Okutauluka omutete

Okutauluka omutete wononthele

EHIPULULO LIOMUENYO

“Nelilongesila Unene Ku Vakuetu!”

“Nelilongesila Unene Ku Vakuetu!”

PUETYI ankho ndyimukuendye, ndyifualali lyo ko França. Otyikundyi tyetu ankho tyaonga onthanda monomphunda mbo Algeria. Monomphunda omo, ovilwa ankho viatokota unene. Nthiki imwe kongulohi ankho ndyikahi nokuyunga nouta wange, ankho kuanthikovela unene. Tyina ndyiti ñga, pena tyimwe tyiivala, pundu-pundu. Andyitili unene owoma. Ame ankho hihande okuipaa omunthu, tupu ankho hihande okuipawa. Andyiliyavela okuti: “Huku yange! Huku yange nkhuateseko!”

Otyipuka otyo, atyipilulula unene omuenyo wange, mokonda andyihimbika okulilinga omapulo konthele Yomutungi. Mbo, nkhele mandyipopi etyi tyaendele na ame etyi ankho ndyimona, tyankhuatehileko okuovola okulilongesa konthele ya Huku. Konyima, andyipopi etyi tyamonekele motyinthiki tyina.

ETYI NELILONGESILA KU TATE

Ame natyitwa menima 1937 mepunda-umbo litiwa Guesnain. Epunda-umbo olio likala popepi no França. Tate ankho uyoka omakala. Tate wandongesile okuti omulume, una okuundapa unene. Tate ankho o wotyikundyi tyokuamena vokuyoka omakala. Ava tate aundapa navo, ankho valingwa onya, iya tate ankho uveamena. Otyo andongesilile okuti apeho nesukisa okukala omuviuki. Tate tyina ankho atala ononkhalamutwe mbonongeleya ononkhembi, ovahona, no ngotyo, otyo vaita onombongo nokulia kovanthu vokuyoka omakaka, ankho tyimuihama unene. Mokonda yotyo, Tate ehetulongesa natyike konthele ya Huku.

Nkhele tya pouna, ame ovivi muene hivihande-ale. Vokukala mo França ankho valinga onya ovanthu vatunda kovilongo ovikuavo. Mahi ame ankho ndyipanga liovanthu vovilongo ovikuavo, ndyikala navo, nokusana navo ombola. Mee o woko Polonia, ha woko França. Ankho ndyihanda ñgeno pokati kovanthu aveho pakala ombembwa, apahamoneka omunthu ulinga okapungulula.

ANDYIHIMBIKA OKUSOKA KOMUENYO WANGE

Etyi ndyifualali

Menima lyo 1957 andyikuatwa, andyikala efualali. Etyi napopia ponthyimbi, tyamonekele menima olio. Etyi namana okuliyavela okuti: “Huku yange! Huku yange nkhuateseko!” Tyina ndyiti ñga, mphuaino embulu, handyale-ko! Andyitulu omutima! Mahi okutuka ponthiki oyo, andyihimbika okusoka unene konthele yomuenyo wange. Andyilipulu okuti: Oityi neilila kovilwa? Okuti Huku wesuka novanthu? Okuti kumbi matukakala umwe nombembwa?

Etyi nakondoka ko França nkhatalelepo ovo tate, ngako ndyinoñgonokela Ombangi imwe ya Siovaa yamphele Ombimbiliya. Pahe etyi nakondoka ko Algeria andyihimbika okutanga Ombimbiliya oyo. Etyi natanga onondaka mbuvasiwa momukanda Eholololo 21:3, 4 mbokuati: “Ekaka lya Huku likahi pokati kovanthu . . . makasekuna ononkhuka momaiho avo, ononkhia kamambukakala-ko vali, nii okuliyava nii okulila nii omaluihamo kavikakalako vali” * andyihuvu unene. Andyilipopila okuti: ‘Okuti etyi otyili umwe?’ Ankho hii natyike konthele ya Huku nii vala Ombimbiliya.

Mo 1959 andyiyekepo oufualali. Ombangi imwe ya Siovaa utiwa François, ahimbika okundekesa ovipuka ovinyingi mo Mbimbiliya. Wandekesile mo Mbimbiliya okuti enyina lya Huku litiwa o Siovaa. (Sal. 83:18) Tupu, apopi okuti Siovaa maeta ouviuki kombanda yohi, ohi aikala omphangu yombembwa. Iya mafuisipo etyi tyipopia omukanda Eholololo 21:3, 4.

Etyi ankho andongesa tyinthyika komutima. Mahi andyinumana unene etyi ononkhalamutwe mbonongeleya vapopia okuti etyi Onombangi valongesa katyivasiwa mo Mbimbiliya! Ngetyi ankho tyilinga tate, na ame nahandele okulinga tyimwe opo ndyimane-ko omatutu oo. Nahandele umwe okutyilinga liwa-liwa!

François nepanga liange tupu nae Ombangi, avankhuatesako okutula omutima. Avati, onombangi mba Siovaa kambesukisile okulwa, etyi vena okulinga okuavela ovanthu ekevelelo pokati konondaka onongwa Mbouhamba wa Huku. Otyo, otyo otyilinga Sesusi alingile, tupu otyo ahanda ovalanduli vae valinge. (Mat. 24:14; Luka 4:43) Pahe, ankho nesukisa okulilongesa okutula omutima nokukala nonthilo netyi ovanthu vetavela. Ombimbiliya ipopia okuti: “Omupika wa Tatekulu kesukisa okulwa mahi wesukisa okukala nomapole novanthu aveho.” — 2 Tim. 2:24.

Nalingile omapiluluko andyimbatisalwa motyonge tyenima 1959. Motyonge omo, ngamo ndyinoñgonokela omphange utiwa o Angèle, iya andyimupande. Andyihimbika okuenda kewaneno liavo. Pahe, etyi tyati mo 1960 atulinepe. Angèle omukai umwe ukahi nawa, otyiawa napewa na Siovaa. — Pro. 19:14.

Onthiki tuelinepa

NELILONGESILA OVIPUKA OVINYINGI KOVAKUATATE OVANONGO

Mokueenda kuomanima, nelilongesila ovipuka ovinyingi kovakuatate ovanongo. Tyimwe nelilongesa otyetyi: Katyesukisile otyilinga patyi wapewa, opo tyiende nawa, wesukisa okuliola omutima oendela monondaka mbuvasiwa mu Provérbios 15:22, mbati: “Pana pena ovaviyuli ovanyingi ovipuka vienda nawa.”

Etyi ndyitalelapo omawaneno mo França mo 1965

Mo 1964, andyimono okuti, ankho nesukisa umwe okuendela monondongwa ombo. Menima olio, andyikala omutalelipo womawaneno, ankho ndyipameka ovakuatate nokukuatesako ovakuatate nonomphange okukala noupanga wapama na Siovaa. Ankho ndyina omanima 27, ankho ovipuka vimwe hivii, mokonda yotyo, nalingile ovipuka ovinyingi viapenga, andyililongesila kuvio. Mahi haunene nelilongesilile kovakuatate ovakulu ovanongo.”

Ongeleka imwe, o puetyi natalelapo ewaneno limwe ko Paris. Omukuatate umwe una oupanga wapama na Siovaa, ati uhanda okupopia na ame. Andyiti: “Ewa, tyitupu tyimwe.”

Etyi tuelivasa, amphulu okuti: “Louis, Olie ondotolo akuatesako? O vokuavela ine o vokukahi nawa?”

Andyiti: “O vokuavela.”

Ati: “Otyo umwe. Mahi ndyikumona okuti, umanena omuvo novakuatate vena oupanga wapama na Siovaa, ngetyi ovakulu vewaneno. Ngwe mewaneno lietu muna ovakuatate ovanyingi ovape, vamwe vasoya iya vena ohonyi. Inkha ukala navo omuvo omunyingi mavahambukwa unene. Mongeleka upondola okukalia momaumbo avo otyo uvepameka.”

Nahambukilwe unene etyi napakeluamo nomukuatate oo. Onkhalelo ankho ehole onongi mba Siovaa, tyenthyikile unene komutima. Namphila tyepuiyile okutavela okuti napengesa, mahi ngatyo umwe ndyilinga. Ndyipandula unene Siovaa wampha ovakuatate vakuatesako, ngomukuatate oo.

Menima lyo 1969 no mo 1973, andyipewa otyilinga tyokukalela komutwe Oseketa Yokuavela Okulia ovakuatate, movionge vivali viovilongo ovinyingi vialingililwe mo Colombes, Paris. Mo 1973 ame nesukisile okuavela okulia ovakuatate valamba po 60.000 mononthiki ononthano! Ankho natila owoma. Andyihinangela onondaka mba Provérbios 15:22 mbupopia okuti nesukisa okupula ku vakuetu. Andyipopi novakuatate ovanongo. Tupu andyipopi novateleki, novokuipaa onongombe, novo kutuika omakovi, novalandi. Otyilinga ankho otyange, mahi ankho mandyityivili vala inkha ndyikuatesuako na vakuetu.

Mo 1973, atukongwa tukaundape mo Mbetele yoko França. Otyillinga tyange tyotete, ankho tyepuyile unene. Ankho ndyina okutuma omikanda ko Camarões, mo Afilika. Mahi okupolela mo 1970 alo 1993, ovilinga vietu ankho viailikwa. Netyi ankho mandyilingi hityii. Mahi etyi omukuatate wokuakalela komutwe ovilinga vyo Filiale mo França etyimona, amphopila okuti: “Ovakuatate vetu ko Camarões vesukisa unene omikanda. Tuvetume omikanda!” Ngatyo umwe tulinga.

Mo 1973, puetyi tukahi meliongiyo mo Nigeria novakuatate vatunda ko Camarões

Naendele ehimbwe movilongo vikala popepi no Camarões opo ndyilinga omaliongiyo novakulu vomawaneno. Ovakuatate ovo ankho vakola omutima, iya vankhuatesileko okutuaila apeho omikanda ovakuatate voko Camarões. Siovaa wayambele ononkhono tualingile. Momanima 20, ovakuatate vetu ko Camarões kavakalele tyihena Omutala Womulavi, nomukanda weliongiyo liomokati kosimanu ankho utiwa Ovilinga Vietu Viouhamba.

Mo 1977, ame na Angèle tuahambukwa okutalelapo ko Nigeria ovatalelipo vomawaneno novakai vavo vatunda ko Camarões

NELILONGESILA KOMUKAI WANGE

Etyi tuehimbika okulipola na Angèle andyimono okuti una ovituwa oviwa. Pahe etyi tuelinepa, ovituwa ovio andyivimono umwe nawa-nawa. Mongeleka, monthiki tuelinepa omukai wange amphopila okuti, likuambela ku Siovaa omupopila okuti tuhanda okulinga atyiho movilinga viove. Siovaa wakumbulula umwe elikuambelo tualingile.

Angèle wankhuatesako okuyumba vali onthumbi mu Siovaa. Mongeleka, mo 1973 etyi tuakongwa tukaundape mo Mbetele, anehetyihande, mokonda ankho ndyihole unene okutalelapo omawaneno. Mahi Angèle anthyinangelesa okuti onthue tuelipakula ku Siovaa, iya tuna okutavela ovilinga aviho etuavela meongano liae. (Heb. 13:17) Etyi omukai wange ankho apopia otyili umwe, atuende umwe ko Mbetele. Omukai wange ukahi nawa, omunongo, wapola pokati. Ovituwa ovio vietukuatesako okupameka otyinepo tyetu, tupu viankhuatesako okulinga omatokolo omawa mokueenda kuomanima aeho tuli kumwe.

Ame na Angèle mo Mbetele yoko, França

Namphila pahe tuakulupa, mahi no ngotyo Angèle omukai ukahi nawa. Mongeleka, mono sikola ononyingi Mbouhamba tuakongwa mupopiwa vala o Ingelesi, mahi ame na Angèle, atulingi ononkhono opo tulilongese o Ingelesi. Tupu atuilukila mewaneno lyo Ingelesi namphila pomuvo opo ankho tunale omanima alamba po 70. Mokonda ndyiwo Komisau yo Filiale yoko França iya ndyina ovilinga ovinyingi, okulilongesa elaka ekuavo tyimphuiya unene. Mahi onthue tulikuatesako. Namphila tuna omanima alamba po 80, mahi no ngotyo tutualako okupongiya omaliongiyo mo Ingelesi no mo Francês. Tupu, tuenda movilinga viokuivisa newaneno. Siovaa wetuyamba unene, etyi tualinga ononkhono mbokulilongesa o Ingelesi.

Atuyambwa unene etyi mo 2017, ame na Angèle tuakongwa opo tuende Kosikola Yovo Komisau yo Filiale kumwe Novakai Vavo ko Patterson, Nova York, Mombetele mulingilwa Onosikola Mbouhamba.

Siovaa Omulongesi Omunene. (Isa. 30:20) Tupu katyituhuvisa okutala ovanthu vae, ovakuendye novakulu, valongesiwa nawa! (Deut. 4:5-8) Ame ndyihole okumona okuti, ovakuendye vatehelela Siovaa nokutavela okupakailuamo novakuatate nonomphange ovanongo, vakala noupanga wapama na Siovaa. Provérbios 9:9 ituhinagelesa okuti: “Longesa omunongo makala vali omunongo. Longesa omuviuki makala vali nenoñgonoko.”

Pamwe-pamwe, ndyisoka etyi tyaendele na ame motyinthiki tyina omanima 60 okualamba. Motyinthiki tyina etyi ankho nesukisa okulinga opo ndyikale nehambu hityii. Mahi pahe ame nelilongesila unene ku vakuetu. Ndyipandula unene Siovaa wandyavela Angèle, otyiawa tyimwe otyiwa. Natokola okutualako okulilongesila ku Tate yange Siovaa, nokovakuatate nonomphange ovanongo venthyole unene.

^ pal. 11 Ombimbiliya Ikola Yaava Ekevelelo Liouye Omupe.