Kanang makahahadlok nga hitabo mao ang sinugdanan sa akong pagpaningkamot nga mailhan ang Diyos. Pero sa dili pa nako isulti ang sunod nga nahitabo, sultihan una mo nako sa akong kaagi sa bata pa ko, nga nakaimpluwensiya sa akong panghunahuna ug nag-andam sa akong kasingkasing sa pagpangita sa Diyos.

Natawo ko niadtong 1937 sa Guesnain, usa ka minahan nga lungsod sa amihanang France. Si Papa minerog karbon, ug sa iya ko nakakat-on sa kaimportante sa paghago. Nakat-onan sab nako kang Papa nga dumtan ang inhustisya. Nakita ni Papa nga daghang minero ang gipatrabaho bisan sa peligrosong mga kahimtang, ug gusto niya silang tabangan. Busa miapil si Papa sa mga unyon ug welga. Nasuko sab siya sa pagkasalingkapaw sa mga pari sa among lugar. Daghan kanila ang hayahayg kinabuhi, pero pangayoan nilag pagkaon ug kuwarta ang pobre kaayong mga minero. Naglagot pag-ayo si Papa sa ginahimo sa mga pari, maong wala ko niya tudloi bahin sa relihiyon. Gani, wala gyod mi maghisgot bahin sa Diyos.

 Samtang nagdako ko, gidumtan sab nako ang inhustisya. Apil niini ang pagpihigpihig ngadto sa mga langyaw nga nagpuyo sa France. Makigdula kog soccer sa mga anak sa mga langyaw, ug malingaw kong kauban sila. Dugang pa, Polish si Mama, dili French. Nangandoy kog panaghiusa ug patas nga pagtratar sa lainlaing rasa.

Niadtong 1957, gipatawag ko aron magsundalo. Kanay rason nga nakaabot ko sa kabukiran sa Algeria, sa ngitngit nga gabii nga gihisgotan ganina. Human ko moingon “Diyos ko! Diyos ko!” nakita nako dili ang usa ka kaawayng sundalo, kondili ang usa ka ihalas nga asno! Nahuwasan gyod ko! Pero, ang maong hitabo ug ang gubat mismo nakapahunahuna nako sa kahulogan sa kinabuhi. Nganong nia ta dinhi? May pagtagad ba ang Diyos kanato? Makabaton kaha tag kalinaw hangtod sa hangtod?

Sa ulahi, dihang mibakasyon ko sa balay sa akong ginikanan, may nakaila ko nga Saksi ni Jehova. Gihatagan ko niyag kopya sa La Sainte Bible, usa ka French Catholic nga hubad sa Bibliya, ug ako ning gibasa pagbalik nako sa Algeria. Usa ka teksto nga nakapainteres kaayo nako mao ang Pinadayag 21:3, 4. Kini nag-ingon: “Ang tolda sa Diyos anaa uban sa mga tawo . . . Ug iyang pahiran ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit.” * Nakurat kaayo ko niining mga pulonga. Naghunahuna ko, ‘Tinuod kaha ni?’ Niadtong panahona, halos wala koy nahibaloan bahin sa Diyos ug sa Bibliya.

Pagbiya nako sa militar niadtong 1959, nakaila nako ang Saksi nga si François, kinsa daghag gitudlo nako bahin sa Bibliya. Pananglitan, iyang gipakita nako diha sa Bibliya nga ang Diyos may personal nga ngalan—Jehova. (Sal. 83:18) Gipatin-aw sab ni François nga si Jehova magpatunghag hustisya sa yuta, maghimo niini nga paraiso, ug magtuman sa giingon sa Pinadayag 21:3, 4.

Nakita nako nga husto ang maong mga pagtulon-an, ug natandog gyod ko niini. Pero naglagot sab kaayo ko sa mga pari, ug gusto nako silang pangasab-an kay nagtudlo silag mga butang nga wala sa Bibliya! Morag naimpluwensiyahan gihapon ko sa panglantaw ni Papa, ug wala koy pailob. Gusto nakong tul-iron dayon ang mga butang!

Gitabangan ko ni François ug sa uban pa nakong bag-ong mga higala nga Saksi sa pagkontrol sa akong kasuko. Ilang gipatin-aw nga ingong mga Kristohanon, dili ta angayng manghukom sa uban, kondili ato silang hatagan ug paglaom pinaagi sa maayong balita sa Gingharian sa Diyos. Kanay gihimo ni Jesus, ug mao pod nay iyang gisugo nga buhaton sa iyang mga sumusunod. (Mat. 24:14; Luc. 4:43) Kinahanglan sab kong makakat-on sa pagpakig-estorya sa mga tawo sa matinahoron ug maayo nga paagi, bisag unsa pay ilang tinuohan. Ang Bibliya nag-ingon: “Ang ulipon sa Ginoo dili kinahanglang makig-away, apan kinahanglang buotan sa tanan.”—2 Tim. 2:24.

Gihimo nako ang gikinahanglang mga kausaban, ug niadtong 1959, nabawtismohan ko sa usa ka sirkitong asembliya. Didto, nakaila nako  ang batan-ong sister nga si Angèle, ug nakagusto ko niya. Motambong ko usahay sa ilang kongregasyon, ug pagka-1960 nagminyo mi. Siya maayo kaayo nga babaye, buotan nga asawa, ug bililhon nga regalo gikan kang Jehova.—Prov. 19:14.

Sulod sa daghang katuigan, nakakat-on kog importanteng mga leksiyon gikan sa maalamon ug eksperyensiyadong mga brader. Kini ang usa sa pinakaimportanteng leksiyon: Aron molampos sa bisan unsang lisod nga asaynment, kinahanglan nga magmapainubsanon ta ug ipadapat ang Proverbio 15:22, nga nag-ingon: “Naay kalamposan kon daghan ang magtatambag.”

Pagka-1964, nakita nako kon unsa ka tinuod ang maong teksto. Nianang tuiga, nagsugod ko pag-alagad ingong tigdumala sa sirkito, nga magduawg mga kongregasyon aron dasigon ang mga igsoon ug palig-onon sila sa espirituwal. Pero 27 anyos lang ko niadtong tungora ug wala pa kaayo koy eksperyensiya. Busa nakahimo kog mga sayop. Pero naningkamot ko nga makakat-on niana. Labaw sa tanan, nakakat-on kog daghang importanteng leksiyon gikan sa maayo ug eksperyensiyadong mga “magtatambag.”

Usa sa akong mahinumdoman nahitabo niadtong bag-o pa ko sa sirkitong buluhaton. Human nako duawa ang usa ka kongregasyon sa Paris, gipangutana ko sa usa ka brader nga hamtong sa espirituwal kon puwede ba siyang makig-estorya nako nga kami lang duha. “Sige,” miingon ko.

Siya nangutana, “Louis, kon ang doktor moadto sa usa ka balay, kinsa may iyang tuyo?”

“Ang masakiton,” mitubag ko.

Siya miingon: “Sakto ka. Pero namatikdan nako nga pirme kang makig-uban niadtong maayog espirituwalidad, sama sa tigdumala sa kongregasyon. Ang among kongregasyon daghag igsoon nga naluya, bag-ohan, o maulawon. Malipay gyod sila kon makig-uban ka nila ug makigdungan pa ganig kaon nila diha sa ilang balay.”

Maayo ang tambag sa maong brader ug mao gyod toy akong gikinahanglan. Natandog kaayo ko sa iyang gugma sa mga karnero ni Jehova. Busa, gitulon nako ang akong garbo ug gipadapat dayon ang iyang giingon. Mapasalamaton ko kang Jehova tungod sa mga igsoon nga sama niya.

Niadtong 1969 ug 1973, gitudlo ko ingong tigdumala sa Food Service Department sa duha ka internasyonal nga kombensiyon sa Colombes,  Paris. Sa 1973 nga kombensiyon, mga 60,000 ka tawo ang kinahanglang pakan-on sulod sa lima ka adlaw! Wala ko kabalo kon unsaon to paghimo. Pero nakatabang na sab ang Proverbio 15:22—ang pagpangayog tambag sa uban. Nangonsulta ko sa mga igsoon nga hamtong sa espirituwal ug eksperyensiyado. Apil nila ang mga tig-ihaw, tigtanom ug gulay, tigluto, ug tigpalit. Pinaagi sa pagtinabangay, nalampos namo kadtong lisod kaayo nga asaynment.

Niadtong 1973, kami sa akong asawa gidapit nga moalagad sa Bethel sa France. Lisod sab ang akong unang asaynment dinhi. Kinahanglan nakong ipadala ang mga literatura ngadto sa mga igsoon sa usa ka nasod sa Africa, ang Cameroon, diin gidili ang atong buluhaton sukad sa 1970 ngadto sa 1993. Mibati na sab ko nga dili nako to kayang himoon. Tingali namatikdan nâ sa brader nga nagdumala sa buluhaton sa France, maong iya kong gidasig: “Ang atong mga igsoon sa Cameroon nagkinahanglan kaayog espirituwal nga pagkaon. Pakan-on nato sila!” Ug kanay among gihimo.

Kadaghan ko mibiyahe ngadto sa mga nasod sa utlanan sa Cameroon aron makig-estorya sa mga ansiyano nianang nasora. Ang maong maisogon ug maampingong mga brader mitabang nako sa paghimog mga kahikayan aron regular nga makadawat ug espirituwal nga pagkaon ang mga igsoon sa Cameroon. Gipanalanginan ni Jehova ang among paningkamot. Gani, sulod sa mga 20 ka tuig, wala gyod mahitabo nga ang iyang katawhan nianang nasora wala makadawat ug kopya sa Bantayanang Torre ug sa binulang publikasyon nga gitawag kaniadto ug Our Kingdom Service.

Bisag sa trato pa lang mi, nakita na nako nga si Angèle suod kang Jehova. Mas nakita nako nâ dihang minyo na mi. Gani, sa gabii human sa among kasal, gihangyo ko niya nga iampo ang  among tinguha nga moalagad kang Jehova sa bug-os ingong magtiayon. Gitubag to ni Jehova.

Gitabangan sab ko ni Angèle nga mas mosalig pa kang Jehova. Pananglitan, niadtong 1973 dihang gidapit mi nga moalagad sa Bethel, nagduhaduha ko kay gimahal nako ang sirkitong buluhaton. Pero gipahinumdoman ko niya nga amo nang gipahinungod ang among kinabuhi kang Jehova. Dili ba angay namong buhaton kon unsay gipahimo sa iyang organisasyon kanamo? (Heb. 13:17) Sakto gyod siya! Busa mianhi mi sa Bethel. Sa dugayng panahon nga magkauban mi, ang iyang pagkamaalamon, maayong panghunahuna, ug espirituwal nga panglantaw nakapalig-on sa among kaminyoon ug nakatabang namo sa paghimog maayong mga desisyon.

Bisan karon nga tigulang na mi, si Angèle maayo ug matinabangon gihapon nga asawa. Pananglitan, aron makaeskuwela sa teokratikanhong mga eskuwelahan, nga sagad English ang gigamit nga pinulongan, naningkamot mi ni Angèle nga mouswag niana nga pinulongan. Busa, mibalhin mi sa English congregation bisag mga 75 anyos na mi niadtong panahona. Tungod sa akong responsibilidad ingong membro sa Komite sa Sangang Buhatan sa France, lisod ang pagtuon ug laing pinulongan. Pero nagtinabangay mi ni Angèle. Karon, kapig 80 anyos na mi, ug sa dihang mangandam mi para sa mga tigom, English ug French nga publikasyon gihapon ang among gamiton. Naningkamot sab ming makigbahin sa mga tigom ug ministeryo kutob sa among maarangan. Gipanalanginan ni Jehova ang among mga paningkamot nga makakat-og English.

Niadtong 2017, nakadawat mig nindot kaayong panalangin. Nakaeskuwela mi sa School for Branch Committee Members and Their Wives, sa Watchtower Educational Center sa Patterson, New York.

Si Jehova gyod ang Dakong Instruktor. (Isa. 30:20) Busa dili ikatingala nga ang iyang katawhan—tigulang ug bata—nakadawat sa kinamaayohang edukasyon! (Deut. 4:5-8) Nakita gyod nako nga ang mga batan-ong maminaw kang Jehova ug sa eksperyensiyadong mga igsoon mouswag sa espirituwal ug mahimong matinumanong mga alagad sa tibuok nilang kinabuhi. Ang Proverbio 9:9 nagpahinumdom kanato: “Hatagig kahibalo ang tawong maalamon, ug siya mahimong mas maalamon. Tudloi ang matarong, ug mouswag ang iyang kahibalo.”

Usahay, mamalandong ko niadtong ngitngit ug makahahadlok nga gabii sa kabukiran sa Algeria mga 60 ka tuig kanhi. Niadtong gabhiona, wala ko mahibalo nga makabaton diay kog malipayong kinabuhi. Daghan kaayo kog nakat-onan sa uban! Si Jehova naghatag nako, maingon man kang Angèle, ug malipayon, makapatagbaw nga kinabuhi. Busa determinado mi nga di gyod mohunong sa pagkat-on gikan sa atong langitnong Amahan ug sa maalamon ug eksperyensiyadong mga igsoon nga nahigugma kaniya.