1. ¿Bin ejemplo la yakʼ jilel te Jesús ta stojol te jnopojeletik sok bin la spasik? (Ilawil te foto ta yelaw te rebista).

KALAL xtaluk ta Balumilal te Jesus sok sbujtsʼ yoʼtan la schol te skʼop Dios, jaʼnix jich ya skʼan te jichukotik-euke (Juan 4:35, 36). Te jnopojeletik yuʼun te Jesús, jaʼnix jich sok stseʼelil yoʼtanik la scholik skʼop Dios (Luc. 10:1, 5-11, 17). Pero chʼay sbujtsʼ yoʼtanik ta scholel skʼop Dios kʼalal la stsakik sok la smilik te Jesuse (Juan 16:32). Te kʼalal chaʼkuxaj te Jesús la yakʼtiklanbey yip yoʼtan te jnopojeletik yuʼun, te jaʼuk ya xbajt ta yoʼtanik scholel te skʼop Dios. Kʼalal ayix ta chʼulchan-a te Jesuse, te jnopojeletik sok sbujtsʼ yoʼtanik la scholik skʼop Dios, te skontratak jich albotik yuʼun: «La anojesic ta Jerusalén te nohptesel awuʼunique» (Hech. 5:28).

2. ¿Bin koltayel yakʼoj te Jehová ta swenta te scholel skʼop Dios?

² Ta sbabial siglo te Jesús jaʼ la yil te bin-utʼil la yichʼ cholel te skʼop Diose, ta swenta te koltayel la yakʼ te Jehová bayal ants winiketik la schʼuunik te skʼop Dios. Jich bitʼil ta Pentecostés ta jaʼbil 33 ay la yichʼik jaʼ 3,000 ta tul (Hech. 2:41). Mo yajtalul te jnopojeletik (Hech. 6:7). Jaʼnix jich te Jesús la yal te ta slajibal kʼajkʼal bayal ants winiketik ya schʼam yaʼiyik te lek yachʼil kʼop (Juan 14:12; Hech. 1:8).

3, 4. 1) ¿Bin yuʼun ay lugaretik te wokol ta cholel te skʼop Diose? 2) ¿Bin ya jnoptik ta artikulo ini?

³ Ta jpisiltik ya jpastik tulan yuʼun tseʼeluk koʼtantik te kʼalal ya jcholtik skʼop Dios. Ay lugaretik te maba wokol ta pasele, melel ay bayal ants winiketik te ya skʼan ya snopik te skʼop Dios, jaʼ yuʼun te ermanoetik wokol ya yaʼiyikix ta snojptesel te ants winiketik. Pero ay yantik lugaretik te wokol ya yilik te ermanoetike, melel maba ya staik te ants winiketik ta snaik sok te machʼatik ya staike ma skʼan ya snopik te Bibliae.

 ⁴ Teme wokol te scholel skʼop Dios ta lugar te banti ayotik, te bin ya jnoptik ta artikulo ini jaʼ ya skoltayotik. Ya jnoptik bin spasojik chaʼoxtul ermanoetik yuʼun ya scholbeyik skʼop Dios te ants winiketik sok bin yuʼun tseʼel koʼtantik ya jcholtik skʼop Dios manchukme ma skʼan yaʼiyik te ants winiketik.

5. ¿Bin wokolil staoj te ermanoetike?

⁵ Ay ermanoetik te wokol ya yaʼiyik te ma staik te ants winiketik ta snaik yuʼun ya scholbeyik skʼop Dios. Ay machʼatik te nainemik ta mukʼul edifisioetik te lek kanantaybil yuʼunik te maʼyuk machʼa ya xjuʼ ya x-och tey-a. Ayniwan jkanan te ma xyakʼ ochel te machʼa ma naʼbiluk sba o maʼyuk machʼa yikʼoj ta sna. Ta yan lugaretik te ermanoetik ya xjuʼ ya xlokʼik ta scholel skʼop Dios ta nanatik, jaʼnax yuʼun te maʼyuk bayal te machʼatik ya staik. Jaʼnix jich ay ermanoetik te namal ya xbajtik, pero maʼyuk lek ants winiketik kuxinemik tey-a. Najtniwan ya xbeenik yuʼun ay machʼa ya scholbeyik skʼop Dios, pero te kʼalal ya xkʼotike, maʼyuk machʼa nakal. Teme jich yak ta kʼaxel ta jtojoltike, ¿bin ya xjuʼ ya jpastik yuʼun maba ya xchebaj koʼtantik?

6. ¿Bin-utʼil pajal te scholel skʼop Dios sok te stsakel chaye?

⁶ Te Jesús la spaj te scholel skʼop Dios jich bitʼil te stsakel chay (Mar. 1:17). Te jtsakchay maniwan orauk ya stsak te kojt chaye, pero ma xlujb ta spasel. Ya yil te jayeb ora ya xjuʼ ta tsakel, te banti ay te chayetik sok te bin-utʼil ya stsake. Jichnix ya skʼan ya jpastik te kʼalal ya jcholtik skʼop Dios. Kiltik bin-utʼil.

7. ¿Bin ya xlokʼ-a teme ya jlebeytik yorail te scholel skʼop Dios?

⁷ Jlebeytik yorail. Yame xkʼopojotik sok bayal ants winiketik teme jaʼ ya jcholtik skʼop Dios-a te kʼalal ayikix ta snaik-ae, melel maʼyuk machʼa te ma sujt tal ta snae. Bayal ermanoetik ya scholik skʼop Dios ta tibiltik o ta ajkʼabal te kʼalal ayikix ta snaik-a te ants winiketik. Jaʼ te bin-ora maʼyukix bayal yaʼtelik-a te ants winiketik sok te ya skʼanikix kʼop-ae o yaniwan xjuʼ jich ya jpastik bitʼil la spas jtul ansiano te David sbiil. Kʼalal yak ta scholel skʼop Dios sok te yan ermano, ya schaʼsujtik te banti ma jambot te tiʼnaile jich ya yal: «Chamnax koʼtantik yuʼun kʼalal ya kiltik te ay bayal ants winiketik ya jtatik ta snaik te kʼalal ya xchaʼsujt kiltike». *

8. ¿Bin-utʼil ya jpastik ta scholel skʼop Dios te bin ya yal te Eclesiastés 11:6?

⁸ Te teksto te banti lokʼem te artikulo ini ya sjultes ta koʼtantik te manchuk ya xlujbotik (kʼopona Eclesiastés 11:6). Te David te machʼa la yichʼix albeyel skʼoplale, maba chebaj yoʼtan. Te bitʼil maba la skom sba ta sleel te ants winiketike, aynix machʼa la sta. La sta jtul winik te ya smulan snopel te Biblia sok jich la yal: «Ayix ocho jaʼbil te liʼ ayon ta kuxinele, pero maʼyuk jtuluk Testigo te kʼaxem yulaʼtaybelone». Te David jich ya yal: «Ay kiloj te kʼalal ya jtatik ants winiketik ta snaik, bayal machʼatik ya schʼam yaʼiyik te skʼop Diose».

9. ¿Bin ya spas chaʼoxtul ermanoetik yuʼun ya xkʼopojik sok te ants winiketik te maʼyukik ta snaik?

⁹ Jletik te banti ya jcholtik skʼop Dios. Ay publikadoretik te ya spasik tulan ta scholbeyel skʼop Dios te ants winiketik te maʼyukik ta snaik. Jich bitʼil te banti ma  xjuʼ ta cholel skʼop Dios ta nanatik, ya scholik skʼop Dios ta kayeetik sok ta karrito. Te bitʼil jich la spasik te ermanoetik, ya xjuʼ ya xkʼopojikix sok te ants winiketik te ma staik ta snaik. Jaʼnix jich te ermanoetik ay yilojik te ants winiketike ya skʼanik kʼop sok ay ya yichʼik jilel junuk publikasion te kʼalal ayik ta parke, ta merkado sok ta negosioetik. Jtul superintendente yuʼun sirkuito te ay ta Bolivia te Floiran sbiil, jich ya yal: «Ya xbootik ta merkado sok ta tiendaetik ta la una o ta las tres ta tibiltik te kʼalal maʼyukix bayal yaʼtelik-a te jchonbajeletike. Ya xkʼopojotik ta lek sok ya jachtik nojptesel ta Biblia».

10. ¿Bin ya skʼan ya jpastik yuʼun ya xjuʼ ya xkʼopojotik sok spisil te ants winiketik?

¹⁰ Jeltaytik te bin-utʼil ya jcholtik te skʼop Dios. Jnop kaʼiytik te ay bayal buelta jleojtik te machʼa ya jkʼan xkʼopojotik sok ta territorio. Baemotik ta sna ta yanyantik ora, pero ma jtatik. ¿Bin ya xjuʼ ya jpastik? Jtul ermana te Katarína sbiil jich ya yal: «Ya jtsʼibaybey kartaetik te machʼatik ma la jta ta snae sok jaʼ ya jtsʼibaybey bael te bin ya jkʼan kalbey te lajuk jtae». ¿Bin ya yakʼ jnoptik? Jaʼ te ya jeltik te bin-utʼil ya jcholtik te skʼop Dios yuʼun jich ya jtatik-a te ants winiketik ta territorio.

11. ¿Bin yuʼun ay ants winiketik ma skʼan ya yaʼiyik te bin ya kalbeytike?

¹¹ Ay ants winiketik ma skʼan ya yaʼiyik te bin ya jcholbeytike. Ya yalik te ma puersauk te ya snaʼbeyik sba te Dios sok  te bin ya yal te Biblia. Maniwan schʼuunik Dios ta skaj te bayal wokoliletik ta Balumilal sok ma skʼan ya snopik te Biblia ta swenta te maba ya spasik te bin ya yalik te jwolwanejetik yuʼun te relijion. Ay yantik te jaʼ baem ta yoʼtanik te yaʼtelik, te sfamiliaik o te swokolik te ma xkʼot ta yoʼtanik te ya xjuʼ ya xkoltayotik yuʼun te Biblia. ¿Bin-utʼil ya xjuʼ tseʼel koʼtantik manchukme te ants winiketik maʼyuk skʼoplal ta yoʼtanik te bin ya kalbeytike?

12. ¿Bin-utʼil ya xjuʼ ya jpastik ta scholel skʼop Dios te bin ya yal te Filipenses 2:4?

¹² Ayuk skʼoplal ta koʼtantik te ants winiketik. Ay ants winiketik te ta sjajchibal ma skʼan ya yaʼiyik-a te bin ya kalbeytik pero te kʼalal la yakʼ ta ilel slekil yoʼtan te machʼa ya xnojpteswan jich kaj snopik te Biblia (kʼopona Filipenses 2:4). Te David te la yichʼix albeyel skʼoplale, jich ya yal: «Teme ay machʼa ya yalbotik te ma smulane, ya jkʼejtik te Biblia o te publikasionetik sok ya kiltik te bin yuʼun jich ya snope». Te ants winiketik ya staik ta ilel teme ya jmel koʼtantik ta stojolik. Yaniwan schʼay ta yoʼtanik te bin la kalbeytik, pero te bin ma schʼay ta yoʼtanik jaʼ te bin yaʼiyel la yaʼiy sbaike. Teme te ants winik maba ya yakʼotik ta kʼop, ya xjuʼ ya kakʼtik ta ilel ta jtaleltik sok ta jsit kelawtik te ay skʼoplal ta koʼtantike.

13. ¿Bin-utʼil ya xjuʼ ya xkoltayotik te bin ya kalbeytik te ants winiketik?

¹³ Te bin-utʼil ya kakʼtik ta ilel te ay skʼoplal ta koʼtantik te ants winiketik, jaʼ te yakuk xkoltayotik sok ya x-ikʼbot yoʼtanik te bin ya kakʼbeytik snopike. Jich bitʼil, ¿aybal yal snichʼnab te ants winik? Te binwan ya smulanik yaʼiyel te meʼil tatiletik, jaʼ te konsejoetik te ay ta Biblia te bin-utʼil ta chʼitesel te alnichʼanetik o te bin-utʼil ta tael te stseʼelil oʼtanil ta familia. Pero teme bayal kandado yichʼoj te puerta, ya xjuʼ ya jcholbeytik te ants winik ta swenta te j-utsʼinwanejetik sok te xiweltikix sba te bitʼil ayotik ta ayinel soknix ya xjuʼ ya jcholbeytik te ya xlaj skʼoplal spisil ini. Te kʼalal ay machʼa ya yaʼiybotik te jkʼoptike, ya xjuʼ ya kalbeytik te bin-utʼil ya xjuʼ ya xkoltayot yuʼun te Biblia. Te Katarína te la kalbeytik skʼoplal ta parrafo 10, jich ya yal: «Ya jnop ta koʼtan te bin-utʼil skoltayejon te skʼop Diose». Teme jich ya jpastik ya yalbotik ta jamal te bin ay ta yoʼtanik sok ya yilik te yantik ants winiketik.

14. Jich bitʼil ya yal te Proverbios 27:17, ¿bin-utʼil ya skoltayotik teme ay joytik ta scholel skʼop Dios?

¹⁴ Jkʼanbeytik koltayel te yantik. Ta  sbabial siglo te Pablo la snojptes te Timoteo te bin-utʼil ya schol skʼop Dios sok te bin-utʼil ya xnojpteswan soknix la stijbey yoʼtan te jichuk ya skoltay te yantik (1 Cor. 4:17). Jich bitʼil la spas te Timoteo, ya xjuʼ ya jnoptik te bin ya spasik te ermanoetik ta kongregasion (kʼopona Proverbios 27:17). Kiltik te bin kʼax ta stojol te ermano Shawn te abatin ta prekursor ta jun lugar te banti te ants winiketik jun yoʼtan ta srelijionik. ¿Bin koltayot yuʼun ma chebaj yoʼtan? Jich ya yal: «Ma jtukeluk ya xlokʼon ta scholel skʼop Dios. Te machʼa ya sjokinone ya kalbeytik skʼoplal te bin-utʼil ya jlekubtestikxan te bin-utʼil ya xnojpteswanotik. Ya kalbeytik skʼoplal te bin la yalbotik jtul ants winik yuʼun jich ya jnaʼtik-a te bin ya xjuʼ ya kaltik teme ay machʼa jich la sjojkʼoybotikxane».

15. ¿Bin yuʼun mukʼ skʼoplal te ya jkʼopontik Dios te kʼalal ya xbootik ta scholel skʼop Dios?

¹⁵ Jkʼanbeytik koltayel te Jehová. Te kʼalal ya xlokʼotik ta scholel skʼop Dios, akʼa jkʼopontik te Jehová yuʼun ya skoltayotik. Teme maba ya jkʼanbeytik te schʼul espiritu, maʼyuk bin ya xjuʼ kuʼuntik spasel (Sal. 127:1; Luc. 11:13). Kʼalal ya jkʼopontik te Jehová, kalbeytik ta jamal te bin ya jkʼantike. Jich bitʼil te akʼa jkʼanbeytik te yakuk jtatik ants winiketik te ya schʼam yaʼiyik te jkʼoptike. Ta patil joʼotik ay ta jwentatik scholbeyel skʼop Dios te ants winiketik.

16. ¿Bin yuʼun mukʼ skʼoplal te ya jnoptik te Biblia yuʼun ya jmulantikxan te scholel skʼop Dios?

¹⁶ Akʼa jnoptik te Biblia. Te sKʼop Dios jich ya yal: «Yuʼun hich yac anaʼic a te bin ya scʼan yoʼtan te Dios, te ha ay yutsil soc te cʼax leque» (Rom. 12:2). Te kʼalal kʼoem ta koʼtantik ta lek te skʼop Dios sok yip koʼtantik ya kalbeytik te ants winiketik. Te Katarína jich ya yal: «La jta ta ilel te ya skʼan ya stsakxan yip schʼuunel koʼtan ta swenta te bintik ya yal te Biblia. Jich yuʼun kaj jnop ta lek te bitʼil yuʼun-nix ay-a te Jpaswanej, te bitʼil te Biblia jaʼ lokʼem tal ta yoʼtan te Dios sok te bitʼil ay jun organisasion yuʼun Jehová ta ora ini». Te Katarína ya yal te bitʼil la snopxan te Biblia la stsakxan yip te schʼuunel yoʼtan sok ya smulanxan te scholel skʼop Dios.

17. ¿Bin yuʼun ay stseʼelil yoʼtan ta scholel skʼop Dios te Jesuse?

¹⁷ Te Jesús ma chʼay te stseʼelil yoʼtan sok maba la skom sba ta scholel te skʼop Dios manchukme te ants winiketik maba la smulanik. ¿Bin yuʼun jich la spas? Snaʼoj te ya skʼan ya snaʼbeyik sba Jehová te ants winiketik sok yuʼun ya skʼan ya skoltaylan. Jaʼnix jich snaʼoj te ay ants winiketik te ya skʼan ya yaʼiyik te skʼop Dios manchukme ma la smulanik ta sjajchibal, jich kʼax ta stojol te sfamilia. Te oxeb jaʼbil sok olil la schol skʼop Dios te Jesús, maʼyuk jtuluk ta sfamilia och ta jnopojel yuʼun (Juan 7:5). Pero te kʼalal chaʼkuxaj te Jesús, ochik ta j-abat yuʼun Dios te sfamilia (Hech. 1:14).

18. ¿Bin yuʼun ma jkom jbatik ta scholel skʼop Dios?

¹⁸ Ma jnaʼtik te machʼatik ya xkaj smulanik te bin ya kakʼbeytik snop ta Biblia. Ay ants winiketik te ya yichʼ bael tiempo yuʼun ya xjajch smulanik. Te machʼatik maba ya yaʼiybotik te jkʼoptik jaʼ ya yilik te jlekil jtaleltik sok te ay stseʼelil koʼtantik, repentaniwan ta patil ya yalbeyik yutsil skʼoplal te Dios (1 Ped. 2:12).

19. Jich bitʼil ya yal te 1 Corintios 3:6, 7, ¿bin ya skʼan ay ta koʼtantik?

 ¹⁹ Manchukme te joʼotik ya jtsʼuntik sok ya kakʼbeytik yalel, ya skʼan ya jnaʼtik te jaʼ ya yakʼ ya xchʼi te Diose (kʼopona 1 Corintios 3:6, 7). Jtul ermano ta Etiopía te Getahun sbiil, jich ya yal: «Kʼaxem ta 20 jaʼbil te joʼon-nax Testigoon ta jun territorio te banti baeltikto ya yichʼ cholel skʼop Dios. Pero ta ora ini ayix 14 publikadoretik, 13 ta tul la yichʼikix jaʼ, tey ajtaybil-euk-a te kinam sok te oxtul jnichʼnab. Ta tsoblejetik ya xkʼotik 32 ta tul ants winiketik». Akʼbot stseʼelil yoʼtan te Getahun te bitʼil maba lujb ta scholel skʼop Dios sok te la smaliy te jaʼ la yikʼ tal Jehová te ants winiketik ta organisasion yuʼun (Juan 6:44).

20. ¿Bin-utʼil pajal kʼoemotik sok te jkoltaywanejetik?

²⁰ Mukʼ skʼoplal ta yoʼtan te Jehová, te skuxlejal te ants winiketik. Ya yakʼbotik te majtanil te ya x-aʼtejotik sok te sNichʼan ta yotsesel ants winiketik ta lum yuʼun te bitʼil mato ya yichʼ lajinel te chopol balumilal ini (Ageo 2:7). Te kʼalal ya jcholtik skʼop Dios jaʼ pajal kʼoemotik sok te machʼatik ya xkoltaywanik ta sleel te ants winiketik te chʼayemik, manchukme chaʼoxtulnax te machʼatik la staik te machʼa chʼayeme, mukʼ skʼoplal te yaʼtelik ta spisilik. Jaʼnix jich pajal sok te scholel skʼop Dios, ma jnaʼtik jaytul ants winiketik ya xkolik lokʼel ta skʼab te Satanás, pero te Jehová ya xjuʼ ya stuuntesotik yuʼun ya xkoltaywanotik. Te Andreas te yak ta kuxinel ta Bolivia, jich ya yal: «Ya jnaʼ te kʼalal ay machʼa ya snaʼbey sba te Jehová sok ya yichʼ jaʼ, jaʼ ta swenta te bayal machʼatik koltaywanik». Jich yuʼun jpastik tulan te sok sbujtsʼ koʼtantik ya jcholtik te skʼop Dios, melel teme jich ya jpastik te Jehová ya yakʼbotik bendision sok ya jmulantikxan te scholel skʼop Dios.