Da li đanđan?
Da li ko purano vreme o brodija ćerđe pe ando papirus?
I biljka ando papirus
BUT manuša đanena so ko purano Egipat aso pisibe koristinđa pe o papirus. * Isto ađahar, o Grcija hem o Rimljanja pisinđe ko papirus. Ama, but manuša na đanena so o papirus koristinđa pe hem te ćeren pe brodija.
Duj makete ando brodija kola hine ćerde ando papirus kola arakhlje pe ki egipatsko grobnica
Oko 2 500 berš angleder, o prorok Isaija pisinđa so o manuša kola živinena ko „područje ando etiopska reke... bićhalena e poslanikonen prekalo more, ko brodija andi e papirusesi trska.“ Kasnije, o prorok Jeremija prorekninđa so o Medijancija hem o Persijancija ka napadinen i diz Vavilon hem ka tharen olenge „brodija andi e papirusesi trska“ te šaj te sprečinen len te našen (Is. 18:1, 2; Jer. 51:32).
I Biblija avela ando Devel hem odolese e manušen kola proučinena i Biblija na iznenadini so o arheolozija arakhlje o dokazija so ko purano vreme o papirus ćaće koristinđa pe te šaj te ćeren pe brodija (2. Tim. 3:16). On arakhlje disave buća kola mothovena sar ko Egipat ćerđe pe o brodija ando papirus.
SAR HINE ĆERDE O BRODIJA ANDO PAPIRUS?
Ko egipatska grobnice arakhlje pe o crtežija hem o reljefija kola mothovena o proces sar o manuša ćedena o papirus hem ćerena brodija. O manuša ćhinena i stabiljka hem phanena la ko snopija, a palo odova odola snopija stegno phanena. Sebepi so o stabiljke ando papirus hine len trouglasto oblik, ked stegno phanena pe, on formirinena jekh but zoralo snop. Jekh knjiga koja vaćeri andi istorija kotar Egipat, phenela so akala brodija kola hine ćerde ando papirus, šajinđe te oven dugačka prekalo 17 metre hem ki svako strana hine than aso 10 ja 12 veslija (A Companion to Ancient Egypt).
O egipatsko reljef ko kova tano mothovdo sar ćerela pe o brodo ando papirus
SOSE O MANUŠA KOLA ĆERÐE BRODIJA KORISTINÐE O PAPIRUS?
Ko Egipat, o papirus šajinđa lokho te arakhi pe sose hine barjola uzi reka Nil. Isto ađahar, na hine pharo te ćeren pe o brodija ando papirus. Čak hem ked o manuša počminđe te koristinen o kaš te ćeren bare brodija, o ribarija hem o lovcija pana koristinđe o čamcija hem o splavija kola hine ćerde ando papirus.
But vreme, o brodija kola hine ćerde ando papirus hine popularna. O grčko pisco kova vićinđa pe Plutarh, kova živinđa maškaro prvo hem o dujto veko ki nevi era, phenđa so o splavija kola hine ćerde ando papirus hine penđarde e manušenđe kola živinđe ko oleso vreme.
^ odl. 3 I biljka papirus barjola ko močvare hem ko reke kola na đana sigate. Odija biljka šaj te barjol hem đi o panđ metre, a olako prečnik šaj te ovel le hem oko 15 centimetrija.
