ცნობილ რე, ნამდა პაპირუს მთავარ ოჭარალ მასალა რდჷ უჯვეშაშ ეგვიპტეს. ბერძნეფ დო რომაელეფ ხოლო ირინუანდეს თის ოჭარალო. * მარა ბრელს ვა უჩქჷ, ნამდა პაპირუსის ხვალე ოჭარალო ვარინ, ნავეფიშ ოკეთებელო ხოლო ირინუანდეს.

2 500 წანაშე მეტ ხანიშ წოხოლე, წინასწარმეტყველ ესაიაქ ჭარჷ, ნამდა „ეთიოპიაშ წყარმალეფიშ მხარეს“ მახორუ ხალხ დესპანებს უტენდჷ ზღვათ „წყარს მენჩურუნსინ ფერ ჭილიშ ნავეფიშ საშვალებათ“. უმოს გვიანო წინასწარმეტყველ იერემიაქ თქუ, ნამდა, მუჟამსით ქალაქ ბაბილონს მიდია დო სპარსეთი ქიგიანთხუდ, თინეფ დოჭუნდეს ბაბილონელეფიშ ჭილიშ ნავეფს, ნამდა ვეშიალებესკო ნტებაქ (ეს. 18:1, 2; იერ. 51:32).

ბიბლია ღორონთიშ შთაგონებულ რე, ათეშენ ბიბლიაშ მარკვიებელეფშო გასაკვირ ვა რე არქეოლოგიურ აღმოჩენეფ, ნამუთ ოძირანს, ნამდა პაპირუს მართალო გიმირინუაფუდ ბიბლიურ დროს ნავეფიშ ოკეთებელო (2 ტიმ. 3:16). კონკრეტულო მუქ იჸუ ძირაფილქ? არქეოლოგეფქ ეგვიპტეს ძირეს პაპირუსიშ ნავიშ დეტალურ მტკიცებულება.

ეგვიპტეშ აკლდამეფიშ კიდალეფს მოჩამილ ნახანტეფშე დო ეშაჭკირილ გამოსახულებეფშე იძირე პაპირუსიშ მოსავალიშ ეჭოფუაშ დო თინეფშე ნავეფიშ კეთებაშ პროცეს. ქომოლკოჩეფქ პაპირუსიშ ღერეფ ოკო ქიგიოჭკირესკო, ართო აკოკირესკო დო თინეფ ართიანს მანგარო ქიმიოსკუესკო. პაპირუსიშ ღერეფს სუმკუნთხულ ფორმა უღჷ. ათეშენ, მუჟამსით თინეფს ართიანს მანგარო ქიმიოსკუანდეს, ძალიერ შეკვრა გიშეშ. ართ წიგნის („Companion to Ancient Egypt“), ნამუთ ეგვიპტეშ ისტორიას ოხუ, ჭარჷ, ნამდა პაპირუსიშ ნავეფ შილებე 17 მეტრაშე უგინძაშ ჸოფედკო, ნამდგას თითოულ მხარეს 10 ვარდა 12 ნიჩაბ უღუდ.

პაპირუს ადვილო ხეშამალაფარ მასალა რდჷ ნილოსიშ გოხოლუას. თეს გეძინელ, ნავეფიშ პაპირუსშე კეთება უმოს ადვილ რდჷ. მუჭოთ იძირენ, თიმწკუმა ხოლო, მუჟამსით ჯაქ გინირთჷ მთავარ მასალათ დიდ გემეფიშ ოშენებელო, მეჩხომეეფ დო მონადირეეფ იშენით პაპირუსიშ ტივეფს დო ჭიჭე ნავეფს ირინუანდეს.

უჯვეშაშ პაპირუსიშ ნავეფს ბრელ ხანს ირინუანდეს. ბერძენ მაჭარალ, პლუტარქე, ნამუთ მოციქულეფიშ დროს ცხოვრენდჷ, იჩიებ, ნამდა პაპირუსიშ ტივეფ მუშ დროს ხოლო ვა რდჷ უცხო ნამთინეშო.