Iton makaharadlok nga panhitabo nakagbag-o han akon kinabuhi kay ito an tinikangan han akon pagpamiling ha Maglalarang. Pero antes ko isumat ha iyo an sunod nga nahitabo hito nga gab-i, isusumat ko anay an akon mga naeksperyensyahan han bata pa ako nga nakaimpluwensya han akon panhunahuna ngan nag-andam han akon kasingkasing ha pagpamiling ha Dios.

Natawo ako han 1937 ha Guesnain, usa nga bungto nga may minahan ha norte han France. Nahibaroan ko kan Tatay, nga usa nga minero, an pagkaimportante ha pagin maduruto. Nakopya ko liwat an iya kangalas ha kawaray-hustisya. Nakita niya nga diri patas an pagtratar ha damu nga minero ngan nagtatrabaho hira ha delikado nga mga kahimtang ngan karuyag gud niya hira buligan. Salit inapi hiya ha mga organisasyon nga nakikig-away para ha mga katungod han mga minero. Nasisina liwat hiya ha pagin hipokrito han mga padi ha amon lugar. Damu ha ira an hayahay an kinabuhi; pero nangangaro hira hin pagkaon ngan kwarta ha mga minero nga nagpipinaniguro ha pagtrinabaho para la mabuhi. Nasisina gud hi Tatay ha mga ginbubuhat han mga padi salit  waray niya ako tutdui mahitungod ha relihiyon. Ngani, waray gud kami mag-istorya mahitungod ha Dios.

Samtang nagtutubo ako, nagtikang liwat ako mangalas ha kawaray-hustisya. Kaupod hito an diskriminasyon nga iginpapakita han iba ha mga dayo nga naukoy ha France. Nakikig-uyag ako hin soccer ha mga anak hito nga mga dayo ngan nalilipay gud ako pakig-upod ha ira. Labot pa, an akon nanay usa nga Polish, diri French. Karuyag ko gud nga an mga tawo nga iba-iba an lahi urosa nga mag-ukoy nga mamurayawon ngan patas nga trataron.

Gin-obligar ako nga umapi ha militar han 1957. Salit nahingadto ako ha kabukiran han Algeria hiton masirom nga gab-i nga gin-unabi kanina. Katapos ko mangaraba hin “Dios ko! Dios ko!” nakita ko, diri an usa nga kaaway nga sundalo, kondi usa nga ihalas nga asno! Naggaan gud an akon pag-abat! Pero tungod hito nga panhitabo ngan han girra mismo, nakapamurubuot ako mahitungod ha kahulogan han kinabuhi. Kay ano nga aanhi kita? Interesado ba ha aton an Dios? Magkakaada pa ba kamurayawan nga waray kataposan?

Ha urhi, han inuli ako ha balay basi bisitahon an akon mga kag-anak, may nakilala ako nga usa nga Saksi ni Jehova. Gintagan niya ako hin kopya han La Sainte Bible, nga usa nga French Catholic nga hubad han Biblia, nga gintikangan ko pagbasa pagbalik ko ha Algeria. Usa nga teksto nga nakapainteres ha akon amo an Pahayag 21:3, 4. Ito nasiring: “An tolda han Dios aada ha katawohan . . . Ngan papahiron niya an ngatanan nga luha ha ira mga mata, ngan mawawara na an kamatayon, pati an kabidoan, pagtangis, ngan kasakit.” * Hito nga higayon ko pa gud la ito nabasa. Nahunahuna ko, ‘Matutuman daw la ini?’ Hito nga panahon, waray gud ako hinbabaroan mahitungod ha Dios ngan ha Biblia.

Han binaya ako ha militar han 1959, nakilala ko an Saksi nga hi François, nga nagtutdo ha akon hin damu nga kamatuoran ha Biblia. Pananglitan, iginpakita niya ha akon ha Biblia nga an Dios may personal nga ngaran, Jehova. (Sal. 83:18) Iginsaysay liwat niya ha akon nga ipapadapat ni Jehova an hustisya ha tuna, hihimoon an tuna nga paraiso, ngan tutumanon an ginsiring ha Pahayag 21:3, 4.

Makatadunganon gud ito nga mga katutdoan, ngan nakabantad ito ha akon kasingkasing. Pero nasina gud liwat ako ha mga padi ngan karuyag ko nga kondenaron hira kay nagtututdo hira hin mga butang nga waray ha Biblia! Baga hin impluwensyado pa gihapon ako han panhunahuna ni Tatay, ngan diri ako pasensyoso. Karuyag ko nga may buhaton dayon!

Ginbuligan ako ni François ngan han iba ko pa nga bag-o nga kasangkayan nga Saksi nga makontrol an akon kasina. Iginsaysay nira nga sugad nga mga Kristiano, an aton buruhaton diri an paghukom, kondi an paghatag hin paglaom pinaagi han maopay nga sumat han Ginhadian han Dios. Ito nga buruhaton an ginbuhat ni Jesus ngan iginsugo ha iya mga sumurunod. (Mat. 24:14; Luc. 4:43) Kinahanglan ko liwat mahibaro nga makiistorya ha mga tawo ha buotan ngan mataktika nga paagi, anoman an ira gintotoohan. An Biblia nasiring: “An uripon han Ginoo diri kinahanglan makig-away, lugod kinahanglan magin buotan ha ngatanan.”—2 Tim. 2:24.

Ginhimo ko an ginkikinahanglan nga mga pagbag-o ngan nagpabawtismo sugad nga Saksi ni  Jehova han 1959 ha usa nga sirkito nga asembleya. Didto, nakilala ko an usa nga batan-on nga sister nga hi Angèle, nga akon naruyagan. Nagtikang ako magtinambong ha ira kongregasyon, ngan han 1960, nagpakasal kami. Usa gud hiya nga birilhon nga babaye, maopay nga asawa, ngan presyoso nga regalo tikang kan Jehova.—Prob. 19:14.

Ha paglabay han mga katuigan, nahibaro ako hin damu nga importante nga leksyon tikang ha maaramon ngan eksperyensyado nga mga brother. Ini an usa han pinakaimportante nga mga leksyon: Basi maglampos ha bisan ano nga makuri nga toka, kinahanglan magin mapainubsanon kita ngan iaplikar an kinaadman ha Proberbios 15:22, nga nasiring: “May kalamposan ha damu nga magsaragdon.”

Tikang han 1964, nakita ko nga tinuod gud ito nga giniyahan nga mga pulong. Hito nga tuig, nag-alagad ako sugad nga paramangno han sirkito ngan ginbibisita ko an mga kongregasyon basi dasigon ngan parig-unon an kabugtoan. Pero 27 anyos pa la ako hito nga panahon ngan kulang pa hin eksperyensya. Salit may nahimo ako nga mga sayop. Pero nangalimbasog ako nga mahibaro tikang hito. Labaw ha ngatanan, nahibaro ako hin damu nga importante nga leksyon tikang ha may kapas ngan eksperyensyado nga mga “magsaragdon.”

May nahinunumdoman ako nga usa nga panhitabo. Katapos ko bisitahon an usa nga kongregasyon ha Paris, may hamtong ha espirituwal nga brother nga nagpakiana ha akon kon puydi ba niya ako makaistorya. “Sige,” nagsiring ako.

Nagpakiana hiya, “Louis, kon an doktor napakadto ha usa nga balay, hin-o an iya ginbibisita?”

Binaton ako, “An may sakit.”

Hiya nagsiring: “Tama. Pero naobserbaran ko nga mas daku an imo panahon ha pakig-upod ha mga mag-opay an espirituwalidad, sugad han paramangno han kongregasyon. Ha amon kongregasyon, damu an kabugtoan nga nanluluya, bag-ohan, o awdanon. Aapresyaron gud nira kon maghahatag ka hin panahon nga makaupod hira, bangin kumadto pa ngani ha ira balay para hin usa nga pangaon.”

Maopay gud an sagdon hiton hinigugma nga brother. Nabantad gud ako han iya gugma para ha mga karnero ni Jehova. Salit gintulon ko an akon pride ngan gin-aplikar dayon an iya ginsiring. Mapasalamaton ako kan Jehova tungod han mga brother nga pariho ha iya.

Han 1969 ngan 1973, igintoka ako ha pagdumara han Food Service Department ha duha nga internasyonal  nga kombensyon ha Colombes, Paris. Ha kombensyon han 1973, mga 60,000 nga tawo an kinahanglan pakaunon ha sulod hin lima ka adlaw! Diri gud ako maaram kon paonan-o namon ito mahihimo. Pero makausa pa, an solusyon ha problema amo an Proberbios 15:22—konsultaha an mga maaramon. Nangaro ako hin sagdon ha hamtong ha espirituwal nga kalalakin-an nga may eksperyensya ha food industry. Kaapi ha ira an mga parabaligya hin karne, paratanom hin mga utanon, kusinero, ngan parapamalit. Tungod han amon pagbinuligay, natuman namon an usa nga makuri gud nga toka.

Han 1973, gin-imbitar kami nga mag-asawa nga mag-alagad ha Bethel ha France. Makuri liwat an akon nagin siyahan nga toka. Kinahanglan ko magpadara hin mga literatura ha aton kabugtoan ha Cameroon, nga usa nga nasud ha Aprika diin igindiri an aton buruhaton tikang han 1970 tubtob 1993. Diri na liwat ako maaram kon paonan-o ko ito bubuhaton. Posible nga napansin ito han paramangno han sanga ha France salit gindasig niya ako: “An aton kabugtoan ha Cameroon nanginginahanglan gud hin espirituwal nga pagkaon. Pakaunon naton hira!” Ngan ito gud an amon ginbuhat.

Nagbiyahe ako hin pipira ka beses ngadto ha mga nasud nga hirani ha Cameroon basi makigkita ha mga tigurang hito nga nasud. Iton maisugon ngan maaramon nga kalalakin-an binulig ha akon ha paghimo hin ginkikinahanglan nga mga kahikayan basi regular nga maipadara an suplay han espirituwal nga pagkaon ngadto ha Cameroon. Ginbendisyonan gud ni Jehova an amon mga pangalimbasog. Ngani, ha sulod hin mga 20 ka tuig, an iya katawohan waray gud pumalya ha pakakarawat hin bisan usa la nga isyu han An Barantayan ngan han binulan nga publikasyon nga gintatawag hadto nga Our Kingdom Service.

Ha tinikangan pa la han amon pagin mag-uyab, napansin ko na an maopay nga espirituwalidad ni Angèle. Mas nakita ko pa gud ito han mag-asawa na kami. Ngani, pagkagab-i mismo katapos han amon kasal, ginhangyo niya ako nga ig-ampo an amon  hingyap nga bug-os nga mag-alagad kan Jehova sugad nga mag-asawa. Ginbaton ni Jehova ito nga pag-ampo.

Ginbuligan liwat ako ni Angèle nga bug-os gud nga sumarig kan Jehova. Pananglitan han 1973, han gin-imbitar kami nga mag-alagad ha Bethel, nagruhaduha ako kay hinigugma ko na an sirkito nga buruhaton. Pero iginpahinumdom ha akon ni Angèle nga igindedikar na namon an amon kinabuhi kan Jehova. Diri ba dapat namon himoon an anoman nga iginpapabuhat ha amon han iya organisasyon? (Heb. 13:17) Husto gud hiya! Salit kinadto kami ha Bethel. Ha amon maiha na nga pagkaupod, an pagin maaramon han akon asawa, an iya maopay nga panhunahuna, ngan duok nga relasyon kan Jehova nagparig-on han amon pag-asawa ngan nakabulig ha amon nga makahimo hin mag-opay nga desisyon.

Yana nga lagas na kami, hi Angèle maopay la gihapon nga asawa ngan padayon nga nasuporta ha akon. Pananglitan, basi makaeskwela ha teokratiko nga mga eskwelahan, nga an damu hito ginhihimo ha Ingles nga linggwahe, kami ni Angèle nangangalimbasog gud basi mag-uswag hito nga linggwahe. Salit binalhin kami ha Ingles nga kongregasyon, bisan kon sobra 70 anyos na kami hito nga panahon. Tungod han akon mga responsabilidad sugad nga membro han Komite han Sanga ha France, makuri gud an pag-aram hin iba nga linggwahe. Pero nagbinuligay kami ni Angèle. Yana, sobra 80 anyos na kami ngan padayon kami nga nangangandam para ha amon mga katirok ha kongregasyon ha Ingles ngan ha French. Nangangalimbasog liwat kami nga pirme makigbahin tubtob ha amon mahihimo ha mga katirok ngan ha ministeryo kaupod han amon kongregasyon. Ginbendisyonan gud ni Jehova an amon mga pangalimbasog nga mahibaro hin Ingles.

Han 2017, nakakarawat kami ni Angèle hin maopay gud nga bendisyon. Nakapribilehiyo kami nga makaeskwela ha School for Branch Committee Members and Their Wives, nga ginhimo ha Watchtower Educational Center ha Patterson, New York.

Hi Jehova gud an Harangdon nga Instruktor. (Isa. 30:20) Salit diri urusahon nga an iya katawohan—lagas man o batan-on—nakakakarawat han pinakamaopay gud nga edukasyon! (Deut. 4:5-8) Ngani, naobserbaran ko nga an mga batan-on nga namamati kan Jehova ngan ha eksperyensyado nga kabugtoan nag-uuswag gud ha espirituwal ngan nagigin malampuson nga mga adulto. An Proberbios 9:9 nagpapahinumdom ha aton: “Paghatag ha maaramon nga tawo, ngan magigin mas maaramon hiya. Tutdui an matadong nga tawo, ngan madudugangan an iya nahibabaroan.”

Usahay, ginhuhunahuna ko iton masirom ngan makaharadlok nga kagab-ihon ha kabukiran han Algeria mga 60 ka tuig na an naglabay. Hito nga gab-i, waray ako ideya nga magkakaada ngay-an ako makalilipay nga kinabuhi. Damu gud an akon nahibaroan tikang ha iba! Gintagan gud ako ni Jehova, pati hi Angèle, hin makalilipay gud nga kinabuhi. Salit determinado kami nga diri umundang ha paghibaro tikang ha aton langitnon nga Amay ngan ha maaramon ngan eksperyensyado nga kabugtoan nga nahigugma ha iya.