Sabe Ba Tu?
Ya usa ba con el papiro para hace bangca na tiempo del Biblia?
El siembra de papiro
CONOCIDO el papiro como el primer material que ta usa onde ta escribi el maga de Egipto de antes. El maga Griego pati el maga Romano ya escribi tambien na papiro. * Poco lang sabe que el papiro nuay lang usa para escribi sino ya usa tambien para hace bangca.
Dos clase de bangca de papiro que ya incuntra adentro na sepultura del un Egipcio
Mas de 2,500 año ya el ya pasa, si profeta Isaias ya escribi que el maga gente quien ta queda “na region del maga rio del Etiopia” ya imbia “maga mensajero que ya pasa na mar, que ya travesa na agua usando el maga bangca que hacido de papiro.” Despues, ya predicta si profeta Jeremias que si hay ataca el maga de Media y Persia con el ciudad de Babilonia, hay quema sila “con el maga bangca de papiro” del maga de Babilonia para gendeh sila puede escapa.—Isa. 18:1, 2; Jer. 51:32.
El Biblia inspirao del Dios poreso gendeh maka-estraña para na maga estudiante del Biblia que el maga arqueologo ya sabe que el papiro ya usa para hace bangca na tiempo del Biblia. (2 Tim. 3:16) Cosa sila ya discubri? Ya puede sabe el maga arqueologo el detallado evidencia que el papiro ta usa gayot para hace bangca na Egipto.
PAQUEMODO YA HACE EL BANGCA DE PAPIRO?
El maga painting y el maga escribida na pader na maga sepultura del maga Egipcio ta dale mira el proceso si paquemodo ta cosecha con el papiro y ta hace con el maga bangca. El maga hombre ta curta con el maga pono del papiro, ta hace con ese balutan y ta apreta con ese. Triangulo el maga pono del papiro. Poreso si ya amarra ya con este junto y ya apreta, queda este duro. Asegun na libro A Companion to Ancient Egypt, el maga bangca de papiro puede alcanza mas de 55 pies el largor (17 m) que puede pone maga 10 o 12 saguan na cada lao de este.
Escribida del maga Egipcio na pader que ta dale mira si paquemodo ta hace con el bangca de papiro
PORQUE EL MAGA TA HACE BANGCA YA USA CON EL PAPIRO?
Na Egipto, manada siembra de papiro el ya crici na patag lugar onde ta pasa el Rio de Nilo. Mas pa, facil lang hace con el bangca de papiro. Maskin palo ya ta usa para hace maga grande barco, el maga pescador y pajareador ta usa siempre maga balsa y diutay bangca que hacido de papiro.
Por largo tiempo, ya continua el maga gente usa con el bangca de papiro. El Griego escritor, si Plutarch, quien ya vivi durante el tiempo del maga apostoles, ya habla que el cuanto del maga gente ta usa siempre con el bangca de papiro na aquel tiempo.
^ par. 3 Ta crici el papiro na maga pantano y sapa. El altor de este siembra puede llega maga 16 pies (5 m) y el anchor del pono puede llega maga 6 pulgada (15 cm).
