Subuduti san hun?
Yúsuati meha san papiru lidan tidaani Bíbülia lun tadügǘniwa waporu?
Lídibu papiru.
SUBUDI hamuti meha saragu gürigia, lidan lan meha binadu Ehiptu yusua lan meha papiru kei aban ubuñei súdiniti lun abürühani. Yusu hamuti meha giñe gürieguna hama rómana lun habürühan. * Míbetiña gürigia asubudirei mámarügüñein lan lun abürühani layusurúa papiru, yúsuati meha giñe lun tadügǘniwa waporu.
Bián ugunei lautu papiru to adarirúboun lidan hamuahan hilaaña Ehiptu.
Kéiburi lóugiñe 2,500 irumu guentó, abürühati profeta Isaíasi hawagu gürigia ha awinwandubaña “lidan ageiraü le yagürounmemebei luéi lidunari Etiopía, le óunahabaliña lóunagülegu luéigiñe Nilu, áfayaheina dúnarugu tidan ugunei lautu maburu [papiru]!”. Ariñagati meha giñe profeta Heremíasi danme lan hebelaagun médiana hama pérüsiana uburugun Babilónia, háguduboun lan waporu lautu papiru to hani babilóniana luéi hanurahan (Isa. 18:1, 2; Her. 51:32).
Kei lúmagiñe lubéi Bungiu tiabin Bíbülia, maweiriduntu hanigi ha aturiahabarun lau hadarirun gürigia ha achiahabaña binadu katei le arufudubei yusua lan papiru lidan tidaani Bíbülia lun tadügǘn waporu (2 Tim. 3:16). Ariha wamá fiu katei le achoururagüdübalin woun luáguti tadügǘniwa waporu lau papiru le adarirúbei Ehiptu.
IDA LIÑA TADÜGǗNIWA WAPORU LAU PAPIRU?
Lidan fiu umúahaü Ehiptu, dariwati efeindihani luáguti katei le arufudubalin ida liña lan lalubahóun papiru ani ida liña lan giñe tadügǘniwa waporu lau. Áchuaha hamuti meha wügüriña papiru ani aba hagüraguni lidan fárüga ani muruñu liña meha hagüraguni. Keiti redei lubéi ǘrüwa louba badüleñu luougua, dan le hóundaraguni kei fárüga, derebuguti. Según aban líburu, aban waporu to lautu papiru gayaraati tamigifedu kéiburi lóugiñe 17 méturu (55 ugudi) ani lau 10 o 12 fágayu lidan kada oubaü (A Companion to Ancient Egypt).
Efeindihani le arufudubalin tadügün waporu lautu papiru.
KA SAN UAGU TADÜGÜWA WAPORU LAU PAPIRU?
Dariwati meha saragu papiru lurugabu duna Nilu.Gama lumoun, ménrengunti meha tadügǘniwa ugunei lau papiru. Íbini dan le meha lagumeserubei fulansu ayusurúa lun tadügǘniwa waporu wéinamutu, genegeti yusu hamanu óuchahatiña hama éibaahatiña, ugunei lautu papiru lun hóuchahan luma lun héibaahan.
Sigitiña meha ayusuroun waporu lautu papiru luagu saragu irumu. Según aban abahüdaguati gürieguna gíriti Plutarco le awinwandubei labadinagua sígulu aban luma biama lidan wadaani, yúsutiña meha gürigia ha lídanbaña lidaani, guríara lautu papiru.
^ par. 3 Lidan burí suanpu láhücha papiru luma lidan duna le méibaagunti. Aba nadü le gayaraati lamigifedun kei burí 5 méturu (16 ugudi), ani le liduru lugudina kei burí 15 sentimeturu (6 incha).
