ARTÍCULO NEMA NATALIKGALHTAWAKGA 20
Chuntiya xatapaxuwan kalichuwinaw Dios
«Kachanti mintalhtsi, chu ni kamajaxa mimakan» (ECL. 11:6).
TAKILHTLIN 70 Kaputsaw tiku kgalhikgo tlan naku
TUKU NATALICHUWINAN *
Akxni Jesús xʼanita kʼakgapun, kstalaninanin xatapaxuwan tsukukgolh lichuwinankgo Dios anta kJerusalén chu klakalhuwa kachikinin (Kaʼakxilhti párrafo 1).
1. ¿Tuku liʼakxilhtit kawilinilh Jesús kstalaninanin, chu xlakan tuku tlawakgolh? (Kaʼakxilhti xmakni revista).
AKXNI Jesús xlama kKatiyatni, ankgalhin xatapaxuwan lichuwinalh Dios, chu lakaskin pi kstalaninanin nachuna kalichuwinankgolh Dios (Juan 4:35, 36). Akxni xkatalamajku kstalaninanin, xlakan xatapaxuwan xlichuwinankgo Dios (Luc. 10:1, 5-11, 17). Pero nialh xlichuwinamputunkgo Dios akxni chipaka chu makgnika xmakgalhtawakgenakan (Juan 16:32). Akxni Jesús xlakastakwananita kamakgpuwantinilh chuntiya nalichuwinankgo Dios. Chu, akxni xʼanita kʼakgapun, xlakan xatapaxuwan lichuwinankgolh Dios pi asta xtalamakgasitsin kawanikgolh: «Malakgatuminitantit kJerusalén mintamasiykan» (Hech. 5:28).
2. ¿La sikulunatlawanit Jehová chuna la lichuwinankan Dios?
2 Kxapulana siglo Jesús pulalilh la kstalaninanin xlichuwinankgo Dios, chu xlakata Jehová kasikulunatlawalh, lhuwa latamanin makgamakglhtinankgolh xaxlikana. Akgtum liʼakxilhtit, kPentecostés xla kata 33, tamunukgolh 3,000 latamanin (Hech. 2:41). Chu tlakg talhuwilh tiku kstalaninanin Cristo litaxtukgolh (Hech. 6:7). Jesús lichuwinalh pi kxaʼawatiya kilhtamaku lhuwa latamanin xʼamakgo makgamakglhtinankgo xalakwan tamakatsinin (Juan 14:12; Hech. 1:8).
3, 4. 1) ¿Tuku xlakata kmakgapitsi kachikinin tuwa kitaxtu lichuwinankan Dios? 2) ¿Tuku nalichuwinanaw kʼuma artículo?
3 Kimputumkan liskujaw xlakata chuntiya xatapaxuwan nalichuwinanaw Dios. Kmakgapitsi kachikinin ni tuwa la lichuwinankan Dios. ¿Tuku xlakata? Xlakata anan lhuwa latamanin tiku katsiputunkgo tuku wan Biblia pi asta natalan tlawakgonit akgtum lista xlakata nakatsikgo tiku tsankgama nakamakgalhtawakgekan. Pero kmakgapitsi kachikinin natalan tuwa la kakitaxtunima, xlakata ni lhuwa latamanin katekgskgo kxchikkan, chu max tiku katekgskgo, ni katsiputunkgo tuku wan Biblia.
4 Komo lamaw niku tuwa lichuwinankan Dios, tuku lichuwinan uma artículo tlan nakinkamakgtayayan. Nalichuwinanaw tuku tlawakgonit makgapitsi natalan xlakata tlakg lhuwa tiku nakalitachuwinankgo Dios, chu tuku xlakata chuntiya xatapaxuwan nalichuwinanaw Dios maski latamanin ni kinkakgaxmatniputunkgoyan.
CHUNTIYA XATAPAXUWAN KALICHUWINAW DIOS MASKI NI KATEKGSAW LATAMANIN
5. ¿Tuku tuwa titaxtumakgo lhuwa xtatayananin Jehová?
5 Lhuwa xtatayananin Jehová tuwa kakitaxtuni akxni lichuwinankgo Dios xlakata ni katekgskgo latamanin kxchikkan. Makgapitsi latamanin wilakgolh klaklanka edificios niku lu kakuenta tlawakan. Max wi tiku kuenta tlawama malakcha chu ni masta talakaskin wi tiku natanu komo chatum tiku wi kʼedificio ni wanit pi wi tiku namin. Kmakgapitsi kachikin, natalan lichuwinankgo Dios kʼakgatunu chiki, pero ni lhuwa latamanin tekgskgo. Na wilakgolh natalan tiku lichuwinankgo Dios klaktsu kachikinin o niku lakgamakgat, niku ni lhuwa latamanin wilakgolh. Max lakgamakgat niku naʼankgo xlakata tlan wi tiku natachuwinankgo chu akxni chankgo, akxilhkgo pi niti wilakgolh kxchikkan. Komo chuna tatekgsaw chuna la lichuwinaw, ¿tuku tlan natlawayaw xlakata ni nataxlajwaniyaw chu tlakg lhuwa latamanin nakatachuwinanaw?
6. ¿Tuku tatalakxtumi akxni lichuwinanaw Dios chu la skitinankan?
6 Jesús tamalakxtumilh akxni lichuwinanaw Dios chuna la chipakan skiti (Mar. 1:17). Chatum skitina tlan nalimaxtu lhuwa kilhtamaku xlakata naskitinan, pero max nipara tantum skiti katichapalh, pero ni taxlajwani, wata lakputsa tuku natlawa. Lakgpali hora, niku naputsa o tuku namaklakaskin. Akinin na tlan chuna natlawayaw akxni nalichuwinanaw Dios. Kaʼakxilhwi makgapitsi tuku tlan natlawayaw.
Anta niku tuwa katekgsaw latamanin kxchikkan, kalitsakgsaw nalichuwinanaw Dios tanu tanu hora, ni lakatum niku kalichuwinaw o pulaklhuwa tuku kamaklakaskiw. (Kaʼakxilhti párrafos 7 asta 10). *
7. ¿Tuku nakitaxtu komo nalakgpaliyaw hora akxni nalichuwinaw Dios?
7 Kalakgpaliw hora. Tlakg nakatachuwinanaw latamanin komo nalichuwinanaw Dios hora akxni tlan nakatekgsaw kxchikkan. Latamanin chali chali taspitparakgo kxchikkan. Lhuwa natalan lichuwinankgo Dios kakgotanun o katsisni, xlakata chuna tlakg lhuwa latamanin katekgskgo. Nachuna, uma kilhtamaku max latamanin tlakg tlan wilakgo chu max tlakg kgalhchuwinamputunkgo. O max na tlan natlawayaw chuna la tuku tlawalh chatum kgolotsin tiku wanikan David. Akxni puntsuwa la lichuwinamakgo Dios, xla chu tiku akxtum taʼan alistalh amparakgo lakgatlakgkgo malakcha niku niti xwilaka. Xla wan: «Kaks klilakawan la xlilhuwa latamanin kkatekgsaw kxchikkan akxni ktaspitparayaw». *
Anta niku tuwa katekgsaw latamanin kxchikkan, kalitsakgsaw nalichuwinanaw Dios tanu tanu hora (Kaʼakxilhti párrafos 7 chu 8).
8. ¿La tlan namakgantaxtiyaw tuku wan Eclesiastés 11:6 akxni lichuwinanaw Dios?
8 Texto nema litsuku uma artículo kinkamalakapastakayan pi ni nataxlajwaniyaw (kalikgalhtawakga Eclesiastés 11:6). David, tiku lichuwinawa, ni taxlajwanilh. Akxni lu xliskujnita, tekgsli chatum lataman kxchik. Chatum chixku tiku xkatsiputun tuku wan Biblia chu wanilh: «Akgtsayan kata lata kwi unu, chu xlimakgtumku kakxilhma chatum xtatayana Jehová kkimalakcha». David wan: «Kkatsininit pi akxni katekgsa latamanin kxchikkan, lhuwa tiku kgaxmatputunkgo tuku lichuwinanaw».
Anta niku tuwa katekgsaw latamanin kxchikkan, kalitsakgsaw ni lakatum niku nalichuwinaw Dios (Kaʼakxilhti párrafo 9).
9. ¿Tuku tlawakgo makgapitsi natalan xlakata nakatachuwinankgo latamanin tiku nila katekgskgo kxchikkan?
9 Kalakgpaliw niku nalichuwinanaw. Makgapitsi natalan tanu tanu niku lichuwinankgonit Dios xlakata tlan nakatachuwinankgo latamanin tiku ni katekgskgo kxchikkan. Akgtum liʼakxilhtit, kkachikin niku wilakgolh laklanka edificios chu nila lichuwinankan Dios k’akgatunu chiki, tlan kitaxtunit lichuwinankan Dios kkatijin chu maklakaskinkan carritos. Xlakata uma, natalan tlan katachuwinankgo latamanin tiku nila xkatekgskgo kxchikkan. Lhuwa natalan na akxilhkgonit pi lhuwa latamanin tlakg lakgatikgo kgalhchuwinankgo chu makgamakglhtinankgo likgalhtawakga anta kparques, kmercados chu anta niku stanankan. Floiran, chatum superintendente de circuito xalak Bolivia, wan: «Kkanaw lata kamakgtum asta kamakgtutu hora kakgotanun kmercados chu niku stanankan, akxni stananin ni lu makgapalamakgolh. Lu tlan kinkakitaxtuniyan chu asta kmastayaw takgalhtawakga xalak Biblia».
Anta niku tuwa katekgsaw latamanin kxchikkan, kalitsakgsaw pulaklhuwa tuku namaklakaskiw akxni nalichuwinanaw Dios (Kaʼakxilhti párrafo 10).
10. ¿Tuku tlan natlawayaw xlakata tlan nakatachuwinanaw putum latamanin?
10 Kalakgpaliw tuku maklakaskinaw. Kalilakpuwaw pi makglhuwata la lakputsanitaw xlakata wi tiku natachuwinanaw anta niku lichuwinanaw Dios. Tanu tanu hora kilanitaw kxchik, pero ni tekgsnitaw. ¿Tuku atanu tlan natlawayaw? Chatum tala tiku wanikan Katarína wan: «Kkatsokgnani cartas tiku ni kkatekgsa kxchikkan chu kkawani tuku xakkawanilh komo xakkatachuwinalh». ¿Tuku kinkamasiyaniyan uma? Pi kililakputsatkan la natlawayaw kintaskujutkan xlakata tlan putum nakatachuwinanaw latamanin niku lichuwinanaw Dios.
CHUNTIYA KALICHUWINAW DIOS MASKI NI NAKINKAKGAXMATNIPUTUNKANAN
11. ¿Tuku xlakata lhuwa latamanin ni kgaxmatputunkgo tamakatsin nema lichuwinanaw?
11 Makgapitsi latamanin ni kgaxmatputunkgo tamakatsin nema lichuwinanaw. Lakpuwankgo pi ni xlakaskinka nakatsikgo xlakata Dios chu tuku wan Biblia. Max ni kanajlanikgo Dios xlakata lhuwa tapatin anan kkakilhtamaku chu lakgmakgankgo tuku wan Biblia xlakata akxilhkgo pi tiku pulalinkgo takanajla ni lilatamakgo tuku lichuwinankgo. Amakgapitsin kajwatiya xtaskujutkan lilakgaputsakgo, xfamiliajkan o xtaʼakglhuwitkan chu ni kuenta tlawakgo pi Biblia tlan nakamakgtaya. ¿La tlan chuntiya xatapaxuwan nalichuwinanaw Dios, maski lhuwa latamanin ni xlakaskinka liʼakxilhkgo tamakatsin nema lichuwinanaw?
12. ¿La tlan namakgantaxtiyaw tuku wan Filipenses 2:4 akxni lichuwinanaw Dios?
12 Kakalilakgaputsaw latamanin. Lhuwa latamanin tiku xapulana ni xkgaxmatputunkgo tamakatsin nema lichuwinanaw, alistalh makgamakglhtinankgolh xlakata akxilhkgolh pi tiku kalitachuwinalh Dios kalilakgaputsakgolh (kalikgalhtawakga Filipenses 2:4). Akgtum liʼakxilhtit, David, tiku lichuwinanitawa, wan: «Komo wi tiku ni katsiputun, kmakiyaw Biblia o kilikgalhtawakgakan chu kkgalhskinaw tuku xlakata ni katsiputun». Latamanin akxilhkgo akxni wi tiku kalilakgaputsa. Max napatsankgakgo tuku nakawaniyaw, pero ni katipatsankgakgolh la nakalikatsiniyaw. Maski chatum lataman ni nakinkamaxkiyan talakaskin natachuwinanaw, kintayatkan chu chuna la nalikatsiniyaw tlan nalimasiyaniyaw pi lilakgaputsayaw.
13. ¿Tuku tlan natlawayaw xlakata latamanin naʼakxilhkgo pi tlan nalitamakgtayakgo tamakatsin nema lichuwinanaw?
13 Pulaktum la tlan nalimasiyayaw pi kalilakgaputsayaw latamanin wa akxni nalakgpaliyaw tuku nalichuwinanaw xlakata chuna tlakg nalakgatikgo chu naʼakxilhkgo pi nakamakgtaya. Akgtum liʼakxilhtit, ¿akxilhaw tuku limasiya pi tiku tachuwinamaw kgalhi kamanan? Max natlatni katsiputunkgo tastakyaw nema masta Biblia xlakata nakatsikgo la kamakgastakkan kamanan o xlakata nakgalhikgo tapaxuwan kfamilia. ¿Chu komo akxilhaw akgtum malakcha nema kgalhi lhuwa tuku likgapikanit? Tlan nalitachuwinanaw uma lataman tuku nitlan lama kkakilhtamaku, chu nawaniyaw pi putum umakgolh namasputukan. Akxni chatum lataman nakinkakgaxmatniyan, kaliskujwi xlakata namakgtayayaw naʼakgatekgsa pi tastakyaw xalak Biblia tlan namakgtaya. Katarína, tiku lichuwinawa kpárrafo 10, wan: «Klilakpuwan la kimakgtayanit tuku xaxlikana». Akxni chuna tlawa, liwana limasiya pi kanajla tuku lichuwinan chu latamanin akxilhkgo uma.
14. Chuna la wan Proverbios 27:17, ¿la kinkamakgtayayan akxni ni kiʼakstukan anaw lichuwinanaw Dios?
14 Kamastaw talakaskin pi amakgapitsin nakinkamakgtayakgoyan. Kxapulana siglo, Pablo masiyanilh Timoteo la xla xmasiya chu xlichuwinan Dios, chu makgpuwantinilh namaklakaskin uma xlakata nakamakgtaya amakgapitsin (1 Cor. 4:17). Chuna la Timoteo, akinin na tlan nalitamakgtayayaw tuku katsinikgo natalan xalak congregación (kalikgalhtawakga Proverbios 27:17). Kalichuwinaw xliʼakxilhtit chatum tala tiku wanikan Shawn, tiku precursor xlitaxtu kʼakgtum aktsu kachikin niku lhuwa latamanin xlipaxuwakgo tuku xkanajlakgo. ¿Tuku makgtayalh xlakata ni nataxlajwani? Xla wan: «Ni kiʼakstu xakkan, akxni xtatlani wi tiku xaktaʼan. Liwana xakmaklakaskinaw kilhtamaku akxni nina xakchanaw kʼakgtum chiki, xaklichuwinanaw la tlakg tlan nakmasiyayaw. Akgtum liʼakxilhtit, xaklichuwinamparayaw tuku xkinkawaninitan chatum lataman, chu alistalh xaklichuwinanaw tuku tlan xaktlawaw komo wi tiku chuna xkinkawaniparan».
15. ¿Tuku xlakata lu xlakaskinka natlawayaw oración akxni naʼanaw lichuwinanaw Dios?
15 Kaskiniw xtamakgtay Jehová. Akxni naʼanaw lichuwinanaw Dios, katlawaw akgtum oración xlakata Jehová nakinkapulalinan. Komo ni xkinkamakgtayan xʼespíritu santo nila tuku xtlawaw (Sal. 127:1; Luc. 11:13). Akxni naskiniyaw tamakgtay Jehová, liwana kawaniw tuku lakaskinaw. Akgtum liʼakxilhtit, kaskiniw pi kakinkamakgtayan natekgsaw kaxatikawa lataman tiku nakgaxmatputun chu namakgamakglhtinamputun xaxlikana. Chu alistalh, katlawaw tuku kinkalakgchanan chu kakalitachuwinaw Dios putum latamanin.
16. ¿Tuku xlakata xlakaskinka kiʼakstukan nakgalhtawakgayaw?
16 Kalimaxtuw kilhtamaku xlakata kiʼakstukan nakgalhtawakgayaw. Xtachuwin Dios wan: «Xlakata tlan liwana nalakgapasatit xtalakaskin Dios, nema xatlan, nema xaʼakgstitum, chu nema xla tlan akxilha» (Rom. 12:2). Akxni kgalhtawakgayaw tlakg liwana lakgapasaw Dios. Wa xlakata, akxni kalitachuwinanaw amakgapitsin xlakata Dios, xlakan naʼakxilhkgo pi xlikana kanajlayaw tuku lichuwinanaw. Katarína wan: «Nina makgas kʼakgatekgsli pi xtalakaskin xakmatliwakglhli chuna la xakkanajlani makgapitsi tamasiy xalak Biblia. Wa xlakata tlakg klakputsalh tuku limasiya pi wi chatum Malakatsukina, pi Biblia wa xTachuwin Dios chu pi la uku Dios kgalhi akgtum kachikin nema lin xtukuwani». Katarína wan pi xlakata xʼakstu kgalhtawakga uma makgtayanit tlakg namatliwakglha xtakanajla chu tlakg paxuwa akxni lichuwinan Dios.
TUKU XLAKATA CHUNTIYA XATAPAXUWAN LICHUWINANAW DIOS
17. ¿Tuku xlakata Jesús chuntiya xatapaxuwan lichuwinalh Dios akxni xlama kKatiyatni?
17 Jesús chuntiya xatapaxuwan lichuwinalh Dios maski makgapitsi latamanin ni kgaxmatniputunkgolh. ¿Tuku xlakata chuna tlawalh? Jesús xkatsi pi latamanin xmaklakaskinkgo nakgaxmatkgo tuku xaxlikana chu xkamakgtayaputun lhuwa latamanin. Na xkatsi pi makgapitsi latamanin tiku xapulana ni xkgaxmatputunkgo tamakatsin xla Tamapakgsin, alistalh xʼamakgo kgaxmatkgo. Chuna kitaxtunilh xfamilia. Akgtutu kata aitat lata Jesús xlichuwinama Dios nipara chatum xnatalan kstalanina litaxtulh (Juan 7:5). Pero akxni xlakastakwananita, kstalaninanin litaxtukgolh (Hech. 1:14).
18. ¿Tuku xlakata chuntiya lichuwinanaw Dios?
18 Ni katsiyaw tiku namakgamakglhtinan tamasiy xalak Biblia nema lichuwinanaw. Makgapitsi latamanin tlakg makgapalakgo xlakata nakgaxmatputunkgo xaxlikana. Asta tiku ni kinkakgaxmatniputunkgoyan akxilhkgo xatlan kintayatkan chu pi chuntiya xatapaxuwan lichuwinanaw Dios, chu max natitaxtu kilhtamaku namaxkiputunkgo «kakni Dios» (1 Ped. 2:12).
19. Chuna la wan 1 Corintios 3:6, 7, ¿tuku kilikatsitkan?
19 Maski akinin chanananaw chu munuwilinanaw, kilikatsitkan pi wa «Dios tiku tlawa pi nastaka» (kalikgalhtawakga 1 Corintios 3:6, 7). Chatum tala xalak Etiopía tiku wanikan Getahun wan: «Liwaka 20 kata, kajwatiya akit xtatayana Jehová xakwanit anta niku ni lu xlichuwinankan Dios. Pero la uku anan 14 natalan. Kgalhkututu tamunukgonit, kimpuskat na tamununit chu kgalhtutu kinkamanan. Max 32 latamanin tiku ktamakxtumiyaw». Getahun lu paxuwa xlakata nikxni taxlajwanilh chuna la xlichuwinan Dios, wata kgalhkgalhilh pi Jehová xkalimilh latamanin tiku kgalhikgo tlan naku anta kxkachikin (Juan 6:44).
20. ¿Tuku xlakata tlan kinkatamalakxtumikanan tiku lakgmaxtunankgo niku tapanknan?
20 Jehová lu xtapalh akxilha xlatamatkan putum latamanin. Xlakata nina min xlisputni uma kakilhtamaku, Jehová kinkamaxkiyan talakgalhaman akxtum nataskujaw xKgawasa xlakata nakalimin kxkachikin latamanin xalak tanu tanu kachikinin (Ageo 2:7). Akxni lichuwinanaw Dios, litaxtuyaw xtachuna la tiku kalakgmaxtukgo tiku taʼakgtaputanukgonit xlakata wi niku tapanknalh. Maski kaj makgapitsi umakgolh lakgmaxtunanin tekgskgo latamanin, taskujut nema tlawakgo xputumkan lu xlakaskinka. Nachuna kitaxtu akxni lichuwinanaw Dios: ni katsiyaw la xlilhuwa latamanin tlan chuntiya nakalakgmaxtukan kxkakilhtamaku Satanás, pero Jehová tlan nakinkamaklakaskinan kaxatikawa akinin xlakata nakamakgtayayaw. Andreas, tiku lama kBolivia, wan: «Kkatsi pi akxni wi tiku lakgapasa xaxlikana chu tamunu, chuna la xlakata lhuwa tiku makgtayanankgolh». Wa xlakata chuntiya kalichuwinaw Dios. Komo chuna natlawayaw Jehová nakinkasikulunatlawayan chu lu napaxuwayaw akxni nalichuwinanaw Dios.
TAKILHTLIN 66 Kalichuwinaw xatlan tamakatsin
^ párr. 5 Kʼuma artículo naʼakxilhaw makgapitsi tuku nakinkamakgtayayan chuntiya xatapaxuwan nalichuwinanaw Dios maski lhuwa latamanin ni tatekgskgo kxchikkan o ni kinkakgaxmatniputunkgoyan.
^ párr. 7 Chuna la tipalhuwa lichuwinanaw Dios, talakaskin namakgantaxtiyaw limapakgsin nema wi k’akgtum país xlakata ni namakgpitsiyaw xtukuwanikan latamanin, xnumerojkan o atanu.
^ párr. 60 TUKU TASIYA KDIBUJO: (lata talhman asta tutsu): Akgtum tamakgaxtokgat lichuwinamakgo Dios anta niku tuwa katekgskan latamanin kxchikkan. Tiku wi kxapulana chiki skujma, tiku wi kxliʼakgtiy chiki anit kpumakuchin chu tiku wi kxliʼakgtutu chiki anit tamawanan. Akxni uma tamakgaxtokgat taspitparakgo tlakg kakgotanun, tlan tachuwinankgo tiku wi kxapulana chiki. Akxni lichuwinamakgo Dios kcarritos lakatsu khospital tekgskgo tiku wi kxliʼakgtiy chiki. Chu tlan tachuwinankgo kteléfono tiku wi kxliʼakgtutu chiki.
