AKÈH wong ngerti nèk wong Mesir jaman mbiyèn nulis ing kertas sing digawé saka papirus. Wong Yunani lan Romawi ya nulis ing kertas sing digawé saka papirus. * Ning, wong-wong biasané ora ngerti nèk papirus ya isa dienggo nggawé prau.

Kira-kira taun 700 SM, Nabi Yésaya kandha nèk wong-wong saka ”cedhaké kali-kali ing Étiopia . . . ngirim utusan ngliwati laut” lan ”para utusan kuwi nyabrang nganggo prau saka papirus”. Nabi Yérémia ya tau ngramalké nèk Média lan Pèrsia bakal nyerang Babilon lan ngobong ”prau-prau sing digawé saka papirus”, bèn wong Babilon ora isa mlayu.​—Yés. 18:1, 2; Yér. 51:32.

Alkitab kuwi asalé saka Gusti Allah. (2 Tim. 3:16) Dadi, wong-wong sing sinau Alkitab mesthiné berharap ana bukti-bukti sing nduduhké nèk ing jaman Alkitab papirus pancèn dienggo nggawé prau. Apa bukti-bukti kuwi pancèn ana? Ana. Saiki, para ahli purbakala wis nemokké bukti-bukti sing nduduhké nèk wong Mesir jaman mbiyèn tau nggawé prau saka papirus.

Saka gambar lan ukiran ing témbok kuburané wong Mesir, awaké dhéwé isa ngerti piyé carané wong-wong ngumpulké papirus lan nggawé prau saka papirus. Pertama, batangé papirus dikethok, terus batang-batang kuwi didadèkké siji lan ditalèni kenceng. Merga batangé papirus kuwi bentuké segitiga, mula pas ditalèni kenceng, batang-batang kuwi isa rapet banget lan kuwat. Nurut buku A Companion to Ancient Egypt, prau sing digawé saka papirus kuwi dawané isa nganti 17 mèter lan saben sisiné isa dipasangi 10 nganti 12 dayung.

Ing dhaérah-dhaérah sekitaré Kali Nil, ana akèh tanduran papirus. Terus, prau saka papirus kuwi nggawéné ya gampang. Senajan wong-wong wektu kuwi wis mulai nggawé prau sing gedhé saka kayu, kétoké prau-prau cilik saka papirus isih digunakké karo nelayan lan pemburu.

Wong-wong isih nggunakké prau-prau saka papirus nganti suwé. Buktiné, Plutarch, penulis Yunani sing urip sejaman karo para rasul, kandha nèk wong-wong ing jamané isih nggunakké prau saka papirus.