Okwenzakala ngalobobusuku kwatshintsha impilo yami ngoba yiso isikhathi engaqalisa ngaso ukuzama ukwazi uNkulunkulu. Kodwa ngingakalilandiseli okwenzakala ngemva kwalokho, wothini ngiqale ngilitshele izinto ezenzakala ngisesemncane, ezenza ukuthi ngifune ukufunda ngoNkulunkulu.

Ngazalwa ngo-1937 eGuesnain, idolobho elalilamamayini elisenyakatho yeFrance. Ubaba wayesebenza emayini yamalahle futhi wangifundisa ukuthi kuqakathekile ukusebenza nzima. Wangifundisa lokuthi ngizonde ukuphathwa kubi kwabantu. Wabona ukuthi abanengi abasebenza emayini babephathwa kubi futhi besebenza endaweni eyingozi, njalo wayefuna ukubancedisa. Yikho wajoyina izinhlanganiso ezazilwela amalungelo abantu abasebenza emayini. Ubuzenzisi babafundisi labo babungamphathi. Abanengi babo babephila impilo entofontofo kodwa babecela ukudla lemali ebantwini ababezidubekela ababesebenza emayini. Okwakusenziwa ngabafundisi kwakumenyanyisa ubaba okokuthi kazange  angifundise lutho oluphathelane lenkolo. Vele asizange sike sixoxe ngoNkulunkulu.

Lami njengobaba ngangikuzonda ukuphathwa kubi kwabantu. Enye yezinto engangizizonda yikubandlululwa kwabantu abathuthela eFrance bevela kwamanye amazwe. Ngangijayele ukudlala ibhora labantwababo futhi ngangikholisa ukuba labo. Phela vele umama wayengasoweFrance, wayengowePoland. Ngangifisa ukuthi abantu bemihlobo etshiyeneyo bahlale ndawonye ngokuthula futhi bangabandlululani.

Ngo-1957 uhulumende wangifaka esisotsheni. Lokho yikho okwangenza ngacina sengisentabeni ze-Algeria ngobusuku lobuyana engikhulume ngabo ekuqaliseni. Ngathi sengimemeze uNkulunkulu ngimcela ukuthi angincedise, kwathutsha idonki yeganga hatshi isitha. Ngezwa kusithi hu! Lanxa kunjalo, okwenzakala ngalobobusuku lempi ngokwayo kwangenza ngacabangisisa ngempilo. Ngazibuza: Siphilelani? UNkulunkulu ulendaba lathi yini? Kuzafa kwaba lokuthula okungasoze kuphele yini?

Ngokuhamba kwesikhathi ngikulivu ngivakatshele abazali bami, ngahlangana lenye indoda enguFakazi kaJehova. Yanginika iBhayibhili lesiFrench lamaKatolika okuthiwa yi-La Sainte Bible futhi ngaqalisa ukulibala sengibuyele e-Algeria. Umbhalo owangithinta kakhulu nguSambulo 21:3, 4. Amavesi lawo athi: ‘Itende likaNkulunkulu lisebantwini. Uzakwesula zonke izinyembezi emehlweni abo, ukufa ngeke kusaba khona, loba ukulila loba ukukhala loba ubuhlungu.’ * Amazwi la angimangalisa. Ngazibuza ukuthi angabe eliqiniso yini. Ngalesosikhathi ngangingakwazi okunengi ngoNkulunkulu langeBhayibhili.

Ngo-1959 sengitshiyile isisotsha ngahlangana lomunye uFakazi okuthiwa nguFrançois owangifundisa izinto ezinengi eziseBhayibhilini. Ngokwesibonelo, wangitshengisa ibizo likaNkulunkulu elithi Jehova. (Hubo. 83:18) Wangichasisela ukuthi uJehova uzaqeda ukungahlulelwa kuhle kwabantu, atshintshe umhlaba ube lipharadayisi besokugcwaliseka amazwi akuSambulo 21:3, 4.

Lokho uFrançois ayengifundisa khona kwakulengqondo futhi kwangithinta inhliziyo. Kodwa ngabazondela abafundisi futhi ngangifuna ukuveza egcekeni ukuthi izinto ababezifundisa kazikho eBhayibhilini. Ngangilokhu ngicabanga njengobaba futhi ngangifuna ukulwisana lokuphathwa kubi kwabantu njalo ngangifuna ukwenza okuthile ngokuphangisa ukuze ngibancede.

UFrançois labangane bami abangoFakazi engasengibatholile bangincedisa ukuthi ngehlise umoya. Bangichasisela ukuthi njengoba singamaKhristu akumelanga sahlulele abantu kodwa kumele sibancedise ngokubatshela izindaba ezinhle ezimayelana loMbuso kaNkulunkulu. Lo yiwo umsebenzi owawusenziwa nguJesu futhi alaya abafundi bakhe ukuthi bawenze. (Mat. 24:14; Luk. 4:43) Kwakumele ngifunde ukukhuluma kuhle labantu futhi ngibe lomusa lanxa ngangingavumelani lalokho abakukholwayo. Phela iBhayibhili lithi “inceku yeNkosi akumelanga ilwe, kodwa kumele ibe lesineke kubo bonke.”—2 Tim. 2:24.

 Ngatshintsha indlela engangiphila ngayo ngasengibhabhathizwa emhlanganweni wesiqinti ngo-1959. Emhlanganweni lo kwakulomunye udade okuthiwa ngu-Angèle owangichazayo. Ngaqalisa ukumvakatshela ebandleni ayengena kulo sasesitshada ngo-1960. Ungumfazi omuhle futhi uyisipho esiligugu esivela kuJehova.—Zaga. 19:14.

Okweminyaka eminengi, ngifunde izifundo ezinengi eziqakathekileyo kubazalwane abahlakaniphileyo futhi abaqinileyo ekukhonzeni. Esinye sakhona yikuthi singaphumelela kuloba yiwuphi umsebenzi wenkonzo onzima nxa sithobekile futhi sisebenzisa lokho okutshiwo kuZaga 15:22 othi: ‘Amaqhinga ayaphumelela ngabeluleki abanengi.’

Ngo-1964 ngaqalisa ukubona ukuthi amazwi la aphefumulelweyo aliqiniso sibili. Lo yiwo umnyaka engaba ngumbonisi wesiqinti ngawo, ngivakatshela amabandla ukuze ngikhuthaze abafowethu labodadewethu njalo ngibancedise ukuthi basondele kuJehova. Ngangileminyaka engu-27 futhi kwakungakabi lokunengi engasengikufundile ngokuba ngumbonisi wesiqinti. Yikho ngangisenza amaphutha. Kodwa ngangizama ukufunda kuwo. Okwanginceda kakhulu yizifundo ezinengi eziqakathekileyo engazifunda ‘kubeluleki’ abahlakaniphileyo futhi abaqinileyo ekukhonzeni.

Ngikhumbula okunye okwenzakala ngisanda kuqalisa ukuba ngumbonisi wesiqinti. Sathi siqeda kuhambela elinye ibandla eliseParis, omunye umzalwane oqinileyo ekukhonzeni wacela ukukhuluma lami. Ngathi, “Kulungile.”

Wabuza wathi: “Louis, nxa udokotela ebuya endlini uyabe elande bani?”

Ngaphendula ngathi: “Ogulayo.”

Yena wathi: “Uqinisile. Kodwa nginanzelele ukuthi uqeda isikhathi esinengi ulabantu abaqinileyo ekukhonzeni, njengombonisi webandla. Ebandleni lethu kulabafowethu labodadewethu abanengi abadanileyo, abasanda kuba ngoFakazi labalenhloni. Ungabakhuthaza nxa ungazinika isikhathi sokuba labo kumbe ubavakatshele uyekudla labo emizini yabo.”

Iseluleko somzalwane lo othandekayo sasisihle sibili. Indlela ayethanda ngayo izimvu zikaJehova yangithinta inhliziyo. Yikho lanxa kwakunzima ukuvuma ukuthi ngenze iphutha, ngahle ngaqalisa  ukukusebenzisa lokho ayekutshilo. Ngiyambonga uJehova ngabazalwane abanjengaye.

Ngo-1969 lango-1973, ngabekwa ukuthi ngibe ngumbonisi wohlangothi olukhangela ngokudla emihlanganweni yezizwe emibili eyenzelwa eColombes, eParis. Emhlanganweni ka-1973, nsuku zonke kwakumele silungise ukudla kwabantu abangaba ngu-60 000, ababezakudla okwamalanga amahlanu. Ngangingakwazi lokuthi sizakwenza njani lokho. Kodwa okwangincedayo yikuphinda ngilandele iseluleko esikuZaga 15:22 esikhuluma ngokwelulekwa ngabanye. Ngacela ukuncediswa ngabazalwane abaqinileyo ekukhonzeni futhi ababelolwazi ngezokudla. Abanye babo babesebenza emabhutsha, belima izilimo, bengabapheki futhi belolwazi kwezokuthenga ukudla. Sindawonye senelisa ukwenza umsebenzi lo onzima.

Ngo-1973, mina lomkami sabizwa eBhetheli eFrance. Umsebenzi engafika ngawuphiwa lawo wawunzima kakhulu. Kwakumele ngidinge indlela zokuhambisela abafowethu abaseCameroon e-Africa amabhuku. Kusukela ngo-1970 kusiya ku-1993, umsebenzi wethu wawungavunyelwa elizweni lelo. Ngangingakwazi ukuthi ngizakwenelisa yini ukuwenza umsebenzi lo. Mhlawumbe umbonisi wegatsha leFrance wakunanzelela lokho yikho wangikhuthaza esithi: “Abafowethu labodadewethu bayakudinga sibili ukudla okuqinisa ukholo. Kasibanikeni.” Lakanye sabanika.

Ngavakatsha kanengi emazweni angcelelane leCameroon ukuze ngibonane labadala belizwe lelo. Abafowethu labo babelesibindi futhi behlakaniphile. Banginceda ukuthi ngithole izindlela zokuthi kuhanjiswe amabhuku ukuze abafowethu labodadewethu beCameroon bahlale bethola ukudla okuqinisa ukholo. UJehova wakubusisa esasikwenza. Okweminyaka edlula 20 abafowethu labodadewethu belizwe lelo kabazange baswele iNqabayokulinda kanye logwalo olwaluphuma nyanga zonke olwaluthiwa yi-Our Kingdom Service.

Siqalisa nje ukuthandana, ngananzelela ukuthi u-Angèle wayemthanda uJehova. Lokhu ngakubona kakhulu sesitshadile. Ngokwesibonelo, sekuntambama ngelanga esatshada ngalo, wathi sithandaze sitshela uJehova ngesifiso sethu sokwenza okunengi ekumkhonzeni. UJehova wawuphendula umthandazo wethu.

U-Angèle ungincede lokuthi ngifunde ukuthemba uJehova ngokupheleleyo. Ngokwesibonelo, ngesikhathi sibizwa eBhetheli ngo-1973, ngangidonda ukuhamba ngenxa yokuthi ngangikuthanda ukuhambela. Kodwa u-Angèle wangikhumbuza ukuthi sasizinikele kuJehova yikho kwakumele senze loba yini inhlanganiso yakhe eyayisicela ukuthi sikwenze. (Heb. 13:17) Ngavumelana laye yikho sasuka saya eBhetheli. Umkami uhlakaniphile, uyazwisisa futhi uyamthanda sibili uJehova. Ubuntu bakhe buwuqinisile umtshado wethu futhi benze senelisa ukwenza izinqumo ezinhle okweminyaka eminengi sindawonye.

Khathesi sesigugile kodwa u-Angèle ulokhu engumfazi omuhle futhi uyangisekela. Ngokwesibonelo, sasebenza nzima sifundela isiKhiwa ukuze senelise ukungena izikolo zenhlanganiso, njengoba ezinengi zisenziwa ngolimi lolo. Saqalisa ukungena lebandla lesiKhiwa lanxa sasesikubo-70. Kwakunzima ukuthi ngifundele olunye ulimi ngenxa yemisebenzi engilayo njengoba ngililunga leKhomithi Yegatsha eFrance. Kodwa mina lo-Angèle sasincedisana. Khathesi sesikubo-80 futhi nxa silungiselela imihlangano silokhu sisebenzisa isiKhiwa lesiFrench. Kanti njalo senza konke okusemandleni ethu ukuthi sihlanganyele emihlanganweni yebandla lasekutshumayeleni. UJehova uyibusisile imizamo yethu yokufundela isiKhiwa.

Sabusiswa ngendlela emangalisayo ngo-2017 ngoba sabizwa eSikolo Samalunga Ekhomithi Yegatsha Labomkabo esenzelwa eWatchtower Educational Center esePatterson, eNew York.

UJehova unguMfundisi Omkhulu sibili. (Isaya. 30:20, NWT) Yikho akumangalisi ukuthi sonke abadala labancane sithola imfundo engcono kulayo yonke. (Dute. 4:5-8) Senginanzelele ukuthi abasakhulayo abalalela uJehova kanye labafowethu labodadewethu abaqinileyo ekukhonzeni bangenza izinqumo ezinhle empilweni futhi babe zinceku zikaJehova ezithembekileyo. Kunjengoba nje iZaga 9:9 zisitsho, “Yeluleka umuntu ohlakaniphileyo uzakwandisa ukuhlakanipha kwakhe; fundisa umuntu olungileyo, uzakwengeza ulwazi lwakhe.”

Ngezinye izikhathi ngiyake ngicabange ngobusuku lobuyana obumnyama obabusesabisa ngisezintabeni ze-Algeria eminyakeni engaba ngu-60 eyadlulayo. Ngangingakwazi ukuthi ngizathokoza kangaka empilweni. Ngifunde okunengi sibili kwabanye. UJehova unike mina lo-Angèle impilo emnandi futhi esuthisayo. Yikho sizimisele ukuqhubeka sifunda kuBaba wethu osezulwini lakubafowethu labodadewethu abahlakaniphileyo futhi abaqinileyo ekukhonzeni abamthandayo.