Aquel maka-miedo suceso ya cambia el de mio vida cay amo quel el principio que quierre yo conoce con el Creador. Pero antes yo habla si cosa ya sucede despues de aquel noche, quierre yo cunta con ustedes si cosa ya pasa conmigo cuando bata yo que ya manda move conmigo para busca con Dios.

Ya nace yo del 1937 na Guesnain, un lugar de minajan na norte parte del France. Ya aprende yo trabaja enbuenamente na de mio tata que un minero de carbon. Ya enseña tambien le conmigo que odia con el injusticia. Quierre le ayuda con el manada minero con quien gendeh ta trata enbuenamente y ta trabaja na peligroso lugar. Poreso, ya entra le na maga organizacion que ta hace manera para defende con el derecho del maga minero. Consumido tambien le cay hipocrito el maga padre. Manada kanila el tiene comfortable vida pero ta pidi siempre sila comida y sen na maga pobre minero. Gendeh gayot ta gusta de mio tata con el cosa ta hace el maga padre poreso nuay le enseña conmigo acerca na religion. Gane, nuay gayot kame man cuento acerca con Dios.

 Mientras ta engranda yo, ya principia tambien yo odia con el injusticia. El uno na maga cosas que ta pensa yo gendeh justo amo que manada gente el gendeh ta gusta con el maga foreigner quien ta queda na France. Ta juga yo soccer junto con el maga anak del maga foreigner y quierre-quierre yo man junto kanila. Gane, el de mio nana Polish, gendeh French. Quierre yo que el maga gente de diferente raza hay vivi junto con paz y igual el tratamiento kanila.

Ya obliga conmigo el gobierno que man soldao del 1957. Amo se el razon si porque yo ya guinda na monte del Algeria na aquel noche que ya menciona enante. Despues yo grita “Dios! O, Dios!” ya puede yo mira gendeh un contrario sino un caballo de monte. Ya alivia gayot el de mio resuello. Pero, aquel suceso y el guerra mismo ya manda conmigo pensa si cosa el proposito del vida. Porque kita taqui? Interesao ba kanaton el Dios? Hay tene ba permanente paz?

Cuando yan vacacion yo para visita con el de mio mayores, ya puede yo conoce un Testigo de Jehova. Ya dale le conmigo un copia de La Sainte Bible, un French Catholic translation de Biblia que ya principia yo le despues yo bira na Algeria. El un particular texto que ya manda gayot conmigo pensa amo el Revelacion 21:3, 4. Este ta habla: “El casa del Dios entre na maga gente. . . . Ay limpia Le el lagrimas na diila maga ojos y nunca mas ay tene muerte, ni dolor, ni tristeza.” * Nuevo gayot este conmigo. ‘Deverasan gaha este?’ ya pensa yo. Na aquel tiempo, nuay pa gayot yo cosa sabe acerca con Dios y na Biblia.

Despues yo descanza sirvi como un soldao del 1959, ya puede yo conoce con el un Testigo de Jehova que si François, quien ya enseña conmigo el manada verdad na Biblia. Por ejemplo, ya dale le mira conmigo na Biblia que el Dios tiene personal nombre, Jehova. (Sal. 83:18) Ya explica tambien si François que si Jehova hay lleva justicia na tierra, hace con este un paraiso y cumpli con el maga palabra na Revelacion 21:3, 4.

Claro gayot ese maga enseñanza y ya alcanza se na de mio corazon. Pero, ya queda tambien yo bien rabiao na maga padre y quierre yo habla kanila que ta enseña sila maga cosas que gendeh estaba na Biblia. Igual siempre el de mio mirada na de mio tata y falta yo paciencia. Quierre yo que tiene dayun yo cosa hace!

Si François y el otro maga nuevo amigo de mio maga Testigo de Jehova ya ayuda conmigo queda calmao. Ya explica sila que el diaton trabajo como maga Cristiano amo gendeh para juzga sino para dale esperanza por medio del buen noticia acerca del Reino del Dios. Ese el trabajo que ya hace si Jesus y ya dale con el de suyu maga siguidores. (Mat. 24:14; Luc. 4:43) Necesita tambien yo aprende converza enbuenamente y con respeto na maga gente, maskin cosa pa sila ta creé. El Biblia ta habla: “No conviene que un servidor del Señor ay queda peleador, sino amable con todo.”—2 Tim. 2:24.

Ya puede yo hace con el maga necesita cambio y ya bautiza yo como uno del maga Testigo de Jehova del 1959 na un asemblea de circuito. Alla, ya conoce yo con el un joven hermana que el nombre  Angèle con quien ya gusta gayot yo. Ya principia yo visita con el congregacion onde le ta atende y ya casa kame del 1960. Un buen mujer gayot ele y un precioso regalo estaba con Jehova.—Prov. 19:14.

Adentro na manada año, ya aprende yo maga importante leccion na maga sabio y experienciao hermano. El uno amo este: Para tene buen exito na maskin cosa dificil assignment, necesita kita queda humilde y aplica con el sabeduria que puede mira na Proverbio 15:22 que ta habla: “Tiene buen exito si manada el quien ta dale consejo.”

Del 1964, necesita gayot yo aplica con ese consejo. Na ese año, ya principia yo sirvi como un circuit overseer que ta visita na maga congregacion para anima con el maga hermano y hace fuerte kanila na espiritual. Pero, 27 año pa lang yo na ese tiempo y falta pa experiencia. Poreso, ta puede yo hace maga kamali pero ta pricura yo aprende con ese. Mas pa na todo, ya aprende yo manada bonito leccion na maga ma-abilidad y experienciao hermano.

Ya puede yo acorda con el cosa ya sucede cuando nuevo pa yo circuit overseer. Despues yo visita con el un congregacion na Paris, el un mature hermano ya pregunta si puede ba le man cuento conmigo na privado. “Si,” ya habla yo.

Ya pregunta le, “Louis, si ta visita na casa el un doctor, con quien ba le ta anda chequia?”

“Con el enfermo,” ya contesta yo.

Ya habla le: “Justo. Pero, ya observa yo que mas ta dale tu tiempo con aquellos quien fuerte na espiritual, igual con el congregation overseer. Na diaton congregacion, manada maga hermano y hermana el maluya, nuevo pa lang o huyain. Hay puede gayot anima si dale tu tiempo para man junto kanila o maskin come junto kanila na diila casa.”

Ya aprecia gayot yo con el buen consejo que ya dale el amable hermano. Ya sinti gayot yo con el de suyu amor para con el maga carnero de Jehova. Poreso maskin dificil para acepta que ya puede yo hace kamali, ya principia dayun yo aplica con el cosa le ya habla. Ta rindi yo gracias con Jehova na maga hermano igual ansina.

Na año 1969 y 1973, ya iscuji conmigo para mira con el Food Service Department na dos international convention na Colombes, Paris. Na convencion del 1973, maga 60,000 gente el necesita  dale come adentro na cinco dia. No sabe yo si paquemodo kame hace con este. Pero otravez, el secreto para tene buen exito amo el Proverbio 15:22—consulta con el maga sabio. Ya pidi yo consejo na maga mature hermano para ayuda conmigo. El cuanto kanila ta vende carne, siembrador de gulay, cucinero y bueno man compra. Na ayuda diila, ya puede kame cumpli con el bien dificil assignment.

Del 1973, ya invita conmigo y con el de mio mujer que sirvi na Bethel, na France. Dificil tambien el de mio primer assignment alla. Necesita yo busca manera para imbia literatura con el diaton maga hermano na Cameroon, un nacion na Africa que donde ya prohibi con el diaton trabajo entre el año 1970 y 1993. No sabe yo si puede ba yo con este hace. Posible, ya puede se mira el hermano quien ta mira con el trabajo na France poreso ya anima le conmigo y ya habla: “El diaton maga hermano na Cameroon ta necesita gayot espiritual comida. Dale kita come kanila!” Y amo se el cosa kame ya hace.

Yan viaje yo manada beses na maga nacion que cerca na Cameroon para man mirajan con el maga anciano na ese nacion. Este maga animoso y sabio hermano ya ayuda conmigo para hace manera para regular puede dale espiritual comida na Cameroon. Ya bendici si Jehova con el diamon maga esfuerzo. Gane, adentro na maga 20 año, el de suyu maga siervo na ese lugar nuay gayot falta maskin un issue del El Torre de Guardia y publicacion de cada mes que ta llama Our Kingdom Service.

Desde ya principia yo enamora con Angèle, ya observa yo que tiene le cerca relacion con Jehova. Cuando ya casa kame, mas claro yo ya puede mira con ese. Gane, na mismo noche del diamon casamiento, ya pidi le conmigo que reza acerca con el diamon deseo que sirvi con Jehova hasta onde kame puede como un maridable. Ya contesta si Jehova ese rezo.

 Ya ayuda tambien conmigo si Angèle que mas confia con Jehova. Por ejemplo, cuando ya invita kanamon para sirvi na Bethel del 1973, yan alang-alang yo cay ta ama yo con el de mio trabajo na circuit work. Pero, ya hace conmigo acorda si Angèle que ya dedica kame diamon vida con Jehova. Poreso, debe kame hace con el maskin cosa kanamon pidi hace el de suyu organizacion. (Heb. 13:17) Uyun gayot yo na cosa le ya habla. Poreso, ya anda kame na Bethel. El de mio mujer sabio, razonable y ta ama gayot con Jehova. Este maga calidad ya puede hace fuerte con el diamon matrimonio y ya ayuda kanamon para hace maga justo decision.

Ahora maskin de edad ya kame, ta continua si Angèle queda un buen mujer y ta suporta conmigo. Por ejemplo, manada del maga teocratico escuela el ta conduci na lengguaje English. Poreso para puede atende na ese maga escuela, iyo y si Angèle ta pricura progresa na ese lengguaje. Para puede se hace, ya cambia kame na congregacion que English el lengguaje maskin pa mas de 70 ya kame na ese tiempo. Por causa na de mio maga responsibilidad como miembro del Branch Committee na France, dificil aprende nuevo lengguaje. Pero, yan ayudajan kame de Angèle. Ahora maskin mas de 80 año ya kame, ta continua siempre kame prepara para na maga miting na congregacion na English y French. Ta pricura tambien kame hace el cosa kame puede hace para participa na maga miting y ministerio junto con el diamon congregacion. Ya bendici si Jehova con el diamon maga esfuerzo que aprende English.

El uno na maga bonito bendicion que ya ricibi kame amo del 2017. Ya tiene kame el privilegio de Angèle que atende na School for Branch Committee Members and Their Wives que ya hace na Watchtower Educational Center na Patterson, New York.

Si Jehova gayot el deverasan Grande Instructor. (Isa. 30:20) Poreso, gendeh maka-estraña que el de suyu maga siervo—de edad y joven—puede obtene el de con todo bonito educacion. (Deut. 4:5-8) Ya puede yo observa que deverasan gayot que si el maga jovenes ta oi con Jehova y con el maga experienciao hermano y hermana, puede sila hace buen decision na vida y queda fiel siervo de Jehova. El Proverbio 9:9 ta hace acorda kanaton: “Enseña tu con el un sabio persona y hay queda le mas sabio. Enseña tu con el recto y hay omenta el de suyu saber.”

Tiene vez, ta puede yo pensa con aquel maka-miedo noche na monte del Algeria maga 60 año ya el ya pasa. Na aquel noche, nuay yo pensa que hay resulta gale quel na un alegre vida. Manada gayot yo cosa ya aprende con otro! Si Jehova ya dale conmigo y con Angèle un bien bonito vida. Poreso, determinao kame que continua aprende na diaton Tata na cielo y na maga sabio y experienciao hermano y hermana quien ta ama con ele.