Nejon tein nechpanok senkis kipatak nonemilis, porin ijkuak peuak niktemoua nikixmatis Dios. Sayoj ke achto ke namechtapouis toni panok nejon youak, nikneki namechtapouis seki taman tein nikpanok keman katka nikonetsinok tein kichiuak maj niknekini nikixmatis Dios.

Niyolik itech xiuit 1937 itech xolal Guesnain, kampa onkak minas uan moajsi kampa ika norte ompa Francia. Nopopaj tekitia itech se mina kampa kikixtiayaj carbón uan nechmachtij ke moneki se tekitis. No nechmachtij ke moneki se kitemos maj mochiua tein melauak. Kintajtouiaya akin tekitiaj itech minas porin kiitaya ke kampa tekitiaj ueliskia kinpanos tein amo kuali, uan yejua ika mokuia iniuan okseki taltikpakneminij akin no kitemouayaj kinpaleuiskej uan yaya huelgas. Uan no, kualania porin tiopixkamej kinkajkayauayaj taltikpakneminij. Maski tiopixkamej kuali nemiaj, kintajtaniayaj tomin uan takual akin tekitiaj itech minas maski yejuan ouij kinkisaya moixpanoltiskej. Kemej nopopaj semi kikualantiaya tein kichiuayaj amo keman nechmachtij maj niktojtoka nion se taneltokalis. Tein melauj, amo keman ika titajtojkej Dios.

 Ijkon kemej nimoskaltijtiaya, okachiok nechkualantiaya nikitas ke ininka mauiltiayaj seki taltikpakneminij. Semi nechkualantiaya maj sekin kinchikoitanij akin okseko kayomej katkaj uan nemiaj ompa Francia. Nikuelitaya nietos iniuan ininkoneuan akin ompa yajkaj mokaltalitoj uan iniuan nimauiltiaya fútbol. Uan no, nomomaj katka kayot Polonia, amo Francia. Niknekia maj taltikpakneminij akin seseko kayomej katkaj kuali mouikanij uan maj amo mochikoitanij.

Nimochiuak tateuijkej itech xiuit 1957, uan yejua ika nietoya Argelia nejon youak tein yekinika namechtapouij. Satepan ke nikijtoj “¡NoDios, xinechpaleui!”, nikitak ke tein kakistik amo katka se tateuijkej, ta katka se burro tein nemi koujtaj. ¡Semi niyolseuik! Nejon tein nechpanok uan neteuilis kichiuak maj okachi itech nitanemiliani nonemilis. Nimotajtaniaya: ¿keyej tinemij?, ¿toka motekipachoua Dios?, ¿onkas yolseuilis se tonal?

Se tonal, keman niajka nikinkalpanoto notatuan nikixmatik se itaixpantijkauj Jiova. Nechmakak se Biblia tein peuak nikixtajtoltia keman nimokepak Argelia. Se tajkuilol tein nechtanemililtij yejua Apocalipsis 21:3, 4, tein kijtoua: “Totajtsin Dios mokaltalikiu intsalan in ipueblojkauan [...]. Uan Totajtsin kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok”. Amo keman nikixtajtoltijtoya nejon, yejua ika nimotajtaniaya ox yekmelauj panoskia. Ijkuak, nion tepitsin nikixmatia Dios nion Biblia.

Itech xiuit 1959 amo katkaok nitateuijkej, uan ijkuak nikixmatik se itaixpantijkauj Jiova akin monotsaya François, akin nechnextilij miak taman tein Biblia tamachtia. Kemej neskayot, nechmachtij ke Dios monotsa Jiova (Sal. 83:18). Uan no, nechmachtij ke Jiova kiixpolos teikamauiltilis, ke kichiuas maj taltikpak mochiua se xochital uan ke no kichiuas tein kijtoua Apocalipsis 21:3, 4.

Nikitak ke katka taixejekol tein nechmachtiayaj uan nikneltokak. Sayoj ke no semi nikualanik iniuan tiopixkamej uan niknekia maj nochin kimatinij ke tein tamachtiayaj amo yetok itech Biblia. Niknextij ke nitanemiliayaok kemej nopopaj uan amo niknekia nimochias, ta niman niknekia nikyektalis nejon.

François uan okseki tokniuan nechpaleuijkej maj amo semi nikualaniniok. Yejuan nechiluijkej ke akin tikchiuaj kemej Cristo amo moneki tikiniluiskej taltikpakneminij ke kichiujtokej tein amo kuali, ta ke moneki tikinmatiltiskej tein kuali tein kichiuas iTekiuajyo Dios. Yejua nejon tein kichiuak Jesús, uan no yejua nejon kinnauatij itatojtokakauan maj kichiuakan (Mat. 24:14; Luc. 4:43). No monekik nimomachtis kuali nikinnojnotsas taltikpakneminij uan nikinpoujkaitas, maski kipiayaj okse taneltokalis. Biblia kijtoua: “Se kuali tekitike ten kiyolpaktia Dios, yejua nijin ma amo kinchiuilijtinemi oksekin ke ma no motajtolteuijtinemikan. Ta [...] ma yolyemankanemi” (2 Tim. 2:24).

Nikpatak nochi tein monekia uan nimoauij itech xiuit 1959 itech se ueyi nechikol tein uejkauaya ome tonal. Itech nejon ueyi nechikol nikixmatik se ichpoch akin semi nikuelitak. Monotsaya Angèle. Niaya nikitati itech nechikol kampa mosentiliaya, uan timonamiktijkej itech xiuit 1960. Yejua se kuali siuat, kipia kualtsitsin kualneskayomej,  se inetetayokolil Jiova tein semi kipia ipatiuj (Prov. 19:14).

Tokniuan takamej akin semi kuali mouikayaj iuan Jiova uan uejkaujya kitekitilijtoyaj nechmachtijkej miak taman. Se taman tein nechmachtijkej tein okachi kipia ipatiuj, yejua ke komo tiknekij kuali tikchiuaskej se tekit tein ouij moneki tiyeskij tiyolyemankej uan tikchiuaskej tein kijtoua Proverbios 15:22: “Kuali kisa keman moajsij miakej tayolmajxitianij”.

Itech xiuit 1964 peuak nikita ke tein kijtoua nejon tajkuilol semi kipia ipatiuj. Ijkuak peuak nitakalpanoua itech nechikolmej uan monekia nikinyolchikauas tokniuan uan nikinpaleuis maj kuali mouikanij iuan Jiova. Sayoj ke nikpiaya 27 xiujmej uan ayamo nikmatia miak taman. Yejua ika nimopolouaya. Sayoj ke nejon nepololmej nechpaleuijkej. Uan okachi nechpaleuij tein nechyolmajxitijkej tokniuan takamej akin semi kuali mouikayaj iuan Jiova uan uejkaujya kitekitilijtoyaj.

Nikelnamiki se taman tein panok keman peuak nitakalpanoua. Itech se nechikol ompa París, satepan ke tamik semana, se tokniuj takat nechtajtanij ox ueliskia tajtos nouan. Nikiluij ke kemaj.

Nechtajtanij: “Louis, keman se tapajtijkej youi kalijtik, ¿akoni kiitati?”.

Niknankilij ke akin mokokoua.

Nechiluij: “Kemaj. Sayoj ke nikitani ke okachi iniuan tietok tokniuan akin chikauak inintakuaujtamatilis, kemej tokniuj akin taixyekana itech nechikol. Miakej tokniuan itech nechikol yankuikej, amo semi tajtouaj oso kipanotokej teisa tein kichiua maj motayokoltikan. Niknemilia ke semi kinyolchikauas komo iniuan titajtoua uan hasta komo tikinkalpanoti ininchan uan iniuan titakua”.

¡Semi kuali tein nechyolmajxitij nejon tokniuj! Nikitak ke semi kintasojtaya iichkauan Jiova. Maski ouij nechkisak nikajsikamatis ke nimopolojtoya, niman peuak nikchiua tein nechyolmajxitij. Niktasojkamatilia Jiova maj moajsikan tokniuan kemej yejua.

Itech xiuit 1969 uan 1973 mochiujkej ome uejueyi nechikolmej ompa Colombes (París) kampa mosentilijkej tokniuan akin katkaj kayomej itech tataman altepemej. Ijkuak nechixtalijkej maj nikixyekana tekit tein mochiuaskia kampa kintamakaskiaj tokniuan. Itech ueyi nechikol tein mochiuak itech xiuit 1973, monekia tikintamakaskej makuil tonalmej kemej 60,000. Amo nikmatia keniuj ueliskia  nikchiuas nejon. Sayoj ke oksepa nechpaleuij tein kijtoua Proverbios 15:22: nikintajtanis oksekin maj nechyolmajxitikan. Niktemoj ininnepaleuil seki tokniuan takamej akin kimatiaj kichiuaskej nejon tekit. Sekin kinamakayaj nakat, tatokayaj, takualchiuayaj uan kimatiaj keniuj takouaskej. Ika ininnepaleuil uelik tikchiujkej nejon ueyi tekit.

Itech xiuit 1973, nonamik uan nejua techyoleujkej maj titapaleuitij Betel tein moajsi Francia. Yekinika tekit tein nechmakakej no ouij katka. Monekia niktemos keniuj ueliskia tikintitaniliskej amaixmej tokniuan akin nemiaj Camerún, se altepet tein moajsi África kampa tekiuanij amo kinkauayaj tokniuan maj kiueyichiuanij Jiova itech xiujmej 1970 hasta 1993. Oksepa amo nikmatia keniuj ueliskia nikchiuas nejon. Nesi ke tokniuj akin ijkuak taixyekanaya ompa Betel kiitak ke nimotekipachojtoya. Kemej kinekia nechyolchikauas, nechiluij: “Tokniuan akin nemij Camerún moneki kiseliskej amaixmej porin semi kinpaleuis. ¡Moneki tikinyekpiaskej!”. Uan yejua nejon tikchiujkej.

Miakpa niajka altepemej tein moajsij kampa tami Camerún porin nimosentiliaya iniuan tokniuan tayekananij akin nemiaj Camerún. Nejon tokniuan semi yolchikaujkej katkaj uan kipiayaj tamatilis. Yejuan nechpaleuijkej maj nikmatini keniuj ueliskia nochipa nikintitanilis amaixmej tokniuan akin nemiaj Camerún. Uan Jiova semi techpaleuij, porin kemej itech 20 xiujmej, itekitikauan nochipa kipiakej amaix Tanejmachtijkej uan amaix tein mejmetstika kisaya, tein ijkuak moixmatia kemej Nuestro Servicio del Reino.

Keman Angèle uan nejua peuak timoixmatij, nikitak ke semi kuali mouikaya iuan Jiova. Uan okachi nikitak nejon keman timonamiktijkej. Kemej neskayot, keman timonamiktijkej, nejon youak nechtajtanij maj niktataujtiani Jiova uan maj nikiluiani ke tiknekiaj tikchiuaskej nochi tein tiueliskiaj itech itekiyo. Uan Jiova technankilij.

Angèle no nechpaleuiani maj okachi nitakuaujtamati iuan Jiova. Kemej neskayot, keman itech  xiuit 1973 techyoleujkej maj titapaleuitij Betel, ouij nechkisak nikselis nejon tekit porin semi nikuelitaya nitakalpanos itech nechikolmej. Sayoj ke Angèle nechelnamiktij ke timotemaktijkaj iuan Jiova, uan ke yejua ika monekia tikchiuaskej tein inechikol technauatiskia (Heb. 13:17). Amo teyi uelik nikijtoj. Yejua ika tiajkej titapaleuitoj Betel. Nonamik semi kitasojta Jiova, semi tamatkej uan kuali kiixejekoua teisa. Nejin kualneskayomej techpaleuianij maj kuali timouikakan uan maj kuali titaixpejpenakan itech nochi xiujmej tein tisenyetonij.

Axkan ke tixiuejkejya, Angèle kisentoka kinextia kualtsitsin kualneskayomej uan semi nechpaleuia. Kemej neskayot, miak tamachtilis tein motemaka itech inechikol Jiova mochiua itech tajtol inglés. Kemej Angèle uan nejua tiknekiaj tikseliskej, peuak timochikauaj okachi tiueliskej nejon tajtol. Yejua ika tipanokej se nechikol kampa motajtoua inglés maski ijkuak tikpiayaj kemej 75 xiujmej. Kemej nietok itech Comité de Sucursal ompa Francia, ouij nechkisak nimomachtis nejon tajtol porin amo semi nikpia tiempo. Sayoj ke Angèle uan nejua timosenpaleuiayaj. Uan axkan ke tikpanauiajya 80 xiujmej, tiksentokaj timomachtiaj tein tikitaskej itech nechikolmej itech tajtol inglés uan itech tajtol francés. Timochikauaj titapaleuiskej nochi tein tiuelij itech nechikolmej uan itech tanojnotsalis. Jiova techtatiochiuiani porin timochikauanij tiueliskej tajtol inglés.

Itech xiuit 2017 tikpiakej se ueyi tatiochiualis. Angèle uan nejua techyoleujkej maj tikselikan Tamachtilis tein kiseliaj Taixyekananij itech Sucursal uan Ininnamik, tein mochiua Patterson (Nueva York) itech Kalmej kampa iTaixpantijkauan Jiova Kitemakaj Tataman Tamachtilis.

Jiova okachi Ueyi Tamachtijkej (Is. 30:20). Yejua ika, nochin itekitikauan, akin xiuejkejya uan akin ayamo xiuejkej, kiseliaj okachi kuali tamachtilis tein onkak (Deut. 4:5-8). Nikitani ke telpochmej uan ichpochmej akin kikakij tein Jiova tayolmajxitia uan tein kinyolmajxitiaj tokniuan takamej uan siuamej akin semi kuali mouikaj iuan Jiova uan uejkaujya kitekitilijtokej semi kinpaleuia, porin kuali taixpejpenaj uan amo keman kikauaj Jiova. Panoua tein kijtoua Proverbios 9:9: “Xikmachti se akin tamatkej uan mochiuas okachi tamatkej. Xikmachti se akin yolmelauak uan kimatis okachi miak taman”.

Kemansa itech nitanemilia tein panok nejon youak keman nietoya itech tepemej ompa Argelia kemej 60 xiujmej achto. Amo nikmatia ke satepan semi niyolpakiskia. ¡Tokniuan nechmachtianij miak taman! Jiova kichiuani maj Angèle uan nejua semi tiyolpakikan. Yejua ika tiknekij tiksentokaskej tikixmatiskej toTajtsin Jiova uan tiktojtokaskej ininneskayo tokniuan takamej uan siuamej akin semi kitasojtaj, kipiaj miak tamatilis uan uejkaujya kitekitilijtokej.