Bũmb ning sẽn maan daar-n-kãng yʋng tɩ mam yɛɛsã toeema m vɩɩmã. Bala yɩɩ baraar tɛk la mam sɩng n na n bao n bãng Wẽnnaam. Nand tɩ m togs-y bũmb ning sẽn maan rẽ poor baraar yʋngã, m na n deng n togs-y-la yɛl kẽer sẽn maan m yãadmẽ wã, tɩ kɩt tɩ m da rat n bao n bãng Wẽnnaam.

Mam doga yʋʋmd 1937 Gɛsne sẽn yaa Fãrens tẽng a ye b sẽn tuud sarbõ. M baaba tʋʋmd ra yaa sarbõ tuubu. A wilga maam tɩ tara yõod tɩ d tʋmd wʋsgo. Wa m baaba, ma-me ra yaa ned sẽn pa nong wẽgbo. A ra getame tɩ b ra wẽgda sẽn tʋmd-b sarbõ wã tuub zĩisẽ wã wʋsgo, tɩ b sẽn da tʋmd to-to wã yaool n da tõe n wa ne yelle. Rẽ kɩtame t’a ra rat n sõng-ba. Rẽ n so t’a tɩ naag sigls sẽn zabd n sõngd sẽn tʋmd-b sarbõ wã tuub zĩisẽ wã, sẽn na yɩl n ges tɩ b yellã manege. Sẽn paase, a sẽn da ne tẽngã tũudmã taoor dãmb sẽn da zãmbd nebã ra yikda a sũuri. B wʋsg ra vɩɩ naar pʋgẽ, la baa ne rẽ, b ra kota sẽn tʋmd-b sarbõ wã tuub zĩisẽ wã rɩɩb la ligdi, n yaool n da miẽ tɩ vɩɩmã pa nana  ne-b baa bilfu. Tũudmã taoor dãmb yel-manesmã ra pa noom m baaba baa baa. Rẽ kɩtame t’a pa zãms maam baa fʋɩ tũudmã wɛɛngẽ ye. Sɩd-sɩdã, d pʋd n zɩ n gom Wẽnnaam yell meng ye.

M sẽn wa n bɩtẽ wã, m da kisa wẽgbã. Wala makre, nebã ra kisa sẽn yi-b tẽn-zẽms n wa be Fãrensã. Mam da nong n bee ne sãambã kamb tɩ d tãood ball ne taaba. M ma rag n da yita Poloyn. Mam sẽn da rat bal yaa laafɩ la bãan zĩnd buud toɛy-toɛyã neb sʋka, tɩ welsg kae ye.

Yʋʋmd 1957 wã, goosneemã kɩtame tɩ m kẽ sodaarã. Yaa rẽ n kɩt tɩ mam da tɩ be Alzeeri tãensã zut ne yʋngã, wa m sẽn togs sɩngrẽ wã. Mam sẽn kelem tɩ “Wẽnde, sõng-mã!” poore, mam yãa we-bõang sẽn yas mam taoorã. Ra pa bɛɛb ye. Yɩɩ yolsg tɛkẽ! Yel-kãngã n paas zabrã kɩtame tɩ m maneg n tags neere, n na n bao n bãng vɩɩmã võore. Wala makre, bõe yĩng la d sẽn be dũni zugã? Tõnd yell paka Wẽnnaam bɩ? Wakat n wat tɩ laafɩ la bãan na n zĩnd dũniyã zug bɩ?

Daar a ye, mam wa n kẽngame n na n tɩ kaag m roagdbã, n seg a Zeova Kaset soaba. A kõo maam Biibl ning b sẽn boond tɩ La Sainte Bible. Yaa Katolik-rãmbã n lebg Biibl-kãnga. Mam sẽn wa n leb Alzeeri wã, m sɩnga Biiblã karengo. Vɛrse sẽn kɩt tɩ m maneg n tags neer yaa Vẽnegr 21:3, 4 sẽn yet bũmb ningã. Be, b yetame yaa: “Wẽnnaam fu-roogã bee ne ninsaalbã . . . B na n yẽesa nintãm fãa ninsaalbã ninẽ, la kũum pa na n le zĩndi, sũ-sãanga, yãbr wall toog pa na n le zĩnd ye.” * Gom-kãensã linga maam. M soka m meng yaa: ‘Rẽ yĩnga, woto tõe n yɩɩ sɩda?’ Wakat kãnga, m da pa mi baa fʋɩ Wẽnnaam la Biiblã zug ye.

Yʋʋmd 1959 wã mam sẽn wa n yi sodaarã, daar a ye m sega a Zeova Kaset soab yʋʋr sẽn boond t’a Fãrãnsoa. A zãmsa maam bũmb wʋsg Biiblã zugu. A wilga maam Biiblã pʋgẽ tɩ Wẽnnaam tara yʋ-peelle, la t’a yʋʋrã yaa a Zeova. (Yɩɩn. 83:18, MN) A leb n wilga maam t’a Zeova na n wa kɩtame tɩ tɩrlem zĩnd dũniyã gill zugu, n kɩt tɩ tẽngã gill lebg arzãna, la a pids goam nins sẽn be Vẽnegr 21:3, 4 pʋgẽ wã.

A sẽn wilg maam bũmb ninsã ra yaa vẽeneg m yamẽ. Kẽe maam hal wʋsgo. La m sũurã yika wʋsg ne tũudmã taoor dãmba, tɩ m da rat n puk b bãongo, b sẽn da zãmsd nebã bũmb toor-toor sẽn pa be Biiblã pʋgẽ wã yĩnga. Ra wõnda m da ket n tara m baaba tagsgã buudu. M da pa tar sũ-mar ye. M da ratame n dems yɛlã zĩig pʋgẽ.

A Fãrãnsoa ne m zo-rãmb a taabã sẽn yaa a Zeova Kaset rãmbã sõnga maam tɩ m tõog m menga. B wilga maam tɩ d sẽn yaa kiris-nebã, d tʋʋmdã pa d kao nebã bʋʋd ye. D segd n taas-b-la koe-noogã, n sõng-b tɩ b bãng tɩ Wẽnnaam Rĩungã na n waa ne manegre. Yaa tʋʋm-kãng la a Zeezi tʋm-yã, la a yeel a karen-biisã tɩ bãmb me maan woto. (Mat. 24:14; Luk 4:43) M da segd n modgame n gomd ne nebã ne bʋgsem, baa b sẽn tẽed bũmb ninsã yaa toore. Biiblã yetame meng tɩ “Zu-soabã tʋm-tʋmd pa segd n zab ye. A segd n talla bʋgsem ne nebã fãa.”—2 Tɩm. 2:24.

 Mam modgame n toeem bũmb wʋsg m vɩɩmã pʋgẽ. Yʋʋmd 1959 wã, mam deega lisg tigs-kãseng a ye sasa, n lebg a Zeova Kaset soaba. Tigs-kãsengã sasa, m paam n bãnga saam-bi-poak yʋʋr sẽn boond t’a Ãnzɛlle, tɩ m yamã kẽ-a. M da mi n kẽnda a tigingã pʋgẽ n maand tigissã. Yʋʋmd 1960, d kẽe kãadem. A sɩd yaa pʋg-sõng tɛkẽ, la kũun-kãseng sẽn yit a Zeova nengẽ. —Yel. 19:14.

Na maan yʋʋm wʋsgo, mam zãmsa bũmb ka tɛk sẽn tar yõod saam-biis sẽn tar yam la minim nengẽ. Sẽn yɩɩd fãa, m bãngame tɩ d sã n dat n tõog tʋʋmd ning fãa a Zeova sẽn kõ-d a siglgã pʋgẽ, d segd n sika d menga, la d tũ saglg ning sẽn be Yel-bũn 15:22 pʋgẽ wã. Be b yetame yaa: “Sagendb sã n yaa wʋsgo, tõogr beeme.”

Yʋʋmd 1964, mam sɩngame n neẽ tɩ Biiblã gom-kãensã sɩd yaa sɩda. Yʋʋm-kãnga, mam lebga tigims sull yel-gɛta, n gilgd n kaagd tigimsã n na n keng saam-biisã raood la m paas b tẽebã pãnga. Wakat kãnga, m da tara yʋʋm 27, n da pa tar minim wʋsg ye. Rẽ n so tɩ m da mi n tudgdẽ. La m modgame n dɩk yam rẽ pʋgẽ. Sẽn yɩɩd fãa, mam zãmsa bũmb wʋsg sẽn tar yõod saam-biis sẽn tar minim la sẽn mi neb saglg sõma nengẽ.

M tẽra bũmb a ye sẽn maane, m sẽn wa n lebg tigims sull yel-gɛt paalmã. M da tɩ kaaga tiging a ye sẽn be Paari. Semennã baasgẽ, saam-biig a ye sẽn tar minim n bool maam kɛɛnga, t’a rat n yã-m lame. Mam leokame tɩ yell kae ye.

A soka maam yaa: “Louis, ned sã n wa bool logtor a zakẽ, yaa bõe yĩnga?”

Mam leokame tɩ “yaa sẽn na yɩl t’a wa tɩp bãada.”

A yeelame yaa: “Yaa woto. La mam gũus n gesame tɩ fo sã n wa kaag tõndo, yaa neb nins tẽeb sẽn tar pãngã la f nong n be ne n tɩ yɩɩda. Wala makre, tigingã yel-gɛtã. Tõnd tigingã yaool n tara saam-biis la saam-bi-pogs wʋsg raood sẽn komse, sẽn yaa nin-paala, bɩ sẽn zoet yãnde. B sã n paam tɩ fo yã sẽk n zĩnd ne-ba, bɩ n pʋd n kẽng b zagsẽ wã n tɩ kaag-ba, la f naag-b n dɩ, b sũur na n yɩɩ noog wʋsgo.”

Saam-biigã saglgã yɩɩ maam noog wʋsgo. A sẽn wilg t’a nonga tigingã nebã yɩ-m-la noog wʋsgo. Baa sẽn yɩ toog tɩ m sak n deeg tɩ m kongame wã, m sɩnga a saglgã tũub tao-tao.  M pʋʋsda a Zeova barka, d sẽn tar saam-biis a woto buudã.

Yʋʋmd 1969 ne yʋʋmd 1973, tigis-kãsems sẽn tigim tẽns toɛy-toɛy neb n zĩnd Kolõmbe, Paari soolmẽ wã, tɩ b yãk maam tɩ m na n yɩ sull ning sẽn na n ges rɩɩbã yellã yel-gɛta. Yʋʋmd 1973 tigis-kãsengã sasa, tõnd da segd n dɩlga sẽn ta neb tus pis-yoobe, rasem a nu pʋgẽ. M da pa mi d sẽn na n maan to-to n tõog n dɩlg neb a woto fãa ye. So-kãngã yɛsa, mam da segd n tũu Yel-bũn 15:22 saglgã, rat n yeel tɩ n bao sagls neb a taab nengẽ. Mam tɩ yãa saam-biis sẽn tar minim tʋʋm-kãng wɛɛngẽ, n paam sagls b nengẽ. Kẽer da yaa koos-rãmba, zẽ-koaadba, rɩ-segendba, la neb sẽn gilgd n daad teedo. D naaga taab n tõog n tʋm tʋʋm-kãngã sẽn da pa nana wã.

Yʋʋmd 1973, b boola maam ne m pagã Fãrens Betɛllẽ wã tɩ d na n tɩ tʋmd be. Tʋʋmd ning b sẽn kõ maam pipi wã pa yɩ nana ye. Mam da segd n gesame tɩ d saam-biisã sẽn be Kamerun sẽn yaa Afirik tẽng a ye wã paamd siglgã sɛbã. B ra gɩdga d tʋʋmdã beenẽ, yʋʋmd 1970 n tãag yʋʋmd 1993. So-kãngã yɛsa, m da pa mi m sã n na n tõoga tʋʋmdã ye. Tõe tɩ saam-biig ning sẽn da yaa Fãrens Betɛllã yel-gɛt wakat kãngã bãnga rẽ. Rẽ n so t’a keng mam raood n yeel yaa: “D saam-biisã sẽn be Kamerunnã sɩd rata sɛbã sẽn na n paas b tẽebã pãngã. Bɩ d ges tɩ b paam rẽ!” La d sɩd gesame tɩ b paame.

Mam toga soay n kẽng tẽns sẽn yaa tẽn-yags ne Kamerunni, n na n maan tigsg ne kãsem-dãmb sẽn yaa Kamerun nebã. Rap kãensã sẽn tar raood la yamã sõnga maam tɩ m bãng m sẽn na n maan to-to, n tõog n toond saam-biisã sẽn be Kamerunnã sɛbã wakat fãa. A Zeova ninga d modgrã barka. Sɩd me, na maan yʋʋm 20 pʋgẽ, a Zeova nin-buiidã sẽn be Kamerunnã zɩ n kong Gũusg Gasg baa a yembre, ne Le service du Royaume sebrã sẽn da yit kiuug fãa wã ye.

Maam ne a Ãnzɛll sẽn wa n sɩng n na n bao n bãng taab n paasã, mam yãame t’a tara zood sõma ne a Zeova. D sẽn wa n kẽ kãadmã, m maneg n yãa rẽ vẽenega. Wala makre, d kãadmã daar zaabre, a kosa maam tɩ m pʋʋs a Zeova n gom tõnd d yiibã sẽn tʋll n tũ-a ne d sũy fãa wã yelle. A Zeova leoka d pʋʋsgã.

A Ãnzɛll leb n sõnga maam tɩ m maneg n teeg a Zeova sõma. Wala makre, b sẽn wa n bool tõnd Betɛllẽ wã yʋʋmd 1973, m da pa rat n kẽng ye. Bala m da nonga tigimsã kaagrã. La a Ãnzɛll tẽega maam tɩ d rɩka d mens n kõ a Zeova n na n maan a raabã. Rẽ wã, d pa segd n maan bũmb ning fãa a siglgã sẽn kos-d tɩ d maanã sɩda? (Ebre. 13:17) M da pa tõe n kɩɩs rẽ ye! D saga d teedo, n kẽng Betɛllẽ wã. Yʋʋm ka tɛkã maam ne m pagã sẽn be ne taabã, a yamã, a sẽn yaa maan-tɩ-zems soabã, la a sẽn nong a Zeova ne a sũur fãa wã kɩtame tɩ d kãadmã paam pãnga, la sõngd tõnd tɩ d bãngd n yãkd yam wakat fãa.

Tõnd yʋʋmã vẽsgame. La a Ãnzɛll ket n yaa pʋg-sõngo, la pag sẽn teend a sɩda. Wala makre, sẽn na yɩl n kẽng siglgã lekoll-dãmbã, tɩ wʋsg yaool n yaa ne ãngilindã, maam ne a Ãnzɛll modgame n na n zãms buud-gom-kãng sõma. Rẽ kɩtame tɩ d tɩ naag tiging sẽn gomd ãngilindi, baa ne tõnd ned kam fãa yʋʋm sẽn yɩɩd 75 wã. Mam sẽn yaa Fãrens filiyallã taoor lʋɩtb sull nedã yĩngã, yɩl n da yã sẽk n zãms buud-gomd a to ra yaa toogo. La maam ne a Ãnzɛll sõnga taaba. Masã, d ned kam fãa yʋʋm yɩɩda 80, la d ket n segenda tigissã ne ãngilindi, la ne farende. D leb n modgdame n kẽnd tigissã wakat fãa, la d moond koe-noogã ne d tigingã wa d sẽn tõe tɛka. D sẽn modgd n zãmsd ãngilindã, a Zeova ninga barka.

Wala makre, yʋʋmd 2017 wã, a Zeova ninga tõnd bark kẽengo. Maam ne a Ãnzɛll paam n kẽnga Betɛll-rãmbã yel-gɛtb ne b pagbã lekolle, a Zeova Kaset rãmbã karen-do-kãsengã sẽn be Patɛrsõn, Niuyork soolmẽ wã.

A Zeova n sɩd yaa karen-saamb-kãsengã. (Eza. 30:20) Dẽnd a nin-buiidã, b yaa kamb tɩ b yaa kãsembã fãa sẽn paamd zãmsg sẽn ka to wã pa lingr ye. (Tõo. 4:5-8) Sɩd me, mam gũus n gesame tɩ kom-bɩɩs nins sẽn kelgd a Zeova la b kelgd saam-biis nins sẽn tar minimã tẽebã bɩta sõma, n yaa neb sẽn maand sɩd ne a Zeova. Yel-bũn 9:9 wã yetame: “Wilg yam soaba, t’a na n paama yam n paase. Zãms nin-tɩrga, la a na n paama bãngr n paase.”

M mi n lebg n tẽega bũmb ning sẽn maane, yʋng ning mam sẽn da be Alzeeri tãensã zutã. Yaa na maan yʋʋm 60 la woto. Yʋn-kãngã, m da pa mi tɩ m vɩɩmã na n wa talla bark woto ye. Mam zãmsa bũmb wʋsg neb a taabã nengẽ. A Zeova sõnga maam ne a Ãnzɛll fãa tɩ d vɩɩmã tar barka. Rẽ n so tɩ d yãk yam n pa na n bas tɩ bũmb gɩdg-d tɩ d pa zãms bũmb wʋsg d saasẽ Ba wã nengẽ, la d tẽed-n-taas nins sẽn tar minim la sẽn nong a Zeova wã me nengẽ ye.