1. Uḅenhị ḍita awe phọ oḍighi eeghe mem oḅẹl okuron asiạ phọ?

AḌITA awe areelhe dị roḅạ runhụ kirokirọ kụ usoor. Eekiạ iyaạr imite ni ḍio phọ aḍiphẹ phọ. Abuniin abuọ aJu phọ umhiigh ni bịn oḅạ arunhụ aruuruen phọ! Iphẹn phọ iḍighi ni iikia esi aruuruen phọ, kuolọ iyaạr phọ abuọ aJu phọ abuẹn phọ r’otelhedom mọ aPita oghaạph bọ ikạr kụ eḍighan elhegh. Bidi ughaạph ghan mọ aḍita awe phọ komoọgh pelieẹny esi omhoọgh omheeraam oghị esi aZizọs Kraist. Oghaạph phọ opọ phọ akạr kụ atir ḍita phọ. Dị tutụ opuru ghan mọ: “Yoor oḍighi ika?” APita aḅenhị bidị mọ: “Torobọ onyọ anyina [aḍiiny] muụm.”—Iiḍighi 2:37, 38.

2. Yira kooḅeghiọn eeghe siẹn emhuoghaạph phọ ephẹn phọ? (Miịn afoto oḅẹl opoḍi phọ.)

² Iyaạr dị etum siphẹ dị emite ikạr kụ egbatanhaạn. Awe dị romạn ni 3,000 kụ uḍiiny muụm oḍighi aani bumatuạn aKraist ḍio phọ aḍiphẹ phọ. Epẹ kụ emhiighom ogbogh oḍighi awe bumatuạn phọ aZizọs atọ bọ aḅenhị budaphạm mọ odị oḍighi. Oḍighi phọ ophọn masighẹ atu ateẹny ḍio arodon. Siẹn amem mọ ayira, yira ko/tue ologhonhaạn ḍighaạgh oye oḍiiny amuụm esi iyạl ikpo awạ bịn. Etue ni esighẹ ibadị arunwanyụ obobọ lhạ obobọ idị epel siphẹ. Eḍighi maạr dị nạ amhoọgh ni oye dị nạ ratughemhị Baibul, nạ kamiịn ni mọ oḍighi idị oye kaḍighi onyọ amatuạn aKraist k’/oọny oḍighi. Esi iduọn phọ, siẹn emhuoghaạph phọ ephẹn, yira kooḅeghiọn idị nạ katue aḍighi kụ opọ nạ ratughemhị bọ kaḍiiny muụm.

3. Odaphạn Matiu 28:19, 20, eeghe iyaạr kụ edị oye dị ratuughạ Baibul kaḍighi orue oḍiiny amuụm?

³ Opọ yira rotughemhị ghan bọ amoọgh omhiigh osighẹ oḍighinhom ghan ipẹ aBaibul phọ ratughemhị bọ kụ agbi oḍiiny  amuụm. (Bạl Matiu 28:19, 20.) Mem dị odị asighẹ aḍighinhom ipẹ odị ratuughạ bọ, pọ odị akịgh “oye oIegheri-iyaạr phọ” aphighi bọ otu phọ odị anyụ aḍighiigh, aZizọs aghaạph bọ amaaniọm. (Mat. 7:24, 25; Luk 6:47, 48) Ika nuụn kụ edị yira kotue bọ ologhonhaạn ḍighaạgh oye dị ratuughạ Baibul osighẹ oḍighinhom ipẹ odị ratuughạ bọ? Uguạ ooḅeghiọn iraạr araraạr.

4. Yira kologhonhaạn ika ḍighaạgh oye osianhaan oḍiiny amuụm? (Miịn igbe phọ “ Ḍighi Idị Opọ Nạ Ratughemhị Ghan Bọ Kapighi Siigbu Aḅilhẹ Ateẹny.”)

⁴ Loghonhaạn ḍighaạgh nyodị ophighi asiigbu. Eeghe kụ iḍighi? Ooḅeghiọn oghaạph omaaniọm mọ ophọn: Eḍighi maạr dị nạ arelhe rakị ekpisi dị ekẹl iboom, eeni nạ kaḍigh ghan ni esi apooghian. Bịn oghiilhaan aḍikẹl ekpisi phọ ke/kạr mun eḍighi iiḅaghamhị esi anạ. Iniin phọ kẹn ni kụ edị kedughanhaan oye dị rotughemhị Baibul oteẹny aḍiigbu oḍiiny amuụm, mem dị odị aphighi siigbu dị odị kanuụn ateẹny. Ḍighinhom igbe phọ “Aḍiigbu” siphẹ aḍinyạ phọ oghol bọ mọ Kelhọm Ghuḍum K’agee-pọ! olhoghonhaạn aḍighaạgh opọ nạ ratughemhị ghan bọ. Torobọ esi ituughạ dị nyinha etuughạ emhạn, kaạph ni ipẹ aḍiigbu phọ keloghonhaạn bọ ḍighaạgh nyodị osighẹ oḍighinhom ipẹ odị matuughạ bọ. Eḍighi maạr dị nạ aatughiạn ḍinhọn aḍiigbu dị odị kateẹny, pọ gẹ ni siphẹ ogẹ bọ mọ “Enhọn iyaạr.” Gbor ghan aaḅeghiọn ghan siigbu phọ ipẹ odị kanuụn bọ ateẹny r’idị odị kateẹny ghisigh.

5. Odaphạn Mạk 10:17-22, eeghe iyaạr kụ edị aZizọs aḅenhị oolhạ phọ, kụ eeghe kụ iḍighi?

⁵ Loghonhaạn ḍighaạgh nyodị onmeeghi iḍighinhom araraạr odị. (Bạl Mạk 10:17-22.) AZizọs alhegheri ni mọ kekparanhaạn ni oolhạ phọ aalhaghi oomo araraạr emhoọgh phọ odị. (Mạk 10:23) Ghalhamọ r’iduọn phọ ni, aZizọs aḅenhị ni oolhạ phọ mọ aḍighi ni iduọn phọ. Eeghe kụ iḍighi? Loor esi dị aZizọs apomhoghiạn nyodị. Eeni amem, yira rokiilhaan ghan ni oromha opọ yira rotughemhị ghan bọ osighẹ oḍighinhom ipẹ odị ratuughạ bọ loor esi dị yira rologhoma  ghan mọ odị koo/kolobian onmia. Resighẹ ghan ni mem eeni amem kụ awe ogbi okporonhaạn igbaany aroozọ okpolhoghiạn imhoom. (Kọl. 3:9, 10) Kuolọ mem dị nạ anhuụn aghaạph ilọ aroozọ dị ewạ mọ odị anmeeghi, kụ edị odị kanuụn amiigh onmeeghi. Nạ aghaaphạn r’odị ilọ iphẹn phọ, pọ nạ raḍeenhaan ghan ogbolhomaam nyodị.—Ps. 141:5; Prov. 27:17.

6. Eeghe kụ iḍighi kụ emhoghi bọ oḍighinhom ghan asipuru dị keesạ iitughiạn?

⁶ Aḍipuru dị keesạ epul iitughiạn eḍighi ḍipuru dị yira ropuru ghan opọ yira rotughemhị ghan bọ, onhaghạn aani idị odị aatughiạn ilọ iyaạr phọ odị atuughạ bọ. Esi iduọn phọ, ḍighinhom ghan ḍidọ aḍipuru phọ aḍiphẹ osighẹ olhegheriom onhaghạn aḍughụm mọ r’omheeraam mọ odị. Nạ agbor ghan aḍighi iduọn phọ, kedughanhaan ni nyinhạ oghaaphạn odị ilọ araraạr dị eeni kekparanhaạn ni nyodị oḍighi. Aḍinyạ phọ Kelhọm Ghuḍum K’agee-pọ! epamanhạm ni odọ asipuru phọ iphẹn phọ. Esi omaạm, esi ituughạ phọ 04 epuru mọ: “Nạ aatughiạn mọ retọl ghan ika esi aZihova mem dị nạ amhạgh ḍien phọ odị?” Esi ituughạ phọ 09 epuru mọ: “Ighẹn kụ araraạr dị keḅeeraạn nyinhạ oghol ooḅereghị?” Eḅẹl amem mọ, opọ nạ ratughemhị bọ kagim ni iitughiạn ilọ ophagharanhaạn idọ asipuru phọ ipẹ phọ. Nạ katue ni aloghonhaạn nyodị ḍighaạgh esi otughemhị odị ilọ ogbiran riisi aBaibul phọ r’iḍoronheẹn phọ.

7. Ika kụ idị nạ katue asighẹ eḍeenhaan onhọn oye atughemhiọm eten dị emhoon?

⁷ Mem dị opọ nạ ratughemhị bọ anhaghanhạn ipẹ ewạ bọ dị odị kaḍighi, sighẹ eḍeenhaan oye akparamhiọm nyodị. Esi omaạm, eḍighi maạr dị odị ra/gbor ghan karu ituughạ, pọ ḍeenhaan nyodị vidio phọ AZihova Ruphogh Ni Imhị, odi bọ gạ phọ oghol bọ mọ “Waaghị Amhiịn” siphẹ esi ituughạ phọ 14. Ibadị ariisi esi ituughạ aḍinyạ phọ Kelhọm Ghuḍum K’agee-pọ! nạ kamiịn ni idọ phọ arumhuoghaạph areḍeenhaan awe, siphẹ agạ phọ oghol bọ mọ “Olhegheri Obughẹ” obobọ siphẹ “Waaghị Amhiịn.” * Ewạ mọ gona loor, u/tomaạm ghan oye phọ nạ ratughemhị ghan bọ onhọn oye, esi oḅẹm mọ, “Eḍighi maạr dị odị katue ni aḍighi iduọn phọ, pọ nạ kẹn katue ni.” Odị ghụn kụ aḅẹm. Kaakaragh ghụn ikpanhạ araraạr phọ elhoghonhaạn bọ ḍighaạgh oye phọ oḍeenhaan bọ siphẹ avidio phọ, odaphạn itughemhị aBaibul phọ. Nạ atue ni akol ekpanhạ esi aBaibul obobọ iyaạr phọ oye phọ aḍighi bọ aḅenhị nyodị. Torobọ amem lọ nạ rakaạph, kaạph ghan alhọgh iiphaghamhiọm ipẹ aZihova alhoghonhaạn bọ oye phọ opọ phọ ḍighaạgh.

8. Nạ kaloghonhaạn ikạ ḍighaạgh opọ nạ ratughemhị bọ ophomhoghiạn aZihova?

⁸ Loghonhaạn nyodị ḍighaạgh ophomhoghiạn aZihova. Ika? Wạ ghan roopoogh olhoghonhaạn odị ḍighaạgh olhegheri araagharạ phọ aZihova. Ḍighi idị odị kamiịn aZihova idiphọ Enhaạn oḅaạl olhoghi dị rabakị ghan buphẹ ophomhoghiạn bọ nyodị. (1 Tim. 1:11; Hib. 11:6) Ḅenhị nyodị mọ odị kamooghọm ni suọ esi osighẹ oḍighinhom ipẹ odị matuughạ bọ, ḅilhẹ mọ asuọ phọ odị kamoọgh bọ eeghironhaan ephomhoghiạn phọ aZihova esi odị. (Isa. 48:17, 18) Kenyu ni nyodị onmeeghi araraạr siphẹ adọl aghuḍum mọ odị iduọn ephomhoghiạn odị esi aZihova rebụgh bọ.—1 Jọn 5:3.

9. Odaphạn Mạk 10:29, 30, eeghe kụ ketue eloghonhaạn ḍighaạgh oye ophinyọn arikiạ oḍighi onyọ amatuạn dị maḍiiny muụm?

⁹ Orue ophoph oghị aghisigh oḍiiny aani amuụm, pọ ewạ dị opọ rotughemhị bọ kapinyọn rikiạ. Idiphọ oolhạ phọ oghaạph bọ oghol epẹ omhạn, eeni kewạ dị abuniin abuphẹ yira rotughemhị ghan bọ koḅilhẹ iniin araraạr emhoọgh abidị. Eḍighi maạr dị oḍighi phọ bidị roḍighi  bọ u/ḅọph r’asinhị iilhogh aBaibul phọ, pọ eeni kewạ dị bidị k’onme. Ibadị eeni kewạ dị kobilhẹ righirị abidị dị u/pomhoghiạn aZihova. Abunhọn eeni abuọ eghunotu abidị dị Abugbaanhaạn AZihova u/ḅeraạn kụ koḅitonhaạn. AZizọs aghaạph mọ eeni kekparanhaạn ni buniin awe ophinyọn arikiạ phọ ipẹ phọ. Kuolọ odị aguanhaan ni mọ amaḅi ka/tolhonhaạn buphẹ rodạph bọ nyodị. Kosephọm bidị r’eghunotu ephomhoghiạn. (Bạl Mạk 10:29, 30.) Ika kụ idị nạ katue aloghonhaạn ḍighaạgh opọ nạ ratughemhị ghan bọ, omhooghọm aani asuọ imạ inmo phọ iphẹn phọ?

10. Nạ atuughạ eeghe esi iphẹn aManuel aghaạph bọ?

¹⁰ Sighẹ nyodị righirị. Emạn maạr agey oḍeenhaan ogbolhomaam oghị esi opọ nạ ratughemhị ghan bọ. Eeghe kụ iḍighi? Lọgh elhegh idị aManuel, epẹ Mexico aghaạph. Odị aghaạph ilọ amem mọ odị ratuughạ bọ Baibul phọ, odị aḅẹm mọ: “Tutụ yoor komiigh ituughạ phọ, otughemhiạ phọ amhị upuru ghan imhị mọ rekị ika. Iphẹn phọ ilhoghonhaạn ghan imhị ḍighaạgh ophoomhị aloor ḅilhẹ r’oghaạph omiteom atorobọ iyaạr lọ riiḅaghamhị imhị. Mị ukạr kụ alhoghoma ghan ogbolhomaam mọ odị esi amhị.”

11. Ika kụ idị abuphẹ yira rotughemhị ghan bọ komooghọm suọ esi omhoọgh ghan amem r’ayira?

¹¹ Moọgh ghan muboom amem r’abuphẹ nạ ratughemhị ghan bọ, idiphọ aZizọs amhoọgh ghan bọ mem r’abudaphạm mọ odị. (Jọn 3:22) Lọ ekpeanhaạn ni, mạgh aani nyodị oru aani k’anạ ophughọl aani amuụm obobọ ophogh aani abrokạst phọ ayira. Eeni odị kakạr kụ asereghiạn mem dị nạ amhạgh aani nyodị mem dị arighirị r’abuọ eghunotu abidị roleeghi rayaạl abidị, obọ odị kaloghoma ghan bọ dọl igini. Oniin onyọ umor dị oghol mọ Kazibwe, epẹ Uganda, aḅẹm mọ “amuboom amem mọ mị amhoọgh ghan bọ r’otughemhiạ phọ amhị ilhoghonhaạn imhị ḍighaạgh otuughạ iboom araraạr ilọ aZihova. R’omhiịn ipẹ aZihova rapogh ghan bọ we phọ odị ḅilhẹ r’idị bidị romoọgh ghan oḅaạl olhoghi. Ipẹ kụ idị mị akạr bọ awạ siphẹ aghuḍum mọ amhị.”

12. Eeghe kụ iḍighi kụ emhoghi bọ ophạm ghan kirokirọ abukaaphọm oghimọm otughemhị oye Baibul?

¹² Pạm ghan kirokirọ abukaaphọm aghimọm  otughemhị odị. Eeni amem, yira rootughiạn ghan mọ enighẹ ghụn dị ogina oye phọ kakị ghan atughemhị obobọ apạm ghan oniin phọ okaaphọm mọ kụ akimọm. Ii ghalhamọ r’iduọn eeni kidughanhaan bọ iyira oḍighi iduọn phọ, opọ yira rotughemhị ghan bọ kakạr kụ amooghọm suọ eḍighi maạr dị yira ogbor ghan ophạm kirokirọ abukaaphọm oghimọm otughemhị odị. ADmitrii epẹ Moldova aḅẹm mọ, “torobọ okaaphọm dị adạph aani otughemhiạ phọ amhị aru, atughemhị ghan ni eten dị egbatanhaạn. Kụ iphẹn phọ ilhoghonhaạn imhị ḍighaạgh omhiịn ghan inhọn areten dị mị katue asighẹ ghan aḍighinhom ipẹ mị atuughạ bọ. Ḅilhẹ kẹn mị u/kạr ukiil umugholoor mem mọ mị aghị bọ ituughạ idiphọ eḅẹl amem, loor iduọn mị malhegheri bọ ni bumor r’abumarani phọ.”

13. Eeghe kụ iḍighi kụ yira kologhonhaạn bọ ḍighaạgh opọ yira rotughemhị ghan bọ oru aani ituughạ?

¹³ Loghonhaạn nyodị ḍighaạgh omhiigh oru aani ituughạ. Eeghe kụ iḍighi? Loor esi dị aZihova atọ aḅenhị buphẹ rooḅereghị bọ nyodị mọ ookpomhoghan ghan. (Hib. 10:24, 25) Oḅarạm isiphẹ, abumor r’abumarani phọ ayira odi bọ siẹn ookpomhoghan phọ kụ abuọ eghunotu ayira. Mem dị yira ookpomhoghan ophạm ituughạ, rekịgh ghan mudị oomo ayira role eḍien eniin esi. Eḍighi maạr dị nạ alhoghonhaạn ḍighaạgh opọ nạ ratughemhị ghan bọ oru aani ituughạ, pọ nạ malhoghonhaạn nyodị ḍighaạgh ogbatạn edạ dị emhạn maạr dị ketorori nyodị engọ oḍiiny amuụm. Kuolọ etue ni ekparanhaạn nyodị ogbatạn edạ phọ ephẹn phọ. Ika kụ idị aḍinyạ phọ Kelhọm Ghuḍum K’agee-pọ! keloghonhaạn ḍighaạgh nyodị okpạr opu ipaanhaạn dị rewạ ghan okikima odị?

14. Yira koḍighi ika kụ enyu opọ yira rotughemhị ghan bọ oru aani ituughạ?

¹⁴ Ituughạ esi ituughạ phọ 10 siphẹ aḍinyạ phọ Kelhọm Ghuḍum K’agee-pọ! oḍighi idị kenyu opọ yira rotughemhị ghan bọ. Kụ ogbi bọ omiteom aḍinyạ phọ, uḅenhị ni bukaaphọm dị osilor osighẹ esi ituughạ phọ ephẹn phọ oḍighinhom ophogh. Bidị umhoọgh ni ekol. Ka/kori nyinha esi esi ituughạ phọ 10 kụ agbi omhạgh odị oru aani ituughạ. Mem mem mọ bịn miigh omhạgh odị oru aani ituughạ kụ aghiọm ghisigh amhạgh ghan. Abuphẹ yira rotughemhị ghan bọ osoman ni ipaanhaạn kirokirọ. Kụ iḍighi kụ, maạr ri azuumaam aphogh nyodị okor ri oḍighi iiḅaghamhị phọ odị ongọ, lọ nạ katue ni. Ka/ḅonyonhu azuan eḍighi maạr dị mesighẹ mem kụ odị ko/mhiigh ituughạ. Kparạm ni, ki/phẹr nyinhạ omhạgh ghan odị.

15. Eeghe oghiilhaan kụ edị eeni opọ yira rotughemhị ghan bọ kamoọgh?

¹⁵ Nạ aatughiạn ni oghiilhaan phọ nạ amhoọgh ghan bọ oḍighi aani oniin Onyọ Ogbaanhaạn AZihova ḍughụm? Eeni nạ ulhoghoma mọ nạ ka/tue ni bịn akị esi ogbo ogbạ ikpo onhụ phọ. Obobọ eeni nạ ughiilhaan mọ abuọ eghunotu obobọ arighirị anạ kosophoghom nyinhạ. Eḍighi idiphọ, pọ nạ katue ni aseenyaạn opọ nạ ratughemhị ghan bọ. AZizọs aḅẹm ni mọ abuniin awe komoọgh ni odọ oghiilhaan phọ opọ. Toroboiperolbọ, odị aḅenhị budaphạm mọ odị mọ ku/meera oghiilhaan akikima bidị okumu aZihova. (Mat. 10:16, 17, 27, 28) Ika kụ idị aZizọs alhoghonhaạn ḍighaạgh budaphạm mọ odị okpạr opu oghiilhaan phọ abidị? Kụ ika kụ idị nạ katue adaphạn aani eḍeenhaan phọ odị?

16. Ika kụ idị nạ katue atughemhị opọ nạ ratughemhị ghan bọ oghaạph aani ilọ omheeraam mọ odị oḅenhị abunhọn?

¹⁶ Tughemhị nyodị oghaạph aani ghan ilọ omheeraam mọ odị oḅenhị abunhọn. Abumatuạn phọ aZizọs eeni umhoọgh ni oghiilhaan mem mọ odị arom bọ bidị oghị ogbạ ikpo onhụ phọ. Kuolọ aZizọs alhoghonhaạn bidị ḍighaạgh esi oḅenhị abidị ekpisi phọ bidị kogbạ bọ ikpo onhụ phọ ḅilhẹ r’adom mọ. (Mat. 10:5-7) Ika kụ idị yira kotue bọ otuughaạny Zizọs? Loghonhaạn  ḍighaạgh opọ nạ ratughemhị bọ olhegheri ekpisi dị odị katue ni agbạ ikpo onhụ phọ. Esi omaạm, puru nyodị mughumọ odị alegheri ni oye dị eḅeraạn otuughạ aani aBaibul phọ. Kụ alhoghonhaạn nyodị ḍighaạgh ookolhobian ipẹ odị kakaạph bọ esi oḍighi oḍeenhaan odị eten dị edugh. Mem lọ ekpeanhaạn ni, nạ atue ni aḍighi aḍeenhaan pakirị phọ eḅẹm bọ mọ “Ibadị Ootughiạn Mọ” obobọ “Oye Atue Ni Apuru Mọ,” edi bọ siphẹ aḍinyạ phọ Kelhọm Ghuḍum K’agee-pọ! Mem dị nạ raḍighi kaḍeenhaan, gbon otughemhị odị idị odị katue asighẹ Baibul phọ angoọm ophagharanhaạn r’amagheel.

17. Odaphạn Matiu 10:19, 20, 29-31 ika kụ idị yira kotue ologhonhaạn ḍighaạgh opọ yira rotughemhị ghan bọ oḍuom olhoghi aZihova?

¹⁷ Loghonhaạn nyodị ḍighaạgh oḍuom olhoghi aZihova. AZizọs angọ ni okuphom owol bumatuạn phọ odị mọ aZihova kaloghonhaạn ni bidị ḍighaạgh, loor esi dị Odị apomoghiạn bidị. (Bạl Matiu 10:19, 20, 29-31.) Tuutughianhạm ghan nyodị mọ aZihova kaloghonhaạn ni nyodị ḍighaạgh kẹn. Nạ katue ni aloghonhaạn nyodị ḍighaạgh esi oghol asiigbu phọ odị ooḅereghị r’odị. AFranciszek epẹ Poland aḅẹm mọ, “otughemhiạ phọ amhị agbor ghan ni aghol siigbu phọ amhị mem dị odị raaḅereghị. Kụ mem dị mị amhiịn dị aZihova aphagharanhaạn iiḅereghị otughemhiạ phọ amhị, bịn mị akem amhiigh ooḅereghị aani ghan. Mị ukạr kụ amhiịn olhoghonhaạn aḍighaạgh aZihova eniin amem dị mị alhọm otu oḍighi ayoor eepoogh oghị ghan ituughạ r’ookpomhoghan eephugh.”

18. AZihova raloghoma ghan ika ilọ oḍighi phọ abutughemhiạ aBaibul phọ roḍighi bọ?

¹⁸ AZihova amoọgh ni ogbolhomaam abuphẹ yira rotughemhị ghan bọ Baibul phọ. Odị alegheri ni ikuph dị abutughemhiạ aBaibul phọ rolọgh ghan olhoghonhaạn aḍighaạgh we oḍuraan ogbị odị, kụ odị apomoghiạn bidị agey loor esi iphẹn phọ. (Isa. 52:7) Eḍighi maạr dị nạ u/moọgh oye dị nạ ratughemhị nyiidiphọ, nạ katue ni aloghonhaạn ḍighaạgh buphẹ rotuughạ bọ Baibul phọ ophoph oghị aghisigh oḍiiny amuụm, esi odạph aani ghan abunhọn abukaaphọm oghị otughemhị abidị Baibul phọ.