1. Ana Yesu jwalosisye chisyasyo chamtuli kwa ŵakulijiganya ŵakwe? Ana ŵakulijiganyaŵa ŵatesile yamtuli? (Alole chiwulili chapachikuto.)

YESU jwagawonaga mwakuŵajilwa masengo gakulalichila pandaŵi jiŵaliji pachilambo chapasi. Jwalakwe jwasakagasoni kuti ŵakulijiganya ŵakwe agawoneje masengoga mwakuŵajilwa. (Yoh. 4:35, 36) Yesu ni ŵakulijiganya ŵakwe ŵakamulaga masengo gakulalichila mwakulimbichila. (Luk. 10:1, 5-11, 17) Pandaŵi jele Yesu ŵataŵidwe soni kuwulajidwa, ŵakulijiganya ŵakwe ŵatandite kuwujila panyuma pamasengo gakulalichila. (Yoh. 16:32) Yesu ali ajimwiche kuŵawe ŵalimbikasisye ŵakulijiganyaŵa kuti alalichileje mwakulimbichila. Jwalakwe ali apite kwinani ŵakulijiganyaŵa ŵakamwile masengo mwakulimbichila. Mwamti achimmagongo ŵawo ŵatandite kudandawula kuti, “Jemanja mjenesye yakwiganya yenu mu Yelusalemu mosope.”—Mase. 5:28.

2. Ana Yehofa akamuchisye chamtuli pa masengo getu gakulalichila?

² Yesu jwalongolelaga Aklistu wa m’yaka 100 yandanda pamasengo gakulalichila, soni Yehofa ŵakamuchisye jemanjaji. Yakuyichisya yakwe ŵandu ŵajinji ŵapikanilaga utenga wawo. Mwachisyasyo, pa Pentekosite 33 C.E., ŵandu ŵakwana 3,000 ŵabatisidwe. (Mase. 2:41) Konjechesya pelepa chiŵalanjilo cha ŵakulijiganya chakwelaga mnope. (Mase. 6:7) Yesu jwaliji ali asasile kala kuti m’masiku gambesi ŵandu ŵajinji chachipikanilaga utenga wetu.—Yoh. 14:12; Mase. 1:8.

3-4. Ligongo chichi masengo gakulalichila gakusaŵaga gakusawusya ku madela gane? Ana chitukambilane chichi munganiji?

³ Wosopewe tukusosekwa kola nganisyo syakuŵajilwa pangani ja kulalichila. M’yilambo yine kutenda yeleyi kukusaŵaga kwangasawusya ligongo lyakuti ŵandu ŵajinji akusasachilila kulijiganya Baibulo. Jemanjaji akusayikana pakwembecheya kuti apatikane jwa Mboni sya Yehofa jwakuti ŵajiganyeje. Nambo m’madela gane pachilambopa yikusaŵa yakusawusya kukukamula chenene masengo gakulalichila. Yikusaŵa myiyi ligongo lyakuti ndaŵi syejinji ŵandu ŵangasimanikwa panyumba.Ŵandu ŵane ŵakusasimanikwaga  panyumba ngakusakola chidwi chakuti alijiganye Baibulo.

⁴ Naga akusatama mudela jele masengo getu gakulalichila gali gakusawusya, yajikusala ngani ajino chiyakamuchisye mnope. Chitukambilane yakusatenda abale ni alongo ŵane kuti alalichileje ŵandu ŵajinji. Chitukambilanesoni ligongo lyakwe tukusosekwa kugawona mwakuŵajilwa masengo gakulalichila chinga ŵandu akusapikanila utenga wetu kapena iyayi.

5. Ana ni yakusawusya yapi yakusasimana nayo abale ni alongo?

⁵ Abale ni alongo ŵajinji yikusaŵa yakusawusya kuti ŵasimane ŵandu panyumba. Ŵakulalichila ŵane akusatama m’madela gele nyumba syejinji sikwete chiteteyo chamachili. Nyumba sine akusamŵikaga mlonda jwakusakanya mundu jwine kwinjila naga nganaŵilanjidwa ni msyene nyumbajo. Ŵakulalichila ŵane yikusaŵaga yangasawusya kulalichila nyumba ni nyumba, nambo mnyumba syejinji ngakusiŵasimanaga ŵandu. Ŵakulalichila ŵanesoni akusalalichila ku madela gakumisi kwele nyumba syakwe sikusaŵa syakutalikangana. Ŵakulalichilaŵa akusajenda ulendo welewu kuti akamsimane mundu jumpepe. Nambo yikusasimanikwasoni kuti mundujo nganamsimana panyumba. Naga tukulalichila kumadela mpela gelega ngatukusosekwa kuwujila munyuma. Ana mpaka tumalane chamtuli ni yakusawusya yeleyi kuti tukomboleje kwalalichila ŵandu ŵajinji?

6. Ana masengo gakulalichila mpaka tugalandanye chamtuli ni masengo gakuwulaga somba?

⁶ Yesu jwawanichisye masengo gakulalichila ni mundu jwakuwulaga somba. (Maliko 1:17) Ŵakuwulaga somba ŵane akusakamula masengo mwakulimbichila, nambo pambesi pakwe ni ngapata chilichose. Jemanjaji ŵangawujila munyuma. Mmalo mwakwe akusagamba kuchenga litala lyakuwulajila sombasyo. Akusatenda yeleyi mwakuchenga ndaŵi, malo, soni yida yakusakamulichisya masengo. Myoyo m’wejisoni tukusosekwa kuchengaga matala gakulalichila.

7. Ana pakusaŵa yakuyichisya yamtuli naga tukulalichila pa ndaŵi syakulekanganalekangana?

⁷ Tuchenjeje ndaŵi jakulalichila. Mpaka twalalichile ŵandu ŵajinji naga tukusajawula pandaŵi jakusasimanikwa panyumba. Atamose ŵanduŵa ngakusasimanikwa panyumba, nambope yikusaŵa kuti pana ndaŵi jichasimanikwesoni panyumba. Abale ni alongo ŵane akusayiwona kuti yikusaŵa chenene kulalichila musi kapena ligulo. Ligongo ndaŵi jeleji ŵandu ŵajinji akusaŵa ali panyumba soni akusaŵa ŵakoseka kupikanila utenga wetu. Mpaka tukamulichisyesoni masengo yaŵasasile jwamkulungwa jwamumpingo jwine lina lyakwe David. Panyuma pakuti alalichile ni mjakwe, jwawujilagasoni mu nyumba syanganiŵasimana ŵandu sila. Jwalakwe jwasasile kuti, “Yaliji yakusangalasya ligongo patuwujilesoni twasimanaga achimsyene nyumba ŵala.” *

8. Ana mpaka tukamulichisye masengo chamtuli maloŵe ga pa Jwakulalichila 11:6 patukulalichila?

⁸ Tukusosekwa kulingalingape kuti twasimaneje ŵandu pa nyumba. Mwamti lilemba lyalikulongolela nganiji likutulimbikasya kuti ngatukusosekwa kuwujila munyuma. (Aŵalanje Jwakulalichila 11:6) David jwatumkolasile jula nganaleka kulalichila. Mwamti panyumba jine ŵamsimene msyene nyumba, nambo ali amjendele kwa maulendo gejinji ni ngamsimana. Munduju jwasachililaga kulijiganya Baibulo soni jwatite, “Ndemi akuno chiŵandika yaka 8, nambo panyumba jangu pano nganayicheje ŵa Mboni sya Yehofa.” David jwatite, “Nayiweni kuti patwasimene ŵandu panyumba, akusaŵa ŵakusachilila kuti apikane utenga wetu watukusalalichilaga.”

9. Ana abale ni alongo ŵane atesile chichi pakusaka kwalalichila ŵandu ŵangakusasimanikwa panyumba?

⁹ Tulinjeje kulalichila ku madela gane. Ŵakulalichila ŵane alinjile kuchenga madela gakusalalichilaga ni chakulinga chakuti akombole kwalalichila  ŵandu ŵangakusasimanikwa panyumba. Mwachisyasyo, kulalichila mumsewu soni kukamulichisya masengo mashelefu kuwoneche kuti kuli kwakamuchisya mnope kwalalichila pameso ni meso ŵandu ŵayikusaŵa yakusawusya kwasimana panyumba jawo. Kupwatika pelepa, ŵakulalichila ŵajinji ayiweni kuti ngayikusaŵa yakusawusya kutanda kunguluka ni mundu kapena kumpa mabuku mnopemnope patukulalichila kumsika soni kumalo gakunguluchila. Jwakulolela dela jwine lina lyakwe Floiran, jwa ku Bolivia jwatite, “Tukusajalaga kumsika soni malo gane gakutendela bisinesi, cha mma 1 koloko musi soni 3 koloko ligulo. Pandaŵiji ŵakutenda yamalonda ngakusatanganidwa mnope. Yikusaŵa yangasawusya kutanda kambilana nawo soni kutandikasya majiganyo ga Baibulo.”

10. Ana mpaka tukamulichisye masengo matala gamtuli kuti twalalichile ŵandu?

¹⁰ Tukamulichisyeje masengo matala gane. Tuwanichisye kuti aŵele ali mkumjawulila mundu jwine mwakuwilisyawilisya kuti akamlalichile. Nambo pa maulendo gosope gaŵele alimkujendela mundujo ngakusimanikwa panyumba. Ana pana yindu yine yampaka atende kuti amlalichile mundujo? Katarína jwatite, “Ngusalemba yikalata yakuti ngayilecheje panyumba janganinamsimana mundu. M’chikalatamu ngusalembaga yosope yingamsalile mundujo yikaŵe kuti tusimene pameso ni meso.” Ana tukulijiganya yamtuli pelepa? Tukusosekwa tukamulichisyeje masengo matala gakulekanganalekangana patukulalichila.

11. Ligongo chichi ŵandu ŵane ŵangasaka kupikanila utenga wetu?

¹¹ Ŵandu ŵane ŵangatenda chidwi ni utenga wetu. Mwamti jemanjaji ŵangakuwona kusosekwa kwakuti ammanyilile Mlungu kapena kulijiganya  Baibulo. Jemanjaji ŵangamkulupilila Mlungu ligongo lya yindu yakusakala yayikutendekwa m’chilambochi. Ŵanduŵa akusakanasoni kuti alijiganye Baibulo ligongo akusayiwona yindu yachinyengo yakusatendaga achimlongola ŵawo ŵadini, ŵakusalambuchisyaga kuti akusatendaga yajikusajiganya Baibulo. Ŵandu ŵane akusatanganidwa mnope ni masengo, kusamalila liŵasa soni yindu yine paumi. Yindu yeleyi yikusalepelekasya kumanyilila kuti Baibulo mpaka jakamuchisye. Ana mpaka tutende uli kuti tuŵeje ŵakusangalala naga ŵandu ŵatukusalalichilaga ŵangatenda chidwi ni utenga wetu?

12. Ana maloŵe ga pa Afilipi 2:4, mpaka gatukamuchisye chamtuli patuli mu utumiki?

¹² Tulosyeje kuti tukwanonyela ŵandu ŵatukwalalichila. Patukutenda yindu yakulosya kuti tukwaganichisya ŵandu ŵatukwalalichila, yikusakamuchisya kuti achenje nganisyo syawo ni kutanda kupikanila utenga wetu. (Aŵalanje Afilipi 2:4.) Mwachisyasyo, David jwatumkolasile kundanda kula jwatite, “Pandaŵi jakukana mundu kumlalichila, naga twajigele Baibulo kapena mabuku gane miyala, tukusasunga kaje ni kumsalila mundujo kuti, ‘Sikomo kwejinji ligongo lyakusala nganisyo syawo.’” Ŵandu akusamanyilila naga tukutenda yindu mwakulosya kwaganichisya. Jemanjaji mpaka aliŵalile maloŵe gatwaŵechete, nambo yatwatesile pandaŵi jitwasakaga kwalalichilaji nganaŵa ayiliŵalile. Atamose msyene nyumba ali akanile kukambilana ya m’Baibulo, nambope ngope jetu soni yakutenda yetu mpaka yilosye kuti tukwaganichisya jemanjaji.

13. Ana mpaka tutende uli kuti twayicheje pamtima ŵandu ŵatukwalalichila?

¹³ Tukusalosya kuti tukwaganichisya achimsyene nyumba patukuchenga utenga watukulalichila kuti ukamulane ni mundu jwatusimene najo. Mwachisyasyo, ana pana umboni wawukulosya kuti msyenenyumbajo jwana ŵanache? Naga yili myoyo, jemanjaji mpaka asangalale ni ngani sya m’Baibulo syampaka syakamuchisye kwalela chenene ŵanache ŵawo soni yampaka atende kuti liŵasa lyawo liŵe lyakusangalala. Tuwanichisyesoni kuti ayiche panyumba ja mundu jwine jwaŵisile maloko gejinji palitanga. Patuyiweni yindu mpela yeleyi mpaka tusagule ngani syasikusala ya yindu yachiwawa soni yindu yine yayikwatesya woga ŵandu ŵajinji. Ngani mpela syeleyi mpaka simkamuchisye msyene nyumba kusaka kumanyilila mwayichimalila yachiwawayi. Ndaŵi jilijose jasimene ni mundu jwachidwi amsalileje yampaka atende kuti malangiso ga m’Baibulo gamkamuchisye jwalakwe. Katarína jwatite, “Ngusakumbuchila yawatite usyesyene pakungamuchisya paumi wangu.” Yaŵakumbuchilaga mlongoju yamkamuchisyaga kuti alalichileje mwakusimichisya. Mwamti ŵandu ŵaŵalalichilaga ŵayiwonaga kuti yakuŵecheta jwalakwe yili yisyesyene.

14. Ana lilemba lya Misyungu 27:17, likulosya chamtuli kuti kwenda ni mundu jwine patukwawula kukulalichila kuli kwakamuchisya?

¹⁴ Tukundeje kuti ŵandu ŵane atukamuchisyeje.  M’yaka 100 yandanda, Paulo ŵamjiganyaga Timoteyo matala gampaka akamulichisye masengo pakulalichila. Ŵamlimbikasisyesoni kuti akamulichisyeje masengo matalaga pakwakamuchisyasoni ŵandu ŵane. (1 Akoli. 4:17) Mpela Timoteyo mpaka tulijiganye yindu yejinji kutyochela kwa Aklistu ŵakumanyilila yejinji ŵali mumpingo. (Aŵalanje Misyungu 27:17.) Kwende tukambilane chisyasyo cha M’bale Shawn. Kwandaŵi jelewu jwalakwe jwatendaga upayiniya kumadela ga kumisi kwele ŵandu ŵakwe ŵaliji ŵakwikutila ni yajikusajiganya dini jawo basi. Ana m’baleju jwatesile uli kuti apitilisyepe kulalichila. M’baleju jwatite, “Ndaŵi syejinji najendaga ni mundu jwine pangwawula kukulalichila. Patukutyoka panyumba jine kwawula panyumba jine, twakambilanaga yampaka tutende kuti tujongolele kajiganye ketu. Mwachisyasyo, twakambilanaga yatutite pakumjanga mundu jwatumlalichileje panyumba jatugambile kutyoka kwene. Kaneko ni twakambilanagasoni yampaka tujongolele pachitusimane ni mundu jwine.”

15. Ligongo chichi lipopelo lili lyakusosekwa mnope pamasengo getu gakulalichila?

¹⁵ Apopeleje kwa Yehofa kuti ŵakamuchisye. Ndaŵi jilijose pali mu utumiki amŵendeje Yehofa kuti ŵakamuchisye. Naga Yehofa ali ngakutukamuchisya ni msimu wakwe weswela ni kuti pangali jwampaka akombole kukamula chenene masengoga. (Sal. 127:1; Luk. 11:13) Pakumŵenda Yehofa kuti ŵakamuchisye, amsalileje yisyesyene yakusaka. Mwachisyasyo, mpaka amŵende kuti ŵakamuchisye kupata mundu jwampaka apikanile utenga wetu soni jwali jwakusachilila kulijiganya ya jwalakwe. Kaneko atendeje yindu mwakamulana ni yaŵendileyo pakumlalichila mundu jwalijose jwasimene najo.

16. Ligongo chichi kulijiganya pajika kuli kwakusosekwa mnope patukukamula masengo gakulalichila?

¹⁶ Apateje ndaŵi jakulijiganya pajika. Maloŵe ga Mlungu gakusati, ‘Mpakomboleje kumanyilila yakusaka Mlungu, nipo mmanyilileje yele yili yambone ni yakumsangalasya jwalakwejo.’ (Alo. 12:2) Patukulijiganya pajika ni patukusammanyilila chenene Mlungu. Yeleyi yikusatukamuchisya kuti twasalileje ŵane yakwamba jwalakwe mwakulosya kuti yatukuŵechetayo tukuyikulupilila. Katarína jwatite, “Pali papitile kandaŵi nayiweni kuti ngusosekwa kulimbisya chikulupi changu pa yindu yine yajikusajiganyaga Baibulo. Kaneko natandite kuwungunya maumboni gakulosya kuti yindu yayili mchilambochi pana juŵapayinganyisye soni kuti Baibulo jili Maloŵe ga Mlungu. Nawungunyisyesoni yakuti Mlungu akwete gulu jajikusamanyika ni lina lyakwe.” Katarína jwasasile kuti kulijiganya pajika kwamkamuchisye kulimbisya chikulupi chakwe soni kuti asangalaleje pali mu utumiki.

17. Ligongo chichi Yesu jwapitilisye kuwuwona utumiki wakwe mwakuŵajilwa?

¹⁷ Ana ligongo chichi Yesu jwapitilisye kulalichila atamose kuti ŵandu ŵane nganapikanilaga utenga wakwe? Jwalakwe jwamanyililaga kuti ŵanduŵa akusosechela kulijiganya usyesyene. Yesu jwaliji jwakusachilila kwakamuchisya ŵanduŵa. Jwamanyililagasoni kuti ŵandu ŵaŵakanaga kupikanila utenga wakwe pandanda, mkupita kwandaŵi chachisaka kulijiganya. Aganichisye ya ŵandu ŵane ŵa m’liŵasa liŵapagwile Yesu. Pa achapwakwe wosope ŵa Yesu, pangali juŵaŵele jwakulijiganya jwakwe. (Yoh. 7:5) Nambope Yesu ali ajimwiche ku ŵawe, achapwakweŵa ŵaŵele ŵakulijiganya ŵakwe.—Mase. 1:14.

18. Ligongo chichi tukusosekwa kupitilisya kulalichila?

¹⁸ Patukulalichila ngatukusamanyililaga mundu jwampaka awupochele usyesyene wa m’Baibulo watukusajiganyaga. Ŵandu ŵane pakusapita ndaŵi jelewu kuti atande kulijiganya usyesyene. Nambo yeleyi mpaka yilekangane ni mwampaka atendele mundu jwine. Ŵandu ŵakusakana kupikanila utenga, pakulola ndamo syetu syambone mpaka yakamuchisye kuti atande ‘kumchimbichisya Mlungu.’—1 Pet. 2:12.

19. Mwakamulana ni lilemba lya 1 Akolinto 3:6, 7, ana tukososekwa kumanyilila chichi?

 ¹⁹ Tukumbuchileje kuti patukulalichila soni kwiganya, Mlungu ni jwakusatendekasya kuti mundujo ajawule pasogolo. (Aŵalanje 1 Akolinto 3:6, 7.) M’bale jwine jwakusatumichila ku Ethiopia jwatite, “Kwa yaka yakupunda 20, mbele ndili mkulalichila jikape kudela kwele ngakukusalalichidwa kaŵiliŵili. Nambo kudelaji ŵandu ŵakwana 13 ŵabatisidwe. Pa ŵandu 13 ŵeleŵa papali ŵamkwangu ni ŵanache ŵangu ŵatatu. Mwamti apano mudelaji ŵakulalichila wosope tupali ŵakwana 14. Ŵandu ŵakusasimanikwa pamisongano wiki jilijose akusakwana 32.” M’baleju ali jwakusangalala ligongo lyakuti ŵapitilisyepe kulalichila, kwineku ali mkwembecheya mwakuwusimana mtima kuti Yehofa ŵakamuchisye ŵandu ŵambone mtima kuti ayiche mu gulu jakwe.—Yoh. 6:44.

20. Ana masengo getu gakulalichila gakulandana chamtuli ni masengo gakwakulupusya ŵandu?

²⁰ Yehofa akusiŵawona ŵandu wosope kuti ali ŵakusosekwa. Jwalakwe atupele upile wakukamula masengo yimpepe ni Mwanache jwakwe. Masengo gakwe gali gakwasonganganya ŵandu ŵamitundu josope mbesiji mkanijiyiche. (Hag. 2:7) Masengo getu gakulalichilaga mpaka tugawanichisye ni masengo gakwakulupusya ŵandu. Ŵatukusakamula masengoga tukusalandana ni ŵandu ŵaŵatumile kuti akakulupusye achimjawo ŵali mumgodi. Atamose kuti ŵandu ŵakuŵalanjikape ni ŵampaka twasimane kuti ali chiŵela umi, nambope masengo gampaka tukamulego gali gakusosekwa mnope. Yeleyi yikulandasoni ni masengo getu gakulalichila. Ngatukusamanyilila winji wa ŵandu ŵachachikulupuka pandaŵi jachichijonanjidwaga chilambo cha Satanachi. Yehofa mpaka akamulichisye masengo jwakutumichila jwakwe jwalijose kuti ŵakamuchisye ŵanduŵa. M’bale jwine jwa ku Bolivia, jwatite, “Panam’weni mundu jwalijiganyisye usyesyene soni kubatisidwa, ngusayiwona kuti yeleyi yakomboleche ni chikamuchisyo cha ŵandu ŵajinji.” Myoyo, tukoleje nganisyo mpela sya m’baleju patukukamula masengo gakulalichila. Naga tukutenda yeleyi, Yehofa chachitupa upile soni tuchiŵa ŵakusangalala patukukamula masengo gakulalichila.