Со уе луэм учыр мынэсьтым улонме воштӥз, малы ке шуоно ӵапак соку мон кутски Инмарез утчаны. Нош нырысь мынам вераме потэ пичи дыры сярысь: кызьы со шӧдӥськиз малпаськон амалэ вылын но кызьы со мылкыдме ӝутӥз Кылдытӥсен тодматскыны.

Мон вордӥськи 1937-тӥ арын Генен карын, Францилэн уйпалаз. Та карын кӧня ке шахтаос вал. Атае шахтёр луыса ужаз. Со дышетӥз монэ ужез но шонерлыкез яратыны. Атае дурбасьтылӥз шахтёръёслы, кудъёсыз туж секыт ужано луизы. Солэн югдурез тупатэмез потэ вал. Соин ик со пыриськиз профсоюзъёсы но забастовкаосы. Священникъёслэн асьсэды шонертэм воземзы солэсь сюлэмзэ туж вӧсь каре вал. Соос пӧлысь тросэз узыресь вал. Озьы ке но соос коньдон но сиён курылӥзы шахтёръёслэсь, кудъёсызлэн улыны коньдонзы мырдэм тырме вал. Атае священникъёслы сокем йыркуръяськиз, Инмарлы оскыны со монэ ноку ӧз дышеты, Инмар сярысь кыл но ӧз поттылы.

Аръёс ортчыса, мон но шонерлыктэм ужъёсты адӟемпотостэм карыны кутски, нош соос улонын  трос гинэ вал. Кылсярысь, тросэз вылтӥяськыса учкизы Францие мукет шаеръёсысь лыктэмъёс шоры. Нош мыным туж кельше вал со лыктэм адямиослэн нылпиосынызы эшъяськыны но соосын футболэн шудыны. Со сяна, мынам анае поляк калыкысь вал. Мынам туж потэ вал, вань калыкъёсысь адямиос ог-огзэс мед гажалозы но ог-огенызы тупаса мед улозы шуыса.

Монэ армие басьтӥзы 1957-тӥ арын. Озьы мон вуи Алжирысь гурезьёсы, кытын монэн луизы учыръёс, кудъёсыз сярысь мон кутсконаз верай. Куке мон кеськи: «Инмаре, юртты мыным», мон азе тушмонъёсы пӧлысь ожгарчи ӧз поты, нош кыр ишак потӥз. Мон талы туж шумпотӥ. Со уй, озьы ик быдэс ожмаськон но, монэ малпаськытӥзы, малы адямиос уло. Малы ми улӥськомы? Инмар ми сярысь сюлмаське-а? Адямиос куке но тупаса улозы-а?

Берлогес, куке мон анае но атае дорын отпускын вал, мон тодматски Иеговалэн одӥг Адӟись-Ивортӥсеныз. Со мыным Библия сётӥз. Алжире берытскыса, мон сое лыдӟыны кутски. Монэ тужгес но паймытӥзы кылъёс, кудъёсыз гожтэмын Усьтӥськонын 21:3, 4: «Инмысь мон бадӟым куара кылӥ, со шуиз: „Тани, Инмарлэн адямиосын огазьын улон интыез-скинияез... Ачиз Инмар соосын огазьын луоз... Инмар соослэн син улысьтызы вань синкылизэс ӵушоз. Кулон уз ни луы, бӧрдон но, викышъян но, висён но уз ни луэ“». Та кылъёс монэ туж паймытӥзы. Озьы луыны быгатэ шат? Соку Инмар сярысь но, Библия сярысь но мон номыре ик ӧй тоды.

1959-тӥ арын, армиысь берытскеме бере, мон тодматски Франсуа нимо Адӟись-Ивортӥсен. Со юрттӥз мыным Библиысь трос зэмлыкъёсын тодматскыны. Кылсярысь, Библиысь со мыным возьматӥз, Инмарлэн нимыз — Иегова шуыса (Пс. 83:18, ВД). Озьы ик Франсуа валэктӥз, Иегова музъем вылысь шонерлыктэм ужъёсты быдтоз, музъемез райлы пӧрмытоз но Усьтӥськонын 21:3, 4 гожтэм кылсётонзэ быдэстоз шуыса.

Та дышетонъёс туж валамонэсь вал. Соос сюлмам ик пыӵазы. Со дыре ик мон священникъёслы йыркуръяськыны кутски. Мон валай: соос дышето солы, мар Библиын гожтэмын ӧвӧл. Мынам туж потэ вал соослэсь шонертэм ужъёссэс шарае поттэме. Мон мырдэм асме киям кутӥ. Мынам азьло сямен ик атаелэн кадь мылкыды вал на шонерлыктэм ужъёсын нюръяськыны.

Франсуа но мукет Адӟись-Ивортӥсьёс, кудъёсыныз мон эшъяськи, юрттӥзы мыным асме киям кутыны. Соос валэктӥзы: милям уг поты адямиосты судъяммы, нош милям потэ соослы юрттэммы, Инмарлэн Эксэйлыкез сярысь ӟеч иворез вераса. Ӵапак та ужез быдэсъяз Иисус. Та ужез ик со быдэсъяны косӥз дышетскисьёссэ но (Матф. 24:14; Лука 4:43). Со сяна, мыным дышетсконо вал адямиосын лякытэн вераськыны, кыӵе гинэ осконзы соослэн медаз луы, малы ке шуоно Библиын гожтэмын: «Кузё-Инмарлэн ляльчиез керетыса улыны кулэ ӧвӧл. Со ваньмыныз ассэ лякыт возьыны кулэ» (2 Тим. 2:24).

Мон трос воштӥськонъёс лэсьтӥ. 1959-тӥ арын мон пылатӥськи ёросысь конгрессын но Иеговалэн Адӟись-Ивортӥсез луи. Отын мон пумитай Анжель нимо егит сузэрез. Со мыным туж кельшиз. Мон ветлыны кутски кенешлэн пумиськонъёсаз,  кудъёсаз Анжель но ветлэ вал. 1960-тӥ арын ми кузпалъяськимы. Со туж умой кышномурт, паймымон кышно но Иеговалэсь дуно кузьым (Мад. 19:14).

Христиан улонэ ӵоже мон тросэзлы дышетски визьмо но быгатӥсь вын-агайёслэсь. Тани одӥгез тужгес но кулэез пӧлысь, малы мон дышетски: секыт ужез быдэстон понна, милемлы зӥбыт-востэм луоно но тодамы возёно, «визь-кенеш сётӥсьёс трос ке, со уж быдэсме» шуыса (Мад. 15:22).

Мадёнъёсысь та кылъёсты мон тужгес но умой валай, куке 1964-тӥ арын ёросэз чаклась луи. Мон кенешъёстӥ ветлыны кутски, вын-агайёслэсь мылкыдзэс ӝутон понна но соослэсь осконзэс юнматон понна. Соку мыным 27 арес гинэ вал бере, мыным тросэзлы дышетсконо на вал. Зэм но, мон янгышъёс но лэсьтылӥ, но мон соос вылын дышетскыны тырши. Нош тужгес но валтӥсез: мыным юрттӥзы быгатӥсь вын-агайёслэн дуно визь-кенешъёссы.

Мынам тодам лыктэ одӥг учыр, кудӥз луиз монэн ёросэз чаклась луыса ужаны-тыршыны кутскеме берегес ик. Огпол мон Парижысь одӥг кенешын вал. Берпуметӥ нуналаз юн осконэн агай юаз мынэсьтым, ми соин синмысь синме вераськыны быгатомы-а шуыса. Мон верай, быгатомы шуыса. Со юаз: «Луи, куке эмъясь кин ке доры лыктэ, кинэ солэн адӟемез потэ?» «Висисез»,— шуи мон. Агай вераз: «Озьы ик вань. Нош мон адӟисько: тон тросгес дырдэ висъяськод соослы, кинъёслэн осконзы юн. Кылсярысь, кенешлэн чакласезлы. Нош милям трос вын-агайёсмы но сузэр-апайёсмы, кудъёсыз секыт мылкыдын уло, возьдасько яке алигес гинэ Иеговалы ужаны-тыршыны кутскизы. Соос туж шумпотысалзы, тон соослы дырдэ висъясалыд ке яке соос доры нуназеяны лыктысалыд ке».

Мон туж тау карисько та дуно агайлэн визьмо кылъёсыз понна. Иеговалэсь ыжъёссэ яратэмез мынам сюлмам ик пыриз. Соин ик мон, вылтӥяськемме палэнтыса, соку ик солэсь визь-кенешсэ уже кутыны кутски. Мон Иеговаез туж тау карисько сыӵе вын-агайёс понна.

1969-тӥ но 1973-тӥ аръёсы монэ куризы радъяны ужез, кудӥз герӟаськемын вал калыккуспо конгрессъёсы лыктэм адямиосты сюдонэн. Та конгрессъёс ортчизы Париж котырысь Коломб карын. Конгрессын, кудӥз 1973-тӥ арын  ортчиз, вить нунал ӵоже ог 60 000 адямиосты сюдоно вал. Вераны ик секыт, макем мон паймемын но кышкамын вал. Мыным нош ик юрттӥзы Мадёнъёсысь 15:22 кылъёс. Мон визь-кенеш кури юн осконэн вын-агайёслэсь, кудъёсыз та удысын ужазы. Соос пӧлын вал сӥлен вузкарисьёс, бакча емышъёсты будэтӥсьёс, пӧраськисьёс но вузкаронниосысь басьяськисьёс. Ваньмы ӵош ми быгатӥмы та ужез быдэстыны, нырысь со быдэстонтэм потэ вал ке но.

1973-тӥ арын монэ но кышноме ӧтизы Франциысь Вефильын ужаны-тыршыны. Мынам нырысетӥ уже капчи ик ӧй вал. Мыным публикациосмес ыстоно вал Африкаысь одӥг шаере, Камерунэ. Отын 1970-тӥ арысен 1993-тӥ арозь ужмес нуыны лэземын ӧй вал. Мон нош ик ӧй тоды, мар бордысен та ужез кутскыны. Тае адӟиз, вылды, агай, кудӥз со дыре Франциысь филиаллэн чакласез луыса ужаз-тыршиз. Со монэ юнматыны малпаз: «Камерунысь вын-агайёсмылы туж кулэ духовной сиён. Ойдо соосты сюдомы!» Но ми сюдӥмы.

Камерунын ужась-тыршись тӧроосын пумиськон понна, мон кӧня ке пол ветлӥ шаеръёсы, кудъёсыз Камерун вӧзын интыяськемын. Та кышкасьтэм но визьмо вын-агайёс юрттӥзы мыным амал шедьтыны, кызьы Камерунэ публикациосмес ялан ыстылыны. Иегова тыршеммес бакель кариз. Камерунын 20 арлэсь но кемагес кивалтӥсьёс ужмес нуыны ӧз лэзе. Озьы ке но та шаерысь вын-агайёс но сузэр-апайёс басьтыны быгатӥзы котькуд толэзе поттэм «Возьмаськон башняез» но «Эксэйлыклы ужан-тыршонмес».

Пумиськылыны кутскеммы бере ик мон адӟи, Анжель вань сюлмысьтыз Иеговаез яратэ шуыса. Нош куке ми кузпалъяськимы, мон тае эшшо но умойгес валай. Кылсярысь, сюанмы бере ӝытаз Иеговалы вӧсяськыкумы, со монэ вераны куриз, табере ми, вань кужыммес сётыса, солы ӵошен ужаломы-тыршомы шуыса. Иегова куронмес кылӥз.

 Со сяна, Анжель юрттӥз мыным эшшо но золгес Иеговалы оскиськыны. Кылсярысь, 1973-тӥ арын милемыз Вефиле ӧтизы. Та ӧтёнлы вазиськыны мон ӧй дырты, малы ке шуоно мыным туж кельше вал ёросэз чаклась луыса ужаны-тыршыны. Но Анжель тодам вайытӥз, ми Иеговалы улонмес сӥзимы шуыса. Соин ик кулэ ӧвӧл-а ми лэсьтыны ваньзэ, мар сярысь милемыз куре солэн организациез? (Евр. 13:17). Талы пумит вераны мон номыр ӧй быгаты ни! Озьыен, ми Вефиле вуимы. Мынам кышное — визьмо кышномурт, кудӥз зэмзэ ик яратэ Иеговаез. Трос аръёс ӵош улэммы ӵоже солэн умой сямъёсыз кусыпъёсмес юнматӥзы но шонер ужпумъёс кутыны юрттӥзы.

Аръёс ортчыса но, Анжель котьма ласянь мыным юрттэ. Кылсярысь, теократической школаосын дышетскон понна, кудъёсыз пӧлысь тросэз англи кылын ортчытӥсько, ми Анжелен ужпум кутӥмы та кылэз волятыны. Милемлы 70 ареслэсь тросгес вал ке но, ми потӥмы англи кенеше. Мукет кылэз дышетыны капчи ик ӧй вал, малы ке шуоно мон француз филиаллэн комитетаз ужасько-тыршисько но мынам трос уже. Но ми кышноеным ог-огмылы юрттӥмы. Али, куке милемлы 80 ареслэсь тросгес ини, ми дышем сяммыя кенешлэн пумиськонъёсызлы англи кылын но, француз кылыны но дасяськиськомы. Озьы ик ми тыршиськомы христиан пумиськонъёсы ӵемгес пыриськыны но вын-агайёсын но сузэр-апайёсын ӵош тодытыны. Иегова англи кылэз дышетыны тыршеммес бакель кариз.

Кылсярысь, 2017-тӥ арын ми Анжелен Иеговалэсь туж дуно кузьым басьтӥмы. Милемыз ӧтизы дышетскыны Филиалъёслэн комитетъёсысьтызы вын-агайёслы но соослэн кышнооссылы школаын. Со ортчытӥське Возьмаськон башнялэн дышетскон центраз, кудӥз интыяськемын Паттерсонын (Нью-Йорк штат, Огазеяськем Штатъёс).

Зэм но, Иегова самой умой визьнодъясь (Иов 36:22). Соин ик паймонэз ӧвӧл, солэн ужась-тыршисьёсыз — арлыдоосыз но, егитъёсыз но — самой умой дышетскон басьто шуыса (К. Зак. 4:5—8). Мон адӟи, кызьы егитъёс, кудъёсыз Иеговалэсь но быгатӥсь вын-агайёслэсь но сузэр-апайёслэсь дышетско, осконзэс юнмато но Иеговалы оскымон ужало-тыршо. Мадёнъёсын 9:9 туж умой гожтэмын: «Визьнодо адямиез визьма, со уката но визьмогес луоз, шонер улӥсез дышеты, со тодонлыксэ будэтоз».

Куддыръя мон малпаськисько со сярысь, мар луиз ог 60 ар талэсь азьло со пеймыт уе Алжир гурезьёсын. Соку мон син азям пуктыны но ӧй быгаты, макем трос умоез монэ азьпалан возьма. Мон мукетъёсызлэсь тросэзлы дышетски. Иегова мыным но Анжельлы кузьмаз туж умой улон, кудӥз бакель каронъёсын тырмемын. Милям юн мылкыдмы вань азьланяз но дышетскыны инмысь Атаймылэсь, озьы ик визьмо но быгатӥсь вын-агайёслэсь но сузэр-апайёслэсь, кудъёсыз сое ярато.