Wolo ɖenɖe tɔm wɛɛ yɔ

Wolo tɔm ñʋŋ ɖeɖe

WEZUU CAƔƲ TƆM

“Mɛnkpɛlɩkɩ lɔŋ sakɩyɛ ɛyaa lalaa cɔlɔ!”

“Mɛnkpɛlɩkɩ lɔŋ sakɩyɛ ɛyaa lalaa cɔlɔ!”

MAAKƐ pɩɣa evelaɣ yem nɛ maakɛ sɔɔja Fransɩ ɛjaɖɛ taa. Sɔɔjanaa pɩlʋʋ ŋgʋ kɩ-taa maawɛɛ yɔ, kɩɩwɛ Alizerii pʋŋ taa, yoŋ kaawɛ egeetiye nɖɩ ɖɩ-taa siŋŋ. Men-ɖeke maawɛ kabʋsɩ nzɩ sɩ-taa paɖʋ kañɩŋa yɔ sɩ-wayɩ, ma pɩɩwɛɛ se menfeŋ, pɩɩkɛ ɖoo cɩjɩka naayɛ nɛ maaɖɔkɩ malɩfa. Pɩkɛdaa lɛ, manɩɩ nɩŋgbanzɩ nasɩyɩ taŋ nɛ sɔɔndʋ kpa-m. Mantaasɔɔlɩ se mankʋ nɔɔyʋ nɛ mantaasɔɔlɩ se pakʋ-m ɖɔɖɔ. Pʋyɔɔ mamabɩ kubusi se Ɛsɔ ɛsɩnɩ-m.

Sɔɔndʋ ndʋ tɩkpa-m puwiye yɔ, tɩlɛɣzɩ me-wezuu caɣʋ mbʋ pʋyɔɔ yɔ kpaɣnɩ alɩwaatʋ ndʋ lɛ, manpaɣzɩ ñaɣʋ pana se mantɩlɩ Ɛsɔ. Ɛlɛ pʋcɔ nɛ mowolo pɩ-yɔɔ nɛ mɛnkɛdɩ-mɩ mbʋ pɩlabɩ pʋwayɩ ɖoo cɩjɩka ana a-taa yɔ lɛ, mɔnsɔɔlaa se meheyi-mɩ mbʋ pɩlabɩ man-pɩjatʋ taa nɛ piyele nɛ mɔnsɔɔlɩ se mantɩlɩ Ɛsɔ yɔ.

MBƲ MƐNKPƐLƖKƖ MAN-CAA CƆLƆ YƆ

Palʋlɩ-m pɩnaɣ 1937 Guesnain tɛtʋ taa, tɩkɛ Fransɩ ɛjaɖɛ taa hayo kiŋ tɛtʋ natʋyʋ ndʋ tɩ-taa pohuyuu tɛtɛɛ ñɩm yɔ. Man-caa kaakɛ tɛtɛɛ pɛɛ naayɛ huyiyu, ɛkpɛlɩkɩ-m se pɩcɛyaa se ɛyʋ ɛla tʋmɩyɛ nɛ kpekpeka. Ɛkpɛlɩkɩ-m ɖɔɖɔ se manpaɖɩ mulum lakasɩ. Eɖiɣzinaa se pomuluu tɛtɛɛ ñɩm huyiyaa sakɩyɛ, nɛ palakɩ tʋmɩyɛ wɛtʋ ndʋ tɩwɛ kaɖɛ yɔ tɩ-taa nɛ ɛsɔɔlɩ se ɛsɩnɩ-wɛ. Pʋyɔɔ ɛsʋ ɛgbɛyɛ nɖɩ ɖɩlʋkɩ tɛtɛɛ ñɩm huyiyaa wala yɔɔ yɔ ɖɩ-taa. Lone nɖɩ ɖɩ-taa ɖɩɩwɛɛ yɔ, peeɖe tɛ fadanaa tɛ pɩ-tɛɛ nɛ pɩ-yɔɔ lakasɩ tɔm cɛyaɣ-ɩ ɖɔɖɔ. Pa-taa sakɩyɛ maɣzɩ wɛnʋʋ ñɩm ɛlɛ paa mbʋ yɔ pɔpɔzʋʋ tɔɔnaɣ nɛ liidiye tɛtɛɛ ñɩm huyiyaa mba pɛkɛ kʋñɔndɩnaa yɔ. Fadanaa tɛ lakasɩ kɩdɛkɛdɩsɩ tɔm cɛyaɣ man-caa siŋŋ nɛ pʋyɔɔ lɛ, ɛtɩwɩlɩ-m tɔm natʋyʋ Ɛsɔ sɛtʋ yɔɔ. Toovenim taa lɛ, wiɖiyi ɖɩtɩyɔɔdɩ Ɛsɔ yɔɔ tɔm natʋyʋ kpa.

Mɛwɛɛ nɛ manpaɣlɩɣ lɛ, ma ɖɔɖɔ manpaɣzɩ paɖʋʋ mulum lakasɩ. Mulum lakasɩ nzɩ sɩ-taa nasɩyɩ lɛ lɩmaɣza kɩdɛkɛda wena nabɛyɛ wɛnɩ agɔma mba pɛwɛ Fransɩ ɛjaɖɛ taa yɔ pɔ-yɔɔ yɔ. Agɔma mba, ma nɛ pe-piya ɖɩmakaɣ pombo nɛ ma nɛ sɩ ɖa-taabalɩyɛ kaakɛdɩnɩ-m. Pɩtasɩ lɛ, mon-ɖoo kaakɛ Pɔlɔɔñɩ tʋ, ɛtaakɛ Fransɩ tʋ. Maasɔɔlaa se ɛyaa mba pɛwɛnɩ tomnaɣ tɔlɩm ndɩ ndɩ yɔ, pɛkpɛndɩ nɛ pɛwɛɛ laŋhɛzɩyɛ taa nɛ pɛwɛɛnɩ wala kʋɖʋma.

MANPAƔZƖ MAƔZƲƲ SIŊŊ SE MANƖƖ WEZUU CAƔƲ TƆBƲƲ

Alɩwaatʋ ndʋ maakɛ sɔɔja yɔ

Komina kpa-m nɛ ɖoŋ nɛ manpɩsɩ sɔɔja pɩnaɣ 1957 taa. Mbʋ pɩɖɔma nɛ mantalɩ Alizerii pʋŋ taa ɖoo cɩjɩka wena a-tɔm mɔyɔɔdaa nɛ pɩɖɛɛ yɔ a-taa. Monkowa se “hayɩ Ɛsɔ sɩnɩ-m” nɛ pɩtɛ lɛ, mana nabʋyʋ, pɩtɩkɛ koyindinaa taa sɔɔja nɔɔyʋ ɛlɛ tɛyɛ kpaŋaɣ! Piyeba nɛ ma-laŋɩyɛ hɛɛ siŋŋ! Sɔɔndʋ ndʋ tɩkpa-m yɔ nɛ you peyeba nɛ manpaɣzɩ maɣzʋʋ siŋŋ se manɩɩ wezuu caɣʋ tɔbʋʋ. Ɛbɛ yɔɔ ɖɩwɛ cɩnɛ? Ɛzɩ Ɛsɔ maɣzɩɣ ɖɔ-yɔɔ? Ɛzɩ wiɖiyi ɖɩkaɣ wɛʋ laŋhɛzɩyɛ taa tam?

Pʋwayɩ, mowoba nɛ menkilimi man-caa nɛ mon-ɖoo pɔ-yɔɔ nɛ manpɩsɩɣ lɛ, mankatɩ Yehowa Aseɣɖe Tʋ nɔɔyʋ. Ɛha-m La Sainte Bible, Bibl ŋgʋ Katooliki mba ɖɛzɩ Fransɩɩ taa yɔ nɛ manpaɣzɩ-kʋ kalʋʋ alɩwaatʋ ndʋ manpɩsɩ Alizerii yɔ. Bibl hɔɔlʋʋ ŋgʋ kitukuni-m siŋŋ yɔ, ŋgʋ lɛ Natʋ 21:3, 4. Pama peeɖe se: “Ɛsɔ kizinziku wɛ ɛyaa cɔlɔ . . . . Nɛ ɛkaɣ hɩzʋʋ ɛsɩtɛɣlɩm kpeekpe pɛ-ɛsɩndaa, nɛ sɩm ɛɛkaɣ tasʋʋ wɛʋ, kʋñɔwiye nɛ kubusi mabʋ nɛ wɩzasɩ paakaɣ tasʋʋ wɛʋ ɖɔɖɔ.” * Tɔm ndʋ tɩɖɩɣzɩ-m. Mɔnpɔzaɣ man-tɩ se: ‘Pɩpɩzɩɣ nɛ pɩla mbʋ toovenim na?’ Alɩwaatʋ ndʋ tɩ-taa, mantaatɩlɩ tɔm sakɩyɛ Ɛsɔ nɛ Bibl yɔɔ.

Mɛntɛm sɔɔjatʋ tʋmɩyɛ pɩnaɣ 1959 taa lɛ, mankatɩ Aseɣɖe Tʋ nɔɔyʋ weyi payaɣ-ɩ se François yɔ, ɛwɩlɩ-m Bibl taa toovenim tɔm sakɩyɛ. Kɩɖaʋ nakʋyʋ yɔ, ɛwɩlɩ-m Bibl taa se Ɛsɔ wɛnɩ hɩɖɛ, nɖɩ lɛ Yehowa. (Keɣa 83:18; nwt) François lɩzɩ-m pɩ-taa ɖɔɖɔ se Yehowa kaɣ kɔnʋʋ siɣsiɣ wɛtʋ tɛtʋ yɔɔ, ɛla nɛ tɛtʋ pɩsɩ paradisuu nɛ ɛla nɛ tɔm ndʋ tɩwɛ Natʋ 21:3, 4 taa yɔ tɩla.

Wɩlɩtʋ ndʋ tɩ-taa wɛ nɩʋ kpem nɛ tiitukuni ma-laŋɩyɛ. Ɛlɛ man-taa paɣzɩ wɩnʋʋ ɖɔɖɔ fadanaa siŋŋ nɛ mañɩnaɣ se monkuli pɔ-yɔɔ, mbʋ pʋyɔɔ yɔ tɔm ndʋ pawɩlɩɣ yɔ tɩfɛyɩ Bibl taa! Pɩwɛ ɛzɩ lɩmaɣza wena man-caa kaawɛna yɔ awɛnɩ ɖoŋ mɔ-yɔɔ mbʋ yɔ, nɛ mantaawɛɛ suuɖu. Maasɔɔlaa se mala nabʋyʋ kpaagbaa!

François nɛ man-taabalaa kɩfama mba pɛkɛ Aseɣɖe Tɩnaa yɔ pasɩnɩ-m nɛ mankpa man-pana. Palɩzɩ-m pɩ-taa se ɖa Krɩstʋ mba lɛ pɩtɩmʋna se ɖɩhʋʋnɩ lalaa tɔm, ɛlɛ pɩwɛɛ se ɖɩsɩnɩ-wɛ nɛ ɖiheyi-wɛ Ɛsɔ Kewiyaɣ yɔɔ tɔm kɩbandʋ. Tʋmɩyɛ nɖɩ Yesu kaalaba nɛ nɖɩ ɛɖʋ ɛ-wayɩ tɩŋɩyaa se pala. (Mat. 24:14; Luka 4:43) Pɩwɛɛ ɖɔɖɔ se mɛnkpɛlɩkɩ ɛzɩma mɔyɔɔdɩnɩ ɛyaa nɛ nɔɔ kɩbaŋa nɛ lɛɣtʋ, paa tisuu mbʋ patɩɩwɛna yɔ. Bibl yɔɔdaa se: “Pɩtɩmʋna se Kɩbaɣlʋ yom eyoo, ɛlɛ pɩmʋnaa se ɛla ɛyaa tɩŋa camɩyɛ.”—2 Tim. 2:24.

Malabɩ lɛɣzɩtʋ ndʋ pɩpɔzʋʋ yɔ nɛ pamɩyɩsɩ-m lɩm pɩnaɣ 1959 taa egeetiye kigbeɣluu nakʋyʋ taa nɛ manpɩsɩ Yehowa Aseɣɖe Tʋ. Peeɖe mankatɩ koobu pɩɣa peleɣa ŋga payaɣ-kɛ se Angèle yɔ, kɔ-tɔm kaakɛdɩnɩ-m. Manpaɣzɩ wobu ɛgbɛyɛ nɖɩ ɖɩ-taa kowokaɣ kediɣzisi yɔ ɖɩ-taa nabʋyʋ taa, nɛ ɖɩɖɔkɩ nesi pɩnaɣ 1960 taa. Toovenim taa lɛ, ɛkɛ halʋ kɩbanʋ siŋŋ weyi ɛ-wayɩ fɛyɩ yɔ nɛ kʋjɔʋ kɩbaŋʋ ŋgʋ kɩlɩnɩ Yehowa cɔlɔ yɔ.—Adu. 19:14.

Ðe-nesi ɖɔkʋʋ wiye

MƐNKPƐLƖKƖ LƆŊ SAKƖYƐ ABALAA MBA PƐWƐ LƆŊ NƐ PƐWƐƐ NIYE YƆ PƆ-CƆLƆ

Mɛnkpɛlɩkɩ lɔŋ kɩbaŋ sakɩyɛ koobiya abalɩñɩma mba pɛwɛ lɔŋ nɛ pɛwɛɛ niye yɔ pɔ-cɔlɔ pɩnzɩ sakɩyɛ. Lɔŋ kɩbaŋ ɩnɩ ɩ-taa nɩɩyɩ lɛ se: Paa tʋmɩyɛ ɛwɛ kaɖɛ ɛzɩma yɔ, ɖɩpɩzɩɣ nɛ ɖɩlabɩ-ɖɩ ye ɖiluzuu ɖa-tɩ nɛ ɖɩɖɔŋ lɔŋ tasʋʋ mbʋ pɩwɛ Aduwa 15:22 taa yɔ ɩ-yɔɔ yɔ. Pama peeɖe se: “Ðenɖe lɔŋ pasɩyaa kpaɖɩ ɖɔʋ yɔ, peeɖe papɩzɩɣ.”

Ðɩɩwɛ egeetiye yɔɔ cɔnɩyʋ tʋmɩyɛ taa Fransɩ pɩnaɣ 1965 taa

Pɩnaɣ 1964 taa manpaɣzɩ naʋ se tɔm ndʋ fezuu kiɖeɖeu sɩnaa nɛ pama Aduwa takayaɣ taa peeɖe yɔ tɩkɛ toovenim. Pɩnaɣ ŋga ka-taa manpaɣzɩ egeetiye yɔɔ cɔnɩyʋ tʋmɩyɛ nɛ menkilimuu agbaa yɔɔ nɛ mankpazɩɣ koobiya ɖoŋ nɛ mansɩɣnɩ-wɛ se pɔñɔtɩnɩ Yehowa. Ɛlɛ pɩnzɩ 27 maawɛnɩ alɩwaatʋ ndʋ tɩ-taa nɛ mantaawɛɛ niye. Nɛ picoɖaɣ-m nabʋyʋ taa. Ɛlɛ mañakaɣ pana nɛ mɛnkpɛlɩkɩɣ lɔŋ alɩwaatʋ ndʋ picoɖaɣ-m yɔ. Kɔzɩ kɔzɩ lɛ, mɛnkpɛlɩkɩ lɔŋ kɩbaŋ sakɩyɛ lɔŋ tasɩyaa mba pɛwɛ niye yɔ pɔ-cɔlɔ.

Mɔntɔzʋʋ nabʋyʋ yɔɔ, mbʋ pɩɩlaba alɩwaatʋ ndʋ mancalɩ kɛʋ egeetiye yɔɔ cɔnɩyʋ yɔ. Menkilimi ɛgbɛyɛ naɖɩyɛ yɔɔ Paarii tɛtʋ taa nɛ pɩtɛ lɛ, koobu nɔɔyʋ weyi ɛpɩ fezuu taa yɔ ɛpɔzɩ-m se pɩsaŋ nɛ ɛnʋ yɔɔdɩnɩ-m men-ɖeke yaa we. Moncosi se “Ɛɛɛ.”

Ɛpɔzɩ-m se “Louis, alɩwaatʋ ndʋ fɛɖʋ nɔɔyʋ woki ɖɩɣa nakɛyɛ taa yɔ, a-cɔlɔ ewoki?”

Moncosi se “Kʋdɔndʋ cɔlɔ.”

Ɛyɔɔdɩ se: “Mbʋ lɛ. Ɛlɛ manaɣ se ŋkpakɩɣ ña-alɩwaatʋ sakɩyɛ nɛ ña nɛ mba taabalɩyɛ kɩbanɖɛ wɛ pa nɛ Yehowa pɛ-hɛkʋ taa yɔ ɩcakɩ; ɛzɩ ɛgbɛyɛ taa ɛzʋtʋyaa mbʋ yɔ. Ðɛ-ɛgbɛyɛ taa, koobiya mba pitibi-wɛ yɔɔɔ, pɛkɛ kɩfama yaa pɛwɛ fɛyɛ yɔ pɔɖɔwa. Pɩkaɣ-wɛ kɛdɩnʋʋ siŋŋ se ŋkpaɣ alɩwaatʋ nɛ ña nɛ wɛ ɩcaɣ yaa halɩ ŋwolo pɛ-tɛ nɛ ɩtɔɔ tɔɔnaɣ.”

Maawɛnɩ ɛsɩmɩyɛ siŋŋ se koobu kʋsɔɔlʋ ɛnʋ ɛtasɩ-m lɔŋ kɩbaŋ ɩnɩ. Sɔɔlɩm mbʋ ɛwɛnɩ Yehowa heŋ yɔɔ yɔ pitukuni ma-laŋɩyɛ. Pʋyɔɔ paa pɩɩwɛ-m kaɖɛ se mentisi se picoɖi-m yɔ, mañaɣ pana nɛ manpaɣzɩ ɖɔm lɔŋ weyi ɛtasɩ-m yɔ ɩ-yɔɔ kpaagbaa. Mɛnsɛɣ Yehowa se ɛlabaɣ lɛ koobiya mba pɛwɛ ɛzɩ ɛnʋ yɔ pɔ-yɔɔ.

Palɩzɩ-m se mɛnkɛ weyi ɛcɔŋnɩ ajɛɛ kigbeɣliŋ tɔɔnaɣ labʋ yɔɔ yɔ pɩnaɣ 1969 nɛ pɩnaɣ 1973 Colombes, Paarii tɛtʋ taa. Kigbeɣluu ŋgʋ paalabɩ pɩnaɣ 1973 taa yɔ kɩ-taa, pɩɩpɔzaa se pala tɔɔnaɣ nɛ ɛyaa ɛzɩ 60 000 mbʋ yɔ tɔɔ kɩyakɩŋ kagbanzɩ! Mantaana se ɛzɩma ɖɩkaɣ pɩzʋʋ nɛ ɖɩla tʋmɩyɛ nɖɩ. Cɩnɛ ɖɔɖɔ, mbʋ pɩpɩzɩɣ se pɩsɩnɩ-ɖʋ yɔ mbʋ lɛ lɔŋ tasʋʋ mbʋ pɩwɛ Aduwa 15:22 taa nɛ pɩtɔŋ se ɖɩpɔzɩ lalaa lɔŋ tasʋʋ yɔ. Mɔnpɔzɩ koobiya mba pɛwɛ niye tʋmɩyɛ nɖɩ ɖɩ-taa yɔ se pasɩnɩ-m. Pa-taa nabɛyɛ kaakɛ alikizaŋwaa, saɖɩñɛ laɖaa, tɔɔnaɣ tɩzɩyaa nɛ wondu yaɖaa. Ðɩkpɛndaa lɛ, ɖɩpɩzaa nɛ ɖɩla tʋmɩyɛ kaɖɛ ñɩnɖɛ nɖɩ.

Pɩnaɣ 1973 taa, paya ma nɛ ma-halʋ se ɖiwolo nɛ ɖɩla tʋmɩyɛ Fransɩ tɛ Betɛɛlɩ taa. Tʋmɩyɛ nɖɩ pacalɩ-m ɖʋʋ peeɖe yɔ, ɖɩkɛ tʋmɩyɛ nɖɩ ɖɩwɛ kaɖɛ siŋŋ ɖɔɖɔ yɔ. Pɩɩwɛɛ se mantɩŋnɩ nʋmɔŋ nɩɩyɩ yɔɔ nɛ mentiyini takayɩsɩ ɖo-koobiya mba pɛwɛ Afrika ɛjaɖɛ nɖɩ payaɣ-ɖɩ se Kameruni yɔ ɖɩ-taa, paaɖɩɣ ɖa-tʋma nʋmɔʋ peeɖe kpaɣnɩ pɩnaɣ 1970 piwolo 1993 taa. Cɩnɛ ɖɔɖɔ, mantaana se mankaɣ pɩzʋʋ nɛ mala tʋmɩyɛ nɖɩ yaa maapɩzɩɣ. Pɩtɩla koobu weyi ɛcɔŋnaɣ ɛgbɛyɛ piliŋa yɔɔ Fransɩ ɛjaɖɛ taa yɔ, ɛna ɛzɩma pɩlakaɣ-m yɔ. ɛkpazɩ-m ɖoŋ nɛ eheyi-m se: “Ðo-koobiya mba pɛwɛ Kameruni yɔ, pɛwɛ kɩcɛyɩm taa siŋŋ nɛ pɩpɔzʋʋ-wɛ fezuu taa tɔɔnaɣ. Pɩwɛɛ se ɖɩcalɩ-wɛ!” Nɛ mbʋ ɖɩlaba.

Ða nɛ Aseɣɖe Tɩnaa mba palɩnɩ Kameruni yɔ, ɖɩɩwɛ ŋgee kediɣzaɣ nakɛyɛ taa pɩnaɣ 1973

Mɔnɖɔm nʋmɔʋ tam sakɩyɛ nɛ mowolo ajɛɛ wena acɔ Kameruni nɛ ata yɔ a-taa se pɩsa nɛ mankatɩ ɛzʋtʋyaa mba pɛwɛ Kameruni ɛjaɖɛ taa yɔ. Koobiya mba, paawɛ abalɩtʋ nɛ paawɛnɩ lɔŋsɩnɖɛ. Pasɩɣaɣnɩ-m se pɩsa nɛ mantɩlɩ nʋmɔŋ weyi ɩ-yɔɔ mantɩŋna nɛ mentiyiɣni ɖo-koobiya mba pɛwɛ Kameruni yɔ takayɩsɩ paa ɛzɩmtaa. Yehowa kaawazɩ ɖa-pana ñaɣʋ. Pʋyɔɔ pɩnzɩ 20 taa, ɛ-samaɣ ŋga kɛwɛ ɛjaɖɛ nɖɩ ɖɩ-taa yɔ, ketifeti Feŋuu Tilimiye takayaɣ nakɛyɛ nɛ fenaɣ fenaɣ takayaɣ ŋga payaɣaɣ alɩwaatʋ ndʋ tɩ-taa se Kewiyaɣ Ɛsɔ Sɛtʋ Tʋmɩyɛ takayaɣ yɔ.

Pɩnaɣ 1977, ma nɛ Angèle ɖa-taa kaawɛ leleŋ se ɖiwobi Naajeeriya, ɖa nɛ egeetiye yɔɔ cɔnɩyaa mba palɩnɩ Kameruni yɔ nɛ pa-halaa

MƐNKPƐLƖKƖ LƆŊ SAKƖYƐ MA-HALƲ KƲSƆƆLƲ CƆLƆ

Ma nɛ Angèle ɖɩpaɣzɩ ɖama ɖanʋʋ lɛ menɖiɣzinaa se taabalɩyɛ kɩbanɖɛ wɛ ɛ nɛ Yehowa pɛ-hɛkʋ taa. Alɩwaatʋ ndʋ ɖɩɖɔkɩ nesi yɔ, mantasɩ naʋ nɛ pɩkɩlɩ se taabalɩyɛ kɩbanɖɛ wɛ ɛ nɛ Yehowa pɛ-hɛkʋ taa. Kɩɖaʋ nakʋyʋ yɔ: Kɩyakʋ ŋgʋ ɖɩɖɔkɩ nesi yɔ, puwiye ɖanaɣ yɔɔ ɛpɔzɩ-m se mantɩmnɩ Yehowa nɛ meheyi-i se ma nɛ ɩ ɖɩsɔɔlaa se ɖɩla ɖo-ɖoŋ ɖeɖe nɛ ɖɩsɛɛ-ɩ. Yehowa cosi adɩma ana a-yɔɔ.

Angèle sɩnɩ-m ɖɔɖɔ se mantaa Yehowa liu nɛ pɩkpaɖɩ. Kɩɖaʋ nakʋyʋ yɔ: Pɩnaɣ 1973, paya-ɖʋ se ɖiwolo Betɛɛlɩ nɛ ɖɩla tʋmɩyɛ lɛ, pɩlabɩ-m kaɖɛ mbʋ pʋyɔɔ yɔ maasɔɔlɩ egeetiye yɔɔ cɔnɩyʋ tʋmɩyɛ nɖɩ malakaɣ yɔ. Ɛlɛ Angèle tɔzɩ-m se ɖɩha ɖa-tɩ Yehowa. Nɛ pʋyɔɔ lɛ, pɩwɛɛ se ɖɩla tʋmɩyɛ nɖɩ payɩ ɛ-ɛgbɛyɛ ɖʋʋ-ɖʋ se ɖɩla yɔ. (Ebr. 13:17) Mentisi ɛ-tɔm ndʋ tɩ-yɔɔ! Nɛ ɖɩɖɛɛ Betɛɛlɩ. Ma-halʋ wɛnɩ lɔŋsɩnɖɛ, ɛnɩɣ tɔm taa nɛ ɛsɔɔlɩ Yehowa siŋŋ. Ɛ-wɛtʋ ndʋ tɩkpazɩ taabalɩyɛ nɖɩ ɖɩwɛ ɖɛ-hɛkʋ taa yɔ ɖoŋ nɛ tɩsɩnɩ-ɖʋ nɛ ɖɩkpaɣ lɩmaɣza kɩbana pɩnzɩ sakɩyɛ nzɩ ɖɩwɛ ɖama cɔlɔ yɔ sɩ-taa.

Ma nɛ Angèle ɖɩwɛ Fransɩ tɛ Betɛɛlɩ tɛ kaɖaɣ taa

Lɛɛlɛɛyɔ ɖɩkpadɩyaa, ɛlɛ Angèle wɛɛ nɛ ewoki pɩ-yɔɔ nɛ ɛkɛɣ halʋ kɩbanʋ weyi ɛsɩɣnɩ-m yɔ. Kaɖaʋ nakʋyʋ yɔ: Pɩsa nɛ ɖiwolo teokrasɩ sukulinaa lɛ, ma nɛ Angèle ɖɩñaɣ pana se ɖɩyɔɔdɩ Aŋglɛɛ kʋnʋŋ nɛ pɩkpaɖɩ mbʋ pʋyɔɔ yɔ, Aŋglɛɛ kʋnʋŋ taa palakɩ sukulinaa mba pa-taa sakɩyɛ. Pʋyɔɔ lɛ, ɖɩpaɣzɩ wobu ɛgbɛyɛ nɖɩ ɖɩ-taa pɔyɔɔdʋʋ Aŋglɛɛ kʋnʋŋ yɔ, paa alɩwaatʋ ndʋ tɩ-taa ɖɩɩwɛnɩ pɩnzɩ ɛzɩ 75 mbʋ yɔ. Maakɛ Fransɩ Ɛgbɛyɛ piliŋa kɔɔmiite taa tʋ, pʋyɔɔ lɛ pɩɩwɛ kaɖɛ se mehiɣ alɩwaatʋ nɛ mɛnkpɛlɩkɩ kʋnʋŋ lɛɛkʋ. Ɛlɛ ma nɛ Angèle ɖɩɩsɩnɩ ɖama. Lɛɛlɛɛyɔ ɖɩwɛnɩ pɩnzɩ 80 mbʋ yɔ, nɛ ɖiwoki pɩ-yɔɔ nɛ ɖɩñɔɔzʋʋ ɖe-kediɣzisi Aŋglɛɛ nɛ Fransɩ kʋnʋmɩŋ taa. Ðɩñakɩ pana ɖɔɖɔ nɛ ɖa nɛ ɖɛ-ɛgbɛyɛ ɖɩlakɩ kediɣzisi nɛ ɖisusuu tɔm ɖoŋ ɖoŋ. Pana wena ɖɩñaɣaa se ɖɩkpɛlɩkɩ Aŋglɛɛ kʋnʋŋ yɔ, Yehowa wazɩ a-yɔɔ.

Ðihiɣ wazaɣ sɔsɔɔ nakɛyɛ pɩnaɣ 2017 taa. Paha ma nɛ Angèle waɖɛ se ɖiwolo Ɛgbɛyɛ piliŋa kɔɔmiite taa mba nɛ pa-halaa sukuli ŋgʋ palakɩ Ɛgbɛyɛ sukulinaa ɖɩlaɖɛ nɖɩ ɖɩwɛ Patɛrsɔɔnɩ, Niyuu Yɔrɩkɩ tɛtʋ taa yɔ.

Toovenim taa lɛ, Yehowa kɛ Wɩlɩyʋ Sɔsɔ. (Iza. 30:20) Pʋyɔɔ lɛ, paa ɖɩkpadɩyaa yaa ɖɩtɩkpadɩyɩ yɔ, ɖa-tɩŋa ɖɩmʋʋ wɩlɩtʋ kɩbandʋ! (Wp. 4:5-8) Toovenim taa lɛ, menɖiɣzinaa se piya evelisi pɩzɩɣ nɛ sɩkpaɣ lɩmaɣza kɩbana si-wezuu caɣʋ taa nɛ sɩpɩsɩ Yehowa sɛyaa siɣsiɣ tɩnaa ye siwelisiɣni Yehowa nɛ koobiya mba pɛwɛ niye yɔ. Aduwa 9:9 tɔzʋʋ-ɖʋ se: “Ha lɔŋ tʋ nɛ ɛtasɩ pɩsʋʋ lɔŋ tʋ; sɩɣzɩ lɔŋ ɛyʋ siɣsiɣ tʋ nɛ ɛkaɣ sɔzʋʋ ɛ-sɩmtʋ yɔɔ.”

Nabʋyʋ taa, mamaɣzɩɣ ɖoo wena maawɛ Alizerii pʋŋ yɔɔ pɩlakɩ pɩnzɩ 60 mbʋ yɔ yɔ a-yɔɔ. Ðoo ana mantaana se mankaɣ hiɣu taa leleŋ siŋŋ me-wezuu caɣʋ taa mbʋ. Mɛnkpɛlɩkɩ lɔŋ sakɩyɛ ɛyaa lalaa cɔlɔ! Toovenim taa lɛ, Yehowa ha ma nɛ Angèle wezuu kɩbaŋʋ siŋŋ nɛ ɖe-liu sɩbɩnɩ-kʋ. Pʋyɔɔ lɛ, ɖɩtɛm ta-taa se ɖɩɩkaɣ yebu kpɛlɩkʋʋ lɔŋ ɖa-Caa weyi ɛwɛ ɛsɔdaa yɔ ɛ-cɔlɔ, nɛ ɖo-koobiya mba pɛwɛ lɔŋ, pɛwɛɛ niye nɛ pɔsɔɔlɩ-ɩ yɔ pɔ-cɔlɔ.

^ tay. 11 Krɩstʋ Mba Grɛɛkɩ Masɩ—Ɛjaɖɛ kɩfaɖɛ tɔm ɖɛzʋʋ.