Cadai întâmplarea parudea sea mânri viața, anda codoia că, de atunci începosardem te rodav le Devles. Tha, mai anglal te phenav tumenghe so întâmplosardea-pe mai dur ande codoi cali riat, camav te dav duma anda chichiva buchia prin save nachlem cana somas șiavorro, cai cărdea-ma te camav te prinjianav le Devles.

Năștisailem ande 1937 ande Guesnain, iech țâno foro miniero anda o nordo la Franțaco. Mânro dad, cai sas minero, sicadea-ma chichi de importanto si te cherav buchi phares. Vo mai sicadea-ma te urâsarav o neciacimos. Vo dichlea că but mineri cherenas buchi ande phare condiții hai camlea te ajutil-le. Anda codoia, cărdea partea anda mai but sindicatea hai lelas partea ca greve. Sa cadea, vo sas-lo zurales holearico cana dichelas i ipocrizia le rașaienghi anda codo than. Chiar cana bute jenen anda lende sas-le iech viața lași, von manghenas hamos hai love catar le mineri cai de abia trainas de pe iech ghies pe aver. Lengo phiraimos cărdea mânre dades cadea de holearico, că ci sicadea-ma chanci andai religia.  Mai but, ci anav manghe amintea că dea duma vroiechdata manța anda o Del.

Ando timpo so barilemas, începosardem vi me te urâsarav o neciacimos. Falas-ma că si iech neciacimos că le imigranți ci sas-le mișto dichle andi Franța. Me chălemas-ma fotbalo le șiavorrența imigranți hai placealas-ma te beșav ande iech than lența. Mai but, mânri dei sas polonezo. Camlem but te avel pacea hai egalitatea mașcar sea-l manușa anda diferime rase.

Ande 1957, somas achardo andi armata. Cadea arăslem andel plaia la Algeriache ande codoi cali riat anda savi dem duma mai anglal. Pala soste manglem o ajutorii le Devlesco, angla mande ci sas iech dușmano, tha iech măgaro sălbatico. Cana dichlem-les, mânro ilo avilea co than. Cu sea cadala, cadai întâmplarea, tha vi o războio cărde-ma te gândisarav-ma mai mișto ca o senso la viațaco. Sostar sam pi phuv? Interesil-pe o Del amendar? Va avela te bucurisaras ame vroiechdata paciatar?

Iech data, cana somas chăre ca mânre dada andi permisia, prinjiandem ieche Martores le Iehovasco. Vo dea-ma iech Biblia, iech traducerea catolico andi șib francezo, cai începosardem te citisarav-la cana gălem parpale andi Algeria. Iech cotor andai Biblia cai șiutea-ma po gânduri sas i Revelația 21:3, 4. Cade phenel-pe: „I țărha le Devleschi sili le manușența! . . . Vo va chosela sea-l asfa anda lenghe iacha hai o merimos ci va mai avela. Ci roimos, ci necazo hai nici duch ci va mai avena”. * Ci avilea manghe te pachiav cana citisardem cadal cuvintea hai pușlem-ma dacă sas-le ciace. Ande codo timpo, ci jianglem chanci anda o Del hai anda i Biblia.

Ande 1959, pala soste tileardem anda i armata, prinjiandem ieche Martoros po anav François, cai sicadea-ma but buchia anda i Biblia. Sar exemplo, sicadea manghe andi Biblia că le Devles siles iech anav, „Iehova”. (Ps. 83:18) Sa cadea, vo phendea manghe că o Iehova va cherela te na mai aven neciacimata pi phuv, va cherela i phuv iech Paradiso hai va pherela le cuvintea anda Revelația 21:3, 4.

Cadal sicaimata, sas-le zurales logico hai arăsle ande mânro ilo. Tha ande sa codo timpo, somas zurales holearico pe le rașaia hai camlem te dichiol-pe că so sicavenas von le manușen sas neciacimata. Camlem sigo te cherav vareso. Dichiolas-pe că o sicaimos cai primisardem-les catar mânro dad, te luptiv contra o neciacimos, sas încă ande mande.

O François hai aver anda mânre neve amala Martori ajutisarde-ma te na mai avav cadea de holearico. Von phende manghe că i buchi ieche creștinoschi ci si codoia te judechil averen, tha te predichisarel i vestea lași anda o Regato le Devlesco, cai anel speranța. O Isus începosardea cadai buchi hai dea-la vi pesche continuatorenghe. Mai but, sichilem te dav duma șucar le manușența hai pherdo tacto, indiferento ande soste pachianas von. I Biblia phenel: „O sclavo le Raiesco ci trebul te hal-pe averența, tha te avel lașio soavrănța”. (2 Tim. 2:24)

Cărdem paruimata hai boldem-ma sar Martoro le Iehovasco ande 1959 ca iech congreso de circumscripția. Code prinjiandem iecha  pheia po anav Angèle, saveatar placiaia-ma zurales but. Începosardem te jiav ca i congregația anda savi cherelas voi partea hai căsătorisardeam-ame ande 1960. I Angèle si ciaces iech jiuvli lași, iech rromni deosebime hai iech cadouo cuci catar o Iehova. (Prov. 19:14)

Andel bărșa cai nachle, sichilem but șucar lecții catar le phrala goghiaver hai cai sas-le experiența. Iech anda le mai importanto sas cadaia: Caște daisarav te cherav mișto orisavi buchi phari cai sas manghe dini, trebul te avav umilo hai te aplichisarav o goghiaver principio anda Proverbe 15:22, cai phenel-pe: „Le planuri . . . pheren-pe cana si but sfătuitori”.

Ande 1964, începosardem te hachiarav ce cuci si cadal cuvintea inspirime. Ande codo bărș, somas numime supraveghetorii de circumscripția, cadea că, gălem andel congregații caște zuriarav le phralen hai te ajutisarav-le te pașion mai but le Iehovastar. Sas-ma 27 bărș hai țâra experiența, cadea că cărdem vi greșeli. Tha încercosardem te sichioav anda lende. O mai but, ajutisarde-ma le cuci lecții cai sichilem-le catar le „sfătuitori” cai sas-le experiența.

Avel manghe andi goghi iech buchi cai sas co începuto mânre serviciosco itineranto. Pala soste vizitisardem iech congregația anda Paris, iech phral maturo spiritualo pușlea-ma dacă daisaras te das duma numai ame. „Sar te na”, phendem lesche.

Vo phendea manghe: „Louis, cana iech doctoro jial ca iech chăr, cas jial te dichel?”.

„Le nasfalen”, phendem lesche parpale.

Vo phendea manghe: „Cadea si. Tha dichlem că beșes ande iech than mai but codolența cai sile iech lași spiritualitatea, sar si o supraveghetorii la congregațiaco. Ande amari congregația si but phrala hai pheia perade, lajiavane sau neve co ciacimos. Von avenas zurales bucurime te beșes vi lența, chiar te jias lende chăre caște han ande iech than”.

O sfato cadale phralesco sas zurales cuci hai lașio. Leschi iubirea anda i turma le Iehovaschi, arăslea ande mânro ilo. Cadea că, mechlem o baricanimos de iech partea hai aplichisardem sigo o sfato. Mulțumisarav le Iehovasche că dea-ma phrala cadea de lașe!

Ande 1969 hai 1973, somas numime te supraveghiv o departamento cai cherelas hai delas o hamos ca dui congresea internaționalo  încărde ande Colombes, Paris. Ca o congreso anda 1973, cai încărdea panji ghiesa, trebuisardea te das te han cam 60 000 manușen. Daștiv te phenav numai cadichi, că darailem iech țâra. Tha vi de cadai data, i soluția sas te aplichisarav o principio andal Proverbe 15:22, hai te rodav o sfato codolengo goghiaver. Cadea că dem duma le phralența maturi spiritualo, saven sas-le experiența andi industria alimentaro. Mașcar cadala sas phrala cai șionas andi phuv legumea, bucătari, măcelari hai manușa cai sas-le experiența te chinen hamos. Ande iech than, daisardeam te cheras mișto cadai phari buchi.

Ande 1973, me hai mânri rromni samas acharde te slujisaras co Betelo andai Franța. Mânri iechto repartiția sas phari. Trebulas te dichav sar te cherav caște arăsăn le publicații ca le phrala anda Camerun, cai amari lucrarea sas-li așadi andi perioada 1970-1993. Ci jianglem dacă daștiv te cherav cadai buchi nici de cadai data. Daștil-pe că o phral cai supraveghilas pe atunci i activitatea anda i Franța, dichlea că sas-ma nevoia te avav zuriardo hai phendea manghe: „Amare phralen anda Camerun sile bari nevoia catar hamos spiritualo. Hai te cheras sea so daisaras caște das-les lenghe!”. Hai cadea cărdem.

Gălem mai butivar andel thema cai sas-le ca i granița pașa o Camerun caște dichav-ma le phurența de congregație anda codo them. Cadala phrala tromane hai prevăzătorii ajutisarde-ma te arachav soluții caște bișialav o hamos spiritualo ando Camerun de fiesavi data cana trebulas. O Iehova binecuvântisardea amare eforturi. Mai but, cam 20 bărș le phrala cathar, primisarde fiesavo număro le Turnosco de Veghe hai amaro Servicio anda o Regato, iech publicația folosime atunci.

Chiar de cana începosardeam te prinjianas-ame, dichlem că i Angèle si iech phei spiritualo.  Lache calități dichile-pe vi mai mișto ande amari viața sar rrom hai rromni. Chiar andi riat cana sas amaro abiav, voi manglea-ma te rughisaras-ame caște avel ame o obiectivo te slujisaras le Iehovasche chichi mai but sar familia, hai o Iehova dea răspunso ca amari rugăciunea.

I Angèle ajutisardea-ma vi te pachiav-ma mai but ando Iehova. Sar exemplo, ande 1973, cana samas acharde te slujisaras co Betelo, me ci prea camlem anda codoia că placealas-ma but i lucrarea itineranto. Tha i Angèle andea manghe amintea că dedichisardeam-ame le Iehovasche hai că trebulas te cheras oriso manghel amendar leschi organizația. (Evr. 13:17) Ci mai daisardem te phenav lache chanci, cadea că tileardeam co Betelo. Andel bărșa cai nachle, i înțelepciunea hai i rezonabilitatea mânra rromniachi hai vi lachi gândirea spiritualo, zuriardea amari căsnicia hai ajutisardea-ame te las lașe decizii.

Vi aghies, mânri rromni ajutil-ma mai dur. Sar exemplo, caște jias ca le școli teocratico, cai le mai but anda lende încăren-pe andi engleza, cărdeam eforturi caște jianas mai mișto cadai șib. Anda codoia, găleam ande iech congregația de șib englezo, chiar cana pe atunci sas ame cam 75 bărș. Anda codoia că sas-ma but buchia te cherav sar membro ando Comiteto la filialaco anda Franța, sas manghe pharo te arachav timpo vi te sichioav iech șib străino. Tha me hai i Angèle ajutisardeam-ame iech averes. Vi acana, cana si ame mai but sar 80 bărș, pregătisaras-ame mai dur andal întruniri la congregațiache vi andi engleza hai vi andi franceza. Sa cadea, das amari zor te jias chichi mai but daisaras ca le întruniri amara congregațiache hai andi lucrarea de predicare. O Iehova pochindea parpale sea-l eforturi cai cărdeam-le caște sichioas i șib englezo.

Ande 2017, o Iehova binecuvântisardea-ame ande iech șucar modo. Amen sas ame o privilegio te jias ca i Școala anda le Membri anda le Comitetea de Filială hai lenghe Rromnia, încărdi ca o Centro de Sicaimos Watchtower, anda Patterson, New York.

O Iehova si o mai Baro Sicaitorii. (Is. 30:20) Anda codoia, ci miril-ame că lesche slujitori vi tărne hai vi phure, primisaren o mai lașio sicaimos! Ando timpo, dichlem că le tărne cai ascultin le sfaturi le Iehovasche hai vi le phralenghe hai pheianghe cai sile experiența, arăsăn creștini maturi. Andel Proverbe 9:9 phenel-pe amenghe: „Sicav le goghiaveres, hai vo va avela vi mai goghiaver. Sicav codoles orta, hai va avela les vi mai but prinjianimos”.

Po iechdata, gândiv-ma ca codoi cali riat cana darailem zurales, andel plaia la Algeriache acana cam 60 bărș. Nici na jianglem ce șucar viața ajucărelas man! Sichilem but buchia averendar! O Iehova dea man hai mânra rromnia iech șucar viața. Sam hotărâme te sichioas sea o timpo catar amaro Dad cerisco hai catar amare phrala hai pheia cai sile experiența!