1. Gin ango ma lupwonnye pa Yecu guwaco ki lwak dano mapol i cencwari me acel ni gutim?

LWAK dano mapol ma gua ki i lobe mapatpat dok giloko leb mapatpat gucito i Jerucalem. Gin mo me aura adada otimme i nino meno. Gurup pa Lujudaya mo me kabedo meno gucako loko leb pa wele magi atura! Kadi bed meno obedo me ur adada, gin ma Lujudaya magi gutito botgi kacel ki gin ma lakwena Petero owaco bot jo ducu obedo me ur makato. Lokke onongo tye ki kwena ni kitwero larogi ka guketo niye i kom Yecu Kricito. Kwena meno ogudo lwak adada mumiyo gupenyo ni: “Wabitimo gin ango?” Petero ogamo lokgi ni: ‘Wek gibatija ngat acel acel ki i kinwu.’​—Tic 2:37, 38.

2. Gin ango ma wabinyamo i pwony man? (Nen cal ma tye i pok ngeye.)

² Gin ma otimme i nge meno obedo me ur adada. Dano ma romo 3,000 kulu gunongo batija i nino meno, ci gudoko lupwonnye pa Kricito. Man aye obedo acakki me tic me loko dano ma Yecu ociko lulub kore ni gutim. Lulub kore pud gitye ka timo tic acel-lu wa i kare-ni. I kare-ni, pe waloko ki dano pi cawa manok keken ci nongo dong gitye atera me nongo batija. Twero tero dwe mapol nyo bene mwaka acel nyo makato wek latin kwan moni onong batija. Tic matek mitte me konyo ngat moni me doko lapwonnye pa Kricito, kit macalo in bene ingeyo ka itye ka kwano Baibul ki ngat mo. I pwony man, wabinyamo gin ma itwero timo me konyo latin kwanni me doko lapwonnye pa Kricito ma onongo batija.

3. Kit ma kinyuto kwede i Matayo 28:19, 20, gin ango ma omyero latin kwan otim wek odong nio wa i batija?

³ Ma peya latin kwan onongo batija, en myero oket i tic gin ma Baibul pwonyo. (Kwan Matayo 28:19, 20.) Ka latin kwan lubo jami ma en tye ka pwonyo, en bedo calo “dano maryek” ma Yecu oloko i kome i laporre, ma okwinyo ngom matut ci ogero ode i kom pata got. (Mat. 7:24, 25; Luka 6:47, 48) Watwero konyo latin kwan nining me keto i tic jami ma en tye ka pwonyo? Kong dong wanyamu tam adek mapatpat.

4. Watwero konyo latin kwan nining me medde ki dongo nio wa i batija? (Nen bene bok ma wiye tye ni “ Kony Latin Kwanni me Keto Yub ki Cobone.”)

⁴ Kony latin kwanni me keto yub. Pingo omyero itim man? Nen kong lapor man: Ka itye ka nyono lela me cito ka mo mabor, itwero moko tammi me cung kong manok i yo ka neno kabedo mogo maleng calo kulu ki godi. Man biweko pe iwinyo calo wotti man bor tutwal. Kit meno, ka latin kwan keto yub ma en twero cobogi pi tutunu, en bineno ni yubbe me nongo batija twere. Ti ki bute me “Gin me atima” ma tye i buk me Bed ki Kwo Maber Nakanaka! me konyo latin kwanni me keto yub. I nge tyeko pwony acel acel, wunyam kit ma gin me atima ma i pwony meno twero konyo latin kwanni me keto i tic jami ma en opwonyo. Ka imito ni latin kwanni ocob yub mapat, itwero coyone i bute ma wiye tye ni “Gin mukene me atima.” Kare ki kare wuti ki bute man me nyamo ki latin kwanni yub ma en twero cobone pi tutunu ki mukene ma mito kare malac me cobone.

5. Kit ma kicoyo kwede i Marako 10:17-22, gin ango ma Yecu owaco ki laco mo ma lalonyo ni otim, dok pingo?

⁵ Kony latin kwanni me timo alokaloka i kwone. (Kwan Marako 10:17-22.) Yecu  onongo ngeyo ni pe bibedo yot pi laco ma lalonyo-ni me cato jamine ducu. (Mar. 10:23) Kadi bed kit meno, Yecu owacce ni myero otim alokaloka madit man i kwone. Pingo? Pien cwiny Yecu omarre. I kare mogo, walworo cuko cwiny latin kwanwa me keto i tic gin ma en tye ka pwonyone pien watamo ni en pud pe tye atera. Twero tero kare pi dano me weko kitgi macon ki me ruko kit manyen. (Kol. 3:9, 10) Ento ka pe igalle ki lok kwede i kom alokaloka ma myero en otim, man biweko en bene pe bigalle ki timone. Nyamo lok man kacel kwede nyuto ni nongo iparo pire.​—Jab. 141:5; Car. 27:17.

6. Pingo omyero wapeny latin kwan ki lapeny ma golo tamme?

⁶ Pire tek ni wapeny latin kwanwa lapeny ma golo tamme i kom pwony ma en tye ka kwanone. Ti ki kodi lapeny magi wek okonyi me ngeyo gin ma latin kwanni niang dok ye iye. Ka itimo man kare ki kare, bibedo yot me nyamo jami ma en nongo ni ye iye tek i anyim. Buk me Bed ki Kwo Maber Nakanaka! tye ki lapeny mapol ma golo tam. Me labolle, pwony me 04 tye ki lapeny ni: “Itamo ni Jehovah winyo nining ka itiyo ki nyinge?” Pwony me 09 penyo ni: “Jami mene ma imito lega pire?” I acakkine, twero bedo tek pi latin kwanni me gamo lapeny magi. Itwero konye ki pwonye me tam matut i kom ginacoya kacel ki cal ma tye i buk man.

7. Watwero tic ki gin mutimme i kwo pa jo mukene i yo maber nining?

⁷ Ka latin kwanni oniang gin ma mitte ni en otim, ti ki gin mutimme i kwo pa jo mukene me cuko cwinye me timone. Me labolle, ka latin kwanni pe maro cito i cokke, itwero nyutte vidio ma wiye tye ni Jehovah Onongo Paro Pira ma nonge i bute me “Tim Kwed” i pwony me 14. I pwony mapol ma tye i buk me Bed ki Kwo Maber Nakanaka!, ibinongo gin mutimme i kwo i bute me “Nong Ngec Matut” nyo “Tim Kwed.” * Gwokke ki poro latin kwanni ki ngat mukene kun iwaco ni, “Ka en twero timone, ci in bene itwero.” Wek latin kwanni omok tam meno pire kene. Me ka meno, lok i kom jami ma pigi tego ma okonyo ngat ma i vidio-ni me keto i tic pwony me Baibul. Me labolle, itwero lok i kom ginacoya mo ma pire tek nyo gin mukene ma ngat meno otimo. Ka twere, lok i kom kit ma Jehovah okonyo kwede dano meno.

8. Watwero konyo latin kwanwa nining me cako maro Jehovah?

⁸ Kony latin kwanni me maro Jehovah. Itwero timo man nining? Nong kare ma itwero tic kwede me ywayo tam pa latin kwanni i kom kit pa Jehovah. Kony latin kwanni me neno Jehovah calo Lubanga ma layom cwiny ma konyo jo ma gimare. (1 Tem. 1:11; Ibru 11:6) Nyutte ni en binongo adwogi maber ka oketo i tic ngec ma en tye ka nongo dok ititte ni adwogi maber magi nyuto ni Jehovah marre. (Ic. 48:17, 18) Ka latin kwanni woto ki dongo marre pi Jehovah, en bibedo ki miti me loko kwone.​—1 Jon 5:3.

9. Ma lubbe ki Marako 10:29, 30, ngo ma twero konyo ngat mo me jalo jami mogo wek odok lapwonnye ma onongo batija?

⁹ Wek latin kwanni odong nio wa i batija, en myero ojal jami mogo. Calo laco ma lalonyo ma kiloko i kome con-ni, lutino kwan mukene bene myero gujal jami me kom. Ka tic ma gitimo pe rwatte ki pwony me Baibul, ci twero mitte ni gunong dog tic mukene. Pi lutino  kwan mogo, mitte ni gujuk bedo ki lurem maraco. Mukene wadigi ma pe gimaro Lucaden twero kwerogi woko. Yecu oye ni twero bedo tek ki jo mukene me jalo jami magi. Ento en ocikke ni jo ma gilubo kore pe gibikoko ange. Jehovah bimiyo botgi jo me kacokke ma gibidoko calo jo me otgi kikome. (Kwan Marako 10:29, 30.) Itwero konyo latin kwanni nining wek onong adwogi maber ki i mot man mamwonya-ni?

10. Gin ango ma ipwonyo ki i lok pa Manuel?

¹⁰ Dong wat macok ki latin kwanni. Pire tek adada ni inyut ki latin kwanni ni iparo pire. Pingo? Nen kong lok pa omego ma nyinge Manuel, ma bedo i lobo Mexico. Ka wiye opo i kom kare ma en tye latin kwan me Baibul, en waco ni: “Kare ducu ma peya wacako kwanwa, lapwonya onongo kong penya me niang kit ma atye kwede. En onongo konya me bedo agonya dok mina kare me lok i kom gin mo keken. Onongo awinyo ni en paro pira adada.”

11. Latin kwanwa me Baibul twero nongo adwogi maber ango ki i tero cawa kacel kwedwa?

¹¹ Kwany kare me bedo ki lutino kwanni, kit ma Yecu bene otero kare ki lulub kore. (Jon 3:22) Ka latin kwanni tye ka timo alokaloka i kwone, ci itwero lwonge i gangi wek wucam gin mo kacel nyo wunen yubwa me JW Broadcasting ma katti dwe ki dwe-ni. Latin kwanni twero bedo ki pwoc madit ka ilwonge i kare ma nongo lureme ki wadine gitye ka kwero kwer mogo me dini nyo lobo-ni dok nongo en winyo ni etye kene. Kazibwe ma bedo i Uganda owaco ni: “Atamo ni apwonyo jami mapol i kom Jehovah ki i bedo kacel ki lapwonya marom aroma ki jami ma apwonyo i cawa me kwanwa. Aneno kit ma Jehovah paro kwede pi jone kacel ki yomcwiny ma gitye kwede. Meno aye gin ma onongo amito i kwona.”

12. Pingo omyero water lutit kwena mapatpat ka kwan ki latin kwanwa?

¹² Lwong lutit kwena mapatpat me bino pi kwanwu. I kare mukene, wawinyo calo yot  me cito kenwa ka kwan ki latin kwanwa nyo me cito ki latit kwena acel-li kare ducu. Kadi bed ni yot i kare mogo me timo meno, bikonyo latin kwanwa makato ka i kare mogo walwongo lutit kwena mapatpat pi kwanwa. Omego Dmitrii ma bedo i lobo Moldova owaco ni: “Latit kwena acel acel ma obino ka kwan kweda onongo tito jami i yo manyen. Meno okonya me neno yo mapatpat ma atwero keto i tic jami ma onongo atye ka pwonyo. Medo i kom meno pe abedo ki lworo tutwal i kare ma acito pi cokkena mukwongo, pien onongo dong atyeko rwatte ki omege ki lumege mapol.”

13. Pingo omyero wakony lutino kwanwa me Baibul me bedo tye i cokke?

¹³ Kony latin kwanni wek ocak cito i cokke. Pingo? Pien Jehovah omiyo cikke ni jo ma giwore myero gucokke kacel; man obedo but worowa. (Ibru 10:24, 25) Medo i kom meno, utmege me kacokke gitye calo jo gangwa kikome. Ka watye i cokke kacel kwedgi, bedo calo watye gang ka camo cam mo mamit kacel. Ka ikonyo latin kwanni me cako bino i cokke, nongo itye ka konye me kwanyo yo ma pire tek adada ma bitere wa i batija. Ento, twero bedo tek adada bote me cako bino i cokke. Buk me Bed ki Kwo Maber Nakanaka! twero konyo latin kwanni nining me cobo peko mo keken ma tye ka genge ki bino i cokke?

14. Watwero cuko cwiny lutino kwanwa nining wek gucak bino i cokke?

¹⁴ Ti ki pwony me 10 me buk me Bed ki Kwo Maber Nakanaka! me cuko cwiny latin kwanni me bino i cokke. I kare ma onongo peya kityeko tic i kom buk man, kipenyo lutit kwena mogo ma gitye ki ngec me tic ki pwony man i kom lutino kwangi. Guwaco ni otiyo maber adada dok okonyo lutino kwangi me cako cito i cokke. Ngene kene ni, pe mitte ni ikur wang ma wuo i pwony me 10 ka dong icak lwongo latin kwanni me bino i cokke. Lwonge cutcut ka wucako kwan dok imedde ki timo meno kare ki kare. Lutino kwan mapatpat gikato ki i ariya mapatpat. Pi meno, nen ariya ma latin kwanni tye ka kato ki iye, dok inen ka itwero konye i yo mo. Pe iwek cwinyi otur ka otero kare malac wek en ocak bino i cokke. Di cwinyi ento medde ki lwonge.

15. Lworo ango ma latin kwanwa twero bedo kwede?

¹⁵ Tika wi po ni onongo itye ki lworo me doko Lacaden pa Jehovah? Gwok nyo itamo ni pe ibitwero tito kwena i ot ki ot. Nyo gwok onongo itye ki lworo ni wadini ki luremi gibiketo aunauna i komi. Ka tye kit meno, ci itwero niang kit ma latin kwanni winyo kwede. Yecu oye ni jo mogo gitwero bedo ki lworo ma kit meno. Ento, en bene ocuko cwiny lulub kore ni pe guwek lworo ogenggi ki tic pi Jehovah. (Mat. 10:16, 17, 27, 28) Yecu okonyo lulub kore nining me loyo lworo ma onongo gitye kwede? Dok itwero lubo lanene nining?

16. Watwero pwonyo latin kwanwa nining me nywako niyene ki jo mukene?

¹⁶ Motmot pwony latin kwanni me nywako niyene ki jo mukene. Lupwonnye pa Yecu nen calo gubedo ki lworo i kare ma en ocwalogi ka tito kwena. Yecu okonyogi ki waccigi jo mene ma omyero gutit kwena botgi kacel ki kwena me atita. (Mat. 10:5-7) Itwero lubo lanen pa Yecu nining? Kony latin kwanni me niang jo mene ma en twero tito kwena botgi. Me labolle, penye ka en ngeyo ngat mo ma romo nongo adwogi maber ki i pwonyo lok ada mo me Baibul. I nge meno, konye me  yubo gin ma en twero wacone kun inyutte yo mayot me nywako ada meno. Ka rwatte, wuromo poro kit me tic ki bute me “Jo Mogo Giwaco Ni” nyo “Ngat Mo Romo Penyi Ni,” ma nonge i buk me Bed ki Kwo Maber Nakanaka! Ka wutye ka timo meno, ket cwinyi ka pwonyo latin kwanni kit me tic ki Baibul me miyo lagam mayot dok ki ryeko.

17. Watwero tic ki Matayo 10:19, 20, 29-31 nining me konyo latin kwanwa me geno Jehovah?

¹⁷ Kony latin kwanni me geno Jehovah. Yecu ocuko cwiny lupwonnyene ni Jehovah bikonyogi pien En marogi. (Kwan Matayo 10:19, 20, 29-31.) Po wi latin kwanni ni Jehovah bikonye bene. Itwero konye me jenge i kom Jehovah ki lega kacel kwede i kom yub ma en tye kwede. Omego ma nyinge Franciszek ma bedo i lobo Poland owaco ni: “Lapwonya onongo pol kare tito yubba i legane. I kare ma aneno kit ma Jehovah onongo gamo kwede lega pa lapwonya, an bene acako lega cutcut. Awinyo calo Jehovah okonya adada i kare ma onongo mitte ni apeny ladit ticca wek omina kare ki i dog tic me cito i cokke ki gure madit.”

18. Jehovah winyo nining i kom tic me pwony ma Lukricitayo gitimo?

¹⁸ Jehovah paro pi lutino kwanwa me Baibul matek. En ngeyo kit ma lutit kwena gitute kwede matek me konyo dano me nyikke cok kwede, dok marogi matek pi ticgi man. (Ic. 52:7) Ka i kare-ni ipe ki latin kwanni me Baibul, pud itwero konyo lutino kwan me Baibul me dongo nio wa i batija ka icito kacel ki lutit kwena mukene ka kwan ki lutino kwangi.