1. Ntakiheryo xeeni Yesu aavanhe awe atthareli awe ni yaapanke exeeni? (Nwehe elatarato ya ekaapa.)

OKATHI Yesu aalaleerya awe valaponi, owo aahikhalana moonelo wooloka ni aaphavela wira atthareli awe akhalaneke moonelo wooloka. (Yoh. 4:35, 36) Nave Yesu ni awiixutti awe yaaniluttuweliwa vanceene olaleerya. (Luka 10:1, 5-11, 17) Nave-tho, nuumala Yesu ovariwa ni wiiviwa, awiixutti awe yaahihiya olaleerya okathi vakhaani. (Yoh. 16:32) Masi nuumala Yesu ohihimuxiwa, owo aahaatumererya wiimananiha olaleerya. Nto nuumala Yesu otthikela wiirimu awiixutti awe yaaniluttuweliwa olaleerya mpakha awanani aya ohimya wira: “Nyuwo moosariha soowiixuttiha sanyu oYerusalemu”.—Mit. 5:28.

2. Yehova aareelinhe sai muteko woolaleerya?

² Yesu aanaavaha malakiheryo maKristau a eseekulu yoopacerya a moota yaakhanle aya oolaleerya. Nto Yehova aanaareeliha. Atthu anceene yaaneemererya muhupi ole yaalaleya aya. Mwa ntakiheryo, Pentekoositi a 33, nuumala Kristu orwa yaahipatisiwa atthu 3.000. (Mit. 2:41) Nave nummuru na awiixutti naanincerereya vanceene. (Mit. 6:7) Yesu aahihimya vahinatthi wira mahiku ookiserya atthu anceene yaamweemererya ihapari sooreera.—Yoh. 14:12; Mit. 1:8.

3-4. Xeeni atthu akina onaavila aya olaleerya? Mwaha ola, ninrowa othokorerya exeeni?

³ Otheene ahu, nihaana okhalana moonelo wooloka naalaleeryaka. Ilapo sikina, vannikhweya opaka eyo. Mwaha wa xeeni? Mwaha woowi atthu anceene anniphavela osomihiwa Biibiliya. Atthu akina annilipelela okathi munceene mpakha ophiya okathi anrowa aya osomihiwaka ni Namoona a Yehova! Masi ilapo sikina vannivila olaleerya. Atthu anikhala ilapo iyo, khanikhala owaani wala khaniphavela wiiwa muhupi wa mBiibiliyani.

⁴ Akhala wira munikhala elapo onixankiha aya olaleerya, malakiheryo a mwaha ola animookhaliheryani vanceene. Ninrowa  oweha itthu anna ni arokora akina anipaka aya wira yaalaleeryeke atthu anceene. Nave ninrowa woona oreera waya okhalana moonelo wooloka hata atthu aniwiriyanaka wala nnaari.

5. Mixankiho xeeni anamalaleerya anceene arina aya?

⁵ Anamoona a Yehova akina vannaavila waaphwanya atthu owaani okathi anilaleerya aya. Anamalaleerya akina anikhala mittetthe ipa sirina muuru soorakama, ipreedio ni akaamera wala makwaarta. Pooti wira makwaarta awo annimukhoottiha okela mutthu oheemereriwe wala ohilattuliwe ni mwaneene etthoko. Anamalaleerya akina anniwerya olaleerya mootaphuwa empa ni empa, masi vannivila waaphwanya axineene etthoko. Anamalaleerya akina anilaleerya mittetthe saamukhaani anikhala aya atthu vakhaani paahi. Nto awo anneetta mikwaha soorakama wira amphwanye nnakhala mutthu mmosa paahi, masi ikwaha sinceene khanimphwanya mutthu ori ene owaani! Akhala wira nyuwo mookhalana mixankiho iyo, muhikhulumuwe. Nto muhaana opaka exeeni wira nvilele mixankiho iyo ni mukhumeleke saana okathi woolaleerya?

6. Mwa enamuna xeeni anamalaleerya anlikana aya ni alipa-oototha ihopa?

⁶ Yesu aahilikanyiha muteko woolaleerya ni muteko wa alipa-oototha ihopa. (Mar.1:17) Atthu akina anitotha ihopa anniviriha mahiku manceene atothaka, masi khuhivara etthu. Hata vari siiso, awo khanihiya ototha. Ohiya-vo, awo annilokiherya inamuna saya sa ototha ihopa. Awo annituruka okathi, opuro ni inamuna soototha. Hiyo nave, nihaana opaka marukunuxo a moota ninlaleerya ahu. Nrowe niwehe malakiheryo vakhaani.

7. Akhala wira nnoolaleerya okathi woovirikana etthu xeeni enrowa okhumelela?

⁷ Mwiimananiheke waalaleerya atthu okathi woovirikana. Nnoowerya waaphwanya atthu anceene akhala wira ninnaalaleerya okathi woovirikana. Okathi yoowo nnoona ahu wira nnimwaaphwanya ari ene owaani. Maana onnikhala okathi atthu anceene antthikela aya owaani! Anamalaleerya anceene annaaphwanya atthu ari ene owaani makaaripi wala ohalaka wiila. Ohiya-vo, okathi owo axineene etthoko khanaatteliwa miteko ni anniphavela ovaanela. Woonasa wene, animoosivelani malakiheryo ovanhe awe mutokweene oniihaniwa David. Owo ohimmye wira nuumala olaleerya, annitthikela olaleerya ipa seiye ahaaphwannye aya atthu ekwaha yoopacerya. David onihimya so: “Kinnihakalala vanceene okathi owo wa nenli kinithikelaka maana kinnaaphwanya axineene etthoko”. *

8. Ninrowa ovarihela sai muteko malakiheryo ari Musuweli 11:6 naalaleeryaka?

⁸ Nihikhulumuwe. Eyo ti etthu yoolepa ya mwaha ola ennitumererya aya opaka. (Mmusome Musuweli 11:6.) David yoowo nimulavunle ahu kaakhulumunwe. Nuumala omananiha ikwaha sinceene ohaaphwanyaka atthu, David aahimphwanya mulopwana mmosa ori ene owaani. Mulopwana ole aahisiveliwa vanceene ovaanela voohimya sa myaha sa mBiibiliyani. Owo aahimmye so: “Kooviriha iyaakha 8 kikhalaka muttetthe ola, masi nkinaxukuriwe ni Namoona a Yehova”. Vano David onihimya so: “Kihoona wira vaavo nnaaphwanya ahu axineene etthoko ari ene owaani, awo annisiveliwa vanceene owiriyana muhupi nnaalaleerya ahu”.

9. Anamalaleerya akina anipaka exeeni akhala wira vannaavila waaphwanya atthu ari ene owaani?

⁹ Mweereryeke olaleerya mapuro makina. Vaavo ahinaaphwanya aya atthu owaani, anamalaleerya akina anniimananiha olaleerya mittetthe sikina. Mwa ntakiheryo, olaleerya mphironi, olaleerya ni ekarinyu ni moohiilokiherya onninikhaliherya waaphwanya atthu  yaale nihinaaphwanya ahu naalaleeryaka empa ni empa mwaha woowi anikhala ipa nihinwerya ahu okela. Nave anamalaleerya akina, ahoona wira atthu vannaasivela ovaanela ni anneemererya iliivuru sahu vaavo nnaalaleerya ahu opaarki, omerkaatu ni mapuro oneettiwa nakoso. Mutokweene a esirkwiitu a oBolivia oniitthaniwa Floiran ohimmye so: “Hiyo ninnirowa olaleerya omerkaatu ni mapuro makina oneettiwa nakoso okhuma 13 oora mpakha 15 oora. Okathi owo, ale anitumiha khanaattana makiliyenti. Nto ninnivaanela oratteene ni atthu awo ni ninnipaceriha soosoma sa Biibiliya”.

10. Inamuna xeeni mukhanle anyu oorumeela wira mwaaphwanye atthu?

¹⁰ Murumeeleke enamuna ekina. Nuupuwele wira nyuwo munnimananiha omphwanya mutthu ori ene owaani ikwaha sinceene. Woonasa wene, nyuwo munnirowa etthoko eyo okathi woovirikana masi khamunimphwanya mutthu. Niireke yookhala etthu ekina mukhanle anyu oopaka wira mumphwanye mutthu? Murokora oniitthaniwa Katarína onihimya so: “Miyo kinnaalepela ikarta atthu ale kihinaaphwanya aka ari ene owaani. Nto kinlepa etthu kaarowa aka waaleela vaakhanle wira kaahaaphwanya”. Ntakiheryo nna ninniixuttiha exeeni? Okathi munlaleerya anyu, mwiimananiheke waalaleerya atthu otheene a muttetthe anyu. Akhala wira khamunwerya olavula ni atthu awo murumeelaka enamuna emosa, mweereryeke enamuna ekina.

11. Xeeni atthu akina ahiniphavela aya owiriyana muhupi nnaalaleerya ahu?

¹¹ Atthu akina khaniphavela owiriyana muhupi nnaalaleerya ahu. Awo anuupuwela wira khahiyo etthu ya faita omusuwela Muluku ni  Biibiliya. Nave, okhala wira khasireere mixankiho moolumwenkuni, atthu akina khanimukupali Muluku. Atthu akina khaniphavela owiriyana itthu Biibiliya onihimya awe mwaha woowi aniweha itthu soohiloka sinipakiwa ni ahooleli a itiini. Atthu akina annixanka vanceene mwaha wa muteko aya, imusi saya ni mixankiho sikina ni anuupuwela wira Biibiliya khoniwerya waakhaliherya. Nto nihaana opaka exeeni wira nihihiye ohakalala hata atthu nnaalaleerya ahu ahiphavelaka oniwiriyana?

12. Ovarihela muteko malakiheryo ari aFilipi 2:4, anrowa onikhaliherya sai naalaleeryaka?

¹² Mwaathokoreryeke saana atthu akina. Atthu akina wanipacerya yahaaphavela owiriyana ihapari sooreera, yaahirukunuxa moonelo aya nuumala woona wira ninnaathokorerya oratteene. (Mmusome aFilipi 2:4.) Mwa ntakiheryo, David nimulavunle ahu wanipacerya ohimmye so: “Vaavo mutthu onihimya awe wira khoniphavela, ninnimpweha Biibiliya ni iliivuru sahu nnamukoha wira: ‘Naaphavela osuwela, etthu xeeni eniwiirihani wuupuwela siiso’”. Atthu akina annoona akhala wira ninnaathokorerya oratteene. Awo pooti ohuupuwela etthu naahimmye ahu, masi animuupuwela moota naathokorerye ahu. Hata mwaneene etthoko ohimyaka wira khoniphavela olavula ni hiyo, mukhalelo ahu ni ethoi ahu, nnimooniherya akhala wira ninnimuthokorerya saana wala nnaari.

13. Nipakeke exeeni wira muhupi ninlaleya ahu waavareke murima atthu a makhalelo otheene?

¹³ Ninnooniherya wira ninnaathokorerya saana atthu akina, naalaleeryaka moovarihana ni mukhalelo aya. Mwa ntakiheryo, niireke vatthokoni-vo yookhala etthu enooniherya wira mutthu owo ookhalana anamwane? Woonasa wene, paapa wala maama, sinoomusivela miruku sa mBiibiliyani sinihimya moota wowaahuwa anamwane wala moota wookhalana etthoko yoohakalala. Niireke vamukhora va mutthu owo, khasireere ikhattiyatto? Akhala wira ti siiso, vaamuloka olavula voohimya sa ikrime ni omooniherya moota ikrime iyo siniwiiriha aya atthu woova. Nuumala-vo, mmuleeleke wira ikrime iyo sinoomala. Woonasa wene, mwaneene etthoko onoohakalala osuwela wira Biibiliya onnileiherya wira ikrime sinoomala. Nto okathi wotheene nwooniheryeke atthu awo wira malakiheryo a mBiibiliyani animwaakhaliherya. Katarína nimulavunle ahu onihimya so: “Miyo kinnimananiha wuupuwela moota ekeekhai ya mBiibiliyani ekikhalihenrye aya orukunuxa okumi aka”. Nto, okathi Katarína onaalaleerya awe atthu, onniimananiha waakhaliherya woona wira Biibiliya onimwaakhaliherya mookumini mwaya.

14. Moovarihana ni Miruku 27:17, mutthu ninlaleeryana ahu orowa onikhaliherya sai?

¹⁴ Mweemereryeke okhaliheriwa ni atthu akina. Murummwa Paulo, aahimwiixuttiha Timootheyo inamuna soolaleerya ni wiixuttiha. Nave aahimutumererya orumeela inamuna iyo wira aakhaliherye atthu akina. (1 aKor. 4:17) Ntoko Timootheyo, anna ni arokora arina sookumanana sinceene a muloko ahu anoowerya oniixuttiha itthu sinceene. (Musome Miruku 27:17.) Nwehe yowiiraneya ya munna oniihaniwa Shawn.Owo aahiviriha okathimunceene olaleeryaka muttetthe mwaamukhaani. Muttetthe yoowo atthu anceene yaasiveliwa aya etiini aya. Etthu xeeni yaamukhalihenrye ohihiya ohakalala vaavo aalaleerya awe? Owo onihimya so: “Okathi wotheene kaaniimananiha olaleerya ni mutthu mukina. Nto vaavo naarowa ahu empa ekina naanivaanela moota woolokiherya inamuna sahu sa wiixuttiha. Mwa ntakiheryo, okathi naakhuma ahu empa emosa nirowaka empa ekina, naanivaanela enamuna naamulalenrye ahu mutthu ole. Nto naaniweha enamuna naakhanle ahu oolokiherya enamuna ele naamulalenrye ahu”.

15. Xeeni vari aya vooloka ovekela naarowaka olaleerya?

 ¹⁵ Munvekeleke Yehova nikhaliheryo. Khula okathi munrowa anyu olaleerya, muhaana onvekela Yehova malakiheryo. Khuuvo mutthu okhanle oolaleerya oratteene ohikhaliheriwaka ni munepa woowaarya wa Muluku. (Esal. 127:1; Luka 11:13) Vaavo munivekela anyu, mulavuleke mooluluwanya. Munvekeleke Yehova wira ookhaliheryeni omphwanya mutthu oniphavela owiriyana itthu munrowa anyu omwiixuttiha. Nuumala-vo, muhaana opaka ele muniwerya anyu mmulaleeryaka khula mutthu munimphwanya anyu.

16. Yoosoma ahu ya Biibiliya, ennikhaliherya sai naalaleeryaka?

¹⁶ Mphaveleke okathi wira mpake yoosoma anyu. Biibiliya onihimya wira: “Musuweleke oratteene etthu Muluku oniphavela awe, yeeyo eri yooreera, yookhalela ni yoomalela”. (aRom. 12:2) Vaavo nimmusoma ahu Biibiliya, ninnimusuwela oratteene Yehova. Nto vaavo nnaalaleerya ahu atthu akina, awo annoona wira ninnikupali ele ninwiixuttiha ahu. Katarína nimulavunle ahu oniihimya so: “Okathi vakhaani ovinre, miyo kaahoona wira kaahaana olipiha waamini waka soowiixuttiha soopacerya sa Biibiliya. Nto kaahipacerya osoma oratteene itthu sinooniherya wira ookhala Mpattuxa, wira Biibiliya Nuulumo na Muluku ni wira Muluku ookhalana mutthenkeso awe valaponi”. Katarína ohimmye wira omusoma Biibiliya woomukhaliherya olipiha waamini wawe ni wuncererya ohakalala wawe aalaleeryaka.

17. Xeeni Yesu aarina awe moonelo wooloka okathi aalaleerya awe?

¹⁷ Yesu khaahiyale okhalana moonelo wooloka voohimya sa muteko woolaleerya nnaamwi atthu akina yahaaphavela owiriyana muhupi aalaleya awe. Mwaha wa xeeni? Mwaha woowi Yesu aanisuwela wira atthu ale yaahaana wiixutta ekeekhai ni aahaana waakhaliherya atthu anceene weemererya muhupi wa Omwene. Nave aanisuwela wira atthu akina wanipacerya yahaaphavela onwiriyana, nuuvira okathi yaamuturuka moonelo aya. Nkahaya muupuwele etthu yiiraneyale ni emusi ya Yesu. Okathi aalaleerya awe valaponi iyaakha iye tthaaru nnimeya khuuvo muhima awe aari mwiixutti awe. (Yoh. 7:5) Masi nuumala Yesu okhwa ni ohihimuxiwa, awo yaahikhala maKristau.—Mit. 1:14.

18. Xeeni vanireerela aya ohihiya olaleerya?

¹⁸ Hiyo, khaninwerya omusuwela mutthu onrowa weemererya ekeekhai wira omurumeeleke Yehova. Maana onnivira okathi wira atthu akina yeemererye ekeekhai. Hata atthu yaale wanipacerya yahaaphavela oniwiriyana, awo pooti opacerya ‘onvuwiha Muluku’ mwaha wooweha moonelo ni mweettelo ahu wooloka.—1 Ped. 2:12.

19. Moovarihana ni 1 aKorinto 3:6, 7, etthu xeeni ninreerela ahu osuwela?

 ¹⁹ Hiyo, ninnisuwela wira muteko ahu waala ni okhuwari ni ninnisuwela muteko Yehova onivara awe vaavo ninlaleerya ahu. (Mmusome 1 aKorinto 3:6, 7.) Munna a wEthiyopia oniihaniwa Getahun onihimya so: “Saahivira iyaakha sinivikana 20 kiri ene Namoona a Yehova mekhaka muttetthe wahaalaleeriwe vanceene. Masi vano, aakhala anamalaleerya 14. Anamalaleerya 13 aapatisiwa, waahela muhina amwaaraka ni aniihu araru. Atthu anivikana 32 anniweha mithukumano khula esumana”. Getahun onnihakalala vanceene opixa murima omulipelelaka Yehova waakhaliherya atthu akina wiirela mpantta mutthenkeso awe!—Yoh. 6:44.

20. Xeeni ohimyaka wira muteko ahu onoolikana ni ekiipa eniwoopola atthu?

²⁰ Yehova onnaavaha efaita atthu otheene. Nave oonivaha eparakha yoovara vamosa ni Mwanawe naatthukumanyaka atthu a maloko otheene ohinatthi olumwenku ola omala. (Hag. 2:7) Muteko ahu woolaleerya, onoolikana ni ekrupu ya atthu eniwoopola atthu. Nto hiyo nri ntoko atthu aniirela mpantta ekrupu ya atthu enrowa owoopola atthu ari vamiinani. Pooti wira atthu akina a ekrupu eyo anoowoopola atthu vakhaani. Masi hata vari siiso, muteko owo ovariwe ni atthu otheene ni wookhalana efaita yinceene. Etthu emosa-ru, enniiraneya ni muteko ahu woolaleerya. Khaninwerya osuwela oratteene nummuru na atthu ninrowa ahu owerya owoopola olumwenku ola wa Satana. Masi ninnisuwela wira Yehova pooti omuruma khula mmosa a hiyo wira aakhaliherye atthu awo. Munna oniihaniwa Andreas onikhala oBolivia, onihimya so: “Miyo, kinoona wira khula mutthu oniixutta ekeekhai ya mBiibiliyani ni onapatisiwa, muteko owo ovariwe ni atthu otheene”. Nto otheene ahu, nihaana okhalana moonelo owo naalaleeryaka. Akhala wira nnoopaka eyo, Yehova onooreeliha muteko ahu woolaleerya ni nnoohakalalaka vanceene.