Tlen onechpanok non tonal onechpaleui para ma niktemo toTajtsin Dios. Satepan namechiluis tlen onechpanok non youak. Achto namechiluis tlen onimokuayejyekouaya ijkuak onikatka nichokotsin uan satepan oniknekiaya nikixmatis toTajtsin Dios.

Itech xiuitl 1937 onineski ompa Guesnain non altepetl mokaua ik norte ompa Francia. Notajtsin otekipanouaya kanin okikixtiayaj tekoli uan onechititi miak ipati titekipanoskej. Noijki onechmachti moneki tikchiuaskej tlen kuali. Okitemouaya ken kinpaleuis akinmej okikixtiayaj tekoli porque otekipanouayaj kanin itlaj amo kuali kinpanoskia. Okitaya teopixkej itech toaltepe okipiayaj ome inmixko uan ye amo okipaktiaya tlen okichiuayaj. Teopixkej okintlajtlaniliayaj tomin nonmej tlakamej tlen amitlaj okipiayaj uan noijki okintlajtlaniliayaj tlakuali. Ik non, notajtsin sapanoua okikualaniaya tlen okichiuayaj, ik non, amo onechmachti itech religión. Amo keman onechtlapoui itech toTajtsin Dios.

 Ijkuak onimoskaltijtiaya ne noijki amo onechpaktiaya ijkuak oksekimej okichiuayaj tlen amo kuali. Amo onechpaktiaya ijkuak okinchikoitayaj akinmej amo okatka ialtepe Francia. Onechpaktiaya nimauiltis fútbol iuan inkoneuan tlen oualayaj itech okse altepetl. laltepe nonantsin okatka Polonia. Ne oniknekiaya nochtin kuali ma mouikakan maski tlatlamantli inmialtepe.

Itech xiuitl 1957 tekiuajkej okijtojkej ma nimochiua soldado. Ik non, oniajsito itepeyo Argelia. Non youak ijkuak onikijto: “¡ToTajtsin Dios techpaleui!”. Oniknamik se burro uan amo se soldado tlen otechkokoliaya, ¡hasta onimoyolseui! Tlen onechpanok onechpaleui ma nimokuayejyeko tleka tiyoltokej. ¿Tiktekipachouaj toTajtsin Dios? ¿Ajsis tonal ijkuak nochtin mouikaskej?

Se tonal ijkuak onikintlajpaloto notatajuan onikixmatki se iTlaixpantijka Jehová. Onechmakak se Biblia tlen okipiaya itoka La Sainte Bible, non okitekitiltiayaj católicos ika tlajtoli francés. Opejki niktlajtoltia ijkuak oksepa onia Argelia, se texto tlen onimokuayejyeko ijkuak oniktlajtolti ye Apocalipsis 21:3, 4, ompa kijtoua: “Dios yochanchiwato iwa n tlakah [...]. Ye kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli, nion tekipanólistli”. * Non amo onikmatiaya uan onikijtouaya kox melauak ijkon panos. Ne amo onikmatiaya itech toTajtsin Dios nion onikmatiaya tlen kijtoua Biblia.

Itech 1959 ijkuak ayakmo onikatka nisoldado, onikixmatki se tokni tlen itoka François. Onechmachti miak tlamantli tlen kijtoua Biblia uan noijki onechititi toTajtsin Dios itoka Jehová (Sal. 83:18). Onechyekilui toTajtsin Dios kitlajtlamis nochi tlen amo kuali uan ijkon mochiuas tlen kijtoua Apocalipsis 21:3, 4.

Tlen onechyekilui onikitak melauak uan oajsik itech noyolo. Pero noijki sapanoua onikualanki iuan teopixkej uan oniknekiaya nikinmiluis tekiuajkej amo otlamachtiayaj tlen kijtoua Biblia. Ok onimokuayejyekouaya ken notajtsin uan san niman itlaj oniknekiaya nikchiuas.

François uan oksekimej tokniuan onechpaleuijkej ayakmo ijkon ma nimokuayejyeko. Tokniuan otechmachtijkej amo moneki tikinteneuaskej oksekimej, moneki tikintlapouiskej satepan kuali tlayetos porque toTajtsin Dios tlayektlalis ika iTekiuajkayo. Ijkon otetlapoui Jesús uan okinmilui imachtijkauan ijkon ma kichiuakan (Mat. 24:14 TNM; Luc. 4:43). Noijki onimomachti moneki nikintlakaitas oksekimej ijkuak nikintlapouis maski okse inreligión. Biblia kijtoua: “Se itékitki n Toteko [amo] kinamiki mamokualanijtinemi, yej moneki mamoyekwika iwan nochteh” (2 Tim. 2:24).

Onikpatlak nonemilis uan onimoapolakti itech 1959 itech se ueyi nechikol itech circuito. Ompa onikixmatki se ichpochtli tlen sapanoua onechpakti itoka Angèle. Opejki niktlajpaloti kanin ye omonechikouaya uan otimonamiktijkej itech 1960. Ye yolkuali uan nechpaleuia miak  uan nikita se tetliokolil tlen onechmakak Jehová (Prov. 19:14).

Yopanok miak xiuitl uan nikita miakej tokniuan yonechmachtijkej miak tlamantli. Ne kijtoua para uelis tikchiuaskej tlen kijtoua ialtepe Jehová, moneki tiyetoskej tiyolyamankej uan moneki tikchiuaskej tlen kijtoua Proverbios 15:22, ompa kijtoua: “Nochi kuali kisa ijkuak kintlajtlaniaj oksekimej tlen kichiuaskej”.

Itech 1964 onikitak melauak tlen kijtoua Biblia. Itech non xiuitl ialtepe Jehová onechilui ma niyeto tlayekanki itech circuito, ik non, onikintlajpalouaya tokniuan para nikinyolchikauas ma mouikakan iuan Jehová. Yikin onikpiaya 27 xiuitl, ik non, seki tlamantli amo onikchiuaya ken omonekiaya. Pero onimochijchika nikchiuas tlen onechmachtiayaj. Tokniuan tlen okipiayaj miak xiuitl uan okipiayaj chikauak intlaneltokilis onechmachtijkej miak tlamantli.

Nikilnamiki ijkuak onikintlajpaloto tokniuan itech se tlanechikol ompa París, se tlen okipiaya chikauak itlaneltokilis onechilui kox uelis nouan motlapouiskia, onikilui kema.

Onechtlajtlani: “Louis, ¿akinmej kinmitati se tepajti?”.

Ne onikilui: “Tlen mokokouaj”.

Ye onechilui: “Kema, pero nikita te okachi tika iuan akinmej kipiaj chikauak itlaneltokilis, ken akin tlayekana itech totlanechikol katej tokniuan tlen yikin omoapolaktijkej, tlen pinauaj noso akinmej moneki tikinyolchikauaskej. Nikijtoua uelis tikinpaleuis uan tias inkalijtik uan uelis inmiuan titlakuas”.

Sapanoua onechpaleui tlen onechilui non tokni, onikitak ye melauak okintlasojtlaya itekipanojkauan Jehová. Onikitak omonekiaya niyetos niyolyamanki uan san niman opejki nikchiua tlen onechilui. Niktlasojkamatilia Jehová porque miakej tokniuan kichiuaj ken non tokni.

Itech 1969 uan 1973 onechiluijkej ma nitlapaleui para titetlamakaskiaj itech ome uejueyij nechikolmej internacionales tlen omochijkej itech Colombes París. Itech ueyi nechikol internacional tlen omochi itech 1973, omonekiaya tikintlamakaskej itech makuili tonal kanaj 60,000, sapanoua onimomojti. Oksepa nochi kuali kisaskia  tla nikchiuaskia tlen kijtoua Proverbios 15:22; ompa kiteititia ma tikintlajtlanikan ixtlamatkej tla itlaj tiknekij tikchiuaskej. Tokniuan tlen okipiayaj chikauak intlaneltokilis uan okimatiayaj ken tetlamakaskej onikintlajtlani ken uelis tikchiuaskiaj. Onimotlapoui iuan tokniuan tlen okimatiayaj kinmiktiskej yolkamej, akinmej okimatiayaj tlatokaskej, tlen okimatiayaj tlakualchiuaskej uan tlen okimatiayaj tlakouaskej. Ijkon otikintlamakakej nochtin akinmej omonechikojkej.

Itech 1973 nosiua uan ne otechyolejkej ma tiktekichiuilikan Jehová itech Betel ompa Francia. Kanin achto otechtitlankej noijki onikitak oui porque omonekiayaj tikintitlaniliskej amatlajkuilolmej tokniuan ompa Camerún. Itech 1970 hasta 1993 itech altepetl Camerún ompa Africa tekiuajkej amo okinkauiliayaj tokniuan ma tetlapouikan, ik non, omonekiaya tikitaskej ken tikintitlaniliskiaj amatlajkuilolmej, sapanoua onimotekipacho. Pero se tokni tlen okitaya ken omotetlapouiaya ompa Francia onechitak uan onechyolchika ijkuak onechilui: “Tokniuan tlen chanti ompa Camerún kinekij amatlajkuilolmej ma tikintitlanilikan”. Uan ijkon otikchijkej.

Miak uelta onia itech altepemej tlen monamikij iuan altepetl Camerún. Ompa onimonechiko iuan tokniuan tlayekankej para inmiuan nimotlapouiskia. Otimopaleuijkej iuan nonmej tokniuan tlen okatkaj yolchikauakej uan ijkon otikintitlanilijkej amatlajkuilolmej tokniuan tlen chantij ompa Camerún uan Jehová otechteochi. Itech 20 xiuitl tokniuan okiselijkej revista Akin Tetlapouijtok uan amatlajkuilol tlen omotokayotiayaj Nuestro Servicio del Reino tlen okisaya sejse metstli.

Ijkuak onikixmatki Angèle onikitak omochijchikauaya kipias inemilis ken toTajtsin Dios kipaktia uan ijkuak otimonamiktijkej okachi ijkon onikitak. Non tonal ijkuak otimonamiktijkej, ijkuak  timotlatlaujtiskiaj onechilui ma nikilui Jehová otiknekiayaj okachi tiktekichiuiliskej san sekan uan ye otechkak.

Angèle noijki yonechpaleui para okachi ma nitlaneltoka itech Jehová. Se tonal itech 1973 ijkuak otechyolejkej ma titlapaleuitij ompa Betel. Ne amo onikmatiaya tlen nikchiuas porque okachi onechpaktiaya nikintlajpaloti tokniuan itech circuito. Pero Angèle onechilnamikti tejuan otimotemakakej ixpan Jehová, ik non, omonekiaya tikchiuaskia tlen otechiluiaya ialtepe (Heb. 13:17). Ayakmo itlaj onikijto uan san niman otikselijkej tlen otechilui ialtepe Jehová uan otiajkej Betel. Yiuejkika nosiua kimati keman tlajtos uan keman amo, kimatij kuali mokuayejyekos uan kitlasojtla Jehová uan non techpaleuia para kuali ma timouikakan uan kuali ma tikpejpenakan tlen tikchiuaskej.

Axkan yitikpiaj miak xiuitl, Angèle yolkuali uan ok nechpaleuia. Nikijtos ken kichiua. Tlamachtil tlen tikseliskiaj kajki ika inglés. Ik non, Angèle uan ne otimochijchikajkej timomachtiskej non tlajtoli. Otikpiayaj kanaj 75 xiuitl ijkuak otikijtojkej timonechikoskiaj iuan tokniuan tlen tlajtouaj inglés. Ken nitlapaleuia iuan tokniuan tlen tlayekanaj itech Betel ompa Francia onikitaya oui nimomachtis tlajtoli inglés pero ome otimopaleuijkej. Axkan yitikpiaj 80 xiuitl pero ok timomachtiaj ika inglés uan francés para timonechikoskej. Timochijchikauaj titlapaleuiskej kanin timonechikouaj uan nochipa titetlapouiaj iuan tokniuan. Jehová yotechteochi porque otimochijchikajkej timomachtiskej inglés.

Itech 2017 otechyolejkej ma tikselikan tlamachtil tlen kinmakaj akinmej tlayekanaj ompa Betel, ik non, otiajkej Patterson Nueva York.

San Jehová ye akin okachi kuali tlamachtia (Is. 30:20). Itekipanojkauan akinmej yikipiaj miak xiuitl uan akinmej amo, nochtin yejuan Jehová kinmachtia (Deut. 4:5-8). Yonikitak telpokamej uan ichpokamej tlen kichiuaj tlen kijtoua Jehová uan noijki kichiuaj tlen kinmiluiaj tokniuan, kuali kipejpenaj tlen kichiuaskej uan nochipa kitlakamatij Jehová. Kichiuaj ijkon ken kijtouaj Proverbios 9:9, ompa kijtoua: “Xikmachti akin ixtlamatki uan okachi mochiuas ixtlamatki. Xikmachti akin yolkuali uan okachi miak tlamantli kimatis”.

Ualeua nikilnamiki tlen yiuejkika onechpanok ipan tepetl ompa Argelia. Yikipia kanaj 60 xiuitl ijkon onechpanok. Amo onimokuayejyekouaya ken satepan sapanoua niyolpakiskia. Miak onechmachtijkej tokniuan. Jehová yotechteochi Angèle iuan ne uan axkan tiyolpakij tiktekichiuiliaj. Yotikijtojkej nochipa timomachtiskej itech Jehová uan noijki tikinkauiliskej tokniuan tlen kitlasojtlaj ma techmachtikan, tikkakiskej tlen techmachtiskej uan tikchiuaskej.