1. მუ მაგალით მეჩჷ იესოქ მუშ მიმაჸუნალეფს დო მუ აკეთეს თინეფქ? (ქოძირით სურათ გალენ გვერდის)

იესოს დედამიწას მსახურებაშ დროს ვა უდინუაფ დადებით განწყობა დო თის ოკო, მუშ მიმაჸუნალეფ ხოლო თაშ რდან (იოან. 4:35, 36). მუჟამსით თინა მუშ მოწაფეეფწკუმა ართო რდჷ, თინეფ ენთუზიაზმით ქადაგენდეს (ლუკ. 10:1, 5—11, 17). მარა იესოშ ჭოფუა დო ღურაშ უკულ მოწაფეეფს ჭიჭე ხანით მეუდინეს ქადაგებაშ სურვილქ (იოან. 16:32). მუჟამსით გეთელ, იესოქ ელუჩ თინეფს, ნამდა ყურადღება ქადაგებაშა გეგნუღალდესკო. შედეგო, თიშ ზეცაშა ულაშ უკულ მოწაფეეფ თიცალ მონდომათ ქადაგენდეს, ნამდა მუნეფიშ ნტერეფქ უწუეს: „თქვა თქვან გურაფათ გეიოფშით იერუსალიმ“ (საქ. 5:28).

2. მუჭო აკურთხჷ იეჰოვაქ სამქადაგებლო საქმე?

² პირველ საუკუნეშ ქრისტიანეფიშ საქმიანობას იესო ხემძღვანელენდჷ დო იეჰოვაქ ხოლო აკურთხჷ თინეფ. შედეგო, ბრელქ მიღჷ ჭეშმარიტება. მაგალთო, ახ. წ. 33 წანაშ 50-ა დღაშ დღესასწაულს სოდგარენ 3 000 კოჩიქ ინათ (საქ. 2:41). მოწაფეეფიშ რიცხვის მანგარო აძინუდ (საქ. 6:7). მარა იესოქ იწინასწარმეტყველ, ნამდა სამქადაგებლო საქმე ბოლო დღალეფს ხოლო უმოს წარმატებულ იჸუაფუდ (იოან. 14:12; საქ. 1:8).

3, 4. მუშენ შილებე რთულ რდას ნამთინე ტერიტორიას მსახურება დო მუს გუვარჩიენთ თე სტატიას?

³ ჩქი, არძა, ვოცადუთ, ვა ვოდინუათ დადებით განწყობა მსახურებას. რე თიცალ ტერიტორიეფ, სოდეთ თენა ადვილ რე, მუშენდა თექ თიზმას ოკო ბიბლიაშ გურაფაშ დოჭყაფა, ნამდა ნამთინეს ოჯინე აფჷ, სოიშახ იეჰოვაშ მოწმეეფ ვა მიჩომილუანა თიშა მიოულარო! მარა შხვა ტერიტორიეფს მაუწყებელეფშო ქადაგება ვა რე ადვილ, მუშენდა ხალხ  იშვიათო ხვადუნა ჸუდეს დო მიდგას ძირნან თინეფ ხოლო, ნაკლებო გიმირჩქინანა ინტერესის ბიბლიაშ მიმართ.

⁴ მსახურება რთულ რენ ფერ ტერიტორიას ქოცხოვრენთ-და, თე სტატიას მოჩამილ რჩევეფქ შილებე მიგეხვარან. ჩქი გუვარჩიენთ, მუ აკეთ ნამთინექ, ნამდა მსახურებას უმოს ხალხ ქოძირკო დო ქიგებგენთ, მუშენ ოკო ვა ვოდინუათ დადებით განწყობა, თიშ უმკუჯინუო, ღებულენს დო ვარ ხალხ ჩქინ ცნობას.

5. მუ სირთულეეფს შეხვადუ ბრელ მაუწყებელ?

⁵ ბრელ მოწმეშო უმოსო ირთულებ კარდოკარ ადამიანეფიშ ძირაფა. ნამთინე მაუწყებელ თიცალ ტერიტორიას ცხოვრენს, სოდეთ მანგარ დაცულ ბინეფ დო იზოლირებულ დასახლებეფ რე. მაგალთო, თექ შილებე გერდას ყარულ, ნამუთ ვემნაშქვანს თის, მით ვა რე თექიან მახორუ ვარდა ვა უღჷ მინულაშ ნებართვა. შხვა მაქადაგებელეფს თეცალ სირთულეეფიშ უმშო შეულებნა კარდოკარ მსახურება, მარა თინეფს ნაკლებო ხვადუ ხალხ ჸუდეს. ნამთინე ხოლო თიცალ სოფელეფშა გილურს, სოდეთ ხვალე მუსხირენ ოჯახ ცხოვრენს. თინეფ შილებე შორშა მიშან ოქადაგებშა, მარა მობინადრექ ვა დოხვადას ჸუდეს! თეცალ სირთულეეფ ქომღუნან-და, ქადაგება ვემვოტუათ. მუშ კეთება შემლებნა, ნამდა გივორჯგინათ თეჯგურა დაბრკოლებეფს დო მიღდან შედეგიან მსახურება?

6. მუჭო გჷ მაუწყებელ მეჩხომეს?

⁶ იესოქ სამქადაგებლო საქმე ჩხომუას შეადარ (მარ. 1:17). ნამთინე მეჩხომე შილებე მუსხირენ დღას გილეშას ოჩხომშა დო ჩხომქ ვა ჭოფინას, მარა თინა აგრძელენს ჩხომუას დო თირანს დროს, ადგილს დო მეთოდის. ჩქი შემლებნა მსახურებაშ დროს ხოლო თაშ მიფქცუათ. გუვარჩუათ, მუშ კეთება შემლებნა.

7. მუ შედეგიქ შილებე მაჸუნას მსახურებაშო დროშ თირუას?

⁷ ქეცადით, დოგორათ მოხუჯურ დრო, ნამდა ქოძირათ ხალხ. ჩქი უმოს მეტ ადამიანს ქეშეფხვადუთ, თიცალ დროს ქიმვაკითხანთ-და, მუჟამსით უმოსო შილებე ქუდოფხვადან. მუდგარენ დროს ხომ არძა ირთუ ჸუდეშა! ბრელ და დო ჯიმაშო პრაქტიკულქ იჸუ ნაონდღერს დო ონჯუას ქადაგებაქ, მუშენდა თე დროს უმოსო ორწყენა ხალხის. თეს გეძინელ, თეცალ დროს მობინადრეეფ შილებე უმოს მოსვანჯელეფ რდან დო ჩიებაშ სურვილ ხოლო უღდან. შილებე ართ უხუცესიშ, დეივიდიშ, რჩევაშ გიმორნაფაქ გემგოდირთან. მუჭოთ თინა იჩიებ, უბანს ართ ვარდა ჟირ საათიშ ქადაგებაშ უკულ პარტნიორწკუმა ართო კინ მეურს თი ჸუდეეფშა, სოდეთ პირველ მეულაშ დროს ვა დოხვადეს. დეივიდი იჩიებ: „გაკვირვებულ ვორექ, მუსხი მობინადრე ფხვადნა ჸუდეს მაჟიაშა მეულაშ დროს“. *

8. მუჭო შემლებნა მსახურებას ეკლესიასტეშ 11:6-იშ გიმორნაფა?

⁸ ჩქი ოკო ვემვოტუათ კარდოკარ ხალხიშ გორუა. თე სტატიაშ მთავარ მუხლ ხოლო თეს გუმოშინანა (წეკითხით ეკლესიასტეშ 11:6). ჟიშე მოშინაფილ დეივიდის ვა დურკებ მონდომა. ართ-ართ ჸუდეშა მუსხირენ მეულაშ უკულ თის საბოლათ ქუდოხვადეს. მობინადრექ დეინტერეს ბიბლიაშ გურშენ ჩიებათ დო თქუ: „სოდგარენ ბრუო წანა რე, მუთ თაქ ფცხოვრენქ, მარა დიო ნამთინ იეჰოვაშ მოწმეს ვეშეფხვალამუქ ჩქიმ კარწკუმა“. დეივიდი იჩიებ: „ვორწყექ, ნამდა მუსხირენ მეულაშ უკულ, მუჟამსით საბოლათ ქეშეხვადუქ მობინადრეეფს, თინეფ უმენტაშო ირჩქილუანა ჩქინ ცნობას“.

9. მუ აკეთ ნამთინე მაუწყებელქ, ნამდა ქოძირკო თიცალ ადამიანეფ, მიდგას ჸუდეს ნაკლებო შეხვადნა?

 ⁹ ქეცადით, იქადაგათ შხვადოშხვა ადგილს. ნამთინე მაუწყებელქ დოთირუ ოქადაგებელ ტერიტორია, ნამდა ქოძირკო თიცალ ადამიანეფ, მიდგას ჸუდეს ნაკლებო შეხვადნა. მაგალთო, ქუჩას დო სტენდეფით ქადაგებაქ ეფექტურ მეთოდიქ იჸუ, თიცალ ადამიანეფიშ ოძირაფალო, მით დიდ კორპუსეფს ცხოვრენს, სოდეთ მოწმეეფს ოქადაგებშა მინულაშ ნებართვა ვა უღნა. თენა საშვალებას არზენს თინეფს, პირისპირ ქუდურაგადუან თიცალეფს, მიდგა შილებე შხვა დროს ვა ძირესკო. თეს გეძინელ, ბრელ მაუწყებელქ ქოძირ, ნამდა ადამიანეფ პარკეფს, ბაზრობეფს დო საქმიან უბანეფს უმოსო ეიაჸუნუნა ჩიებას დო ღებულენა ლიტერატურას. ფლოირენი, რაიონულ ზედამხედველ ბოლივიაშე, იჩიებ: „ჩქი ბაზრობეფშა დო საქმიან უბნეფშა მევურთ 13:00-შე 15:00 საათშახ პერიოდის, მუჟამსით მოვაჭრეეფ ნაკლებო რენა დაკავებულ. უმენტაშო ჯგირ ჩიებეფ მიღნა დო ბიბლიაშ გურაფეფს ხოლო იბჭყანთ“.

10. მუ მეთოდეფ შეილებნა გიმირინუათ, ნამდა დეკავშირათ ადამიანეფს?

¹⁰ ქეცადით, გეგმირინუათ შხვადოშხვა მეთოდ. წერმიდგინით, ნამდა მუსხირენშა ეცადით პიროვნებაწკუმა დაკავშირებას. მაგალთო, მიაკითხეთ შხვადოშხვა დროს, მარა იშენით ვა დორხვადეს ჸუდეს. ხოლო მუ მეთოდიშ გიმორნაფა შეილებნა? ართ და, კატარინა, იჩიებ: „თიცალ პიროვნებეფს, მით ჸუდეს დღას ვა ფხვადუ, მებჭარუნქ თის, მუდგაშ რაგად პირისპირ მოკოდ“. მუს ბგურაფლენთ კატარინაშ მაგალითშე? ირნერ საშვალება გეგმირინეთ, ნამდა დეკავშირათ თქვან უბანს მახორუ ადამიანეფს.

11. მუშენ ვაინტერეს ნამთინეს თინა, მუდგას ჩქი გინოფჩანთ?

¹¹ ნამთინეს ვაინტერეს თინა, მუდგას ჩქი გინოფჩანთ. თინეფ ფიქრენა, ნამდა ღორონთ დო ბიბლია ვასაჭირნა. თეს გეძინელ, ვა წანა ღორონთიშ, მუშენდა მსოფლიოს ბრელ ტანჯებას ორწყენა. თინეფს ვაინტერესნა ბიბლია თვალთმაქცობაშ გურშენ, მუდგას თი რელიგიურ ლიდერეფ გიმირჩქინანა, მით აცხადენა, ნამდა თე წიგნიშ თანახმას ცხოვრენა. შხვეფ გინოჸუნელ რენა სამუშას, ოჯახის ვარდა პირად პრობლემეფს დო ვარწყენა, მუჭო შეულებ ბიბლიას თინეფიშ მოხვარა. მუჭო შემლებნა ვა ვოდინუათ ხიოლ, მუჟამსით თინეფ, მიდგას ვუქადაგუთ, ვაფასენა ჩქინ ცნობას?

12. მუჭო მიმეხვარებნა მსახურებას ფილიპელეფიშ 2:4-ის მოჩამილ სიტყვეფიშ მეჸუნა?

¹² გეგმირჩქინით პირად ინტერეს. ბრელქ, მიდგაქ პირველო ვემირჩქილუ სახიოლო ამბე, უმოს გვიანო, მუჟამსით მაუწყებელშე პირად ინტერეს ქიგინ, მიღჷ თინა (წეკითხით ფილიპელეფიშ 2:4). მაგალთო, ჟიშე მოშინაფილ დეივიდი იჩიებ: «მუჟამსით მიდგარენ მირაგადნა, ნამდა ვაინტერეს, ჩქი ბიბლიას დო ლიტერატურას ჩანთაშა ალებდვანთ დო ვოკითხუთ: „ირო თაშ ფიქრენდითო?“». ხალხ გინაფლენს, მუჟამსით თინეფიშ მიმართ ყურადღებას გიმირჩქინანა. თინეფს შილებე გაჭყორდან მუშ გურშენ ვეჩით, მარა ვა გაჭყორდუნა ჩქინ გიმორჩქინელ გულწრფელ ინტერეს. თიმწკუმა ხოლო, მუჟამსით მობინადრე ჩიებაშ საშვალებას ვა მარზენა, ჩქინ დამოკიდებულება დო სახეშ გამომეტყველებათ შემლებნა ვოძირათ, ნამდა გულწრფელო ვორეთ თით დაინტერესებულ.

13. მუჭო შემლებნა ფთირუათ ორაგადე თითოულ მობინადრეშ საჭიროებეფიშ მიხედვით?

¹³ პირად ინტერესის თიმწკუმა გიმიფრჩქინანთ, მუჟამსით ჩქინ ორაგადეს მობინადრეშ საჭიროებეფიშ მიხედვით ფთირანთ. მაგალთო, მუთუნ თიცალს ხომ ვა ვორწყეთ, სოვრეშეთ იძირე, ნამდა თე ჸუდეს ბაღანეფ ცხოვრენა? მშობლეფქ შილებე დეინტერესან ბაღანეფიშ რდუალაწკუმა ვარდა ბედნერ ოჯახურ ცხოვრებაწკუმა დაკავშირებულ პრაქტიკულ რჩევეფით, ნამუთ ბიბლიას რე მოჩამილ. მობინადრეშ კარს მუსხირენ ოკილარ ხომ ვა უღჷ? ჩქი შილებე გინობჭყვიდათ, ნამდა ქივეჩუათ მსოფლიოს მოდვალირ დამნაშავეობა დო შიშიშ გურშენ, მუდგაშ უკულ მობინადრეს შილებე სურვილქ გურჩქინდას, ქიგეგას, მუ რე გამოსავალ. არძანერ სიტუაციაშ დროს ეცადით, ქაძირუათ თინეფს, მით გირჩქილენა, მუჭო შეულებ ბიბლიას თინეფიშ მოხვარა. კატარინა, ნამუთ ჟიშე მიფშინეთ, იჩიებ: „გუმაშინე, მუჭო  თირუ ჩქიმ ცხოვრება უჯგუშობაშა ჭეშმარიტებაქ“. შედეგო, კატარინა ბოლოშა რე დარწმუნებულ თიშა, მუდგას იჩიებ დო თეს შხვეფ ხოლო ორწყენა.

14. იგავეფიშ 27:17-ის მოჩამილ პრინციპიშ თანახმას, მუჭო შეულებნა პარტნიორეფს ართიანიშ მოხვარა?

¹⁴ მიღით მოხვარა შხვეფშე. პირველ საუკუნეს პავლექ ტიმოთეს დაგურუ ქადაგებაშ დო გურაფაშ მეთოდეფ დო ელუჩ, ნამდა შხვეფშა ხოლო ქუდუგურუაფუდკო (1 კორ. 4:17). ტიმოთეცალო, ჩქი ხოლო შემლებნა დიბგურუათ გამოცდილ და დო ჯიმალეფშე (წეკითხით იგავეფიშ 27:17). გუვარჩუათ ართ ჯიმაშ მაგალით, ნამდგას შონი ჯოხო. მუსხირენ ხანს თინა პიონერო მსახურენდჷ დაშორებულ სოფელეფს, სოდეთ ხალხიშ უმენტაშის აკმაყოფილენდჷ მუნეფიშ რელიგია. მუ აკეთ თიქ, ნამდა ვადინუკო ხიოლ? შონი იჩიებ: „მუჟამსით შეიოლებერ რდჷ, პარტნიორწკუმა ართო მიფშჷ მსახურებაშა. ჩქი სოიშახ ართ ჸუდეშე მაჟია ჸუდეშა მიფშით, ართიანს გურაფაშ უნარეფიშ გაუჯგუშებას ვოხვარუდით. მაგალთო, იფჩიებუდით, მუ მიწის მობინადრექ დო მუჭო ვუპასუხით ჩქი. თეშ უკულ ვარჩიენდით, თეცალ სიტუაციას კინ ქეშეფხვადუდით-და, მუჭო შემლებდეს შხვანერო ვუპასუხითკო“.

15. მუშენ უკინებ ლოცვას მნიშვნელოვან ადგილ ჩქინ მსახურებას?

¹⁵ ქოთხით იეჰოვას მოხვარა. მიენდით იეჰოვაშ ხემძღვანელობას ირიათო, მუჟამსით მსახურებას რეთ. თიშ ძალიერ წმინდა შურიშ მოხვარაშ უმშო, ნამთინს ვეშმალებენა მუთუნნერ საქმეშ კეთება (ფსალმ. 127:1; ლუკ. 11:13). მუჟამსით ლოცულენთ, კონკრეტულ საკითხშე ქუდურაგადეთ იეჰოვას. მაგალთო, ქოთხით, დუგოგორაფუან თიცალ ადამიანეფ, მით სწორას რე განწყობილ დო მზათ რე მარჩქილაფარო. თეშ უკულ იმოქმედით ლოცვაშ თანახმას დო ქუქადაგით არძას, მიდგას შეხვადუთ.

16. მუშენ რე ჩქინ მსახურებაშო პირად გურაფა მნიშვნელოვან?

¹⁶ დრო გეგმურთით პირად გურაფას. ღორონთიშ სიტყვა იჩიებ: ქინანჭით „ღორონთიშ ნებას, ნამუთ რე ჯგირ, მოსაწონ დო სრულყოფილ“ (რომ. 12:2). მუთ უმოსო დარწმუნებულ ვორეთ, ნამდა მიჩქნა ჭეშმარიტება ღორონთიშ გურშენ, თით უმოს დამაჯერებელო ვეჩიებუთ შხვეფს მსახურებას. ჟიშე მოშინაფილ კატარინა იჩიებ: „ჭიჭე ხანიშ წოხოლე ქიმეფხვად, ნამდა ნამთინე ძირითად ბიბლიურ გურაფეფიშ მიმართ რწმენაშ გამანგარება მოსაჭირუდ. ათეშენ დეტალურო გეგმიბრკვი თიშ მტკიცებულებეფ, ნამდა გუმაჭყაფალ არსებენს, ბიბლია დასურო ღორონთიშ სიტყვა რე დო ღორონთის უღჷ ორგანიზაცია, ნამუთ თიშ წარმომადგენელ რე“. კატარინა გეუძინანს, ნამდა პირად გურაფაქ გამანგარ თიშ რწმენა დო მსახურებას უმოს ხიოლ მოუღ.

17. მუშენ ვა უდინუაფ იესოს დადებით განწყობა მსახურებას?

¹⁷ იესოს ვემუდინუაფ დადებით განწყობა დო ვემუტებ ქადაგება თიშ უმკუჯინუო, ნამდა ნამთინე ვერჩქილუანდჷ თიშ ცნობას. იესოს არჩქილედ, მუჭო ოსაჭირუდ ხალხის ჭეშმარიტებაშ გაგება დო ოკოდ, მუთ შილებე ბრელს მეხვარკო, მიღესკო სამეფოშ ცნობა. იესოს თინა ხოლო უჩქუდ, ნამდა ნამთინექ, მით დუდშე ვერჩქილუანდჷ, შილებე უმოს გვიანო დითირკო დამოკიდებულება. დეფიქრით იესოშ ოჯახიშ შემთხვევაშე. სუმ წანა დო გვერდიან მსახურებაშ დინახალე მუშ ნამთინ ჯიმა ვეგნორთე თიშ მოწაფეთ (იოან. 7:5). მარა იესოშ გათელებაშ უკულ თინეფქ ქრისტიანეფო გინირთეს (საქ. 1:14).

18. მუშენ ვაგრძელენთ ქადაგებას?

¹⁸ ჩქი ვამჩქუნა თინეფშე, მიდგას ვოგურუანთ, საბოლათ მი გინირთუ იეჰოვაშ  მსახურო. ნამთინეს უმოს მეტ დრო ოსაჭირ ჭეშმარიტებაშ დაგურაფალო. თინეფ ხოლო მით ვამრჩქილენა, ორწყენა ჩქინ ჯგირ დამოკიდებულებას დო დადებით განწყობას დო საბოლათ შილებე „განადიდან ღორონთ“ (1 პეტ. 2:12).

19. მუჭოთ 1 კორინთელეფიშ 3:6, 7-ის ჭარჷ, მუ ოკო მარჩქილედან?

¹⁹ მართალ რე, ჩქი ბრგუნთ დო ბწყარუნთ, მარა ოკო მარჩქილედან, ნამდა ღორონთ რდუნს (წეკითხით 1 კორინთელეფიშ 3:6, 7). ართ ჯიმა, გეთაჰუნი, ნამუთ ეთიოპიას მსახურენს, იჩიებ: „20 წანაშე მეტ ხანს, თიცალ ტერიტორიას ფცხოვრენდჷ, სოდეთ იშვიათო ქადაგენა დო ხვალე მა ვორდჷ იეჰოვაშ მოწმე. მარა ასე თექ 14 მაუწყებელ რე, სოვრეშეთ ვითოსუმქ დინათ, თინეფ შქას ჩქიმ ოსურქ დო სუმხოლო სქუაქ. ასე ჩქინ შეხვალამეფს საშვალოთ 32 კოჩ ოსწრჷ“. გეთაჰუნი ბედნერ რე, მუშენდა თის ვემუტებ მსახურება თიმწკუმა ხოლო, მუჟამსით მოთვინებათ უჯინედ იეჰოვას, ნამდა ჯგირ გურიშ ადამიანეფ მუშ ორგანიზაციაშა ქუმუჸონაფუდკო (იოან. 6:44).

20. მუ გაგებათ ბგუთ მაშველეფს?

²⁰ იეჰოვაშო არძა ადამიან ძვირფას რე. თინა მარზენა პატის, მუშ სქუაწკუმა ართო დო შხვადოშხვა ეროვნებაშ ადამიანეფწკუმა გაერთიანებულო ივმსახურათ თე ქვეყნიერებაშ განადგურებაშახ (ანგ. 2:7). ქადაგება შილებე შევადარათ სამაშველო საქმიანობას. ჩქი ბგუთ თი მაშველეფს, მით მაღაროს მითოსქილადირ ხალხიშ გინასქილიდაფარო რენა გოტებულ. შილებე ხვალე მუსხირენ მაშველქ მიოგორუას ნამთინე დაზარალებურს, მარა არძაშ ხანდა მნიშვნელოვან რე. ჩქინ მსახურება ხოლო თეშნერ რე. ჩქი ვამჩქუნა ხოლო მუსხი ადამიანქ შილებე გინოსქიდას სატანაშ ქვეყნიერებაშე. მარა იეჰოვას შეულებ ნებისმიერ გეგმირინუას თინეფიშ მახვარებელო. ბოლივიას მახორუ ანდრეასი იჩიებ: „ვორწყექ, ნამდა, მუჟამსით პიროვნება გურაფლენს ბიბლიას დო ინათუ, თენა მთელ ჯგუფიშ მონდომაშ შედეგ რე“. მორთ ჩქი ხოლო მიღდან თეცალ დადებით განწყობა მსახურებაშ მიმართ. თაშ ქიმიფქციებუთ-და, იეჰოვა მაკურთხენა დო ჩქინ მსახურება დიდ ხიოლს მომღანა.