Una hanuaboi ai e vara ḡauna ese egu mauri e haidaua badina una nega amo na ura Dirava baina dibaia. To, una hanuaboi ai e vara ḡauna do asina herevalaia neganai, maraḡigu ai e vara ḡaudia daidiai Dirava na urava baina tahua sivaraina mani aina herevalaia.

Lau na laḡani 1937 Guesnain ai na vara, una na mining taonina ta France ena not kahana ai. Tamagu na mining ai e ḡaukarava, bona ia ese ḡaukara goada karana ena namo e hadibagu. Tamagu ese e hadibagu kara gageva baina inai henia bona e itaia mining ai e ḡaukarava taudia momo na se kara namo henidiava bona ḡaukara metaudia e karava dainai e ura baine durudia. Bona ia na mining taudia edia maoro e tuarilaiva oreana ta ai e vareai. Danu, pris taudia edia koikoi karadia ese lalona e hahisiava. Idia momo na taḡa taudia, to dounu mining ai e ḡaukarava ogoḡami taudia amo moni bona aniani e noiva. Tamagu na pris edia kara se moalelaiva dainai lauegu ai tomadiho bona Dirava na se herevalaiava.

 Lau danu na bada neganai kara gagevadia na asina ura heniva. Una kara gagevana ta na, France ai e nohova idau tano taudia na haida ese asie ura henidiava. To, lau na idau tano taudia natudia ida a sokava bona na bamodiava. Bona sinagu na Polish hahinena, dia French. Lau na na urava bese iboudiai maino ai bae noho bona bae kara namo heheni.

Laḡani 1957 ai, gavamani ese e hamaorogu ami ai baina vareai. Hari Algeria ororonai matamanai name herevalaia ḡauna na una negai e vara. Dirava ena heduru totona na boi murinai, dia inaigu ta na itaia to uda donkina ta na itaia! Una neganai kudougu na e heato diho! Una e vara ḡauna bona tuari daidiai lau ese mauri anina na laloa matama. Dahaka dainai ta maurimu? Dirava ese ita e lalodamu, eiava? Ita be nega ta maino ai baita noho hanaihanaimu, eiava?

Gabeai, tamagu sinagu na vadivadi henidia neganai, Iehova ena Witnes ta na hedavari henia. Ia ese French Catholic translation Baibul ladana, La Sainte Bible kopena ta e henigu, bona Algeria na lou lao neganai na duahia matama. Lalogu e veria sirina ta na Apokalupo 21:3, 4. E gwaumu: “Dirava ena noho gabuna na taunimanima dekedekediai; Ia ese iruru-matadia iboudiai matadia amo baine dahu oho. Mase bona daradoko bona taitai bona hisihisi bae ore.” * Egu nega ginigunana hereva unu bamona ta na itaia. Na lalo, una be momokani, a? Una negai lau na Dirava bona Baibul na asi dibagu namonamo.

Laḡani 1959 ai, ami na rakatania murinai Witnes tauna ta ladana François na hedavari henia, ia ese hereva momokanidia momo e hadibalaigu. Heḡereḡere, ia ese Baibul amo e hahedinaraia Dirava ladana na Iehova. (Sal. 83:18) Bona François ese e hahedinaraia Iehova ese tanobada ai hahemaoro maoromaoro be havaraiamu, tanobada na paradaiso ai be halaoamu, bona Apokalupo 21:3, 4 ena hereva be haḡuḡuruamu.

Unu hahediba herevadia na na lalopararalai, bona kudougu e hamarerea. To, pris na badu henidia dikadika bona na ura baina gwau henidia badina Baibul ese se gwaurai ḡaudia e hahedibalaiva. Tamagu heḡereḡerena, lau na na urava ḡau ta baina karaia haraḡa, unu amo kara gagevadia bae ore!

François bona Witnes ma haida ese e durugu egu badu baina biagua. Idia ese e hamaorogu Kristen taudia edia ḡaukara na haida basie hahemaoro henidia, to Dirava ena Basileia sivarai namona amo haida bae durudia. Iesu na una ḡaukara e karaia bona ena hahediba danu una ḡaukara e henidia. (Mat. 24:14; Luka 4:43) Danu, na diba mai gado namogu bona aonegagu ida taunimanima baina hereva henidia ena be e abi daeva ḡaudia na i’idau. Baibul na e gwa: “Lohiabada ena hesiai tauna na basine heai, a taunimanima iboudiai baine gado namodia henidia.”​—2 Tim. 2:24.

Egu mauri na haidaua bona laḡani 1959 Iehova ena Witnes taudia edia seket hebouhebouna  ta ai na bapatiso. Unuseniai, taihu ta ladana Angèle na hedavari henia bona na ura henia. Ena kongrigeisin na lao henia matama bona laḡani 1960 ai a headava. Ia na hahine namona bona lauegu ai ia na Iehova ena harihari ḡauna.​—Her. 19:14.

Lo tadikakadia edia amo mai anidia bada ḡaudia momo na diba. Mai anina bada ḡauna ta na ina: Eda hesiai ḡaukara baita karaia namonamo totona, namona na baita manau bona Hereva Lada-isidia 15:22 [NWT] ena aonega herevana baita badinaia, eto: “Sisiba taudia na momo neganai bo kwalimumu.”

Laḡani 1964 ai, na itaia una hereva na momokani. Una laḡani ai seket ḡaukarana na karaia matama bona kongrigeisin na vadivadi henidiava tadikaka taihu na lauma dalanai baina hagoadadia. To, una neganai lau laḡanigu na 27 dainai egu ekspiriens na dia bada. Bona ḡau haida na asina kara namonamova. To, na hekwarahiva baina hanamo. Bona hereadaena be, “sisiba taudia” mai edia diba bona ekspiriens amo ḡau momo na diba.

Seket tauna ai nala matama neganai e vara ḡauna ta na laloataomu. Paris ai kongrigeisin ta na vadivadi henia murinai, lo tadikaka ta ese e noigu baine hereva henigu. Bena nato, “Namo.”

E nanadaigu eto, “Louis, bema dokta na e vadivadimu neganai, ia be daika e ha itaiamu?”

Bena nato, “Gorere tauna.”

Bena ia na e gwa: “Maoro. To, nega momo oi na lauma dalanai e goadamu taudia o vadivadi henidiamu, heḡereḡere kongrigeisin inarina tauna. Kongrigeisin ai tadikaka taihu momo na e lalomanokamu, mamatamata, eiava e hemaraimu. Bo hagoadadia dibamu bema nega bo atomu bo herevahereva heboumu, bona edia ruma ai bo aniani heboumu.”

Tadikaka ena sisiba namona dainai na moale. Ena lalokau Iehova ena mamoe ediai ese lau na e durugu. Una dainai na manau bona maoromaoro ena sisiba na badinaia. Iehova na tenkiu heniamu tadikaka unu bamodia dainai.

Laḡani 1969 bona 1973 lalodiai, lau na e abigu hidi Paris, Colombes edia intanesinol hebouhebou rua ai Food Service Department baina naria. Laḡani 1973 hebouhebouna ai, dina faiv  lalodiai taunimanima 60,000 bamona baia ubudia! Asi dibagu una be ede baia karaia tomamu. To, lau ese Hereva Lada-isidia 15:22 ena hereva na laloa, ma haida edia amo heduru baina abi na namo. Una ḡaukara ai, mai edia ekspiriens lo tadikakadia na noidia bae durugu. Idia haida na midi e utuva taudia, uma anianidia e hadova taudia, nanadu taudia, bona hoihoi taudia. Iboumaiai a ḡaukara hebou dainai una ḡaukara aukana a haḡuḡurua.

Laḡani 1973 ai lau bona adavagu na e boirimai France ena Betele ai baia ḡaukara. Egu asainmen ginigunana na asainmen aukana. Lau na dala baina tahu Africa hanuana ta Cameroon ai tadikaka totodia pablikeisin baina siai, unuseniai laḡani 1970 bona 1993 padadiai iseda ḡaukara na e taravatua. Una negai danu asi dibagu una be ede baina karaia toma. France ena brens ovasia na una e itaia dainai lau e hagoadagu eto: “Cameroon ai eda tadikaka na pablikeisin bae abi na namo. Namona na madi baita durudia!” Bona ai na unu a kara toma.

Cameroon ena border hanuadia momo nala, unu hanua ai elda taudia baina hedavari henidia totona. Unu tadikaka na mai goadadia bona mai aonegadia, idia ese lau e durugu dala a kara unu amo hanaihanai Cameroon tadikakadia na pablikeisin bae abi diba. Iehova ese emai hekwarahi na e hanamoa. Laḡani 20 mai kahadia lalodiai, unu gabu ai e nohova tadikakadia ese hua ta ta ai e lasiva The Watchtower bona Our Kingdom Service na e abi hanaihanaiva.

Angèle ida a hetura matamava negana amo, na itaia iena hetura karana Iehova ida na goada. A headava murinai una kara na e hedinarai ḡoevaḡoeva. Heḡereḡere, a headava hanuaboina ai, e noigu baina ḡuriḡuri Iehova ese baine  durumai ena hesiai ḡaukara baia habadaia totona. Iehova ese una ḡuriḡuri na e haerelaia.

Danu Angèle ese e duruguva nega iboudiai Iehova enai baina tabekau. Heḡereḡere laḡani 1973 ai, e boirimai Betele baiala neganai, asina ura badina lau na seket ḡaukara na ura heniava. To, Angèle ese e hadibagu emai mauri na Iehova enai a gwauhamatalaia. Una dainai orea ese e henimaiva ḡaukaradia iboudiai baia karadia na namo. (Heb. 13:17) Ena hereva na na abia dae! Una dainai ai na Betele ala. Adavagu na aonega, lalomaoromaoro, bona Iehova e lalokau heniamu hahinena, unu kara ese laḡani momo lalodiai emai headava e hagoadaia bona e durumai abi hidi maorodia baia kara.

Hari, ai na vada buburuka to Angèle ese dounu e durugumu. Heḡereḡere tiokratik skulidia momo na English ai e karamu, una dainai Angèle bona lau na a hekwarahiva una gado baia dibaia. Una anina na English kongrigeisin baiala ena be laḡanimai na da 70 lalodiai. Lau na France ena brens komiti ta dainai, asi egu nega gado ma ta baina dibaia. To Angèle bona lau na a heduru heheniva. Hari laḡanimai na da 80 lalodiai, bona kongrigeisin heboudia na English bona French gado ai a heḡaeḡaelaimu. Danu nega momo hebou a laomu bona emai kongrigeisin ida a haroro heboumu. Iehova ese e durumai English gado a dibaia.

Laḡani 2017 ai, hahenamo hereana ta abia. Angèle bona lau na e boirimai brens komiti bona adavadia edia skuli baiala, una na Watchtower Educational Center Patterson, New York ai.

Momokani, Iehova na Hahediba Tauna Hereadaena. (Isa. 30:20) Una dainai ita iboudai, burukadia bona matamatadia e hadibada namonamomu. (Deu. 4:5-8) Momokani bema matamata taudia ese Iehova bona lo tadikaka taihu be kamonai henidiamu, edia mauri ai abi hidi namodia be karamu bona Iehova ihesiai henina taudia namodia ai be laomu. Hereva Lada-isidia 9:9 na e gwaumu: “Aonega tauna ba hadibaia, bena ena aonega ma baine bada; kara maoromaoro tauna ba hadibaia, bena baine diba herea.”

Nega haida laḡani 60 gunadiai Algeria ororona ai e vara ḡauna na laloamu. Una negai asina diba gabeai egu mauri na baine namo. Ma haida edia amo ḡau momo na diba! Iehova ese lau bona Angèle na mauri namona e henimai. Una dainai lalomai a hadai Tamamai gubai bona ia e lalokau heniamu tadikaka taihu edia amo hanaihanai diba baia abi.