PLANTI manmeri i save olsem inap planti handret yia i go pinis, ol man long Isip i save raitim tok antap long pepa ol i wokim long papairas—em wanpela kain pitpit. Ol Grik na ol Rom tu i save raitim tok long papairas. * Tasol planti man i no save olsem ol man long bipo i bin yusim papairas long wokim ol bot tu.

Winim 2,500 yia i go pinis, profet Aisaia i bin raitim tok olsem ol lain i stap “long ol hap i stap klostu long ol wara bilong Itiopia” i save salim lain bilong ol “long solwara i go, ol i go brukim wara long ol bot ol i wokim long pitpit.” Bihain, profet Jeremaia i tok profet long lain Midia na Persia bai kam bagarapim biktaun Babilon, na em i tok ol bai kukim ol bot bilong ol Babilon, em “ol bot ol i bin wokim long pitpit” na dispela bai pasim ol long ranawe.—Ais. 18:1, 2; Jer. 51:32.

God yet i kamapim ol tok bilong Baibel, olsem na ol sumatin bilong Baibel ol i no kirap nogut olsem, ol samting bilong bipo em ol saveman i bin painim i soim klia olsem ol man i bin wokim ol bot long papairas long taim bilong ol man i bin raitim Baibel. (2 Tim. 3:16) Ol i bin painim wanem ol samting? Ol saveman i bin painim planti evidens i soim klia olsem long Isip bilong bipo, ol man i bin wokim ol bot long papairas.

Ol peinting na ol disain antap long ol matmat bilong ol Isip bilong bipo i soim hau ol man i bin katim ol papairas na wokim ol bot. Ol man i save katim ol longpela bun bilong ol papairas, pasim long bandel, na bihain ol i bungim ol bandel wantaim na taitim. Ol bun bilong papairas i gat traiengol seip. Olsem na taim ol i taitim, ol i slip gut antap long narapela narapela, na ol i strong. Buk A Companion to Ancient Egypt i tok, bot ol i wokim long papairas sampela taim em i longpela winim 17 mita, na i gat 10-pela o 12-pela pul long wan wan sait bilong en.

Long Isip, planti papairas i gro long Ples Daun Bilong Nail, em hap we Wara Nail i ron long en. Na tu, em isi long wokim ol bot long papairas. Na long taim we i gat planti diwai i stap bilong ol man i ken wokim ol bikpela bot na sip samting, ol man bilong kisim pis na ol man bilong painim abus i wok yet long yusim ol bot ol i wokim long papairas.

Long bipo, inap longpela taim ol man i bin wokim na yusim ol bot ol i wokim long papairas. Wanpela man Grik, em man bilong raitim buk, nem bilong em Plutarch, na em i bin stap long taim bilong ol Kristen bilong pastaim, em i tok sampela man long taim bilong em ol i wok yet long yusim ol bot ol i wokim long papairas.