo yakone. Anethu hi nga gira sasimweso thumoni wathu nyo tshumayele. Olu hi na bhula khu silo nyo khaguri si nga hi phasago.

7. Mihandro muni hi nga yi manago khu gu tshumayela khu dzitepo nyo hambane?

⁷ Zama gu vbwetedzeya vathu khu dzitepo nyo hambane. Ethu hi na si kodza gu mana vathu nya vangi ha gu tshumayela khu dzitepo si vbevbugago gu va mana mudzidrangani. Lisine gu khu mahegiso va na wuya ndrangani. Vandriyathu nya vangi va ngu tshumayela ni siyambo mwendro ni wutshigu kholu va ngu si kodza gu mana vathu nya vangi. Gu diga isoso, ga tepo yeyi vathu va rude mapimo nigu va ni tepo nyo bhule. Mwendro adzina u nga zama gu gira esi si giridwego khu lidhota limwedo nyo pwani khu David. Uye wari khuye: Hwane nyo tshumayele umo nya teritoriyu nyo khaguri, uye ni pari yaye va gu bweleya umo nya dzindranga va nga mba mana vathu. Uye wari khuye: “Nyi ngu samadziswa khu tengo nya vathu nyi wu manago mudzidrangani tepo nyi bweleyago nya wuvili.” *

8. Malito ma gomogo umo ga Muhevbudzi 11:6, hi nga ma thumisa kharini thumoni nyo tshumayele?

⁸ Kha hi yeli gu tsukuwa. Isoso khiso lowo wu seketeyago ndrima yeyi wu hi kutsago gu gira. (Leri Muhevbudzi 11:6.) David a nga khumbugwa hwane yeyi, kha tsukuwa. Hwane nyo ba a hamugide vathu nya vangi mudzidrangani, hegiside khu gu mana muthu moyo. Mwama a mu manidego a di gu tsakeya gu hevbula Bhibhiliya, a di khuye: “Nyi na ni 8 myaga na nyi gu vbanya avba. Nyi di si endredwi khu Fakazi ya Jehovha.” David wari khuye: “Tepo khu mahegiso hi  manago muthu ndrangani, gutala nya dzitepo uye a ngu tsakeya esi hi mu hevbudzago.”

9. Ginani egi vahuweleyi nyo khaguri va girago sa gu va garadzeya gu mana vathu mudzidrangani?

⁹ Vbindrugedza wulanga. Tepo vahuweleyi nyo khaguri si va garadzeyago gu mana vathu mudzidrangani avo va gu zama gu tshumayela ga mambe malanga. Khu giyeyedzo, avo va ngu dugeleya khu gu tshumayela mudziruwani ni gu thumisa sikarinyana nya mabhuku. Khu kharato, avo va ngu si kodza gu bhula ni vathu va vbanyago umo nya dzinyumba nya dzikhongolo, omu va nga hadzi gu mba dzumedziswa gu beya gasi gu tshumayela. Vahuweleyi nya vangi va wonide gu khavo umo nya dziparki, dzimerkadhu ni mambe malanga gu giredwago umo dzinogosi, vathu va tshulegide gu bhula ni gu hakha mabhuku yathu. Floiran, muwoneleyi moyo nya gipandre Bolívia, wari khuye: “Umo nya 13 ni dzi 15 ora ha gu hongola dzimerkadhu ni malanga gu girwago umo dzinogosi hi ya tshumayela. Khu dziora dzedzi varengisi kha va pharega ngudzu. Hi ngu si kodza gu manega ni mabhulo nyo tsakise navo hi bwe hi pheya sihevbulo nya Bhibhiliya.”

10. Dzindziya muni u nga dzi thumisago gasi gu mana vathu?

¹⁰ Zama gu thumisa dzimbe dzindziya. Khu giyeyedzo, adzina u hongode ga muthu nyo khaguri khu dzitepo nya dzingi ganiolu kha wa mu mana. Ina yomo yimbe ndziya nya gu zame gu mana muthu yoyo? Ndriyathu moyo nyo pwani khu Katarina, wari khuye: “Eni nyo oloveya gu loveya malangaliya ava nyi nga mba si kodza gu va mana magaya gwawo, nyi lova esi nyi nga hadzi gu va embeya nari khatshi nyi di va manide.” Ginani hi gi hevbulago ga giyeyedzo gegi? Thumoni nyo tshumayele, zama gu bhula ni vatshavbo  avbo nya teritoriyu yago. Wa gu zama khu ndziya nyo khaguri si tandrega, thumisa yimbe ndziya gasi gu va mana.

11. Khu ginani vathu nyo khaguri va gu mba tsakeya mahungu yathu?

¹¹ Khandri vatshavbo va tsakeyago mahungu yathu. Avo kha va pwisisi gu khavo khu ginani va yedego gu hevbula khu Nungungulu ni Bhibhiliya. Khu kotani nya olu va wonago gutshaniseka avo kha va khodwi ga Nungungulu. Avo kha va khathali khu Bhibhiliya kholu va wonago vathangeyi nya wukhongeyi va gu khavo va ngu landrisa esi Bhibhiliya yi si ganeyago na va gu gira silo nyo vivbe. Vambe vo khala va pimisa ngudzu khu mithumo yawe, dzindranga dzawe ni sigaradzo sawe ni gu kha va tumbi gu khavo Bhibhiliya yi nga va phasa. Ginani hi nga girago gasi hi simama na hi tsakide ambari vathu va gu mba yeyedza gu khathala khesi hi hevbudzago?

12. Wusingalagadzi wu gomogo ga Vafilipi 2:4, wu nga hi phasa kharini thumoni wathu nyo tshumayele?

¹² Yeyedza gu khathala khu vambe. Nya vangi va nga ba va si ma tsakeyi mahungu nya yadi, va vbindrugedzide mawonelo yawe tepo va nga tugula gu khavo hi ngu khathala khavo. (Leri Vafilipi 2:4.) Khu giyeyedzo David hi ganedego khuye gupheyani, wari khuye: “Tepo muthu a ganeyago gu khuye, kha nyi vbweti gu sipwa esi mu tago naso, ha gu vega Bhibhiliya yathu ni mabhuku yathu, hi hegisa, khethu: ‘Nyi di gu tsakeya guti gu kheni khu ginani u pimisago kharato.’” Vathu va ngu si tugula tepo muthu a yeyedzago gukhathala khavo. Avo adzina kha va na nga dundruga esi hi ganedego, ganiolu va na dundruga edzi hi va pharidego khidzo. Ambari muthu a gu mba hi dzumeleya gu bhula naye khu mahungu nya yadi, ethu hi nga yeyedza gukhathala khuye khu mithumo yathu ni khovbe yathu.

13. Hi nga pwananisa kharini mahungu yathu ni giemo nya mune ndranga?

¹³ Hi nga yeyedza gu khethu hi ngu khathala khu vathu khu gu pwananisa mahungu yathu ni giemo gya mune ndranga. Khu giyeyedzo, ina gyomo u gi wonago gi yeyedzago gu mune ndranga a ni sanana? Oyu a gu mu velegi adzina a nga tsakiswa khu wusingalagadzi wa omu nya Bhibhiliya wu ganeyago khedzi a nga sayisago khidzo sanana ni edzi a nga manago khidzo litsako ndrangani. Ina avba nya lidimba gu ni dzikadiyado nya dzingi? Ga giemo nya nga egi, u nga ganeya khu gu tala nya wughevenga ni edzi wughevenga wu theyago khidzo hwanga vathu. Mune ndranga a na tsaka khu gupwa gu khuye gigaradzo gegi kha gi na manega gambe. Wa gu mana muthu a tsakeyago, mu yeyedze edzi wusingalagadzi nya Bhibhiliya wu nga mu phasago khidzo. Katarina a khumbugidwego gupheyani, wari khuye: “Nyo zama gu  dundruga edzi Bhibhiliya yi tshukwadzisidego khidzo womi wangu.” Khu kharato, Katarina a gu ba a ganeya ni vathu a gu ganeya na tiyide nigu vathu va ngu si wona isoso.

14. Guya khu Mavingu 27:17, avo va dugago vatshavbo thumoni nyo tshumayele va nga phasana kharini?

¹⁴ Dzumeya giphaso gya vambe. Mupostoli Pawulo, hevbudzide Thimoti edzi a nga tshumayelago khidzo ni gu hevbudza a bwe a mu kutsa gu gira sasimweso ga vambe. (1 Vakorinto 4:17) Gufana ni Thimoti anethu hi na hevbula nya singi ga vandriyathu va vidzidwego libandlani lathu. (Leri Mavingu 27:17.) Wona giyeyedzo gya ndriyathu moyo nya gupwani khu Shawn. Uye thumide khu tepo nyo khaguri kha nga piyonero ga wulanga wu gu mwalo vathu nya vangi nigu vathu va iyoyo va di gu tsakiswa ngudzu khu dzitshetshe dzawe. Si kodzide kharini gu simama na tsakide thumoni nyo tshumayele? Uye wari khuye: “Sa gu kodzega, tepo yatshavbo nyi di gu hongola thumoni nyo tshumayele ni mumbe muthu. Tepo hi nga ba hi hongola ga yimbe ndranga hi di gu londrola tepo yoyo gasi gu phasana gu tshukwadzisa silo nyo khaguri avbo nya thumo wathu nyo tshumayele. Khu giyeyedzo, hi di gu bhula khesi mune ndranga a ganedego ni edzi hi mu hlamudego khidzo. Khu gu landreya hi bhula khesi hi nga girago a gu tshuka mumbe muthu a hi hakha khu ndziya nyo fane.”

15. Khu ginani nombelo wu gu na ni lisima avba nya thumo wathu nyo tshumayele?

¹⁵ Gombeya u lomba giphaso ga Jehovha. Tepo yatshavbo u pategago avba nya thumo nyo tshumayele lomba giphaso ga Jehovha. Mwalo a nga si kodzago gu gira thumo wowu nya mba phaswa khu liphuvbo nya guage la Nungungulu. (Ndzi. 127:1; Luka 11:13) Gira nombelo nyo kongome. Khu giyeyedzo, lomba Jehovha gasi a gu phasa gu mana muthu a vbwetago gu engiseya mahungu yathu ni gu hevbula khu Nungungulu. Khavbovbo gira gipandre gyago u bwe u dzi garadzeya gu tshumayela vatshavbo u va manago.

16. Gihevbulo nya muthu enga gyo hi phasa kharini thumoni nyo tshumayele?

¹⁶ Dzi ningi tepo nyo hevbule Bhibhiliya. Lito la Nungungulu lari khiyo: “Pima gugola gwa Nungungulu; ni gu pima esi nya sadi, nya gutsakise, si vbeledego mahoni gwa Nungungulu.” (Rom. 12:2) Gu hevbula Bhibhiliya si ngu hi phasa gu muti gwadi Jehovha, khu kharato, tepo hi tshumayelago maningano khu Nungungulu vathu va ngu si kodza gu wona gu khavo ethu hi ngu khodwa ga esi hi hevbudzago. Katarina hi ganedego khuye gupheyani, wari khuye: “Tepwana hwane nyi wonide gu kheni nyi yede gu engedzeya gukhodwa gwangu avba nya sihevbudzo nya litshina nya Bhibhiliya. Khu kharato, nyi hevbude gwadi mahungu ma ganeyago gu khayo gu ni Muvangi, mahungu ma yeyedzago gu khayo Bhibhiliya khu lisine Lito la Nungungulu ni mahungu ma yeyedzago gu khayo Nungungulu na ni hengeledzano muhuno.” Katarina a gu ganeya gu khuye gihevbulo nya muthu enga gi tiyiside gukhodwa gwaye gi bwe gi engedzeya litsako laye thumoni nyo tshumayele.

17. Khu ginani Jesu a nga simama gu manega ni mawonelo nya yadi khu thumo wawe nyo tshumayele?

¹⁷ Jesu manegide ni mawonelo nya yadi a bwe a simama gu tshumayela ambari tepo vathu va nga ba va si engisi mahungu yaye. Khu ginani? Uye a di gu dziti gu khuye vathu nya vangi va ngu dzina guti lisine, nigu uye a di gu vbweta gu va phasa gu dzumeya mahungu nya Mufumo. Uye gambe a di gu dziti gu khuye vambe kha va na nga dzegeya gu dzumeya mahungu nya Mufumo. Ganiolu khu gu gimbiya nya tepo va di hadzi gu vbindrugedza. Nga wona esi si dugeledego khu vandrangani ga Jesu. Uye vbedzide myaga miraru ni metado na gu tshumayela, ganiolu mwalo ni moyo nya vandriyaye a nga vbindrugedza a khala mupizane waye. (Joh. 7:5) Ganiolu,  hwane nyo ba Jesu a wusidwe khu gufani, avo va khade Makristo. — Mith. 1:14.

18. Khu ginani hi simamago gu tshumayela?

¹⁸ Ethu hi mwalo ndziya nya guti oyu a na dzumeyago gu thumeya Jehovha. Vambe va ngu dzega tepo gasi va hevbula lisine. Ambari vale gupheyani va si li tsakeyigo lisine avo va nga “rungudza Nungungulu” khu kotani nya mavbanyelo yathu. — 1 Ped. 2:12.

19. Ginani egi 1 Vakorinto 3:6, 7, a hi hevbudzago maningano ni thumo nyo tshumayele?

¹⁹ Ethu ho yala ni gu thedzeya mati, ganiolu hi yede guti gu khethu Jehovha khuye a gu na ni gipandre nya gikhongolo avba nya thumo nyo tshumayele. (Leri 1 Vakorinto 3:6, 7.) Ndriyathu moyo nyo pwani khu Getahun, a thumeyago Etiòpia, wari khuye: “Guvbindra 20 myaga, gu diri eni basi Fakazi ya Jehovha umo nya teritoriyu gu si thumwigu ngudzu. Olu hi 14 vahuweleyi nigu 13 nya avo va bhabhatisidwe gupata ni mwangadzi wangu ni sanana sangu sa siraru. Hi na ni tanga nya 32 vathu va tago mitshanganoni.” Getahun o dzipwa na tsakide kholu a nga simama a tshumayela, a vireya gu khuye Jehovha a phasa vambe gasi va ta gira gipandre nya hengeledzano yaye! — Joh. 6:44.

20. Ethu ha gu fana ni tsawa nya va vbulugisi khu ndziya muni?

²⁰ Vathu vatshavbo va na ni lisima mahoni ga Jehovha. Ni gu uye a ngu hi ninga lithomo nyo thume gomogo ni gyanana gyaye, gasi hi hengeledza vathu nya mafumbo yatshavbo na ma si vbohi mahegiso nya litigo leli. (Agewu 2:7) Thumo nyo tshumayele wo fana ni thumo nya va vbulugisi. Ethu ha gu fana ni tsawa nya vathu wu rumidwego gu ya vbulugisa vathu va gu romo umo nya ngalava yi dzamago. Adzina vadugwana basi va na si kodzago gu vbulugisa muthu nyo khaguri, ganiolu vatshavbo va giride thumo nya lisima. Isoso si ngu fana ni thumo nyo tshumayele. Kha hi dziti gu khethu khu mani a na si kodzago gu vbulugisa muthu nyo khaguri ga litigo leli la Sathane. Ganiolu, hi ngu dziti gu khethu Jehovha a nga thumisa ni wevbini gwathu. Andreas a vbanyago Bolívia wari khuye: “Ni wevbini a hevbulago lisine a hegisa khu gu bhabhatiswa mihandro nya thumo nya tsawa.” Anethu hi yede gu wona thumo nya gu tshumayele khu ndziya yayimweyo. Ha gu gira isoso, Jehovha a na hi kategisa nigu thumo wathu nyo tshumayele wu na hi reseya litsako.