1. Ngɛ kaseli ɔmɛ a be ɔ mi ɔ, mɛni nɛ a de nimli asafo ko kaa a pee?

NYUMUHI kɛ yihi babauu hia blɔ kɛ ya Yerusalem. A je ma slɔɔtoslɔɔtohi a nɔ, nɛ a tuɔ gbi slɔɔtoslɔɔtohi hulɔ. Nyakpɛ nɔ́ ko ya nɔ jamɛ a ligbi ɔ. Si kake too ɔ, Yuda bi komɛ bɔni nibwɔhi nɛ a ba a a je gbi tumi! Enɛ ɔ pee nibwɔ ɔmɛ nyakpɛ wawɛɛ. Se nɔ́ nɛ pee mɛ nyakpɛ pe kulaa ji nɔ́ nɛ Yuda bi ɔmɛ ngɛ mɛ dee, kɛ nɔ́ nɛ bɔfo Petro ngɛ mɛ dee ɔ. Sɛ gbi nɛ a nu ɔ eko ji kaa ke a ná hemi kɛ yemi ngɛ Yesu Kristo mi ɔ, a ma nyɛ ma he a yi wami. Sɛ gbi nɛ ɔ ta nimli asafo ɔ a tsui he wawɛɛ. Enɛ ɔ he ɔ, ni ɔmɛ bi ke: “Mɛni e sa kaa waa pee?” Petro de mɛ ke: “Nyɛ ti nɔ fɛɛ nɔ nɛ e ha nɛ a baptisi lɛ.”—Níts. 2:37, 38.

2. Mɛni he wa ma susu ngɛ ní kasemi nɛ ɔ mi? (Hyɛ foni nɛ ngɛ womi ɔ hɛ mi ɔ.)

² Nɔ́ nɛ tsa nɔ jamɛ a ligbi ɔ sa kadimi wawɛɛ. Nihi maa pee 3,000 ha nɛ a baptisi mɛ, nɛ a ba pee Kristo kaseli. Enɛ ɔ ji kaselɔ peemi ní tsumi ɔ nɛ Yesu fã e se nyɛɛli kaa a tsu ɔ sisije. Kɛ ba si mwɔnɛ ɔ, Yesu kaseli ngɛ ní tsumi nɛ ɔ tsue. Ngɛ wa be nɛ ɔ mi ɔ, wa fiɛɛ we ha nihi ngmlɛfia bɔɔ ko pɛ kɛkɛ a he su kɛ ha baptisimi. E ma nyɛ ma he nyɔhiɔhi abɔ, loo jeha, loo nɔ́ nɛ pe jã loko Baiblo kaselɔ ko ma nyɛ maa su oti nɛ ɔ he. Ke o kɛ nɔ ko kaseɔ Baiblo ɔ, o ma nyɛ maa ye he odase kaa kaselɔ peemi ní tsumi ɔ biɔ mɔde bɔmi wawɛɛ. Ngɛ ní kasemi nɛ ɔ mi ɔ, wa ma susu nɔ́ nɛ o ma nyɛ maa pee kɛ ye bua o Baiblo kaselɔ nɛ e ba pee kaselɔ nɛ a baptisi lɛ ɔ he.

3. Kaa bɔ nɛ a tsɔɔ ngɛ Mateo 28:19, 20 ɔ, mɛni e sa nɛ Baiblo kaselɔ ko nɛ e pee konɛ e ya e hɛ mi nɛ e ha nɛ a baptisi lɛ?

³ Loko a maa baptisi Baiblo kaselɔ ko ɔ, jã e kɛ níhi nɛ e ngɛ kasee ngɛ Baiblo ɔ mi ɔ tsuɔ ní. (Kane Mateo 28:19, 20.) Ke  Baiblo kaselɔ ko kɛ níhi nɛ e kaseɔ ɔ tsuɔ ní ɔ, e ma ba pee kaa “nyumu ní lelɔ” nɛ e tsua si nɛ e mi kuɔ nɛ e ma e tsu ngɛ tɛ sa nɔ nɛ Yesu tu e he munyu ngɛ e nɔ́ he tomi nɔ́ ko mi ɔ. (Mat. 7:24, 25; Luka 6:47, 48) Mɛni wa ma nyɛ maa pee kɛ ye bua Baiblo kaselɔ ko nɛ e ngɔ níhi nɛ e ngɛ kasee ɔ kɛ tsu ní? Nyɛ ha nɛ wa susu níhi etɛ nɛ wa ma nyɛ maa pee ɔ a he.

4. Mɛni wa ma nyɛ maa pee kɛ ye bua Baiblo kaselɔ ko nɛ a ya a hɛ mi kɛ su baptisimi he? (Hyɛ daka nɛ ji “ Moo Ye Bua O Baiblo Kaselɔ Nɛ E Ngɔ Otihi Kɛ Ma E Hɛ Mi Nɛ E Su A He” ɔ hulɔ.)

⁴ Moo ye bua o Baiblo kaselɔ ɔ nɛ e ngɔ otihi kɛ ma e hɛ mi. Mɛni he je nɛ e sa nɛ o pee jã a? Mo susu nɔ́ he tomi nɔ́ nɛ ɔ he nɛ o hyɛ: Ke o kɛ lɔle ngɛ blɔ hiae kɛ yaa he ko nɛ kɛ ɔ, eko ɔ, o maa suɔ nɛ o kple si si abɔ ngɛ blɔ ɔ nɔ ngɛ hehi nɛ a ngɛ fɛu. Ke o pee jã a, lɔ ɔ ma ha nɛ o hɛ mi be mo suae tsɔ. Jã nɔuu kɛ̃ nɛ ke Baiblo kaselɔ ko ngɔ otihi nɛ e ma nyɛ maa su he mla kɛ ma e hɛ mi ɔ, lɔ ɔ ma nyɛ maa ye bua lɛ nɛ e na kaa e ma nyɛ maa su baptisimi he. Moo ngɔ fã nɛ ji “Nɔ́ Nɛ O Ma Tsu He Ní” nɛ ngɛ womi nɛ ji O Ma Nyɛ Ma Ná Bua Jɔmi Kɛ Ya Neneene! ɔ mi ɔ kɛ ye bua o Baiblo kaselɔ ɔ nɛ e ya e hɛ mi. Ke nyɛ kase yi fɛɛ yi ta a, o kɛ Baiblo kaselɔ ɔ nɛ susu bɔ nɛ munyu nɛ ngɛ “Nɔ́ Nɛ O Ma Tsu He Ní” blɔ he ɔ kɔɔ níhi nɛ nyɛ kase ɔ he ha a he. Ke o maa suɔ nɛ Baiblo kaselɔ ɔ nɛ tsu nɔ́ kpa ko he ní ɔ, moo ngma ngɛ fã nɛ ji “Nɔ́ Kpa Nɛ O Ma Tsu He Ní” ɔ sisi. Be fɛɛ be ɔ, o kɛ o Baiblo kaselɔ ɔ nɛ susu otihi nɛ e ma nyɛ maa su he mla, kɛ otihi nɛ e ma he be loko e ma nyɛ maa su he nɛ ngɛ fã nɛ ɔmɛ ɔ a he.

5. Kaa bɔ nɛ Maako 10:17-22 ɔ tsɔɔ ɔ, mɛni nɛ Yesu de nyumu niatsɛ ko kaa e pee, nɛ mɛni he je?

⁵ Moo ye bua o Baiblo kaselɔ nɛ e pee tsakemihi ngɛ e si himi mi. (Kane Maako 10:17-22.) Yesu le kaa e he maa wa ha niatsɛ ko kaa e maa jua e níhi tsuo nɛ e ngɛ ɔ. (Maak. 10:23) Se kɛ̃ ɔ, Yesu de nyumu ɔ kaa e pee tsakemi ngua nɛ ɔ ngɛ e si himi mi. Mɛni he je? Ejakaa Yesu ná suɔmi ha lɛ. Be komɛ ɔ, e he ma nyɛ maa wa  ha wɔ kaa wa maa wo wa Baiblo kaselɔ ko he wami nɛ e ngɔ níhi nɛ e ngɛ kasee ɔ kɛ tsu ní, ejakaa wa susuɔ kaa e pee we klaalo kaa e maa pee tsakemi. E ma nyɛ ma he be loko nihi ma je su momo ɔ, nɛ a wo su ehe ɔ. (Kol. 3:9, 10) Se ke o kɛ Baiblo kaselɔ ɔ sɛɛ ní nɛ ɔmɛ a he ní mla a, e ma nyɛ maa ye bua lɛ nɛ e bɔni tsakemi peemi mla. Ke o kɛ lɛ susu ní nɛ ɔmɛ a he ɔ, lɔ ɔ tsɔɔ kaa o susuɔ e he.—La 141:5; Abɛ 27:17.

6. Mɛni he je nɛ e sa nɛ waa kɛ sane bimihi nɛ ma ha nɛ Baiblo kaselɔ nɛ tsɔɔ e juɛmi ɔ nɛ tsu ní ɔ?

⁶ O ma nyɛ ma bi Baiblo kaselɔ ɔ sane konɛ e tsɔɔ e juɛmi ngɛ nɔ́ nɛ nyɛ ngɛ kasee ɔ he. Enɛ ɔ maa ye bua mo nɛ o le níhi nɛ Baiblo kaselɔ ɔ nu sisi kɛ níhi nɛ e heɔ yeɔ. Ke o pɔɔ jã peemi ɔ, e he be wae ha mo kaa o kɛ lɛ ma susu níhi nɛ eko ɔ, e he wa ha lɛ kaa e maa kplɛɛ nɔ ɔ a he. O maa na sane bimihi fuu nɛ ma ha nɛ Baiblo kaselɔ ɔ nɛ tsɔɔ e juɛmi ngɛ níhi a he ɔ ngɛ womi nɛ ji O Ma Nyɛ Ma Ná Bua Jɔmi Kɛ Ya Neneene! ɔ mi. Kaa nɔ hyɛmi nɔ́ ɔ, ní kasemi 04 ɔ bi ke: “Kɛ o susu kaa Yehowa maa nu he ha kɛɛ ke o kɛ e biɛ ɔ tsɛ lɛ?” Ní kasemi 09 ɔ hu bi ke: “Mɛni ji ní komɛ nɛ o suɔ kaa o maa sɔle ngɛ a he?” Eko ɔ, sisije ɔ, e he maa wa ha o Baiblo kaselɔ ɔ kaa e ma ha sane bimi nɛ ɔmɛ a heto. Se o ma nyɛ maa ye bua lɛ nɛ e susu ngmamihi kɛ fonihi nɛ a ngɛ womi ɔ mi ɔ a he.

7. Mɛni blɔ nɔ nɛ o kɛ ni kpahi a níhi a si kpamihi ma nyɛ ma tsu ní saminya?

⁷ Ke o Baiblo kaselɔ ɔ nu níhi nɛ e sa nɛ e pee ɔ a sisi ɔ, moo ngɔ níhi a si kpami ko kɛ wo lɛ he wami. Kaa nɔ hyɛmi nɔ́ ɔ, ke o Baiblo kaselɔ ɔ pɔɛ asafo mi kpehi yami ɔ, o ma nyɛ ma je video nɛ ji, Yehowa Ye Bua Mi nɛ ngɛ “Ní Kpahi Nɛ Maa Ye Bua Mo” blɔ he ɔ nɛ ngɛ O Ma Nyɛ Ma Ná Bua Jɔmi Kɛ Ya Neneene! womi ɔ ní kasemi 14 ɔ mi ɔ kɛ tsɔɔ lɛ. O ma nyɛ maa na níhi a si kpami nɛ ɔmɛ fuu ngɛ “Moo Kase Babauu” loo “Ní Kpahi Nɛ Maa Ye Bua Mo” blɔ he ɔ ngɛ womi ɔ mi. * Moo hyɛ nɛ hi nɛ o ko ngɔ o Baiblo kaselɔ ɔ kɛ to nɔ kpa ko he nɛ o de ke, “Ke lɛɛ e nyɛ nɛ e pee ɔ, lɛɛ mo hu o ma nyɛ maa pee.” Ha nɛ Baiblo kaselɔ ɔ nitsɛ nɛ e na kaa ke nɔ ko nyɛ nɛ e pee ɔ, lɛɛ lɛ hu e ma nyɛ maa pee. Moo tu ní pɔtɛɛ komɛ nɛ nɔ nɛ ngɛ video ɔ mi ɔ pee nɛ ye bua lɛ nɛ e nyɛ pee tsakemi ɔ he munyu. Eko ɔ, o ma nyɛ maa tu ngmami ko aloo nɔ́ pɔtɛɛ ko nɛ e pee ɔ he munyu. Moo ma bɔ nɛ Yehowa ye bua nɔ ɔ ha a nɔ mi ke e he ba hia nɛ o pee jã.

8. Mɛni o ma nyɛ maa pee kɛ ye bua o Baiblo kaselɔ nɛ e ná suɔmi kɛ ha Yehowa?

⁸ Moo ye bua o Baiblo kaselɔ nɛ e suɔ Yehowa. Ngɛ mɛni blɔ nɔ? Mo hla blɔhi a nɔ nɛ o maa gu kɛ ye bua o Baiblo kaselɔ ɔ konɛ e kase Yehowa su ɔmɛ a he ní fuu. Moo ye bua o Baiblo kaselɔ ɔ nɛ e na Yehowa kaa bua jɔmi Mawu nɛ e suɔ nɛ e ye bua nihi nɛ a suɔ lɛ ɔ. (1 Tim. 1:11; Heb. 11:6) Moo ye bua o Baiblo kaselɔ ɔ nɛ e na kaa ke e kɛ níhi nɛ e ngɛ kasee ɔ tsu ní ɔ, e ma ná he se. Nɛ o tsɔɔ lɛ nya kaa se nami nɛ ɔmɛ ji nɔ́ nɛ tsɔɔ kaa Yehowa suɔ lɛ ɔ nɛ. (Yes. 48:17, 18) Ke suɔmi nɛ o Baiblo kaselɔ ɔ ngɛ kɛ ha Yehowa a mi ngɛ wae ɔ, lɔ ɔ maa wo lɛ he wami konɛ e pee tsakemihi nɛ a he hia a ngɛ e si himi mi.—1 Yoh. 5:3.

9. Ngɛ Maako 10:29, 30 ɔ nya a, mɛni ma nyɛ maa ye bua nɔ ko nɛ e ngɔ ní komɛ kɛ sã afɔle ngɛ e si himi mi konɛ e ba pee Kristo kaselɔ nɛ a baptisi lɛ?

⁹ E sa nɛ Baiblo kaselɔ ɔ nɛ e ngɔ ní komɛ kɛ sã afɔle ngɛ e si himi mi loko e ma nyɛ maa ya e hɛ mi kɛ su baptisimi he. Kaa bɔ nɛ e ji ngɛ nyumu niatsɛ ɔ nɛ wa tu e he munyu kɛ sɛ  hlami ɔ blɔ fa mi ɔ, eko ɔ, e ma bi nɛ Baiblo kaseli komɛ nɛ a ngɔ ní komɛ kɛ sã afɔle. Ke ní tsumi nɛ a ngɛ tsue ɔ kɛ Baiblo sisi tomi mlaa kpa we gbi ɔ, eko ɔ, e he maa hia nɛ a hla ní tsumi kpa. Eko ɔ, e ma bi nɛ a kpɛti nihi fuu kɛ a huɛmɛ nɛ a sɔmɔ we Yehowa a nɛ kpa bɔmi. Eko ɔ, Baiblo kaseli ɔmɛ a kpɛti ni komɛ a weku li ma kua mɛ akɛnɛ a sume Yehowa Odasefohi ɔ he je. Yesu tsɔɔ kaa e he ma nyɛ maa wa ha a kpɛti ni komɛ kaa a maa pee tsakemi nɛ ɔmɛ ngɛ a si himi mi. Se e wo si kaa nihi nɛ a maa nyɛɛ e se ɔ a nine be si nyɛe kɔkɔɔkɔ, mohu ɔ, Yehowa maa jɔɔ mɛ kɛ mumi mi weku. (Kane Maako 10:29, 30.) Mɛni o ma nyɛ maa pee kɛ ye bua o Baiblo kaselɔ konɛ e ná nike ní nɛ se be nɛ ɔ he se?

10. Mɛni o kase ngɛ Manuel níhi a si kpami ɔ mi?

¹⁰ O kɛ o Baiblo kaselɔ ɔ nɛ bɔ huɛ. E he hia wawɛɛ kaa o ma ha nɛ o Baiblo kaselɔ ɔ nɛ na kaa o susuɔ e he. Mɛni he je? Mo kadi nɔ́ nɛ Manuel nɛ e ngɛ Mexico ɔ de. E tu bɔ nɛ e Baiblo tsɔɔlɔ ye bua lɛ ha benɛ e ji Baiblo kaselɔ ɔ he munyu. E de ke: “Loko wa maa je ní kasemi ɔ sisi ɔ, ye tsɔɔlɔ ɔ biɔ mi bɔ nɛ i ngɛ ha, e yeɔ bua mi nɛ ye tsui nɔɔ ye mi, nɛ e yeɔ bua mi nɛ i nyɛɔ nɛ i deɔ lɛ ní komɛ. I nu he kaa e susuɔ ye he wawɛɛ.”

11. Ke wa ná be kɛ ha wa Baiblo kaseli ɔmɛ ɔ, mɛni blɔ nɔ e ma nyɛ maa ye bua mɛ ngɛ?

¹¹ Mo ná be kɛ ha o Baiblo kaseli ɔmɛ kaa bɔ nɛ Yesu ná be kɛ ha e kaseli ɔmɛ ɔ. (Yoh. 3:22) Ke o Baiblo kaselɔ ɔ ngɛ tsakemihi pee ngɛ e si himi mi ɔ, o ma nyɛ maa fɔ lɛ nine kɛ ba o we ɔ mi nɛ nyɛɛ nu kɔfi bɔɔ loo nyɛɛ ye ní bɔɔ, loo nyɛɛ hyɛ brɔɔdkastin nɛ baa daa nyɔhiɔ ɔ eko. O Baiblo kaselɔ ɔ bua maa jɔ wawɛɛ titli ke o pee enɛ ɔ be mi nɛ e huɛmɛ kɛ e weku li ngɛ lakpa jami gbijlɔ komɛ yee nɛ́ eko ɔ, e hɛ ngɛ jae akɛnɛ e kɛ e he wui mi ɔ he je. Kazibwe nɛ e ngɛ Uganda a de ke: “Ní kasemi ɔ ha nɛ i kase níhi fuu ngɛ Yehowa he. Se níhi nɛ i kɛ ye Baiblo tsɔɔlɔ ɔ bla kɛ pee ɔ hu ye bua mi nɛ i kase Yehowa he níhi fuu. I na bɔ nɛ Yehowa susuɔ e we bi a he ha, kɛ bɔ nɛ a ngɛ bua jɔmi ha. Lɔ ɔ ji nɔ́ nɛ i ngɛ hlae ngɛ ye si himi mi.”

12. Mɛni he je nɛ e sa nɛ waa kɛ fiɛɛli kpahi nɛ ya wa Baiblo kaseli a ngɔ ɔ?

 ¹² Moo fɔ fiɛɛli kpahi nine nɛ a piɛɛ o he ke o kɛ o Baiblo kaselɔ ko yaa kase ní. Be komɛ ɔ, eko ɔ, wa ma susu kaa e maa hi kaa wɔ pɛ waa kɛ Baiblo kaselɔ ɔ ma ya kase ní, aloo waa kɛ fiɛɛlɔ nɛ waa kɛ lɛ pɔɔ yami ɔ maa ya. Eko ɔ, jã peemi maa da wɔ, se ke waa kɛ fiɛɛli kpahi yaa wa Baiblo kaselɔ ɔ ngɔ ɔ, e maa ye bua lɛ wawɛɛ. Dmitrii nɛ e ngɛ Moldova a de ke: “Fiɛɛlɔ fɛɛ fiɛɛlɔ nɛ ye Baiblo tsɔɔlɔ ɔ kɛ maa ba a tsɔɔ níhi a mi ngɛ blɔ klɛdɛɛ ko nɔ. Lɔ ɔ ye bua mi nɛ i na blɔ slɔɔtohi a nɔ nɛ i kɛ nɔ́ nɛ i ngɛ kasee ɔ ma tsu ní. Jehanɛ hu ɔ, e ha nɛ kekle be nɛ i ya asafo mi kpe ɔ, I gbo we zo tsɔ, ejakaa i le nyɛmimɛ nɛ a ngɛ asafo ɔ mi ɔ a kpɛti nihi hiɛhiɛɛ.”

13. Mɛni he je nɛ e sa nɛ waa ye bua wa Baiblo kaseli nɛ a ya asafo mi kpehi?

¹³ Moo ye bua o Baiblo kaselɔ ɔ nɛ e ya asafo mi kpehi. Mɛni he je? Yehowa fã e sɔmɔli kaa a ko kpa a he nya buami, ejakaa he nya buami ji wa jami ɔ fã. (Heb. 10:24, 25) Jehanɛ hu ɔ, wa nyɛmimɛ nyumuhi kɛ yihi nɛ a ngɛ asafo ɔ mi ɔ ba peeɔ wa weku li. Ke wa ya asafo mi kpehi ɔ, e ngɛ kaa nɔ́ nɛ waa kɛ nyɛmimɛ ɔmɛ bla kɛ ngɛ niye ní ngɔngɔɛ ko yee. Ke o ye bua o Baiblo kaselɔ ko nɛ e ya asafo mi kpe ɔ, o ngɛ lɛ yee buae nɛ e pee nɔ́ ko nɛ he hia wawɛɛ konɛ e nyɛ nɛ e su baptisimi he. Se sisije ɔ, e he ma nyɛ maa wa ha lɛ kaa e maa ya asafo mi kpehi. Ngɛ mɛni blɔ nɔ nɛ womi nɛ ji, O Ma Nyɛ Ma Na Bua Jɔmi Kɛ Ya Neneene! ɔ ma nyɛ maa ye bua o Baiblo kaselɔ ɔ nɛ e tsu nyagbahi nɛ ha nɛ e nyɛ we nɛ e ya asafo mi kpehi ɔ a he ní?

14. Mɛni wa ma nyɛ maa pee kɛ wo wa Baiblo kaseli he wami nɛ a bɔni asafo mi kpehi yami?

¹⁴ Moo ngɔ ní kasemi 10 nɛ ngɛ womi nɛ ji O Ma Nyɛ Ma Ná Bua Jɔmi Kɛ Ya Neneene! ɔ mi ɔ kɛ wo o Baiblo kaselɔ ɔ he wami. Loko a maa gbe womi nɛ ɔ nya a, a ha nɛ fiɛɛli komɛ nɛ a ngɛ níhi a si kpami ngɔ ní kasemi 10 kɛ ye bua a Baiblo kaseli. A tsɔɔ kaa e ye bua wawɛɛ nɛ a Baiblo kaseli ɔmɛ bɔni asafo mi kpehi yami. Se koo mlɛ nɛ nyɛɛ su ní kasemi 10 loko o fɔ o Baiblo kaselɔ nine kɛ ya wa kpe ɔmɛ. Moo fɔ lɛ nine mla, nɛ o ya nɔ nɛ o pee jã be fɛɛ be. Baiblo kaselɔ fɛɛ Baiblo kaselɔ kɛ e nyagba. Enɛ ɔ he ɔ, moo le o Baiblo kaselɔ ko hiami níhi nɛ o le níhi nɛ o ma nyɛ maa pee kɛ ye bua lɛ. O kɔni mi ko jɔ̃ ke e he wa ha o Baiblo kaselɔ ɔ kaa e ma bɔni asafo mi kpehi yami nɔuu. Moo to o tsui si, nɛ o ya nɔ nɛ o fɔ lɛ nine.

15. Mɛni ma nyɛ ma ha nɛ Baiblo kaselɔ ko nɛ ye gbeye?

¹⁵ Anɛ o kai kaa o ye gbeye bɔɔ benɛ o ngɛ hlae nɛ o ba pee Yehowa Odasefo no ɔ lo? Eko ɔ, o susu kaa o be nyɛe nɛ o fiɛɛ ngɛ wehi a mi. Aloo eko ɔ, o ye gbeye kaa o weku li loo o huɛmɛ maa te si kɛ wo mo. Ke jã a, lɛɛ o ma nyɛ maa nu o Baiblo kaselɔ ɔ sisi. Yesu tsɔɔ kaa ni komɛ ma nyɛ maa nu he jã. Se kɛ̃ ɔ, e wo e kaseli ɔmɛ he wami kaa a ko ha nɛ gbeye yemi nɛ ha nɛ a kpa Yehowa sɔmɔmi. (Mat. 10:16, 17, 27, 28) Mɛni Yesu pee kɛ ye bua e se nyɛɛli ɔmɛ konɛ a jɔɔ gbeye yemi? Nɛ mɛni blɔ nɔ nɛ wa ma nyɛ maa gu kɛ kase e nɔ hyɛmi nɔ́ ɔ?

16. Mɛni blɔ nɔ o maa gu kɛ tsɔse o Baiblo kaselɔ ɔ nɛ e nyɛ nɛ e jaje e hemi kɛ yemi ɔ kɛ tsɔɔ ni kpahi?

¹⁶ Mo tsɔse o Baiblo kaselɔ ɔ bɔɔbɔɔbɔɔ konɛ e jaje e hemi kɛ yemi ɔ kɛ tsɔɔ ni kpahi. Eko ɔ, Yesu kaseli ɔmɛ ye gbeye benɛ e tsɔ mɛ kaa a ya fiɛɛ ɔ. Se Yesu ye bua mɛ nɛ e de mɛ he nɛ a ya fiɛɛ ngɛ kɛ sɛ gbi nɛ a ya fiɛɛ. (Mat. 10:5-7) Mɛni blɔ nɔ o maa gu kɛ kase Yesu nɔ hyɛmi nɔ́ ɔ? Moo ye bua o Baiblo kaselɔ ɔ nɛ e na he nɛ e ma nyɛ maa fiɛɛ ngɛ. Kaa nɔ hyɛmi nɔ́ ɔ, mo bi lɛ kaa e le nɔ ko nɛ e maa suɔ nɛ e le Baiblo mi anɔkuale pɔtɛɛ ko lo. Moo ye bua lɛ kɛ dla e he, nɛ o tsɔɔ lɛ blɔ kpiti nɔ nɛ e ma nyɛ  maa gu kɛ tsɔɔ nɔ ɔ anɔkuale ɔ. Ngɛ be nɛ sa mi ɔ, o ma nyɛ maa ngɔ munyu nɛ ngɛ “Ni Komɛ Deɔ Ke” loo “Eko ɔ, Nɔ Ko Ma Bi Ke” blɔ he ɔ nɛ ngɛ womi nɛ ji O Ma Nyɛ Ma Ná Bua Jɔmi Kɛ Ya Neneene! ɔ mi ɔ kɛ ye bua lɛ. Ke o ngɛ jã pee ɔ, ngɔɔ o juɛmi kɛ ma blɔ nɔ nɛ o maa gu kɛ ye bua Baiblo kaselɔ ɔ nɛ e ngɔ Baiblo ɔ kɛ ha sanehi a heto nɛ e kɛ hɛ si kami nɛ tsu ní ɔ nɔ.

17. Mɛni blɔ nɔ nɛ waa kɛ Mateo 10:19, 20, 29-31 ɔ ma nyɛ maa ye bua wa Baiblo kaseli nɛ a ngɔ a hɛ kɛ fɔ Yehowa nɔ?

¹⁷ Moo ye bua o Baiblo kaselɔ ɔ konɛ e ná Yehowa mi hemi kɛ yemi. Yesu ha nɛ e kaseli ɔmɛ ná nɔ mi mami kaa Yehowa maa ye bua mɛ, ejakaa e suɔ mɛ. (Kane Mateo 10:19, 20, 29-31.) Mo kai o Baiblo kaselɔ ɔ kaa Yehowa maa ye bua lɛ hulɔ. O kɛ lɛ nɛ sɔle ngɛ otihi nɛ e kɛ ma e hɛ mi ɔ a he, nɛ lɔ ɔ maa ye bua lɛ nɛ e ngɔ e hɛ kɛ fɔ Yehowa nɔ. Franciszek nɛ e ngɛ Poland ɔ de ke: “Ye Baiblo tsɔɔlɔ ɔ pɔɔ otihi nɛ i kɛ ma ye hɛ mi ɔ a ta womi ngɛ e sɔlemi mi. Benɛ i na bɔ nɛ Yehowa ha ye Baiblo tsɔɔlɔ ɔ sɔlemi ɔmɛ a heto ha a, i bɔni sɔlemi oya nɔuu. Benɛ e he ba hia nɛ ma bi blɔ ngɛ ye ní tsumi ehe ɔ mi nɛ ma bɔni asafo mi kpehi kɛ kpokpa nɔ kpehi yami ɔ, i na kaa Yehowa ye bua mi wawɛɛ.”

18. Kɛ Yehowa naa ní tsumi nɛ Baiblo tsɔɔli tsuɔ ɔ ha kɛɛ?

¹⁸ Yehowa susuɔ wa Baiblo kaseli ɔmɛ a he wawɛɛ. E hɛ saa mɔde nɛ Baiblo tsɔɔli bɔɔ konɛ a ye bua nihi nɛ a hɛ kɛ su e he wawɛɛ ɔ, nɛ e suɔ mɛ ngɛ mɔde nɛ a ngɛ bɔe ɔ he. (Yes. 52:7) Ke o kɛ nɔ ko kase we Baiblo ɔ amlɔ nɛ ɔ po ɔ, o ma nyɛ maa ye bua Baiblo kaseli nɛ a ya a hɛ mi kɛ su baptisimi he kɛ gu fiɛɛli kpahi nɛ o maa piɛɛ a he be mi nɛ a kɛ a Baiblo kaseli ngɛ Baiblo ɔ kasee ɔ.