A sani di pasa a neti dati kenki mi heri libi. A meki taki mi bigin suku Gado. Ma fosi mi fruteri unu san pasa na a dungru neti dati, mi wani fruteri unu wan tu sani di pasa di mi ben pikin èn di meki taki mi ben wani kon sabi suma na Gado.

Mi gebore na ini 1937 ini Guesnain, wan foto na noordsei fu Fransikondre pe furu sma ben e wroko na ini mijn pe den ben e diki ston-krofaya. Mi papa di ben e wroko na ini den mijn tu, ben leri mi taki a prenspari fu wroko tranga. Boiti dati mi papa ben leri mi fu du san reti. A situwâsi na ini den mijn no ben bun srefisrefi èn den wrokoman no ben e kisi bun pai. A sani disi ben meki taki mi papa ben go na ini organisâsi di ben e opo taki gi den reti fu den wrokoman èn a ben e go na strati fu protesteer tu. Mi papa no ben lobi a hoigrifasi fu den priester drape tu. Furu fu den ben abi en moro bun leki den tra sma, ma toku den ben e aksi den pôti wrokoman nyanyan nanga moni. Fu di mi papa no ben lobi a fasi fa den priester ben e tyari  densrefi, meki a no leri mi noti fu kerki. Fu taki en leti, noiti a ben e taki fu Gado srefi.

Di mi ben e gro kon bigi, mi srefi no ben lobi en tu te sma ben e libi takru nanga trawan. Furu sma no ben lobi den trakondre sma di ben kon libi na Fransikondre. Ma mi ben lobi fu prei voetbal nanga den pikin fu den sma dati èn mi ben lobi fu de nanga den tu. Boiti dati, mi mama no ben de fu Fransikondre, a ben de fu Polen. Ala ten mi ben e winsi taki ala sma ben o libi na ini freide èn nowan sma ben o de moro hei noso lagi moro trawan.

Na ini 1957, mi ben abi fu go na ini a legre. Dati meki mi ben de na a bergikontren fu Algaria a neti dati. Baka di mi bari: „O mi Gado! Mi Gado!”, mi kon si taki a no wan srudati fu den feanti ben e waka kon, ma na wan buriki! Yu kan frustan fa mi ben breiti di mi si dati. Ma toku, a sani disi èn a heri feti srefi meki mi prakseri moro seryusu fu a libi. Mi ben e aksi misrefi: ’Fu san ede wi de dya? Gado e broko en ede nanga wi? Wan ten o kon pe freide o de na heri grontapu?’

Bakaten di mi go na oso fu luku mi papa nanga mama, dan mi miti wan Yehovah Kotoigi. A gi mi wan Bijbel èn mi bigin leisi en di mi drai go baka na Algaria. Wan pisi fu Bijbel di naki mi ati, ben de Openbaring 21:3, 4. Drape skrifi: „A tenti fu Gado de na libisma. . . . A o figi ala watra puru na den ai èn dede no o de moro. Nowan sari, noso krei, noso pen no o de moro.” Den wortu disi ben e fruwondru mi. Mi ben aksi misrefi efu den ben tru. Na a ten dati mi no ben sabi notinoti fu Gado èn fu Bijbel.

Baka di mi komoto na ini a legre na ini 1959, mi miti wan Kotoigi di nen François. A leri mi furu tru tori fu Bijbel. Fu eksempre, a sori mi na ini Bijbel taki Gado nen na Yehovah (Ps. 83:18). François sori mi tu taki Yehovah o puru ala ogri na grontapu, a o kenki grontapu kon tron wan paradijs, èn a o meki den wortu fu Openbaring 21:3, 4 kon tru.

A no ben muilek fu bribi den sani disi èn den naki mi ati. Ma na tra sei, mi ati ben bron nanga den priester èn mi ben wani ala sma fu sabi taki den sani di den ben e leri sma no skrifi na ini Bijbel. Soleki fa a sori, dan mi ben e denki ete leki mi papa èn mi no ben abi pasensi. Mi ben wani du wan sani wantewante!

François nanga den tra nyun Kotoigi mati fu mi yepi mi fu no atibron so esi moro. Den sori mi taki wi leki Kresten no musu krutu sma, ma wi musu fruteri den a bun nyunsu fu Gado Kownukondre fu yepi den. Na a wroko dati Yesus ben du èn wi leki bakaman fu en musu du a wroko dati tu (Mat. 24:14; Luk. 4:43). Mi ben musu leri fu taki nanga moro switifasi èn nanga moro lespeki, awinsi san tra sma ben e bribi. Bijbel e taki dati „wan srafu fu Masra no musu meki trobi, ma a musu sori switifasi gi ala sma”.​—2 Tim. 2:24.

 Mi tyari kenki kon èn te fu kaba mi dopu leki Yehovah Kotoigi na ini 1959 na wan kring konmakandra. Drape mi miti wan yongu sisa di nen Angèle. Mi ben lobi en. Mi bigin go na a gemeente pe a ben de èn wi trow na ini 1960. A de wan bun uma, wan bun wefi, èn wan warti kado fu Yehovah.​—Odo 19:14.

Na ini den yari di pasa mi leri furu fu brada di ben abi koni nanga ondrofeni. Wan fu den moro prenspari sani di mi leri na disi: Awinsi fa wan toewijzing muilek, sani o waka bun te wi abi sakafasi èn te wi e du san skrifi na Odo 15:22: „Te furu raiman de, sani e waka bun.”

Na ini 1964, mi kon si taki a sani disi tru. A yari dati mi bigin dini leki kring-owruman èn mi ben e go na den gemeente fu gi den brada nanga sisa deki-ati èn fu tranga a bribi fu den. Ma mi ben abi 27 yari na a ten dati èn mi no ben abi ondrofeni. Dus mi ben e meki fowtu. Ma mi pruberi fu leri fu den fowtu dati. San moro prenspari, na taki mi leri furu bun sani fu „raiman” di ben sabi du den wroko bun èn di ben abi ondrofeni.

Mi sabi ete san wan brada ben taigi mi di mi ben de kring-owruman no so langa ete. Baka di mi go luku wan gemeente na ini Parijs, dan wan lepi brada aksi mi efu a ben kan taki nanga mi eife. Mi taki: „A bun.”

A aksi mi: „Louis, suma wan datra e yepi: Siki sma noso gosontu sma?”

„Den siki sma”, mi piki.

Ne a taki: „A tru, ma mi si taki yu lobi de nanga den sma di de bun na ini waarheid, sma soleki a gemeente owruman. A gemeente abi furu brada nanga sisa di lasi-ati. Trawan nyun noso den e syensyen. Den ben o breiti efu yu ben o meki ten fu go luku den noso fu go nyan na den oso.”

Mi ben warderi a bun rai di a lobi brada dati gi mi. A ben naki mi ati fu si fa a ben lobi den skapu fu Yehovah. Dati meki mi saka misrefi èn wantewante mi bigin du san a ben taigi mi. Mi e taki Yehovah tangi gi den sortu brada dati.

Na ini den yari 1969 nanga 1973, mi tron opziener fu a Nyanyan Afdeling na tu internationaal kongres ini Colombes, na Parijs. Na a kongres fu 1973, sowan 60.000 sma  ben musu kisi nyanyan feifi dei langa! Yu kan frustan taki mi no ben sabi efu mi ben o man tyari a frantwortu disi. Ma mi du baka san Odo 15:22 e leri: Suku rai na den wan di abi koni. Mi suku rai na lepi brada di ben de na ini a nyanyan-bisnis. Dati ben de brada di ben e srakti èn seri meti, brada di ben e prani èn seri gruntu, brada di ben e bori nyanyan na ini restaurant èn brada di ben e bai sani gi bedrijf. Fu di wi ben e wroko makandra, meki wi ben man klari a bigi wroko disi.

Na ini 1973, mi nanga mi wefi kisi a kari fu go wroko na Betel na ini Fransikondre. A fosi wroko di mi ben musu du drape ben de wan muilekwan tu. Mi ben musu sorgu taki den brada nanga sisa fu wi di ben e libi na ini na Afrikan kondre Kamerun kisi den buku nanga tijdschrift fu wi. Lanti ben tapu a wroko fu wi na ini a kondre dati na a pisi ten fu 1970 te go miti 1993. Mi ben denki baka taki mi no ben o man du a wroko disi. A kan taki a brada di ben abi a frantwortu fu luku a wroko fu wi na ini Fransikondre ben si dati. Dati meki a gi mi deki-ati èn a taki: „Den brada nanga sisa fu wi na ini Kamerun abi a yeye nyanyan disi tranga fanowdu. Kon meki wi gi den!” Sobun, na dati wi du.

Mi go difrenti leisi na den kondre krosibei fu Kamerun fu miti den owruman fu a kondre dati. Den brada disi ben koni èn den ben abi deki-ati. Den yepi mi fu seti sani so taki wi brada nanga sisa na ini Kamerun ben kan kisi den buku nanga tijdschrift doronomo. Yehovah blesi a muiti fu wi. Èn sowan 20 yari langa a pipel fu Yehovah na ini a kondre dati noiti no misi wan Waktitoren noso Wi Kownukondre Wroko di ben e kon na doro ibri mun.

Sensi di mi bigin leri sabi Angèle, mi kon si taki a ben de wan bun mati fu Yehovah. Baka di wi trow mi kon si den moi fasi fu en moro  srefi. Fu eksempre, a srefi neti di wi trow, a aksi mi fu begi Yehovah fu yepi wi leki trowpaar fu du so furu leki wi man na ini a wroko fu en. Èn Yehovah piki a begi fu wi.

Angèle yepi mi tu fu frutrow moro na tapu Yehovah. Fu eksempre, di den kari wi fu go wroko na Betel na ini 1973, dan mi ben e tweifri pikinso fu di mi ben lobi a kringwroko. Ma dan Angèle memre mi taki wi gi wi libi abra na Yehovah. Sobun, wi musu du ala san en organisâsi e aksi fu wi (Hebr. 13:17). A ben abi leti! Dati meki wi go dini na Betel. A frow fu mi koni, a srapu, èn a lobi Yehovah tu. Na ini ala den yari di wi de makandra, den fasi disi yepi wi fu teki bun bosroiti.

A tru taki wi kon owru kaba. Ma te na a dei fu tide Angèle na wan bun wefi di e horibaka gi mi. Fu eksempre, furu fu den skoro fu na organisâsi fu wi e hori na ini Ingrisitongo. Fu di mi nanga Angèle ben wani go na wan fu den skoro disi, meki wi wroko tranga fu leri a tongo disi. Dati meki wi go na wan Ingrisitongo gemeente, aladi wi ben pasa 70 yari kaba. Den frantwortu di mi abi leki wan memre fu a Bijkantoro Komte fu Fransikondre ben meki taki a ben muilek gi mi fu leri wan tra tongo, ma mi nanga Angèle e yepi makandra. Now wi pasa 80 yari kaba, ma wi e tan sreka wisrefi gi den gemeente konmakandra na ini Ingrisitongo nanga Fransitongo. Wi e du muiti tu fu de na den konmakandra èn fu go na ini a preikiwroko nanga wi gemeente ibri wiki. Yehovah blesi a muiti di wi du fu leri Ingrisitongo.

Na ini 2017, mi nanga Angèle kisi a moi grani fu go na a Skoro gi brada fu Bijkantoro Komte nanga den wefi fu den. A skoro disi ben hori na a Waktitoren Skoro Centrum na Patterson, New York.

Yehovah na wi Gran Leriman trutru (Yes. 30:20). Dati meki a no e fruwondru wi taki wi alamala, yonguwan nanga owruwan, e kisi a moro bun leri di de! (Deut. 4:5-8) Iya, mi kon si taki yonguwan di e teki rai fu Yehovah èn fu lepi brada nanga sisa e gro kon tron sma di e dini Yehovah nanga den heri ati. Odo 9:9 e taki: „Gi wan koni sma leri, dan a o kon moro koni. Leri wan reti-ati sma wan sani, dan a o suku fu kon sabi moro.”

Son leisi mi e sidon denki a sani di ben miti mi a neti na tapu a bergi na Algaria sowan 60 yari pasa. Na a ten dati mi no ben sabi taki a libi ben o gi mi so furu prisiri. Mi leri so furu fu tra sma. Yehovah gi mi nanga Angèle wan kefalek moi libi. Dati meki wi wani tan teki leri fu wi hemel Tata èn fu koni brada nanga sisa di abi ondrofeni èn di lobi Yehovah tu.