თე საშინელ შემთხვევაქ ჩქიმ ცხოვრება დოთირუ, მუშენდა თექ ქუდმოჭყაფუ ღორონთიშ გორუა. სოიშახ თე ისტორიას გუვაგრძელენდე, მორთ ქიგეჩიებუთ ბაღანობას მოხვალამირ შემთხვევეფიშ გურშენ, ნამდგაქ ჩქიმ აზროვნებაშა იმოქმედ დო მამზად ჩქიმ გურ ღორონთიშ ოგორალო.

დებაბდჷ 1937 წანას გენანს, ჩრდილოეთ საფრანგეთიშ ართ ჭიჭე ქალაქის. მუაჩქიმშე, ნამუთ მეშახტე რდჷ, ხანდაშ ფას დიბგურე. თიშე სამართლიანობაშ ძალიერ გრძნობაქ ხოლო გეგნმადვჷ, მუდგაქ გინაჭყვიდირაფუ თის, იმოქმედკო მეშახტეეფიშ მახვარებელო, მიდგას საშინელ სამუშა პირობეფ უღდეს. თინეფიშ მდგომარეობა გაუჯგუშკონ თიშენ, მუაჩქიმქ ქაკათ ორგანიზაციას, ნამუთ მეშახტეეფიშ უფლებეფიშ დაცვებას ოცადუდ. თეს გეძინელ, თის გურ მალედ თი ფარისევლობაშე, ნამდგას ადგილობრივ მღვდელეფ გიმირჩქინანდეს. თინეფშე ბრელ ფუფუნებას ცხოვრენდჷ, მარა ოჭკუმალს დო ფარას მეშახტეეფშე ითხინდჷ, მით დუდის ონდეთ ეიჯუმუანდჷ. მუაჩქიმს ჯოგუდ მღვდელეფ დო ათეშენ ჩქიმდა რელიგიაშ გურშენ მუთუნ ვა უგურუაფ. ჩქი დღას ვამჩიებინუნა ღორონთიშ გურშენ.

 გემწიბრდინ, მა ხოლო გემეჯოგ უსამართლობაქ. უსამართლობაშ ართ-ართ მხარე თი წინასწარ გორჩქინელ აზრ რდჷ, ნამუთ საფრანგეთის მახორუ უცხოელეფიშ მიმართ უღუდ ნამთინეს. მა იმიგრანტეფიშ ბაღანეფწკუმა ართო ფეხბურთის ბლაჸაფენდჷ დო თინეფწკუმა რინა მობწონდჷ. თეს გეძინელ, დიაჩქიმ პოლონელ რდჷ დო ვართ ხოლო ფრანგ. ბნატრენდჷ, შხვადოშხვა ეროვნებაშ ხალხ შქას მშვიდობა დო თანასწორობა ჸოფედკო.

ჯარშა 1957 წანას დომძახეს. თეშნერო მოფხვად ალჟირიშ გვალეფს, თი უკმელა სერს, ნამდგაშეთ ჟიშე იფჩი. თიშ უკულ, მუთ მივოძახ: „ღორონთ! ღორონთ!“ მოწინააღმდეგეეფიშ ჯარიშკოჩიქ ვარინ, ტყარ ვირქ ქამოსქიდ ხეს! თენა ქობძირინ, შურქ მუმადგჷ. თე კონკრეტულ შემთხვევაქ დო მთელ ომქ უმოსო დუმაფიქრჷ კითხვეფშა: მუ რე სიცოცხლეშ აზრ? მუშენ ვარსებენთ? ქოზრუნენსო ღორონთ ჩქინდე? ქუმაღვენუნანო დღას მშვიდობა, ნამუთ დიდხანს იჸუაფ?

უმოს გვიანო, მუჟამსით ჭიჭე ხანით მშობლეფიშ ოძირაფშა ვორდჷ მოულირ დო უკახლე იფრთუდ, ართ იეჰოვაშ მოწმეს ქეშეფხვად. თიქ ქომუჩ ფრანგულ ბიბლიაშ კათოლიკურ თარგმან („La Sainte Bible“), ნამდგაშ კითხირ ალჟირშა დორთაშ უკულ ქიდიბჭყჷ. ართ-ართ მონაკვეთ, ნამდგაქ განსაკუთრებულო შეხუ ჩქიმ გურს, რდჷ გამოცხადებაშ 21:3, 4: „ღორონთიშ კარავ ხალხწკუმა რე! . . გელუწიმინდანს თინეფს ირნერ ჩილამურს თოლეფშე დო ვეჸუაფ ღურა, ვართ ნგარა, თვალუა დო ჭუა“. * კითხირებულქ მანგარო გუმაკვირ დო ჩქიმ დუდის ბკითხჷ: „შისრულებნო თე სიტყვეფ?“. თი დროს ბრელ მუთუნ ვამჩქუდ ღორონთ დო ბიბლიაშ გურშენ.

1959 წანას, თიშ უკულ, მუთ სამხედრო სამსახურ გუვათე, ართ იეჰოვაშ მოწმეს, ფრანსუას, ქეშეფხვად, ნამდგაქ ბრელ მუდგარენ დუმოგურუ ბიბლიაშე. მაგალთო, თიქ ბიბლიაშე ქუმოძირუ, ნამდა ღორონთის უღჷ პირად სახელ — იეჰოვა (ფსალმ. 83:18). თიქ თინა ხოლო ემინწყჷ, ნამდა იეჰოვა სამართლიანობას დამყარენს დედამიწას, სამოთხეთ გინაშქვანს თის დო შეასრულენს გამოცხადებაშ 21:3 დო 4-ის მოჩამილ სიტყვეფს.

თე გურაფეფ ლოგიკურ რდჷ დო ჩქიმ გურს ხოლო შეხუ. მარა მანგარ გარისხებულ ვორდჷ მღვდელეფშე დო მოკოდ, პასუხ მოფთხიკო თი გურაფეფიშ გურშენ, ნამუთ ბიბლიაშა ვა რდჷ გერსხილ! თავრეშე იძირედ, ნამდა მუაჩქიმიშ აზროვნება მოქმედენდჷ ჩქიმწკუმა დო მოთვინებაშ უნარ ვამღუდ. მოკოდ, მუდგარენეფ ხეთეშე ვაკეთკო!

ფრანსუაქ დო ჩქიმ ახალ მეგობრეფქ, მით იეჰოვაშ მოწმეეფ რენა, მიმეხვარეს, დევმშვიდკო. თინეფქ ემინწყეს, ნამდა ჩქინ, მუჭოთ ქრისტიანეფიშ, საქმე შხვეფიშ გასამართლება ვარინ, თინეფშა ჩქინ იმენდიშ, ღორონთიშ სამეფოშ გურშენ სახიოლო ამბეშ, გინოჩამა რე. თენა რე თი საქმე, ნამდგას იესო ორთუდ დო ნამდგაშ კეთება მუშ მიმაჸუნალეფს დავალ (მათ. 24:14; ლუკ. 4:43). თეს გეძინელ, ოკო დიბგურეკო ადამიანეფწკუმა გემუანო დო ტაქტიანო ჩიება, თინეფიშ რწმენაშ უმკუჯინუო. ბიბლია იჩიებ: „უფალიშ მონა ოკო ვა ჩხუპენდას, თეშ მანგიორო არძაწკუმა თავაზიან ოკო რდას“ (2 ტიმ. 2:24).

 საჭირო ცვლილებეფ გუვაკეთ დო 1959 წანაშ რაიონულ კონგრესის დიბნათ, მუჭოთ ართ-ართ იეჰოვაშ მოწმექ. თექ ქეშეფხვად ართ ახალგაზრდა დას, ანჟელს, ნამდგაქ მიმეწონ. მა ქიდიბჭყჷ თი შეხვალამეფშა დასწრება, ნამდგას თინა ოსწრუდ დო 1960 წანას დებქორწინით. თინა მართალო მანგარ ჯგირ პიროვნება, შესანიშნავ მეუღლე დო ძვირფას საჩუქარ რე იეჰოვაშე (იგავ. 19:14).

წანეფიშ დინახალე ბრელ მნიშვნელოვან მუდგარენ დიბგურე ბრძენ დო გამოცდილ ჯიმალეფშე. არძაშ უმოს მნიშვნელოვან თინა რდჷ, ნამდა ნებისმიერ რთულ დავალება ჯგირო შევასრულათინ, ოკო ვორდათ თანდაბალეფ დო მივაჸუნათ სიბრძნეს, ნამუთ იგავეფიშ 15:22-ს ჭარჷ: „ბრელ ელმაჩამალ რენ თექ, საქმე ხოლო იკეთებ“.

1964 წანაშე მოჸუნაფილ ვორწყექ თე შთაგონებულ სიტყვეფიშ ჭეშმარიტებას. თე წანას რაიონულ ზედამხედველო დიბჭყჷ მსახურება, მივაკითხანდჷ კრებეფს, ნამდა გურშა ელვუკინკო ჯიმალეფს დო სულიერო გუვამანგარკო თინეფ. თე დროს 27 წანერ ვორდჷ დო ბრელ გამოცდილება ხოლო ვამღუდ, ათეშენ ფჩირთუდ. მარა ვოცადუდ, დიბგურეკო შხვეფშე. თე ირფელიშ შედეგო, ბრელ მნიშვნელოვან გაკვეთილ მიბღჷ უნარიან დო გამოცდილ „ელმაჩამალეფშე“.

ართ შემთხვევა გუმაშინე, ნამდგაქ თიმწკუმა მოხვად, მუჟამსით რაიონულ ზედამხედველო ახალ დანიშნულ ვორდჷ. პარიზიშ ართ-ართ კრებას მიღდეს მონახულება; ართ სულიერო მოწიფულ ჯიმაქ მიწუ, ნამდა ცალკე ოკოდ ჩქიმწკუმა დორაგადაფა, მა ხოლო დევეთანხმჷ.

თიქ ბკითხჷ: „ლუის, მუჟამსით ექიმ მიდგარენიშ ჸუდეშა მეურს, მი ოკო ძირას თიქ?“.

„ლეხ“ — ვუწი მა.

თიქ მიწუ: „მართალ რექ, მარა ვოკვირუქუნ, სი დროშ უმენტაშ ნაწილს თინეფწკუმა ართო რექ, მით ჯგირო რე სულიერო, მაგალთო, კრებაშ ზედამხედველ. ჩქინ კრებას ბრელ თიცალ და დო ჯიმა მსახურენს, მით გურგოტახილ, ახალ ვარდა მორდებუან რე. თინეფ მანგარო დაფასენა, მუჟამსით დროს გეგმურთუნქ, მაგალთო, თინეფიშ ჸუდეშა სადილშა მიდურქ“.

თე ძვირფას ჯიმაქ მართალო ჯგირ დო საჭირო რჩევა მუჩჷ. თიშ ჸოროფაქ, მუთ იეჰოვაშ შხურიშ მიმართ უღუდ, ჩქიმ გურს შეხუ. ათეშენ ჩქიმ სიამაყეს გივორჯგინ დო ხეთეშე ქიდიბჭყჷ თიშ რჩევაშ გიმორნაფა. მარდულ ვორექ იეჰოვაშ თეცალ ჯიმალეფშენ.

 1969 დო 1973 წანეფს ჟირ საერთაშორისო კონგრესის, ნამუთ კოლომბესის, პარიზის, იტარებუდ, სამზარეულოშ ზედამხედველო დებნიშნჷ. 1973 წანაშ კონგრესის ხუთ დღას სოდგარენ 60 000 ადამიანშო ოკო რდუკო ოჭკუმალ მზათ! ვამჩქუდ, მუჭო შემალებედეს თეშ კეთება. მარა ხოლო ართშა, გამოსავალ რდჷ იგავეფიშ 15:22 — შხვეფშე რჩევაშ მეღება. რჩევა ელვაკითხე სულიერო მოწიფულ ჯიმალეფს, მიდგას გამოცდილება უღუდ თე საკითხის. თინეფშე ნამთინეს ბოსტნეულიშ მოჸუნაფაშ საქმე არჩქილედ, ნამთინეს მომარაგებაშ, ნამთინე რდჷ მეკასბე დო მზარეულ. ჩქი ართო შემალებუეს გვალაშმადიდა დავალებაშ შესრულებაქ.

1973 წანას მა დო ჩქიმ ოსურ საფრანგეთიშ ბეთელშა მემწვიეს. თექ ჩქიმ პირველ დანიშნულება ხოლო მანგარ ძნელ რდჷ. მა ოკო ქიმემჭირინუაფუდკო ლიტერატურა აფრიკაშ ქიანას, კამერუნს, მახორუ და დო ჯიმალეფშა, სოდეთ ჩქინ საქმიანობა 1970—1993 წანეფს ვარიებულ რდჷ. კინ ვამჩქუდ, შემალებედ დო ვარ თეშ კეთება. საფრანგეთიშ ფილიალიშ ზედამხედველქ, ნამდგაქ შილებე თენა ქოძირ, გურშა ელამკინ დო მიწუ: „კამერუნს ჩქინ ჯიმალეფს მანგარო ოსაჭირნა სულიერ საზრდო. ჩქი ოკო იბზრუნათ თინეფშო!“. დო ქოთ თაშ გუვაკეთით.

მუსხირენშა იბდჷ კამერუნიშ მოსაზღვრე ქიანეფშა, ნამდა თე ქიანას მსახურენდესინ თი უხუცესეფს ქეშეფხვადკო. თე გაბედულ დო გონიერ ჯიმალეფქ მიმეხვარეს, მუთ საჭირო რდუნ, ირფელ გამკეთებუდკო, ნამდა სულიერ საზრდო კამერუნს რეგულარულო მიღესკო. იეჰოვაქ აკურთხჷ ჩქინ მონდომა. თაშ ნამდა, სოდგარენ 20 წანაშ დინახალე თე ტერიტორიას მახორუ და დო ჯიმალეფს ართ გიშაშქუმალა ხოლო ვეგშასქილადნა „გინაჯინალ კოშკიშ“ დო ირთუთიან პუბლიკაციაშ, მუდგას „ჩქინ სამეფო მსახურება“ ჯოხოდ.

ურთიერთობა დიბჭყითინ თევრეშე მოჸუნაფილ, ვორწყედ ანჟელიშ სულიერ თვისებეფს. თე თვისებეფ დაქორწინებაშ უკულ ხოლო  უმოსო ქობძირ. მაგალთო, ქორწინებაშ დღას თიქ ფთხუ, ქიბლოცკო ჩქინ მიზანიშ გურშენ, ნამდა იეჰოვას სრულას ვემსახურითკო, მუჭოთ დაქორწინებულ წყვილქ. იეჰოვაქ უპასუხ თე ლოცვას.

ანჟელქ თის ხოლო ქიმმეხვარ, ნამდა უმოს სრულაშო ქიმვენდკო იეჰოვას. მაგალთო, 1973 წანას, მუჟამსით ბეთელშა მემწვიეს, მიჭირდჷ გადაწყვეტილებაშ მეღება, მუშენდა მიჸორდჷ გილმალ მსახურება. მარა ანჟელქ ქუგმოშინ, ნამდა ჩქინ ცხოვრება იეჰოვაშა მაფდეს მეძღვინელ. ათეშენ თინა ოკო ვაკეთითკო, მუდგაშ კეთებას თიშ ორგანიზაცია ფთხინდეს (ებრ. 13:17). მა სრულაშო ვოთანხმუდ თიშ სიტყვეფს! ათეშენ ბეთელშა მიდაფრთით. ჩქი ბრელ ხან რე, ართო ფცხოვრენთინ, დო თე დროშ დინახალე ჩქიმ მეუღლეშ გიმორჩქინელ გონიერებაქ დო სულიერ აზროვნებაქ გამანგარ ჩქინ ქორწინება დო მიმეხვარეს სწორ გადაწყვეტილებეფიშ მეღებას.

ასე ხოლო, მუჟამსით ხანშამიშულირეფ ვორეთ, ანჟელი კინ თიცალ შესანიშნავ მეუღლე რე დო ირიათო ელამრე. მაგალთო, თეოკრატიულ სკოლეფ გემკოფრთითკონ, ნამდგაშ უმენტაშ ინგლისურ ნინაშა იტარებ, მა დო ანჟელქ ქიდიბჭყით თე ნინაშ უჯგუშო გურაფა, მუთ ვა რდჷ ადვილ საქმე. ათეშენ, თიშ უმკუჯინუო, ნამდა 70 წანას გინოჩილათირ ვორდით, გეგნოფრთით ინგლისურ კრებაშა. მა, მუჭოთ საფრანგეთიშ ფილიალიშ კომიტეტიშ წევრის, ბრელ პასუხიშმგებლობა მიღუდ, ათეშენ ჩქიმო ძნელ რდჷ ახალ ნინაშ გურაფა. მარა მა დო ანჟელი ართიანს ვოხვარუდით. ასე, მუჟამსით 80 წანას გეგნოფჩირთით, ვაგრძელენთ კრებაშ შეხვალამეფშო მომზადებას ჟირხოლო ნინაშა, ინგლისურო დო ფრანგულო. თეს გეძინელ, ნამ შემლებნან თით ვოცადუთ, ნამდა ჩქინ კრებაწკუმა ართო მიბღათ მონაწილება შეხვალამეფს დო მსახურებას. იეჰოვაქ აკურთხჷ ჩქინ მონდომა, დომგურუაფდესკო ინგლისურ ნინა.

ხოლო ართ შესანიშნავ კურთხევა მიბღით 2017 წანას. მა დო ანჟელქ მიკოფრთით სკოლა ფილიალიშ კომიტეტიშ წევრეფშო დო თინეფიშ მეუღლეეფშო, ნამდგაქ პატერსონს, ნიუ-იორკის, გინაჯინალ კოშკიშ საგანმანათლებლო ცენტრის ჩეტარ.

იეჰოვა მართალო დიდებულ მასწავლებერ რე (ეს. 30:20). ათეშენ გასაკვირ ვა რე, ნამდა თიშ ხალხ, ახალგაზრდა იჸინო დოვარ მოხუცებულ, ღებულენს არძაშ უჯგუშ განათლებას! (კან. 4:5—8). ვორწყექ, ნამდა ახალგაზრდეფ, მით ქოთ იეჰოვას ურჩქილენა დო ქოთ გამოცდილ და დო ჯიმალეფს, სულიერო წიმი მეულა დო მიოჭირინუანა მოწიფულობას. იგავეფიშ 9:9 გუმოშინანა: „ქელუჩ ბრძენს დო ხოლო უმოსო დებრძენებ; ქუდაგურე მართალს დო უმოს არჩქვენუ“.

მინშა გუმაშინე ალჟირიშ გვალეფს ვორდინ თი ოშქურანჯ დო უკმელა სერ, ნამუთ სოდგარენ 60 წანაშ წოხოლე რდჷ. თიმწკუმა ვამჩქუდ, მუ ჯგირობუა მელუდ წიმი. ბრელ მუდგარენ დიბგურე შხვეფშე! იეჰოვაქ მა დო ანჟელს კმაყოფილებათ დო კურთხევეფით ეფშა ცხოვრება მუჩეს. თაშ ნამდა, გინოჭყვიდილ მაფნა, დღას ვემვოტუათ ჩქინ ზეციერ მუმაშე დო თინა უჸორსინ ფერ, ბრძენ დო გამოცდილ და დო ჯიმალეფშე გურაფა.