Weh mi hapm da nait mi chaynj mi laif bikaaz ih mi mek Ah waahn fain owt moa bowt di Kriyayta. Bot bifoa Ah tel yu di res a weh mi hapm da nait, mek Ah tel yu bowt som a di tingz weh mi hapm tu mi wen Ah mi smaal weh mi mek Ah waahn laan bowt Gaad.

Ai mi baan eena 1937 da Guesnain, wahn smaal tong da di naadan paat a France. Mi pa yoostu werk eena wahn koal main ahn hihn mi teech mi dat ih impoatant fi werk haad. Mi pa mi aalso teech mi fi hayt injostis. Hihn mi si dat wahn lata peepl weh mi-di werk eena di koal main mi-di werk anda daynjaros kandishanz ahn di kompani neva chreet dehn fyaa, ahn hihn mi waahn help dehn. Mi pa mi jain sohn aaganaizayshan weh fait fi di raits a peepl weh werk eena di main fi chrai mek dehn sichuwayshan beta. Hihn mi aalso geh beks wen hihn mi si dat di loakal prees dehn da-mi loan hipokrit. Lata dehn mi gat it gud bot dehn mi stil aks di poa peepl weh mi werk eena di main fi gi dehn food ahn moni. Mai pa mi soh beks wid dehn prees dat ih neva teech mi  notn bowt rilijan. In fak, wi neva eevn yoostu taak bowt Gaad.

Az Ah mi-di geh oalda, Ai mi staat tu hayt injostis tu. Ah mi si dat lata peepl mi prejudis gens di farinaz weh mi liv da France an Ai neva tink dat fyaa. Ah yoostu play futbaal wid fi dehn chiljren an Ah mi ga lata fon wid dehn. Pahn tap a dat, mai ma da neva fahn France needa, shee mi kohn fahn Poland. Ai mi waahn peepl fahn aal difrent rays fi liv tugeda eena pees ahn fi geh fyaa chreetment.

Ah mi jain di aami eena 1957. Dat da how Ah mi en op eena di mongtin dehn da Algeria pahn di daak nait weh Ah mi menshan erliya. Da nait wen Ah mi hyaa sohnbadi di kohn, Ah mi kaal owt tu Gaad fi help. Ah mi tink dat da-mi wan a di enimi soalja, bot da mi jos wahn dongki. Yu kyaahn imajin how gud Ah mi feel. Da ivent ahn di hoal waar mi mek Ah staat tu tink moa seeryos bowt di meenin a laif. Ah mi staat tu tink bowt kweschanz laik: Wai wi deh ya? Gaad kay bowt wi? Wee wahn eva ga pees weh wahn laas fareva?

Laytaraan, wen Ah mi gaahn hoam fi vizit mi payrents, Ah mi meet wan a Jehoava Witnisiz. Hihn mi gi mi wahn kapi a La Sainte Bible, wahn French Kyaatlik chranslayshan a di Baibl, an Ah mi staat tu reed it afta Ah mi gaahn bak da Algeria. Wan pasij weh mi impres mi da-mi Revilayshan 21:3, 4, weh seh: “Di tent a Gaad wahn deh wid di peepl, . . . Ahn hihn wahn waip weh dehn tyaaz fahn dehn aiy, nobadi noh wahn ded nohmoh, nobadi noh wahn feel saro ner payn nohmoh ner krai bikaaz a sadnis.” * Ah mi sopraiz wen Ah reed da skripcha. Ah mi aks miself if dat kuda eva kohn chroo. Dehn taim deh, Ah neva noa notn bowt Gaad ner di Baibl.

Afta Ah mi lef di aami eena 1959, Ah mi meet wahn Witnis weh naym François. Hihn mi teech mi wahn lata tingz fahn di Baibl. Fi egzampl, hihn mi shoa mi fahn di Baibl dat Gaad naym Jehoava. (Ps. 83:18) François mi aalso tel mi dat Jehoava wahn bring jostis tu di ert, ton di ert intu wahn paradais, ahn mek di prafesi eena Revilayshan 21:3, 4 kohn chroo.

Dehndeh teechinz mi mek lata sens tu mi, ahn dehn mi toch mi haat. Bot saym taim Ah mi geh beks wid di prees dehn an Ah mi waahn kandem dehn bikaaz dehn mi-di teech tingz weh neva deh eena di Baibl! Ai stil mi-di tink laik mi pa an Ah mi waahn fait gens injostis. Ah neva waahn wayt, Ah mi waahn du sohnting rait away!

François ahn mi ada nyoo Witnis frenz mi help mi fi kaam dong. Dehn mi eksplayn tu mi dat, az Kristyanz, wee neva fi joj ada peepl bot wi mi fi tel dehn di gud nyooz a Gaad Kingdom soh dat dehn kuda ga hoap. Dat da di werk weh Jeezas mi du, ahn da di werk weh ih giv ih falowaz fi du. (Mach. 24:14; Look 4:43) Ah mi aalso haftu laan fi chreet peepl eena wahn kain way ahn taak tu dehn wid rispek, noh mata weh dehn bileev. Ahn laik weh di Baibl seh: “Wahn slayv a di Laad noh haftu kwaaril, bot ih fi bee jentl tuwaadz evribadi.”—2 Tim. 2:24.

 Ah mi mek di chaynjiz weh Ah mi need fi mek an Ah mi geh baptaiz az wan a Jehoava Witnisiz da wahn serkit asembli eena 1959. Wen Ah mi dehdeh Ah meet wahn yong sista weh naym Angèle, an Ah mi laik ahn. Ah mi staat tu vizit di kangrigayshan weh shee mi-di goh, ahn wi mi geh marid eena 1960. Shee da wahn amayzin persn, wahn wandaful waif, ahn wahn preshos gif fahn Jehoava.—Prov. 19:14.

Oava di yaaz, Ah laan wahn lata impoatant lesn fahn bradaz weh waiz ahn spirichwali machoar. Wan a di moas impoatant lesn weh Ah laan bays pahn Proverbs 15:22, weh seh: “If wahn groop a kongslaz ga gud kamyoonikayshan dehn ga gud rizolts.” If wi fala da kongsl, wi wahn ku ga sokses eena eni asainment weh wi get.

Eena 1964, Ah mi staat tu si dat Ah reeli need fi fala da advais. Da saym yaa, Ah mi staat tu serv az wahn serkit oavaseeya, an Ah mi staat vizit di difrent kangrigayshan dehn fi inkorij di bradaz ahn help dehn fi jraa kloasa tu Jehoava. Bot, Ah mi onli 27 yaaz oal an Ah neva ga lata ekspeeryens. Soh Ah mi mek sohn mistayk lang di way, bot Ah mi chrai laan fahn dehn. Ah mi laan sohn gud lesn fahn waiz “kongslaz” weh mi ga lata ekspeeryens.

Ah ku memba sohnting weh mi hapm wen Ah mi jos staat serv az serkit oavaseeya. Afta Ah mi vizit wahn kangrigayshan da Paris, wahn spirichwali machoar brada mi aks mi if ih kuda mi taak tu mi bai miself. “Shoar,” Ai tel ahn.

Hihn aks mi, “Louis, weh kaina peepl wahn dakta spen ih taim di help?”

Ai tel ahn, “Sik peepl.”

Hihn seh: “Da chroo dat. Bot Ah noatis dat yu spen moas a yu taim wid bradaz ahn sistaz weh ga wahn gud ahn schrang rilayshanship wid Jehoava, laik di kangrigayshan oavaseeya. Wi kangrigayshan ga lata bradaz ahn sistaz weh feel diskorij, weh jos kom eena di chroot, er weh feel shai. Dehn wuda reeli apreeshiayt if yu spen taim wid dehn, yu kuda eevn goh da dehn hows fi eet wahn meel wid dehn.”

Ah mi veri graytful fi di gud advais weh da dyaa brada gi mi. Ih mi toch mi haat fi si humoch hihn lov Jehoava sheep. Soh eevn doa ih neva eezi fi  aksep dat Ah mi mek wahn mistayk, Ah mi staat tu fala fi hihn advais. Ah tank Jehoava fi bradaz laik dat.

Eena 1969 ahn 1973, Ai da-mi di oavaseeya fi di Food Servis Dipaatment da too intanashanal kanvenshan da Colombes, Paris. Fi di 1973 kanvenshan, wi mi haftu provaid food fi bowt 60,000 peepl fi faiv dayz! Ai neva noa how wi mi wahn du dat. Bot agen, di solooshan fi di prablem da-mi fi fala weh Proverbs 15:22 seh—fala advais fahn waiz peepl. Soh Ah mi luk fi advais fahn spirichwali machoar bradaz weh mi noa how fi bucha, fi groa vejitablz, fi kuk, ahn fi bai food. Ahn tugeda wi mi aybl fi tek kayr a dis haad asainment.

Eena 1973, mee ahn mi waif mi geh wahn invitayshan fi serv da Betel da France. Mi fers asainment da neva wahn eezi wan. Ah mi haftu fain wayz fi sen lichricha tu wi bradaz eena di African konchri a Cameroon, wehpaat wi werk mi deh anda ban bitween 1970 ahn 1993. Agen, Ai neva noa if Ah mi wahn ku du dis. Ah tink di branch oavaseeya da France mi noatis how Ah feel, bikaaz ih mi inkorij mi ahn tel mi: “Wi bradaz da Cameroon reeli need spirichwal food. Mek wi feed dehn!” Ahn dat da weh wi mi du.

Sevral taimz Ah mi meet wid eldaz fahn Cameroon da difrent konchri pahn di Cameroon boada. Dehnya bradaz mi ga korij ahn dehn mi waiz. Dehn mi help wi fi fain wayz fi sen di lichricha soh dat dehn geh wahn regyula soplai a spirichwal food. Jehoava mi bles di werk weh dehn mi-di du. In fak, fi bowt 20 yaaz, fi hihn peepl eena da konchri neva mis wan singl kapi a Di Wachtowa ahn di poblikayshan weh naym Our Kingdom Service weh wi yoostu yooz fi di midweek meetin.

Fahn di taim wi mi staat dayt, Ah mi noatis dat Angèle ga wahn kloas rilayshanship wid Jehoava.  Ahn dat mi eevn moa klyaa afta wi mi geh marid. In fak, di saym day wen wi mi geh marid, da eevnin shee mi aks mi fi pray bowt wi dizaiya fi du aal weh wi kud eena Jehoava servis az wahn marid kopl. Jehoava mi ansa da pryaa.

Angèle mi aalso help mi fi chros eena Jehoava eevn moa. Fi egzampl, wen wi mi geh di invitayshan fi serv da Betel eena 1973, Ai neva waahn goh bikaaz Ai mi lov di serkit werk. Bot Angèle mi rimain mi dat wi mi dedikayt wi laif tu Jehoava, soh wi shuda du wateva fi hihn aaganaizayshan aks wi fi du. (Heeb. 13:17) Ai mi agree wid shee, soh wi gaahn da Betel! Mi waif da wahn waiz uman weh lov Jehoava. Dehndeh kwalitiz help mek wi rilayshanship schranga an ih help wi fi mek gud disizhanz joorin aala wi yaaz tugeda.

Now dat wi oalda, Angèle da stil wahn wandaful waif weh sopoat mi wahn lat. Fi egzampl, wahn lata wi teeyokratik skool deh eena English, soh fi mek wi ku goh, mee an Angèle mi werk haad fi laan English beta. Soh wi mi jain wahn English kangrigayshan eevn doa wi mi eena wi 70ʼs. Ai mi deh pahn di France Branch Komiti, ahn wid aala di rispansabiliti weh Ah mi gat, ih mi haad fi fain taim fi stodi wahn nada langwij. Bot wi mi help wan anada owt. Now wi deh eena wi 80ʼs, ahn wi stil pripyaa fi wi kangrigayshan meetin dehn eena English ahn French. Wi chrai tek paat eena di meetin dehn an eena di minischri wid wi kangrigayshan az moch az wi kud. Jehoava bles wi haad werk fi laan English.

Wahn amayzin blesin weh mee an Angèle mi get eena 2017, da-mi di privilij fi goh da di Skool fi Branch Komiti Membaz ahn Dehn Waif da di Watchtower Educational Center da Patterson, New York.

Jehoava da wi Gran Inschrokta fi chroo! (Isa. 30:20) Soh aala fi hihn peepl—oal ahn yong—geh di bes ejukayshan! (Deut. 4:5-8) Ah noatis dat yong peepl weh lisn tu Jehoava ahn tu spirichwali machoar bradaz ahn sistaz ku mek gud disizhanz eena laif ahn dehn ku stay faytful tu Jehoava. Laik weh Proverbs 9:9 seh: “Shayr wid wahn waiz persn an ih wahn geh waiza. Teech sombadi weh raichos an ih wahn kantinyu laan eevn moa.”

Sohntaim, Ah tink bowt weh mi hapm bowt 60 yaaz agoa pahn da daak nait eena di mongtin dehn da Algeria. Eena dehn dayz, Ah neva noa how hapi mi laif mi wahn bee. Ai laan soh moch fahn ada bradaz! Jehoava gi mee an Angèle wahn reeli wandaful laif. Soh wee waahn kantinyu laan fahn wi hevnli Faada ahn fahn waiz ahn spirichwali machoar bradaz ahn sistaz weh lov ahn.