Ataiai ia vara gauna dainai Havaraia Tauna lau tahua matamaia. To unai lau do gwauraia lasi neganai, mani lau maragi neganai idia vara gaudia dainai Dirava lau tahua ena sivarai lau herevalaia.

Lau be lagani 1937 Guesnain ai lau vara, ia be France ena not kahana ai ia noho maini taoni ta. Egu tamana be maini dekenai ia gaukara, bona lau ia hadibaia gaukara goada karana be mai anina bada. Egu tamana ese lau ia hadibaia kara gageva lau inai henia totona. Ia ura maini dekenai idia gaukara taudia ia durudia badina idia be gabu namodia dekenai idia gaukara lasi, bona edia bosi ese idia kara auka henidia. Unai dainai gaukara taudia edia namo idia laloa bada oreadia lalonai ia vareai bona gaukara amo ia straik danu. Pris taudia edia kara gageva dekenai ia badu danu. Idia be taga maurina idia noholaia to maini dekenai idia gaukara ogogami taudia amo aniani bona moni totona idia noinoi. Egu tamana be pris taudia dekenai ia badu dainai lau dekenai Dirava ena sivarai ia hadibaia lasi.

 Lau tubu daekau neganai, lau danu be kara gageva lau inai henia. Unai kara ta be France dekenai idia noho idau tano taudia inai henia karana. Idau tano amo idia mai natudia ida soka lau gadara bona edia hebamo lau moalelaia. Danu egu sinana be Poland hahinena, ia be France hahine lasi. Lau ura bese idauidau taudia be ta ta do idia matauraia bona maino ai do idia noho.

Lagani 1957 ai gavamani ena taravatu dainai ami lalonai lau vareai. Unai dainai matamanai lau herevalaia bamona, lau be tuari totona Algeria ena ororo ai lau noho. Lau boiboi “Dirava e! Dirava e!” murinai, egu inai soldia tauna ta lau itaia lasi to doniki ta ia mai. Egu gari ia ore, to ia vara gauna bona tuari dainai mauri ena anina lau laloa momo. Dahaka dainai ita mauri noho? Dirava be ita ia laloa, a? Nega ta maino ai do ita noho, a?

Gabeai, egu tama sina edia gabu dekenai lau holidei neganai, Iehova ena Witnes tauna ta lau davaria. Ia ese lau dekenai French Katolik trensleisen Baibel ta ia henia, bona Algeria dekenai lau giroa lou neganai lau duahia matamaia. Lau laloa bada Baibel sirina ta be Apokalupo 21:3, 4. Ia gwau: “Dirava ena palai rumana be taunimanima ida ia noho. . . . Bona ia ese mata ranu ibounai be edia matana amo do ia dahua ore, bona mase, lalohisihisi, taitai, bona hisihisi be do idia ore.” * Unai hereva dekenai lau hoa. Lau laloa, ‘Unai do ia vara momokani, a?’ Unai nega ai, lau be Dirava bona Baibel ena hereva ta lau diba lasi.

Lagani 1959 ai ami lau rakatania murinai, Witnes ta ladana, François lau davaria. Ia ese lau dekenai Baibel ena hereva momokani momo ia hadibaia. Hegeregere, Baibel amo lau ia hadibaia Dirava ena ladana be Iehova. (Sal. 83:18) Danu, François ia gwau, Iehova ese tanobada dekenai hahemaoro maoromaoro do ia mailaia, paradaiso ai do ia halaoa, bona Apokalupo 21:3, 4 edia hereva do ia hagugurua.

Baibel amo lau dibaia gaudia lau lalopararalaia bona lau diba do idia vara momokani. To danu pris taudia lau badu henia dikadika bona lau ura idia lau gwau henia, badina edia hahediba herevadia be Baibel amo lasi. Toana be lau be egu tamana ena kara lau tohotohoa bona lau ura kara gageva lau hadokoa haraga!

François bona egu Witnes turadia matamatadia ese lau idia durua egu badu lau biagua totona. Lau idia hamaoroa ita Keristani taudia eda gaukara be taunimanima do ita hahemaoro henidia lasi, to Dirava ena Basileia ena sivarai namona amo idia do ita durua. Iesu ese unai gaukara ia karaia bona ena hahediba taudia ia hamaoroa unai do idia karaia danu. (Mat. 24:14; Luka 4:43) Danu lau dibaia gauna ta be mai manau bona hemataurai ida taunimanima do lau hereva henidia, herevana idia be mai edia tomadiho. Baibel ia gwau: “Lohiabada ena hesiai tauna ia heai be anina lasi, to gau badana be taunimanima ibounai ia hebogahisi henia.”​—2 Tim. 2:24.

Egu kara lau haidaua bona lagani 1959 ena sekit hebouhebou ta dekenai bapatiso lau abia. Unuseniai taihu matamata ta ladana Angèle lau  itaia, bona lau ura henia. Iena kongrigeisen lau lao matamaia bona lagani 1960 ai ai headava. Ia be hahine namo hereana bona Iehova ena harihari gauna.​—Aon. 19:14.

Idia hanaia lagani momo lalonai, aonega bona diba bada taudia amo mai anina bada gaudia lau dibaia. Gau ginigunana be: Asainmen aukana ita hagugurua totona, do ita manau bona Aonega Herevadia 15:22 ena hereva ita badinaia, ia gwau: “Sisiba henia taudia be momo neganai, do oi kwalimu.”

Lagani 1964 ai lau itaia unai siri ena hereva be momokani. Unai lagani ai, sekit gaukara lau matamaia bona kongrigeisen lau vadivadi bona tadikaka taihu lau hagoadaia. To, unai nega ai egu mauri lagani be 27 bona gau momo lau diba lasi. Ena be gau haida lau karaia kerere, to unai ese lau ia durua gabeai lau karaia namonamo totona. To gau badana be ‘sisiba idia henia’ aonega taudia amo gau momo lau dibaia.

Lau laloatao, Paris ai kongrigeisen ta lau vadivadi murinai, lo tadikaka ta ese lau ia noia ai herevahereva totona. Lau gwau: “Ia namo.”

Lau ia nanadaia, “Louis, doketa ta be ruma ta ia vadivadi neganai, daika itaia totona ia lao?”

Lau haere, “Gorere tauna.”

Ia gwau: “Oibe. To lau itaia emu nega bada be goada taudia oi bamoa, hegeregere kongrigeisen naria tauna. Emai kongrigeisen ai tadikaka taihu momo be idia lalomanoka, haida be matamata, bona haida be hemarai momo taudia. Idia oi bamoa eiava edia ruma ai idia ida oi aniani hebou karana do idia moalelaia bada.”

Unai tadikaka ena sisiba namona ese lau ia durua. Iena lalokau Iehova dekenai ese lau ia hagoadaia bada. Ena be lau abia dae lasi lau be unai kerere lau karaia, to iena sisiba lau badinaia. Unai bamona tadikaka dainai Iehova lau tanikiu henia.

Lagani 1969 bona 1973 ai lau idia abia hidi Colombes, Paris ai idia karaia intanesinol hebouhebou rua edia aniani dipatmen lau naria totona. Lagani 1973 ena hebouhebou ai, taunimanima 60,000 bamona be dina 5 lalonai do ai ubudia! Lau diba lasi edena bamona unai do ai karaia. To Aonega Herevadia 15:22 hegeregerena, namona be aonega taudia edia sisiba do lau tahua. Unai  dainai, vamu idia hoihoilaia taudia, uma karaia taudia, aniani hoia taudia bona nadunadu taudia edia heduru lau noia, bona ai gaukara hebou unai asainmen aukana ai hagugurua totona.

Lagani 1973 ai lau bona egu adavana idia boiria France ena Betele dekenai ai gaukara totona. Lau idia henia gaukara ginigunana be asainmen aukana ma ta. Africa tanona Cameroon dekenai tadikaka taihu totona litrisa do lau abia lao, unai tano dekenai lagani 1970 bona 1993 huanai iseda gaukara idia taravatua. Lau diba lasi edena bamona unai do lau karaia. France dekenai gaukara ia naria tadikaka be reana unai ai itaia bona lau ia hagoadaia ia gwau: “Cameroon dekenai iseda tadikaka taihu be Dirava ena Hereva totona idia hitolo. Mani ita ubudia!” Bona unai bamona ai karaia.

Cameroon kahirakahira idia noho tanodia dekenai nega haida lau lao Cameroon elda taudia ida lau hebou totona. Unai tadikaka be idia gari lasi bona mai edia aonega. Idia ese lau idia durua Cameroon dekenai litrisa do ai abia vareai dalana ai hegaegaelaia. Iehova ese emai gaukara ia hanamoa. Oibe, lagani 20 bamona, Iehova ena taunimanima unai tano dekenai be Gima Kohorona bona guna ita gwauraia Iseda Basileia Pepana ta idia reaia lasi!

Ai hetura matamaia negana amo Angèle ena Keristani kara namodia lau itaia. Emai headava maurina lalonai ia ese unai kara namodia ia hahedinaraia. Oibe, emai headava dinana ena hanuaboi ai, lau ia noia Iehova do ai guriguri henia ai ruaosi be ia do ai hesiai henia totona. Iehova ese unai guriguri ia haerelaia.

Angèle ese lau ia durua mai egu lalona ibounai ida Iehova lau abidadama henia totona. Hegeregere, lagani 1973 ai Betele gaukara totona ai idia boiria neganai, lau ura lasi lao badina sekit gaukara lau ura henia bada. To Angèle ia gwau,  aiemai mauri be Iehova dekenai ai gwauhamatalaia vadaeni, unai dainai iena orea ese ia henia gaukara ai karaia be namo. (Heb. 13:17) Iena hereva lau abia dae. Vadaeni Betele dekenai ai lao. Egu adavana be aonega bona laloa maoromaoro hahinena, bona Iehova ia lalokau henia bada. Emai headava laganidia ibounai lalonai unai kara namodia ese emai headava ia hagoadaia bona ai ia durua disisen namodia ai karaia totona.

Hari ai buruka vadaeni, bona egu adavana be lau ia durua noho. Hegeregere tiokratik sikuli ai lao totona, lau bona Angèle be ai hekwarahi bada emai English gado ai hanamoa totona, badina unai sikuli momo be English gado dekenai idia karaia. Unai dainai ena be emai mauri lagani be 70 ia hanaia, to English gado kongrigeisen dekenai ai lao. Lau be France brens komiti ena memba ta dainai, egu maduna be momo bona nega be lasi gado ma ta lau dibaia totona. To lau bona Angèle be ta ta ai durua. Hari emai mauri lagani be 80 ia hanaia, to emai kongrigeisen heboudia be English bona French gado dekenai ai hegaegaelaia. Danu ai hekwarahi noho emai kongrigeisen ida ai hebou, bona haroro gaukara ai karaia totona. English gado ai dibaia totona Iehova ese ai ia hanamoa.

Lagani 2017 ai hahenamo badana ta ai abia. Lau bona Angèle be Brens Komiti Taudia Bona Adavadia Edia Sikuli dekenai ai lao, unai be Watchtower Educational Center, Patterson, New York ai.

Oibe, Iehova be Hadibaia Tauna Badana. (Isa. 30:20) Unai dainai, iena taunimanima, matamata bona buruka ia hadibadia namonamo! (Deut. 4:5-8) Momokani, lau itaia bema matamata taudia ese Iehova bona lo tadikaka taihu idia kamonai henidia, edia mauri lalonai disisen namodia do idia karaia bona Iehova hesiai henia goadagoada taudia ai do idia lao. Aonega Herevadia 9:9 ia gwau: “Aonega tauna dekenai diba oi henia, bona ena aonega do ia bada ia lao. Kara maoromaoro tauna oi hadibaia, bona ena diba do ia bada.”

Nega ta ta ai lagani 60 gunanai, Algeria ena ororo gabuna ai hanuaboi ai ia vara gauna lau laloa. Unai nega ai lau diba lasi gabeai lau be mauri namona do lau moalelaia. Ma haida amo gau momo lau dibaia! Iehova ese lau bona Angèle dekenai mauri namo hereana ia henia. Unai dainai emai lalona ai hadaia emai guba Tamana bona lo tadikaka taihu amo diba abia karana do ai hadokoa lasi.