ALANYIMU ka atre laka, angetre Aigupito ekö a tranetran la papyrus, matre troa nyi pepa. Hnei angetre Heleni mina fe me angetre Roma hna hane cinyihan hune papyrus. * Ngo thatre kö itre xan laka, hna xome fe la feja cili, matre troa cane la itre he.

Ketre, traqa koi 2 500 hë lao macatre ne cinyihane Isaia perofeta laka, hnene la itre ka lapa ezine la “hneopegejë ne Aithiope” hna “upe la ite maca jëne hnagejë, hna tithe la ite he gome hune la hnagejë.” Thupene lai, hnei Ieremia hna perofetan ka hape, tro angetre Madai me Peresi a “deuthe la ite haine hnei eë,” matre tha tro kö a kötr hnei angetre Babulona. Kola qaja la itre he hna kuca hnei papyrus.—Is. 18:1, 2; Iere. 51:32.

Eje hi, ewekë i Akötresieti la Tusi Hmitrötr. Celë hi matre, tha sesëkötre kö së ngöne la kola jelenyipicin hnei itre ka ithel laka, hna kuca la itre he ekö hnene la papyrus. (2 Tim. 3:16) Nemene la hna öhn hnene la itre ka inamacan? Hnei angatr hna öhn laka, hna xome la itre feja cili matre troa kuca la itre he e Aigupito.

Ame e hnine la itre hua e Aigupito, hna peidrëne la aqane thupa la papyrus ekö, matre troa cane la itre he. Itre trahmanyi a thupa me ce hnöth la itre drön, me ce xawane la itre uk. Ketre, ka köni kona la itre dröne papyrus, matre tha jole kö troa ce hnöth itre ej. Nge ame la itre uke ne ej ke, ka catre hnyawa. Kola qaja ngöne la ketre itus göne la mel e Aigupito * ka hape, 17 lao met la eqeane la itre he hna kuca hnei papyrus, matre hna xome la 10 maine 12 lao galu.

Hnei angetre Aigupito hna majemine huliwane la papyrus ke, ka cia hlöeë ezine la hneopegejë hna hape, le Nil. Ketre, tha jole kö troa cane la itre he jëne la feja cili. Ngacama hna cane la itre he ka tru hnei sinöe, ngo hnene palahi la itre ka nyi ie hna huliwane la itre weng me itre neköi he hna kuca hnei papyrus.

Eje hi, itre macatre ne kola cane ekö la itre he jëne papyrus. Öni Plutarque, ketre atre cinyihan ekö qa Geres ka hape, ame ngöne la hneijine i nyidrë, hna cane fe la itre he jëne papyrus.