OVANTHU ovanyingi vetyii okuti mono papilu omo ovanthu kohale mo Isitu ankho vahoneka. Ova Geleku nova Loma navo ankho vahoneka mono papilu. * Mahi etyi ovanthu ovanyingi vehei, okuti ono papilu tupu ankho mbulingwa nambo onombaluku.

Omanima 2.500 konyima, omuuli Isaiya wahonekelele ovanthu “vakala Monondongi mbo Etiopia.” Ovanthu atumine vaendelele konombaluku mbonopapilu. Konyima omuuli Selemiya apopia okuti, tyina Ombambilonia yamahitiswa nova Medo nova Persia, onombaluku mbalingwa nopapilu mambuyokwa opo ova Mbambilonia vahaye nkholo. — Isa. 18:1, 2; Jer. 51:32.

Tyina ovanongo vamavasi ovipuka vilekesa okuti, kohale ono papilu ankho mbutungwa nambo onombaluku, katyituhuvisa mokonda Ombimbiliya Ondaka ya Huku yetyipopiale. (2 Tim. 3:16) Oityi vavasa? Ovanongo vavasa ovipuka vilekesa okuti ko Isitu kohale ankho kulingwa onombaluku nonopapilu.

Omalutalatu amwe avasiwa momatundu o Isitu, alekesa okuti ova Isitu ankho vateta ono papilu opo valinge nambo onombaluku. Ono papilu ankho vembuteta, avembukutu oupandi-oupandi, konyima oupandi oo aveukutu kumwe aukala umwe ngombaluku. Omukanda umwe upopia konthele yo Isitu, wapopia okuti onombaluku ombo, ankho mbupondola okukala nonometulu 17 iya kononthele kupondola okukala ovimuti 10 ine 12 viokuisinga.

Onopapilu mbukulila unene Mondongi Nilu, ankho katyipuiya okuvasa ono papilu. Atee umwe etyi pahe ovanthu vahimbika okulinga onombaluku nomavai, mahi no ngotyo ovafwi vamwe novayevi vamwe ankho vatualako okuundapeswa onombaluku mbalingwa nono papilu.

Onombaluku mbono papilu mbatuaileko okuundapeswa momanima omanyingi. Omuhoneki umwe utiwa Plutarch, omu Geleku wakalele pomuvo wono apositolu, wapopia okuti ovanthu ankho vei unene ono papilu.