Chay kutipi imachus pasawasqanmi yanapawaran kay pachata kamaq Diosta maskhanaypaq. Chay orqopi imachus pasawasqanta manaraq willashaspa ñaupaqtaqa willasaykichis wawa kashaspa imaynatachus wiñasqayta.

Noqaqa 1937 watapin Guesnain llaqtapi nacerani, chayqa kashan Francia nacionpin. Chay llaqtapiqa minapin llank’anku, papaypas chaypin llank’aq, chaymi yachachiwaran allin llank’aq kanaypaq chaninta imatapas ruwanaypaqwan. Chaymi papayqa jujkunata yanapayta munaspa huelgakunata ruwanankupaq asociacionpi participaq. Chaymantapas papayqa phiñakuqmi sacerdotekunapaq, paykunaqa qhapaqña karanku chaypas minapi llank’aq mana imayoq wajcha runakunamantan mañakuqku mijuykunata qolqeta ima. Chayraykun papayqa religionkunamantaqa mana yachayta munaqchu manataqmi jayk’aqpas Diosmantaqa yachachiwaqchu.

Wiñasqayman jinan papay jina mana chaninta ruwaq runakunata cheqnikuyta qallarirani. Francia nacionpiqa juj ladomanta jamuq runakunatan cheqnikuqku, chaymi chay cheqnikuq runakunapaq  phiñakuq kani. Noqan ichaqa juj ladokunamanta jamuq runakunaq wawankuwan pujllaq kani. Mamitayqa Polonia nacionmantan karan. Chaymi noqaqa munarani llapa runakunapas mana qhawanakuspa sumaqta kausanankuta.

Noqataqa 1957 watapin cuartelman apawaranku, ñaupaqpi willamusqay jinapas chay cuartelmantan Argelia nacionpa orqonman kachawaranku. Chaypin “¡Diosníy, yanapaykuway!” nisqay qhepaman juj asnowan tuparani, chayraqmi thaj karani. Noqaqa enemigoyku kananpaqmi piensarani. Chhayna sasachakuykunapi kasparaqmi niq kani: “¿Imaraykun sasachakuykunapi tarikunchis? ¿Manachu Dios runakunamanta llakikun? ¿Jayk’aqllapas thaj kausay kanmanchu?”, nispa.

Tiempowanqa permisota mañakuspaymi papaypa wasinta visitarani, chaypin tuparani Jehová Diospa testigonwan, paymi qowaran Santa Biblia nisqata Francés simipi. Chay Biblia qowasqantaqa Argelia nacionman chayaspayraqmi leerani. Chaypin tarirani Apocalipsis 21:3, 4 textota, chaypin nin: “Diospa karpanqa runakuna ukhupin kashanqa, paymi runakunawan kuska tiyanqa, [...] paymi ñawinkumanta tukuy weqeta pichanqa, manan wañuypas kanqañachu, manañataqmi llakikuypas, waqaypas, ni nanaypas kanqañachu”, nispa. * Manan jayk’aqpas chay jina textotaqa leeranichu, chaymi nirani: “Cheqaqpunichu chay kanman”, nispa. Chay kutipaqqa manan Diosmantaqa imatapas yacharaniraqchu.

Cuartelmantan lloqsipurani 1959 watapi, chay watallapitaqmi reqsirani François sutiyoq hermanota. Paymi Bibliamanta imaymanata yachachiwaran, chaypin yacharani Diospa sutinqa Jehová kasqanta (Sal. 83:18). Chaymantapas niwaranmi: “Diosqa kay pachapi imaymana mana allinkunatan chinkachipunqa, kay pachatapas paraisomanmi tukuchipunqa, Apocalipsis 21:3, 4 textoq nisqantapas llapantan junt’anqa”, nispa.

Chay yachachikuykunaqa sonqoymanmi chayaran. Chaymi sacerdotekunapaq phiñakurani, Bibliamanta mana allinta yachachisqankumantapas denunciaytaraqmi munarani. Chaypin reparakurani papay jina mana allinta piensaykuspa comunta imatapas ruwaruyta.

François hermanon yanapawaran allinta imatapas ruwanaypaq, chaymantapas niwaranmi: “Cristianokunaqa manan pitapas juzgananchischu”, nispa. Aswanpas Diospa gobiernonmanta runakunaman willanaypaqmi kallpachawaran (Mat. 24:14; Luc. 4:43). Chayta ruwanankupaqpunin Jesuspas qatikuqninkunata kamachisqa, chaymi noqapas kallpachakurani munakuywan respetowan runakunata rimapayanaypaq. Bibliapipas ninmi: “Señorpa kamachinqa manan imaraykupas maqanakunanchu, aswanmi payqa llapa runakunapaq llamp’u sonqo kanan”, nispa (2 Tim. 2:24).

Juj asambleapin 1959 watapi bautizakapurani. Chaypin reqsirani juj munay hermanata, sutinmi kasqa Angèle. Paywanmi 1960 watapi casarakapurani payqa munayllañan allin llank’aqllañan kanpas, chaymi Jehová Diospa regalonta jina qhawarini (Prov. 19:14).

Watakunaq pasasqanman jinan imaymanata yacharani allin experienciayoq hermanokunamanta. Chaymi Diospa llaqtanpi ima llank’anatapas junt’anapaqqa juch’uyaykukuq kananchis. Kasukunanchistaqmi Proverbios 15:22 textoq nisqanta, chaypin nin: “Askha yuyaychaqkuna kaqtinmi ichaqa yuyaykusqakunaqa junt’akun”, nispa.

Iñiq t’aqakunata watukuq umalli kanaypaqmi 1964 watapi churawaranku, chhaynapi iñiq t’aqakunata visitaspay hermanokunata iñiyninkupi kallpachanaypaq. Chay llank’ayta allinta junt’anaypaqqa Proverbios 15:22 texton yanapawaran, chay watapiqa 27 watallaypiraqmi kasharani manataqmi allintaraqchu imatapas yacharani. Chaymi kallpachakurani allin experienciayoq hermanokunaq yachachiwasqankuman jina ruwanaypaq.

Willasaykichis juj kutipi imachus pasawasqanta. Francia nacionpi ñaupaq kutipi iñiq t’aqakunata visitasqay qhepamanmi juj allin iñiyniyoq hermano niwaran: “Juj ratolla rimasunmanchu”, nispa. Chaymi noqaqa nirani: “Riki”, nispa. Chaypin niwaran:

“Louis, ¿pimanmi doctor juj wasita rispa visitan?”, nispa.

Jinan nirani: “Onqosqa runamanmi visitan”, nispa.

Paytaq niwaran: “Arí”, nispa. Chaymantapas niwaranmi: “Qanqa allin iñiyniyoq hermanokunallawanmi parlashanki. Kay iñiq t’aqapiqa kashanmi chayllaraq bautizakuq hermanonchiskuna iñiyninkupi pisikallpayaq hermanonchiskunapas, paykunawanmi astawanqa parlarinayki. Atispaykiqa wasinkutan visitawaq juj ratollapas kuska imallatapas mijunaykichispaq”, nispa.

Chay hermanoq consejawasqanqa anchatan yanapawaran. Chaypin repararani hermanonchiskunamanta llakikusqanta, chaymi noqaqa hermanoq niwasqanman jina ruwayta qallarirani. Chaykunamantan Jehová Diosta anchata agradecekuni.

Francia nacionpin 1969 watapi 1973 watapiwan jatun asambleakuna Colombes llaqtapi aparikuran, chaypin mijuna qoymanta encargakuqta churawaranku. 1973 watapiqa yaqa 60.000 runakunamanmi pisqa p’unchay mijunata qonayku karan, chay llank’ayta junt’anaypaqqa manchasqan kasharani. Ichaqa Proverbios 15:22 textoq nisqanmi yanapawaran chaymanta yachaq  allin iñiyniyoq hermanokunata maskhanaypaq. Chaypin tuparani wayk’uyta yachaq rantiyta yachaq hermanokunawan, chaymantapas tupallaranitaqmi chajra llank’aq aycha vendeq hermanokunawanpas. Paykunan allinta yanapawaranku chay llank’ayta junt’anaypaq.

Francia nacionpi Betel wasipi yanapakunaypaqmi 1973 watapi esposaytawan invitawaranku, chaypi llank’ayqa manan facilchu karan. Camerún nacionmanmi imaynatapas qelqakunata apachinayku karan, chay nacionpiqa 1970 watapi 1993 watapiwanmi Dios serviyninchis jark’asqa kasharan. Chayraykun noqapaqqa chay llank’ayqa nishu sasa karan, qelqakuna rakiymanta encargakuq hermanon repararuran chay jina kashasqayta. Jinan niwaran: “Camerún nacionpi hermanokunaqa qelqakunatan necesitashanku iñiyninkupi kallpachasqa kanankupaq”, nispa.

Chaymi askha kutita viajarani Camerún nacionpa ladonpi kaq nacionkunaman. Chaypin iñiq t’aqakunamanta umallikunawan juñukurayku, paykunan yanapawaranku Camerún nacionpi hermanokunaman tiempollanpi qelqakuna chayananpaq. Jehová Diospa yanapayninwanmi 20 watakuna Camerún nacionpi hermanonchiskunaman Qhawaq qelqata Nuestro Servicio del Reino nisqa qelqatapas mana faltayta chayachirayku.

Reqsinakusqaykumantapachan esposaypiqa repararani munakuq khuyapayakuq kasqanta. Astawanqa casarakuspa tiyasqaykupin chay jina kasqantaqa repararani. Chaymi casarakusqayku p’unchaypas niwaran: “Mañakuy Jehová Diosmanta payllataña tukuy tiemponchiswan servinanchispaq”, nispa. Chay mañakusqaykutaqa uyariwarankun Jehová Diosqa.

Angèle esposayqa Jehová Diospi confianaypaqmi astawan yanapawaran. 1973 watapin Betel wasipi yanapakunaypaq invitawaranku, noqamanqa iñiq t’aqakunata visitaymi gustawaq,  chaymi iskayasharani Betelman riyta. Esposaymi ichaqa yuyarichiwaran tukuy tiempoykuwan Diosta servinaykupaq prometekusqaykuta, niwarantaqmi: “Diospa llaqtanpi imapipas llank’ananchispaq niwaqtinchisqa kasukunanchismi”, nispa (Heb. 13:17). Chaymi noqaqa mana ima niytapas atiraniñachu, jinan Betel wasipi yanapakunaykupaq invitacionta aceptarayku. Esposaypa allin iñiyniyoq kasqanmi yanapawaranku imatapas allinta decidinaykupaq, kusisqa kausanaykupaqpas.

Kunanqa kuraqñan kashayku chaywanpas esposayqa allintan yanapawashan. Diospa llaqtanpiqa askha escuelakunan kan, ichaqa chay escuelakunaqa inglés simipin aparikun. Chaymi 75 wataykupi kashaspayku esposaypiwan inglés simita rimaq iñiq t’aqaman ripurayku, chhaynapi inglés simita astawan yachanaykupaq. Sucursalmanta jujnin kaq encargakuqmi kani, chaymi mana tiempoy aypawanchu juj simita yachanaypaq, chhaynaña chaypas esposaywanmi yanapanakushayku. Kunanqa 80 más wataykupiñan kashayku chaywanpas inglés simipi Francés simipiwanmi juñunakuykunapaqqa preparakuyku. Tukuy atisqaykutan kallpachakushayku iñiq t’aqapi yanapakunaykupaq, Diosmanta willaypi yanapakunaykupaqpas. Chay ruwasqaykumantan Jehová Diosqa bendeciwashallanku.

Chaymantapas 2017 watapin esposaytawan invitawaranku sucursalmanta encargakuqkunapaq esposankupaqwan escuelaman, chayqa aparikuran Watchtower jatun escuelapin, chayqa kashan Patterson llaqtapi Estados Unidos nacionpin.

Jehová Diosqa allin yachachiqmi (Isa. 30:20). Chaymi wayna-sipaskunatapas kuraqkunatapas llapanchista allinta yachachiwashanchis (Deut. 4:5-8). Chaymantapas Jehová Diospa consejonkunata allin experienciayoq iñiqmasinchiskunaq consejonkunata kasukuq wayna-sipaskunaqa allintan imatapas decidinku, tukuy sonqowantaqmi Diostapas servinku. Chay ruwasqankuqa Proverbios 9:9 nisqan jinan, chaypin nin: “Yachayniyoqta yachachiy, aswan yachaysapan kanqa, chanin runata yachachiy, aswan yachaysapan kanqa”, nispa.

Mayninpiqa yuyarillanipunin Argelia orqopi imachus pasawasqanta, chayqa 60 wata ñaupaqtaraqmi pasawaran. Chay kutipiqa manan piensaranipaschu kunan jina kusisqa kausanaytaqa. Noqaqa imaymanatan hermanokunamanta yacharani, chaymi kunanqa esposaywan kusisqa Jehová Diosta servishayku. Chaymantapas yachashallaykun Jehová Diosmanta allin experienciayoq hermanokunamantapas.