Әԝ рʹож, жийина мьн гӧһаст, чьмки мьн ида дьхԝәст Хԝәде нас бькьра. Ле пешийа кӧ әз бежьм кӧ паше чь ԛәԝьми, әз дьхԝазьм ԝәрʹа бәʹса зарʹотийа хԝә бькьм. Гава әз һе зарʹ бум, һьнә тьшта ль сәр мьн һʹӧкӧм кьрьбу у дьле мьн һазьр кьрьбу кӧ әз Хԝәде бьгәрʹьм.

Әз дь сала 1937-да ль бажаре Гуеснаине (Франса) һатьм буйине. Баве мьн дь мадәнед кʹомьреда дьхәбьти у әз һин дькьрьм кӧ хәбате ԛимәт бькьм. Ӧса жи, баве мьн гәләк һәԛийе һʹьз дькьр, у ве йәке ль сәр мьн жи һʹӧкӧм дькьр. Сәва кӧ мафед хәбатчийед мадәнед кʹомьре бьпарезә, баве мьн бу әндәме тʹәшкиләтәке, кӧ ԝана дьпʹараст. Баве мьн сәва дӧрʹутийа кʹәшишед дере гәләк әʹщьз дьбу. Һʹале гәләка жь ԝан баш бу, ле ԝана диса жи жь мадәнщийед кʹәсиб хԝарьн у пʹәрә дьхԝәстьн. Баве мьн кьрьнед ԝан һаԛас нәфрʹәт дькьр кӧ әԝи дәрһәԛа религийа тʹӧ тьшт әз һин нәдькьрьм. Мә ль мале тʹӧ щара бәʹса Хԝәде нәдькьр.

 Гава әз мәзьн дьбум, мьн жи нәһәԛийе нәфрʹәт дькьр. Мәсәлә, һьнә кәса хәрибед кӧ ль Франсайе дьжитн һʹьз нәдькьр. Ле мьн тʹәви зарʹед кʹочбәра футбол дьлист, у мьн һʹьз дькьр тʹәви ԝан һәвалтийе бькьм. Дийа мьн Франси нибу, ле Полони бу. Ләма, әз һʹьзрәта әʹдьлайе у ԝәкһәвийа дь нав мәрьвада бум.

Дь сала 1957-да, бона хьзмәта әскәрийе гази мьн кьрьн. Бь ви аԝайи, әз кʹәтьм нава чʹийайед Щәзайьре, чаԝа мьн серида готьбу. Гава мьн гот «Хԝәдайе мәзьн, али мьн бькә!», нә дьжмьнәк, ле кʹәрәки бәйани бәр мьн дәркʹәт. Дьле мьн рʹьһʹәт бу! Диса жи, әв сәрһати у шәрʹе ль Щәзайьре бун сәбәб кӧ әз ль сәр нета жийине кʹур бьфькьрьм. Әм чьма һәнә? Гәло Хԝәде бона мә хәм дькә? Гәло ԝе бе әԝ рʹож кӧ әʹдьлайи сәр әʹрде һәбә?

Паше, гава изне данә мьн кӧ сәрики де-баве хԝә хьм, әз рʹасти Шәʹдәки Йаһоԝа һатьм. Әԝи Кʹьтеба Пироз да мьн, у паши кӧ әз вәгәрʹийам Щәзайьре, мьн дәстпекьр бьхуньм. Пʹарәкә Кʹьтеба Пироз, йа кӧ ль мьн гәләк хԝәш һат, Әʹйанти 21:3, 4 бу, йа кӧ ӧса дьбежә: «Ва коне Хԝәде нава мәрьвада йә! . . . Әԝе жь чʹәʹвед ԝан һʹәму һесьред ԝан паԛьж кә у иди мьрьне тʹӧнәбә, нә шин, нә гьри, нә еш-ешук, чьмки тьштед бәре дәрбаз бун». Әԝ рʹез гәләк дьле мьн гьртьн у әз хԝәрʹа фькьрим гәло готьнед ван рʹеза рʹаст ьн йан на.

Дь сала 1959-да, мьн әскәрийа хԝә хьлаз кьр. Паши ве йәке, мьн Шәʹдәки бь наве Франсуа нас кьр, йе кӧ гәләк рʹастийед Кʹьтеба Пироз әз һин кьрьм. Мәсәлә, әԝи жь Кʹьтеба Пироз нишани мьн кьр, ԝәки наве Хԝәде Йаһоԝа йә (Зәбур 83:18). Ӧса жи, Франсуа нишани мьн кьр, ԝәки Йаһоԝа ԝе һәԛийе бинә дьнйайе, әʹрде бькә щьнәт у готьнед Әʹйанти 21:3, 4 бинә сери.

Тьштед кӧ әз һин дьбум логики бун у дьле мьн дьгьртьн. Ле бәле, әз сәр кʹәшиша гәләк һерс бум, у мьн дьхԝәст тʹәви ԝан шәрʹ бькьра, чьмки тьштед кӧ ԝана һин дькьр нә жь Кʹьтеба Пироз бун. Әʹйан ә кӧ әз һе дь бьн һʹӧкӧма баве хԝәда бум, чьмки мьн сәбра хԝә зу ӧнда дькьр, у мьн дьхԝәст мьԛабьли нәһәԛийе у нәрʹастийе һәр тьшти бькьм!

Франсуа у Шәʹдед дьн али мьн кьр, кӧ әз һерса хԝә дайньм. Ԝана мьнрʹа зәлал кьр кӧ ише мә нә әв ә кӧ әм кәсед дьн сущдар бькьн, ле әв ә кӧ әм бәʹса мьзгина Пʹадшатийа Хԝәде бькьн. Иса Мәсиһ жи әв шьхӧл дькьр, у әԝи әʹмьр дабу кӧ шагьртед ԝи жи ви шьхӧли бькьн (Мәтта 24:14; Луԛа 4:43). Ӧса жи, лазьм бу кӧ әз һин бьбьм кӧ баԝәрийа мәрьва һәр чь бә жи, гәрәке әз бь нәрми тʹәви ԝан хәбәр дьм. Кʹьтеба Пироз ӧса дьбежә: «Хӧламе Хӧдан накʹәвә, кӧ шәрʹ бькә, ле һьндава һʹәмуйада бәрбьһер бә» (2 Тимотʹейо 2:24).

Мьн жийина хԝә гӧһаст, у дь сала 1959-да, әз ль щьвинәкә һәреме һатьмә ньхӧмандьне. Ль ԝе дәре, мьн хушкәкә  щаһьл йа бь наве Енщеле нас кьр, у дьле мьн кʹәт ԝе. Әз щар щара дьчум щьвата ԝе, у дь сала 1960-да, әм зәԝьщин. Енщеле бь рʹасти жи мәрьвәкә гәләк һʹәйф ә, кʹӧлфәтәкә гәләк баш ә, у пʹешкʹешәкә жь Хԝәде йә (Мәтʹәлок 19:14).

Бь сала, мьн жь бьред билан у щерʹьбанди гәләк дәрсед фәрз стандьн. Йәк жь дәрсед сәрәкә әв бу: Сәва кӧ әм дь кʹьфшкьрьнәкә чәтьнда пешдачуйи бьн, гәрәке әм мьлук бьн у гӧһ бьдьн ширәтед кәсед дьн (Мәтʹәлок 15:22).

Дь сала 1964-да, мьн дит кӧ әв ширәт чьԛас бь билани йә. Ԝе сале, әз бум бәрпьрсийаре мьһале, у әз дьчум щьвата кӧ хушк-бьра рʹӧһʹанида бьшьдиньм. Ле әз һе 27 сали бум, у гәләк щерʹьбанди нибум, ләма мьн һьнә шаши дькьрьн. Диса жи, мьн хирәт дькьр кӧ әз жь ван шашийа дәрса һин бьм, у әз жь бьред сәрԝахт у щерʹьбанди гәләк тьштед керһати һин бум.

Мәсәлә, ль ԝан сала, паши кӧ мьн сәрледана щьватәкә ль Парисе тʹәсәли кьрьбу, бьраки щерʹьбанди дьхԝәст тʹәви мьн хәбәр дә.

Әԝи пьрси: «Луис, гава һʹәким те мала кәсәки, гәло әԝ дьхԝазә кʹе бьвинә?»

Мьн гот: «Йе нәхԝәш».

Әԝи гот: «Әре, рʹаст ә. Ле мьн дит кӧ тӧ һәри зедә тʹәви кәсед кӧ жь алийе рʹӧһʹанива ԛәԝи нә ԝәхт дәрбаз дьки, мәсәлә тʹәви бәрпьрсийаре щьвате. Дь щьвата мәда гәләк хушк у бьред ну, шәрмокә у дьлтәнг һәнә. Һәгәр тә тʹәви ԝан ԝәхт дәрбаз бькьра йан бона хԝарьне бьчуйайи мала ԝан, әԝана ԝе гәләк ша буна».

Ширәта ви бьре һежа бона мьн гәләк ԛимәт бу. Әԝи пәзед Йаһоԝа гәләк һʹьз дькьр, у ве йәке гәләк дьле мьн гьрт. Ләма, мьн ԛӧрʹәтийа хԝә пʹепәс кьр, у ширәта ԝи ԛәбул кьр. Әз жь Йаһоԝа гәләк рʹази бум, кӧ әԝи бьред ӧса да мьн.

Дь салед 1969 у 1973-да, әз ль дӧ щьватед мәзьнә һʹәмдьнйайе, йед кӧ ль Парисе һатьн дәрбаз кьрьн, ча бәрпьрсийаре Идара Бәлакьрьна Хԝарьнеда һатьм кʹьфшкьрьн. Ль щьвина сала 1973, лазьм бу кӧ пенщ рʹожа ԝәкә 60 000 кәсирʹа  хԝарьн бе бәлакьрьне. Әз гәләк тьрсийам! Ле готьнед жь Мәтʹәлок 15:22 диса керһати бун. Ль гора ширәта ве рʹезе, мьн жь бьред гьһишти, йед кӧ ль сектора хԝарьне щерʹьбанди бун, рʹебәри хԝәст. Дь нав ԝанда, ԛәсаб, щоткʹар, аспеж у йед кӧ хԝарьн дькʹьрʹин һәбун. Тʹәвайи, мә ԝи шьхӧли рʹьнд анин сери.

Дь сала 1973-да, әз у жьна мьн, әм һатьн тʹәглифкьрьн кӧ ль Бәйтʹәла Франсайе хьзмәт бькьн. Кʹьфшкьрьна мьн йа пешьн һеса нибу. Лазьм бу кӧ әз әʹдәбйәта бьшиньм Камеруне. Ль ви ԝәлате Африкайе, шьхӧле мә жь сала 1970 һʹәта 1993 ԛәдәхә бу. Диса жи, мьн ньзаньбу кӧ әзе ви шьхӧле зор чаԝа бькьм. Ле бьре кӧ жь ише Шәʹдед Йаһоԝа йед ль Франсайе щабдар бу, мерхаси да мьн у гот: «Хушк у бьред ль Камеруне һʹәԝщәйи хԝарьна рʹӧһʹани нә. Бьра әм ве хԝарьне бьдьн ԝан!» Ләма, мә ԝанрʹа хԝарьна рʹӧһʹани шанд.

Әз чәнд щара чум ԝәлатед незики Камеруне кӧ тʹәви рʹуспийед жь Камеруне ль һәв тʹоп бьм. Бь аликʹарийа ван бьред мерхас у билан, мә щурʹә-щурʹә метод дитьн кӧ хԝарьна рʹӧһʹани бәрдәԝам кьн хушк у бьред Камерунерʹа бьшиньн. Йаһоԝа хирәта мә кʹәрәм дькьр. Нава 20 салада, Шәʹдед Йаһоԝа һʹәму журналед «Бьрща Ԛәрәԝьлийе» у һʹәму бәрнамед «Ԛӧльхкьрьна Пʹадшатийе» дьстандьн.

Гава мә һәвдӧ ну нас дькьр, мьн зу фәʹм кьр кӧ Енщел жь алийе рʹӧһʹанива чьԛас ԛәԝи йә. Паши кӧ әм зәԝьщин, һʹӧнӧред ԝе йед рʹӧһʹани дьһа зедә әʹйан дьбун. Мәсәлә, ль евара дәʹԝата мә, әԝе жь мьн хԝәст кӧ әз дӧа бькьм у Йаһоԝарʹа бежьм кӧ әм дьхԝазьн ча щотәкә зәԝьщи һʹәта кӧ жь дәсте мә те хьзмәт бькьн. Йаһоԝа щаба дӧайе мә да!

 Ӧса жи, Енщеле али мьн кьрийә кӧ әз дьһа зедә итʹбарийа хԝә Йаһоԝа биньм. Мәсәлә, гава әм дь сала 1973-да һатьбун тʹәглифкьрьн кӧ ль Бәйтʹәле хьзмәт бькьн, мьн гәләк нәдьхԝәст һәрʹьм Бәйтʹәле, чьмки мьн шьхӧле бәрпьрсийаре мьһале һʹьз дькьр. Ле Енщеле ани бира мьн кӧ мә жийина хԝә дабу дәсте Йаһоԝа. Әԝе мьнрʹа гот кӧ лазьм ә әм һʹәму хԝәстьнед тʹәшкиләта ԝи биньн сери (Ибрани 13:17). Бәле, готьнед ԝе рʹаст бун! Ләма әм чун Бәйтʹәле. Бь сайа билани у ньһерʹандьна рʹӧһʹани, йа кӧ жьна мьн нава гәләк салада әʹйан кьрийә, зәԝаща мә ԛәԝи буйә, у мә гәләк сафикьрьнед баш кьрийә.

Әм ида щаһьл ниньн, ле әз аликʹарийа Енщеле һʹәта ньһа дьстиньм. Мәсәлә, сәва кӧ һинбунед тʹәшкиләте бьстиньн, йед кӧ бь зьмане Инглизи дәрбаз дьбун, мьн у Енщеле, мә пʹьрʹ хирәт кьр кӧ зьмане Инглизи дьһа баш һин бьн. Әм ида жь 70 сали мәзьнтьр бун, у әм дәрбази щьватәкә бь зьмане Инглизи бун. Жь бәр кӧ әз әндәме Комитейа Филиала Франсайе бум, шьхӧлед мьн гәләк бун у ль мьн зор дьһат кӧ зьманәки ну һин бьбьм. Ле мьн у Енщеле, мә али һәв дькьр. Ньһа әм ида жь 80 сали мәзьнтьр ьн, у гава әм бона щьвина хԝә һазьр дькьн, әм ве йәке һьм бь Инглизи һьм бь Франси дькьн. Әм һʹәта кӧ жь дәсте мә те дьчьн щьвина у тʹәви щьвата хԝә хьзмәт дькьн. Йаһоԝа хирәта мә, йа кӧ мә бона һинбуна зьмане Инглизи нишан кьрийә, кʹәрәм кьрийә.

Дь сала 2017-да, мә кʹәрәмәкә мәзьн станд. Әз у Енщеле, әм мәкʹтәба бона Әндәмед Комитейа Филиале у Жьнед Ԝан, ль Патерсоне дәрбаз бун (Нийу Йорк, Америка).

Йаһоԝа Хԝәде бь рʹасти жи Мамостәйе Мәзьн ә (Ишайа 30:20). Ләма, һʹәму хьзмәткʹаред ԝи һинкьрьна һәри баш дьстиньн (Ԛануна Дӧщари 4:5-8). Мьн дитийә кӧ щаһьлед кӧ гӧһ дьдьн һьм Йаһоԝа һьм жи хушк у бьред щерʹьбанди жь алийе рʹӧһʹанива рʹьнд пешда дьчьн у дь рʹийа рʹастийеда пешда дьчьн. Мәтʹәлок 9:9 ӧса дьбежә: «Йе сәрԝахт ширәт кә у әԝе һе сәрԝахт бә, мәрьве рʹаст һин кә, занәбуна ԝийе һе зедә бә».

Щарна те бира мьн кӧ ԝәкә 60 сал бәре, ль чʹийайед Щәзайьре чь һатьбу сәре мьн. Ль ԝе дәме, мьн ньзаньбу кӧ жийина мьн ԝе чьԛас хԝәш бьбә. Әз бь рʹасти жь кәсед дьн гәләк тьшт һин бумә. Йаһоԝа әм гәләк кʹәрәм кьрьнә! Әм дьхԝазьн һәр тʹьм жь Баве хԝәйи әʹзмани у жь хушк у бьред щерʹьбанди, йед кӧ ԝи һʹьз дькьн, һин бьбьн.