MAET iu savve olketa lo Egypt bifor savve raet lo pepa wea pipol wakem from papyrus plant. Olketa lo Greece and Rome tu savve duim olsem. * Bat maet iu no savve pipol iusim papyrus for wakem boat tu.

Winim 2,500 year go finis, profet Isaiah sei pipol from “ples wea stap klosap lo olketa river blo Ethiopia” iusim “olketa boat wea olketa wakem from papyrus for akros lo sea.” Jeremiah tu profesi abaotem taem wea olketa blo Media and Persia attakim Babylon and bonem “olketa boat wea olketa wakem from papyrus” mekem pipol blo Babylon no savve iusim for ranawe.—Isa. 18:1, 2, NW; Jer. 51:32, NW.

Iumi sure olketa boat wea Isaiah and Jeremiah storyim lo Bible really stap. Samfala wea studyim olketa old samting faendem samting wea pruvim pipol lo taem blo Bible iusim papyrus for wakem boat. (2 Tim. 3:16) Bae iumi storyim wanem olketa faendem lo Egypt.

Lo samfala cave lo Egypt, olketa faendem olketa piksa lo wall wea showimaot hao olketa katem papyrus and then wakem olketa boat. Olketa man katem papyrus, taengem lo bandol, and then taengem olketa bandol hia tugeta. Papyrus grass garem thrifala saed wea flat, so taem olketa taengem grass hia lo bandol hem strong and hard for wata kam insaed. Wanfala buk, A Companion to Ancient Egypt, sei hao long blo samfala papyrus boat savve winim 17 meter, and 10 or 12-fala man savve sidaon lo each saed for padolem boat hia.

Lo Egypt staka papyrus grow followim Nile River. And tu, hem no hard tumas for wakem boat from papyrus. Nomata taem pipol start for iusim wood for wakem olketa big boat, olketa man for fishing gohed iusim raft and smol boat wea olketa wakem from papyrus.

Pipol gohed iusim papyrus for wakem boat for staka year. Plutarch, wanfala Greek savveman wea laef lo taem blo olketa aposol sei, samfala pipol still iusim papyrus boat lo datfala taem.