MANY people know say, many years ago for Egypt, the main thing wey people use write that time na paper wey they use papyrus plant make. People from Greece and Rome still use papyrus paper write. * Many people no know say no be only paper they use papyrus plant make, they still use-am make boat.

More than 2,500 years ago, prophet Isaiah write say the people for the area wey the rivers of Ethiopia dey, send messengers make they travel for sea with boat wey they use papyrus make. After, prophet Jeremiah talk say the time wey people of Media and Persia go attack the city of Babylon, they go burn their papyrus boats so that they no go fit escape.—Isa. 18:1, 2; Jer. 51:32.

Na God use holy spirit direct everything wey they write inside Bible. So as Bible students, e no surprise us say science people find out say people for Bible time use papyrus plant build boat. (2 Tim. 3:16) Science people see some things wey prove-am say people for Egypt use papyrus plant make boat.

For where Egypt people bury their people, things wey they paint and carve for wall show how people de gather papyrus plant and how them de use-am make boat. Men de cut the papyrus plant and tie them together separate-separate. Then, they go gather all of them together. Papyrus plant de thick for down and tiny for up. So when they tie them together, e de really strong. One book wey talk about the history of Egypt people talk say, boat wey they use papyrus make fit long pass 55 feet (17 m), and e de get space wey fit contain 10 or 12 paddle for each side.

For Egypt, papyrus plant de grow plenty for the area wey River Nile de flow pass. Another thing be say, papyrus boat dey easy to make. Even when people start to use wood build big boats, e be like say fishermen and hunters still continue to use papyrus plant build small boats.

For long time, people continue to use boat wey they use papyrus plant make. One Greek writer wey e name na Plutarch live for time of the apostles, and e talk say people still use papyrus boats that time.