Ebyabireho eryo izoba bikahindura amagara gange ahakuba bikatuma natandika kutekateka aha Muhangi. Konka ntakabagambire ebyakuratireho bwanyima y’eco kiro, reka mbanze mbagambire ebyambireho ncari omwana bikatuma nayenda kumanya byingi ahari Ruhanga.

Nkazarwa omu mwaka gwa 1937 omu tawuni ya Guesnain y’omu matemba ga Bufaransa ahu bari kucukura amabare g’obuguzi bwingi. Tata akaba ari omucukuzi wa koroto kandi nkamwegeraho kukora n’amani. Nambwenu akanyegesa kwerinda kutwariza kubi abandi. Akaba nareba abacukuzi ababire bari kutwarizibwa kubi kandi bari kukorera omu mbera zigumire, ayenda ngu abakwase. Ebyo bikatuma yaza omu bitongore ebiri kurwanira obugabe bw’abacukuzi. Nambwenu ku yabire nareba oburyarya bw’abebembezi b’amadini kikaba nikimugwisa kubi. Abingi bakaba bari abagiga, konka oshanga bari kushaba ebyokurya n’esente abacukuzi ababire bari kutaho amani ngu babone oku babaho. Tata akaba nayangira kimwe emitwarize y’abebembezi b’amadini catuma atanyegesa eby’edini. Tukaba  tutari n’okukunda kugamba aha bikwatirine na Ruhanga.

Nanye ku nagenzire ninkura, nkatandika kwanga kutwariza kubi abandi. Omuri ebyo hakaba harimu oku abantu babire nibatwariza kubi abanyamahanga ababire batwire omuri Bufaransa. Nkaba ninkunda kuzana omupira gw’ebigeri n’abana b’abafuruki kandi ndi kukunda oku babire babireho. Orebire mama na we akaba ari omufuruki ahakuba akaba ari ow’omuri Polandi atari ow’omuri Bufaransa. Nkaba ndikwenda ngu abantu b’obwoko obutari kushushana babeho bine obusinge kandi bari kwingana.

Ihanga rikanshaba kuza omu mahe omuri 1957. Aho ni ho nayeshangire omu mishozi y’omuri Aligeriya obu habire hariho omwirima nk’oku naba nakigambire. Ku namazire kurira ndi kushaba Ruhanga, tindabugine omusirikare, ahobwe nkabugana endogoya y’omu kibira. Mazima eco kikampumuriza munonga! Konka orutaro orwabireho n’ebyambireho bikatuma natekateka aha kigendererwa c’amagara. Nkebuza ngu: “Ahabw’enki turiho? Mbehi Ruhanga natufaho? Mbehi hine obu turigira obusinge obw’ebiro byona?

Bwanyima ku nabire ntayayire omu ka, nkabugana Omuhamya wa Yehova. Akampa Bibuli y’Orufurenci y’abakaturiki, eyi natandikire kushoma obu nagarukire omuri Aligeriya. Ecahandikirwe ecatumire nakizaho kutekateka ni ec’omu Kushuuruurwa 21:3, 4 ahari kugira hati: ‘Reba ihema rya Ruhanga riri omu bantu. Aryaragaza amarira gona aha misho gabo tiharibaho okufa obundi, n’obu okwakuba okucura ninga okurira ninga obusaasi, ahakuba ebya ira biryaba bihwireho.’ * Nkaba ntakahuriragaho ebigambo nk’ebyo. Nkebuza ngu: “Hona ebi biryabaho?’ Omuri obwo bwire tihine ekintu eki nabire ndikumanya ahari Ruhanga n’omuri Bibuli.

Ku narugire omu busirikare omu mwaka gwa 1959, nkabugana Omuhamya ori kwetwa François, owanyegesize amazima mingi g’omuri Bibuli. Ecokureberaho: Akanyereka omuri Bibuli ku Ruhanga ayine izina bwite, ari ryo Yehova. (Zab 83:18) Nambwenu akanshobororera ku Yehova arije kureta oburinganiza omu nsi, akahindura ensi yona paradiso kandi akahikiriza ebiri omu Kushuuruurwa 21:3, 4.

Ezo nyegesa zikaba ziri kuhurirwa, kandi zikampika aha mutima. Konka nambwenu nkahurira nayitirwa abembembezi b’amadini ekiniga kandi nayenda kubajuma ahabw’okwegesa ebitari omuri Bibuli! Noshusha ngu nkaba ncayine emitekatecere nk’eya Tata, kandi ntari kwehangana. Nkaba nshemerire kugira eki nakora juba!

François n’abandi banywani bange basya b’Abahamya abu nabire natunga, bakankwasa kutuza. Bakanshobororera ku omurimo gw’Abakristo gutari okucwera abandi emanja, ahobwe ku ni okuburira abantu obutumwa burungi bw’Obukama bwa Ruhanga. Ogo ni go murimo ogu Yesu yakozire kandi akaragira n’abakurasi beye ngu bagukore. Nambwenu akanyegesa kugambira ge abantu kandi nkerinda kubagambira kubi ahabw’enyikiriza zabo. Nk’oku Bibuli eri kugamba, ‘omuhuku wa Mukama tashemerire  kuba entongani, kureka ori kutwaza ge ahari bona.’—2 Tim 2:24.

Nkakora empinduka kandi naba Omuhamya wa Yehova omu mwaka gwa 1959 aha kiterane c’akacweka. Ku nabire ndi yo nkabugana omuhara ori kwetwa Angèle, rero nahurira namukunda. Nkatandika kutayayira ekibina cabo kandi omuri 1960 twatasana. Mazima ni omukazi obonire kandi ayine emicwe mirungi. ni ekiconco eki Yehova yampire.—Enf 19:14.

Omu myaka yona eyi namara, nkegera byingi ahari benetata b’abanyabwenge kandi abamanyirire. Kugira ngu tugire eki twahikaho aha murimo gona ogu twahebwa tushemerire kuba abacurezi kandi tukakuratiza obuhabuzi oburi omu Nfumu 15:22 ahari kugira ngu: ‘Ahu abahi b’obwenge bingi bari enama zihikirizibwa.’

Omu mwaka gwa 1964 nkatandika kwerebera ku ebyo bigambo biri amazima. Omuri ogo mwaka nkatandika omurimo g’okutayayira ebibina ndi kugaruramu amani benetata omu by’omwika. Konka nkaba nyine emyaka 27 kusha kandi nkaba ntakamanyirire. Eco kikaba nikituma nakora enshobe. Konka nkaba ningezaho kubegeraho byingi. Ekiri kukira byona, nkegera byingi aha ‘bahi b’obwenge’ abamanyirire.

Ninyijuka ecambireho ari bwo mbire omureberezi ori kutayayira ebibina. Ku natayayire omu kibina ekiri omuri Paris, mwenetata okuzire omu by’omwika akanyeta yanshaba kuganira na we. Nanye nkabyikiriza.

Akambuza ngu: “Louis omudokita yayija omuka naba ayijire kureba baha?”

Nkamugarukamu ngu: “Ni abarwire.”

Akangira ngu: “Ni ko kiri mazima. Konka nkareba iwe obwire bwawe ori kubumara n’abari ge omu by’omwika nk’abazehe. Konka ekibina kitu kirimu benetata na banyanyazi bingi abahwiremu amani, abasya, n’abari kugira enshoni. Nibabasa kushemererwa ku ori kumara obwire na bo okatayaya n’omu maka gabo mukarya hamwe.”

Mazima ogo mwenetata akampa obuhabuzi burungi. Rukundo eyi yabire ari kukundamu entama za Yehova ekankora aha mutima. Obwe rero, nkecureza natandika kuta omu nkora obuhabuzi obu yampire. Ninsima Yehova ahakuba yampire benetata bari nk’ogo.

Omu myaka yaza 1969 kuhisya 1973 nkatoranwa ngu mbe omureberezi w’ekishenge  c’eby’okurya omu biterane by’ensi yona ebyaberire omu kacweka ka Colombes omu tawuni ya Paris. Omu kiterane ca 1973 tukaba tushemerire kugaburira abantu abari kuhika aha 60,000 omu biro bitano byona. Nkaba ntari kumanya yaba nabire ndije kubasa ogo murimo. Nambwenu ecatukwasize ni obuhabuzi bw’omu Nfumu 15:22 turi kurondera aha bandi obuhabuzi. Nkabuza benetata ababire bamanyirire kukora omu byokurya. omuri abo harimu ababagi benyama, abahingi b’emboga, abateki n’abaguzi. Twena tukakwatanisa twakora ogo murimo ogwabire gutorobi.

Omu mwaka gwa 1973 nyowe n’omukazi wange bakatweta ngu tuze kukorera ahari Beteli y’omuri Bufaransa. Omu murimo g’okubanza ogu twahibwe twahikayo tukabuganamu ebindi bizibu. Tukatandika kutwarira ebitabo benetata b’omu ihanga ry’omuri Afurika rya Kameruni, ahu omurimo gwitu gwabire gwayemerezibwe kwiha omu mwaka gwa 1970 kuhisya omu gwa 1993. Nambwenu nkahurira nayemereza omutima, konka bwanyima benetata ababire bari kureberera omurimo omuri Bufaransa omuri obwo bwire bakangumya bari kugira bati: “Benetata b’omuri Kameruni nibendera kimwe ebyokurya by’omwika; obwe rero reka tugume tubibatwarire.” Kandi mazima eco ni co twakozire.

Nkakora engendo nyingi ndi kutayayira amahanga mingi agahikine na Kameruni kugira ngu mbugane n’abazehe b’omuri eryo hanga. Abo bashija b’abanyabwenge kandi b’emanzi bakankwasa kuhikiriza omurimo gwange g’okutwara ebyokurya by’omwika omuri Kameruni. Yehova akaha emigisha byona ebi twakozire. Omu myaka 20, abahereza ba Ruhanga b’omuri eryo ihanga bakaba batakaburaga Omunara g’omurinzi ninga shi akatabo akabire kari kwetwa Omurimo g’Obukama omuri obwo bwire.

Kwiha ndi kutandika kusigurana na Angèle nkerebera ku ari kukunda Yehova. Kandi emitwarize yeye mirungi ekakizaho kurebeka ku twamazire  kutasana. N’omu kiro eki twakorireho obugenyi akangambira ngu ngambire Yehova ecetengo kitu c’okumuhereza omu omurimo g’obwire bwona turi hamwe. Kandi Yehova akagarukamu eyo shara yitu.

Nambwenu Angèle akankwasa kukizaho kwesiga Yehova. Ecokureberaho: Omu mwaka gwa 1973 ku batwesire kuza kukora ahari Beteli, nkabanza nayanga ahakuba nkaba ninkunda omurimo g’okutayayira ebibina. Konka omukazi wange Angèle akanyijusa ku twayehire Yehova. Nambwenu akanyijusa ku tushemerire kwikiriza ebi ekitongore ceye catushaba ngu tukore. (Heb 13:17) Eco nkaba ntari kubasa kukihakana. Tukahika turi kuza ahari Beteli. Emyaka yona eyi namara ndi n’omukazi wange, obwenge bweye, ebitekateko byeye ebiri kombeka, n’oku ari kureba ebintu omu buryo bw’omwika bikagumya eka yitu kandi byatukwasa kukora ensharamu ndungi.

Hati tukuzire omu myaka, konka Angèle akagumizamu kuba omukazi w’obwenge kandi ori kunshagika. Ecokureberaho: Ahakuba amashomero gitu mingi bari kugesesa omu Rujungu, nyowe na Angèle tukataho amani kugira ngu tumanye ge orwo rurimi, ni yo nshonga twatandikire kwekwatanisa n’ekibina ekiri kukoresa Orujungu n’obu twabire turi omu myaka ya za 70 omuri obwo bwire. Ahakuba ndi omuri Komiti ya Ofisi y’omuri Bufaransa kwega orundi rurimi kikaba kitorobi! Konka nyowe na Angèle nituyambayambana. Hati turi omu myaka yaza 80, konka nitugumizamu kutebekanisa enterane omu Rujungu n’omu Rufurenci. Nambwenu nitugumizamu kwekwatanisa omu nterane n’omu murimo g’okuburira turi n’ab’omu kibina kitu. Yehova akaha omugisha amani agu twatiremu turi kwega Orujungu.

Ogundi murimo ogu twahibwe tukagutunga omu mwaka gwa 2017. Nyowe na Angèle tukatunga omugisha g’okwega Ishomero ry’ab’omuri Komiti ya Ofisi n’abakazi babo eriri kubera Petterson omuri New York.

Mazima Yehova ni we Omwegesa mukuru. (Isa 30:20) Obwe rero tikiri kututangaza kureba twena abato n’abakuru turi kwega ebintu by’omuhendo! (Bir 4:5-8) Mazima nkerebera ku abacari bato abari kuhurikiza Yehova na benetata abamanyirire bari kutunguka omu by’omwika kandi bakagira ebi bahikaho. Nk’oku omu Nfumu 9:9 hari kugamba, ‘ohabure omunyabwenge, aryayeyongera kugira obwenge. Oyegese ohikirire, nayija kweyongera kwega.’

N’obu hahwire emyaka 60, tindi kubasa kwebwa ebyambireho obu nabire ndi omu mishozi y’omuri Aligeriya. Omuri eco kiro nkaba ntari kumanya ku nabire ndije kubaho ge. Nkegera byingi aha bandi. Nyowe n’omukazi wange Angèle, Yehova akatuha amagara marungi kandi agijwire okushemererwa. Obwe rero, tukamaririra kugumizamu kwegera ahari Tata witu w’omu iguru n’ahari benetata na banyanyazi abamanyirire kandi bari kumukunda.