1. Mang e kanawo’ nib manigil ni dag Jesus nrayog ni nge folwok pi gachalpen riy, ma mang e rrin’ed? (Mu guy e sasing ni bay u wuru’ e re ke babyor ney.)

NAP’AN ni immoy Jesus u fayleng ma de tal ko machib, ma i athapeg ni manga yigi motoyil e girdi’. Ku aram e n’en ni baadag ni nge rin’ pi gachalpen. (John 4:35, 36) Nap’an ni immoy Jesus rok pi gachalpen ma ri yad ba pasig ko machib. (Luke 10:1, 5-11, 17) Machane tomuren nni kol Jesus ngan li’ nge yim’, me mulan’ pi gachalpen nda kur machibgad u lan ba ngiyal’. (John 16:32) Tomuren nni faseg Jesus ko yam’ me pi’ e athamgil ngorad ni ngar tedan’rad ko machib. Ma tomuren ni sul nga tharmiy, ma aram mi yad machib u fithik’ e pasig me k’aring e pi toogor rorad ni nge lungurad: “A mu guyed iray e n’en ni kam rin’ed! Kam wereged e tin ni gimed be machibnag u gubin yang u Jerusalem.”​—Acts 5:28.

2. Uw rogon ni ke ayuweg Jehovah fare maruwel ni machib?

² I pow’iy Jesus e maruwel ni i rin’ e pi Kristiano ko bin som’on e chibog, me ayuwegrad Jehovah ni ngar yoorgad. Bod nnap’an e Pentekost ko duw ni 33 C.E., ma sogonap’an 3,000 e girdi’ nni taufenagrad. (Acts 2:41) Ma aram mi ri yoor i yan pi gachalpen Jesus. (Acts 6:7) Yugu aram rogon me yog Jesus u m’on riy nra taw ko tin tomuren e rran, ma ra yoor boch e girdi’ ni yad ra motoyil ko fare thin nib fel’.​—John 14:12; Acts 1:8.

3-4. Mang fan ni bay boch e nam nib mo’maw’ e machib riy? Mang e gad ra weliy ko re article ney?

³ Gad gubin ni gad ma guy rogon ni nge dabi mulan’dad ko machib ni gad ma tay. Bay boch e nam nib mo’maw’ ni nge mulan’dad ko machib riy. Mang fan? Bochan e boor e girdi’ ni yad baadag ni ngar filed e Bible. Ere bay boch i yad nthingari son nge  taw ko ngiyal’ nrayog ni nge fil reb e Pi Mich e Bible ngak! Machane bay boch e nam u fayleng nib mo’maw’ e machib riy, ya ba ga’ ni gathi ri bay e girdi’ u tabinaw, ma faanra bay ma gathi ri yad baadag ni ngan weliy murung’agen e Bible.

⁴ Faanra ga be par u bang nib mo’maw’ e machib riy, ma ra ayuwegem e pi n’en yira weliy ko re article ney. Gad ra weliy e n’en ke rin’ boch e walag ya nge yag ni yoor e girdi’ nra machibnaged. Ku gad ra weliy fan ndabi mulan’dad ndemtrug ko be motoyil e girdi’ ngodad fa danga’.

5. Mang boch e magawon ni ma mada’nag boor e Pi Mich?

⁵ Boor e Pi Mich ni yad be guy ni be gel e mo’maw’ riy ni ngar pirieged e girdi’ u tabinaw rorad. Bay boch e walag ni yad ma par ko gin bay boch e apartment riy ndabiyog ni nga yugu ni yan ngay nge boch e naun ni bay e yoror riy. Rayog ni bay e matanag ko pi naun ney ndabi pag e girdi’ ni nge yan nga naun ndawori pi’ be’ ni ma par u rom mat’awrad. Bay boch e nam nib mom ni ma machib e Pi Mich riy u mit e tabinaw, machane ri in e girdi’ ni yad ma pirieg. Ku bay boch e walag ni yad ma machib u yu yang ni buchuuw e girdi’ riy. Rayog nthingar ra milekaggad nib n’uw yang ni yad be nameg taareb e naun, ma yad ra taw ngay ma de moy be’! Faanra gad ma machib u yu yang ni aray rogon, ma dabi mulan’dad. Ere mang e rayog ni ngad rin’ed me yoor e girdi’ ni ngad machibnaged?

6. Uw rogon ni pi tamachib e taareb rogorad ko pi tafita’?

⁶ I taarebrogonnag Jesus fare maruwel ni machib ko maruwel ko pi tafita’. (Mark 1:17) Bay boch e tafita’ nrayog ni nga ranod ko fita’ u lan boor e rran, machane der yag e nig ngorad. Yugu aram rogon ma der ma mulan’rad, ya yad ma thilyeg e ngiyal’ ni nga ranod ko fita’, ara gin ngar fita’gad riy, ara rogon e fita’ ni ngar ted. Ku rayog ni ngad rin’ed e re n’ey u nap’an e machib. Ere chiney e ngad weliyed boch ban’en nra ayuwegdad.

7. Mang angin nra yib ni faan gad ra thilthilyeg e ngiyal’ ni gad ma machib riy?

⁷ Mu thilyeg e ngiyal’ ni ga be machib riy. Faan gad ra machib ko ngiyal’ nib ga’ ni bay e girdi’ u tabinaw, ma boor e girdi’ ni gad ra mada’nag. Ya bin riyul’ riy e gubin e girdi’ ni yad ra sul nga taferad! Boor e walag ni kar guyed nib fel’ ni ngar machibgad ko mithigyal’ ara blayal’ ni bochan e boor e girdi’ ni yad ra pirieg. Maku reb e, rayog ni aram e ngiyal’ nib gapas laniyan’ e girdi’, ma yad ra adag ni ngar nonad ngodad. Fa reb e rayog ni ngam rin’ e n’en ma rin’ reb e piilal ni ka nog David ngak. Ma yog nra n’uw nap’an ni kar machibgow be’ u bang, ma aram mar sulow ko naun ndar piriegew be’ riy ko som’on. Ma gaar, “Gu ma gin nga urngin e girdi’ ni gamow ma pirieg u tabinaw ko yay ni migid ni gamow ra sul.” *

8. Uw rogon ni ngad folgad ko Eklesiastes 11:6 u nap’an e machib?

⁸ Susun e dabi mulan’dad. Ireray e n’en ni gad be fil ko fare kenggin e thin nu Bible ni fan ko re article ney. (Mu beeg e Eklesiastes 11:6. *) David ni faan kan weliy murung’agen e de mulan’. Bay ba naun ni yugu ma sul ngay ma der ma pirieg be’ riy, machane bay borran ni yan ma bay be’ nib pumoon u tabinaw. Re pumoon nem e baadag ni ngan weliy murung’agen e Bible. Ere yog ni gaar, “Sogonap’an meruk e duw ni kug par u roy, ma dawor gu  mada’gow reb e Pi Mich Rok Jehovah.” I gaar David, “Kug guy nnap’an ni ga ra mada’eg e girdi’ u tabinaw rorad, mab ga’ ni yad baadag ni ngar motoyilgad ko n’en gad be machibnag.”

9. Mang e ke rin’ boch e Pi Mich ya nge yag ni ngar nonad ko girdi’ nib mo’maw’ ni ngan piriegrad u tabinaw?

⁹ Mu thilyeg e gin ga ma machib riy. Bay boch e walag ni kar thilyeged e gin yad ma machib riy ya nge yag nra machibnaged e girdi’ nib mo’maw’ ni ngan piriegrad u tabinaw. Bod ni boor e girdi’ ni yad ma par u boch e naun ndabiyog ni ngan yan ngay ko machib ni ke yag ni ngan mada’nagrad u nap’an ni yibe machib u kanawo’ ngu nap’an ni yibe machib ni yibe fanay e cart. Maku reb e, boor e walag ni kar guyed ni baadag e girdi’ ni ngan non ngorad ara ngar feked e babyor u park, nge market, nge tagil’ e siyobay. Floiran ni ma lekag e ulung u Bolivia e yog ni gaar: “Gamad ma yan nga market nge tagil’ e siyobay u thilin e taareb e kolok nge dalip e kolok ni mithigyal’ ko ngiyal’ ni gathi ri boor e girdi’ ni be chuway’. Ba ga’ ni ma yag ni nggu nonad ko girdi’ ni ma maruwel u rom mug tababnaged e fol Bible.”

10. Ku mang e rayog ni ngam rin’ ya nge yag nim pirieg e girdi’?

¹⁰ Mmachib u reb e kanawo’ nib thil. Mu susunnag ni yig ga be sul ni ngam guy be’ ma kub thilthil ngal’an ni ga be yan nga tafen, machane der yag ni ngam mada’gow. Ere gur, ka bay yugu reb e kanawo’ nrayog ni ngam mada’gow riy? I gaar Katarína, “Gu ma yoloy e babyor nggu pi’ ngak e piin nda gur mada’nagrad u tabinaw, mu gog ngorad e n’en gu ra yog ni faanra kug mada’gad.” Mang e gad be fil ko re n’ey? Mu thilthilyeg e kanawo’ ni ga be machib riy, ya nge yag nim mada’nag urngin e girdi’ ko gin ga ma machib riy.

11. Mang fan ni bay boch e girdi’ ndubrad ni ngar motoyilgad ko n’en gad ma machibnag?

¹¹ Bay boch e girdi’ ndubrad ni ngar motoyilgad ko n’en gad ma machibnag. Yad ma lemnag nde t’uf ni ngar nanged Got ara n’en bay u Bible. De mich Got u wan’rad ni bochan e yad be guy ni kaygi yoor e gafgow u fayleng. Dubrad ni ngar filed e n’en bay u Bible ni bochan urngin e kireb ni yad be guy ni be rin’ e pi tayugang’ ko teliw ni yugu aram rogon ni yad ma yog ni yad ma fol ko n’en be yog e Bible. Ma boch e girdi’ e ka yugu ra pared ni yad be lemnag e maruwel rorad, ara tabinaw rorad, ara tirorad e magawon, ma darur lemnaged rogon nrayog ni nge ayuwegrad e Bible. Ere uw rogon ni ngad pared ni gad ba felfelan’ u nap’an ni gad be machibnag e piin nde ga’ fan e machib rodad u wan’rad?

12. Faan gad ra fol ko fare thin ko Filippi 2:4, ma uw rogon nra ayuwegdad u nap’an e machib?

¹² Mu dag ni ga be lemnag yugu boch e girdi’. Boor e girdi’ e som’on e dubrad ni ngar motoyilgad ko fare thin nib fel’, machane me thil e lem rorad u nap’an ni dag reb e walag ngorad nriyul’ ni be lemnagrad. (Mu beeg e Filippi 2:4.) David ni faan kan weliy murung’agen e yog ni gaar, “Faanra yog be’ ndabun ni nge motoyil, ma aram mug sulwegew e Bible ara babyor romow nga kabang me lungumow, ‘Rayog ni ngam weliy fan ni ga ma lem ni aray rogon?’” Rayog ni nge nang e girdi’ ko yibe lemnagrad fa danga’. Rayog ni ngar paged talin e n’en ka dogned ngorad, machane dab ra paged talin rogon e ngongol rodad ngorad. Mus ni faanra de pagdad be’ ni ngad machibnaged, ma rayog ni ngad daged ngak ni gad be lemnag u daken e ngongol rodad.

13. Uw rogon ni ngad puluwniged e n’en gad be yog ko n’en baadag e en gad be machibnag ni nge nang?

¹³ Gad ra guy rogon ni nge puluw e n’en gad be yog ko n’en baadag e en gad be machibnag ni nge nang, ma aram e ra m’ug ni gad be lemnag. Gur, gad be guy boch ban’en ni be dag ni bay e bitir ko fare tabinaw? Sana ra adag e gallabthir ko fare tabinaw ni ngar nangew boch e fonow u Bible u murung’agen e chugol bitir, ara rogon ni nge yag e felfelan’ nga lan e tabinaw. Gur, gad be guy ni boor e lok ko mab rorad? Faanra arrogon, ma rayog ni ngad weliyed murung’agen e kireb ni yibe rin’ nge rogon ni be k’aring e marus ko girdi’. Sana ra adag facha’ ni nge nang nra ba ngiyal’ me chuw e pi kireb ney. Ere ga ra pirieg be’ ni baadag ni nge motoyil mag guy rogon ni nge nang rogon nra yib angin e fonow nu Bible ngak. Katarína ni faan kan weliy murung’agen e gaar, “Gu ma puguran ngan’ug rogon ni ke ayuwegeg e tin riyul’.” Ere rib mich u wan’ Katarína e n’en ma machibnag, ma rayog ni nge guy e girdi’ e re n’ey.

14. Faanra be machib l’agruw ni’ u taabang, ma uw rogon nrayog ni ngar ayuwegew yow nrogon nib puluw ko Proverbs 27:17?

 ¹⁴ Mu ning e ayuw ngak boch e walag. Nap’an e bin som’on e chibog me fil Paul ngak Timothy rogon ni nge machib ma be fil ban’en ko girdi’, miki pi’ e athamgil nga laniyan’ ni ngki ayuweg boch e girdi’ ni aram rogon. (1 Kor. 4:17) Ku arrogodad nrayog ni ngad filed boch ban’en ko pi walag ni ke n’uw nap’rad u lan e ulung ni bod ni rin’ Timothy. (Mu beeg e Proverbs 27:17.) Am lemnag e n’en ni rin’ reb e walag ni pumoon ni ka nog Shawn ngak. Ba n’uw nap’an ni i pioneer u reb e binaw nib palog ko gin ma par yooren e girdi’ riy, ma yooren e girdi’ ko re binaw nem e yad baadag e teliw rorad. Ere uw rogon ni par nib felfelan’? I yog ni gaar: “Gamow ma maruwel reb e walag u taabang ko ngiyal’ nrayog. Ra gamow be yan u reb e naun nga reb, ma gamow ma weliy boch ban’en nra mon’ognag rogon e machib ni gamow be tay. Bod ni gamow ma weliy e n’en ke yog be’ ngomow, nge n’en ku gognew ngak. Ngemu’ mug weliyew e n’en nib thil nrayog ni nggu rin’ew ko yay ni migid ni kug mada’nagew be’ ni ki yog ban’en ni aray rogon.”

15. Mang nib ga’ fan e meybil ko machib ni gad ma tay?

¹⁵ Mu ning e ayuw ngak Jehovah u daken e meybil. Gubin yay ni ga ra yan ko machib, mag ning e ayuw ngak Jehovah. Ba t’uf gelngin nib thothup ni nge ayuwegdad u gubin ban’en ni gad be rin’. (Ps. 127:1; Luke 11:13) Nap’an ni ga ra ning e ayuw ngak Jehovah u daken e meybil, ma ngarim tamilangnag ngak e n’en nib t’uf ni nge ayuwegem riy. Bod nrayog ni ngam wenig ngak ni nge pow’iyem ngak be’ ni baadag ni nge fil murung’agen ma ra motoyil. Ngemu’ mag rin’ e n’en ni ga be yibilay ni aram e ngam machibnag urngin e girdi’ ni ga be mada’nag.

16. Ra nge fel’ rogon e machib ni gad ma tay, ma mang fan nib t’uf ni ngaud filed e Bible ni goo gadad?

¹⁶ Mu tay e tayim ni fan ko fol Bible ni goo gur. Be gaar e Thin rok Got: “Ngam nanged e tin nib m’agan’ Got ngay​—ni tin nib fel’, nib fel’ u wan’ Got ma rib yal’uw.” (Rom. 12:2) Faanra ud filed e thin rok Got, ma aram e rayog ni ngad nanged Got nib fel’ rogon. Ma nap’an ni gad ra weliy murung’agen ko girdi’, ma rayog ni ngar guyed nriyul’ nib mich u wan’dad e n’en gad be weliy. Katarína ni faan kan weliy murung’agen e yog ni gaar: “Dawori n’uw nap’an ni ke yan mug nang nib t’uf ni ngguy rogon ni ngari mich u wan’ug boch e machib u Bible. Ere gu fal’eg i fil boch ban’en ni be micheg ni bay e En Tasunmiy, nge n’en ni be micheg ni Bible e riyul’ ni Thin rok Got, nge n’en ni ku be micheg ni bay ba ulung e ngiyal’ ney ni be fanay Got.” I yog Katarína ni fol Bible ni ma tay e ke gelnag e michan’ rok, miki gelnag e felfelan’ rok u nap’an e machib.

17. Mang fan nde mulan’ Jesus ko machib ni i tay?

¹⁷ De mulan’ Jesus ko machib ni i tay ni yugu aram rogon ni bay boch e girdi’ nda ur motoyilgad ngak. Mang fan? Manang nib t’uf ni nge nang e girdi’ e tin riyul’, ma baadag ni nge ayuweg urngin e girdi’ nrayog rok. Ku manang ni bay boch e girdi’ ndubrad ni ngar motoyilgad ko som’on, machane ra boch nga tomuren ma yad ra motoyil. Am lemnag e n’en ni buch ko girdien e tabinaw rok. U lan fa dalip nge baley e duw ni machib riy, ma dariy reb i walagen ni pumoon ni mang reb i gachalpen. (John 7:5) Machane tomuren nni faseg ko yam’, mar manged boch e Kristiano.​—Acts 1:14.

18. Mang fan ni gad be ulul ko machib?

¹⁸ Dad nanged ko mini’ e ra munmun me mang reb e tapigpig rok Jehovah. Bay boch e girdi’ nib n’uw nap’an mfin ra adaged ni ngar filed e tin riyul’. Mus ko piin dubrad ni ngar motoyilgad ngodad ni yad ma guy rogon e ngongol nib fel’ ni gad ma dag nge rogon nder mulan’dad  u nap’an e machib. Ere rayog ni nge munmun “mi yad pining e sorok ngak Got.”​—1 Pet. 2:12.

19. Mang e thingar dab da paged talin nrogon ni be yog e 1 Korinth 3:6, 7?

¹⁹ Yugu aram rogon ni gad be machib ma gad be fil e tin riyul’ ko girdi’, machane thingar dab da paged talin ni Got e ir e ma yibnag angin e maruwel rodad. (Mu beeg e 1 Korinth 3:6, 7.) Getahun nreb e walag ni pumoon ni ma pigpig u Ethiopia e yog ni gaar: “Ba pag 20 e duw ni yigoo gag e Pi Mich ko gin gu ma par riy. Machane chiney e ke gaman 14 e tamachib u roy. Ragag nge dalip i yad e ke un ko taufe, nib muun e ppin rog ngay nge dalip i bitir ni fakmow. Ba ga’ ni 32 e girdi’ ni yad ma un ko muulung.” Ba felfelan’ Getahun ni ke ulul ko machib ma be sonnag Jehovah ni nge ayuweg e girdi’ ni ngar manged boch e tapigpig rok!​—John 6:44.

20. Uw rogon ni maruwel rodad e taareb rogon ko maruwel ni ma rin’ e piin yima pi’rad ni ngar ayuweged boch e girdi’ ni yad bay u thatharen e riya’?

²⁰ Gubin e girdi’ nib ga’ fan e yafos rorad u wan’ Jehovah. Ke pagdad ni ngad maruwelgad Fak u taabang ni ngad kunuyed e girdi’ u gubin e nam nga taabang u m’on ni ngan thang e re m’ag ney. (Hag. 2:7) Machib ni gad ma tay e rayog ni ngan taarebrogonnag ko maruwel ni be rin’ ba ulung i girdi’ ni kan pi’rad ni nga ranod ra ayuweged boch e girdi’ ni ka ranod nga bangi ban’en ni kan ker u tan e but’ ni ngar gayed boch e malang nib tolang puluwon, ma dabkiyog ni ngar sulod nga tamilang. Yugu aram rogon ni kemus ni in i yad e yag ni nge pirieg bagayad fapi cha’ ni ke man e kanawo’ ngorad u tan e but’, machane yad gubin nib ga’ fan e maruwel ni kar rin’ed. Ku arrogon e machib ni gad ma tay. Dad nanged urngin e girdi’ ni yira ayuweg ni nge chuw ko re m’ag rok Satan ney. Machane demtrug bagadad nrayog ni nge fanay Jehovah ni nge ayuweg e pi girdi’ ney. Andreas ni ma par u Bolivia e yog ni gaar, “Gu manang nnap’an nra fil be’ e tin riyul’ me un ko taufe, ma aram angin e maruwel ni ke tay boor e girdi’ u taabang ni ngar ayuweged facha’.” Ere manga yugu da lemnaged e machib ni gad ma tay ni aray rogon. Faan gad ra rin’ ma ra tow’athnagdad Jehovah, me yag ni ngaud machibgad u fithik’ e felfelan’.