1. Биринҹи әсрдә Иса Мәсиһин шаҝирдләри бөјүк бир издиһама нә демишди?

ЈЕРУСӘЛИМӘ мүхтәлиф дијарлардан кишили-гадынлы бөјүк бир издиһам ҝәлиб. Онлар фәргли дилләрдә данышыр. Һәмин ҝүн гејри-ади бир шеј баш верир: бир груп јәһуди бирдән-бирә гонагларын дилләриндә данышмаға башлајыр! Амма бу јәһудиләрин вә һәвари Бутрусун данышдыглары онлары лап мәәттәл гојур. Онлар өјрәнирләр ки, хилас олунмаг үчүн Иса Мәсиһә иман ҝәтирмәлидирләр. Бу онлары јаман дүшүндүрүр. Белә ки, онлар сорушурлар: «Биз нә едәк?» Бутрус онлара дејир: «Гој һәр кәс... вәфтиз олунсун» (Һәв. 2:37, 38).

2. Бу мәгаләдә нә һагда данышаҹағыг? (Үз габығындакы шәклә бахын.)

² Бундан сонра мөһтәшәм бир шеј баш верир. Һәмин ҝүн тәхминән 3000 нәфәр вәфтиз олунуб Мәсиһин шаҝирди олур. Һәмин вахтдан башлајан шаҝирд һазырламаг иши та бу ҝүнә, XXI әсрә гәдәр давам едир. Дүздүр, бизим дөврүмүздә инсанын бир нечә саатын ичиндә вәфтизә јарарлы олмасы мүмкүн дејил. Бунун үчүн ајлар, бир ил, һәтта бундан да чох вахт лазым ҝәлә биләр. Әҝәр һал-һазырда кимәсә дәрс кечирсинизсә, бу ишин зәһмәт тәләб едән иш олдуғуну јахшы биләрсиниз. Бу мәгаләдән өјрәнәҹәјик ки, дәрс кечдијимиз инсана Мәсиһин вәфтиз олунмуш шаҝирди олмаға неҹә көмәк едә биләрик.

3. Мәтта 28:19, 20 ајәләринә әсасән, шаҝирд вәфтиз олунмаг үчүн нә етмәлидир?

³ Шаҝирд вәфтиз олунмаздан өнҹә Мүгәддәс Китабда јазыланлары тәтбиг етмәлидир. (Мәтта 28:19, 20 ајәләрини охујун.) Өјрәндикләринә әмәл едән шаҝирд дәрин газыб евини даш үзәриндә тикән «ағыллы адама» бәнзәјир (Мәт. 7:24, 25; Лука 6:47, 48). Бәс биз шаҝирдә өјрәндикләрини тәтбиг етмәјә неҹә көмәк едә биләрик? Ҝәлин үч мәсләһәти нәзәрдән кечирәк.

4. Шаҝирдин тәдриҹән вәфтизә јарарлы олмасына неҹә көмәк едә биләрсиниз? (« Шаҝирдинизә мәгсәдләр гојмаға вә онлара чатмаға көмәк един» адлы чәрчивәјә бахын.)

⁴ Мәгсәдләр гојмаға көмәк един. Бу нәјә ҝөрә ваҹибдир? Ҝәлин бир нүмунәјә бахаг. Тәсәввүр един ки, сәфәрә чыхырсыныз. Јол сизә узун ҝәлмәсин дејә ҝөзәл јерләрдә дајанмаг гәрарына ҝәлирсиниз. Ејнилә шаҝирд гаршысына јахын заманда наил ола биләҹәји мәгсәдләр гојса, ҝөрәҹәк ки, вәфтиз олунмаг мәгсәдинә дә чата биләр. «Әбәди хошбәхт һәјат!» китабындакы «Мәгсәд» чәрчивәси васитәсилә шаҝирдинизә инкишаф етмәјә көмәк един. Һәр дәрсин сонунда бу мәгсәдин инди өјрәндикләри илә неҹә әлагәли олдуғуну мүзакирә един. Әҝәр шаҝирдинизин башга мәгсәд гојмасыны истәјирсинизсә, онда һәмин мәгсәди «Диҝәр» адлы һиссәјә јазын. Бу чәрчивәнин көмәји илә мүтәмади олараг шаҝирдинизлә јахын заманда вә ҝәләҹәкдә наил ола биләҹәји мәгсәдләр һагда данышын.

5. Марк 10:17—22 ајәләриндә гејд олундуғу кими, Иса бир варлы адама нә деди вә нәјә ҝөрә?

⁵ Һәјатында дәјишикликләр етмәјә көмәк един. (Марк 10:17—22 ајәләрини охујун.) Иса билирди ки, варлы адама һәр шејини сатмаг асан олмајаҹаг (Марк 10:23). Амма јенә дә она бу ҹүр бөјүк дәјишиклик етмәли олдуғуну деди. Нәјә ҝөрә? Чүнки оғлан Исанын үрәјинә јатды. Бәзән дүшүнүрүк ки, шаҝирдимиз һансыса дәјишиклији етмәјә һәлә һазыр дејил,  буна ҝөрә дә онунла бу барәдә данышмырыг. Амма инсанын көһнә вәрдишиндән әл чәкиб јени шәхсијјәти ҝејинмәси үчүн мүәјјән вахт лазымдыр (Кол. 3:9, 10). Буна ҝөрә дә онунла бу барәдә нә гәдәр тез данышсаг, бир о гәдәр дә тез дәјишиклик етмәјә башлајаҹаг. Бу ону дүшүндүјүнүзү ҝөстәрәҹәк (Зәб. 141:5; Мәс. 27:17).

6. Нәјә ҝөрә шаҝирдин фикрини өјрәнмәк үчүн суаллар вермәлијик?

⁶ Шаҝирдин мөвзу барәдә фикрини өјрәнмәк үчүн суаллар верин. Бунун сајәсиндә онун нәји баша дүшдүјүнү, нәјә инандығыны биләҹәксиниз. Буну мүнтәзәм етсәниз, онунла чәтин гәбул едәҹәји мөвзулар барәдә сөһбәт етмәк даһа раһат олаҹаг. «Әбәди хошбәхт һәјат!» китабында шаҝирдин фикрини өјрәнмәк үчүн чохлу суаллар вар. Мәсәлән, дөрдүнҹү дәрсдә белә бир суал вар: «Неҹә дүшүнүрсүнүз, сиз Јеһованын адыны чағыранда О һансы һиссләри кечирир?» Доггузунҹу дәрсдә исә белә бир суал вар: «Нәләр барәдә дуа етмәк истәјәрдиниз?» Әввәл-әввәл шаҝирдиниз бу кими суаллара ҹаваб вермәкдә чәтинлик чәкә биләр. Она көмәк етмәк үчүн ајәләр вә шәкилләр үзәриндә дүшүнмәји өјрәдә биләрсиниз.

7. Һәјат һекајәләриндән еффектив шәкилдә неҹә истифадә едә биләрик?

⁷ Шаҝирдә неҹә давранмалы олдуғуну изаһ едәндән сонра һәјат һекајәләри васитәсилә ону өјрәндикләрини тәтбиг етмәјә тәшвиг един. Мәсәлән, әҝәр шаҝирдиниз јығынҹагларда мүнтәзәм иштирак етмирсә, 14-ҹү дәрсдә олан «Әлавә мәлумат» чәрчивәсиндәки «Јеһова мәним гајғымы чәкди» адлы видеону ҝөстәрин. «Әбәди хошбәхт һәјат!» китабынын бир чох дәрсиндә ја «Дәринлијә варын», ја да «Әлавә мәлумат» бөлмәсиндә бу кими һәјат һекајәләри тапа биләрсиниз *. Амма еһтијатлы олун ки, шаҝирдинизи мүгајисә едәрәк демәјәсиниз: «О баҹардыса, сән дә баҹарарсан». Гој о өзү бу нәтиҹәјә ҝәлсин. Видеодакы инсана Мүгәддәс Китабдан өјрәндијини тәтбиг етмәјә көмәк едән әсас мәгамлара диггәти јөнәлдин. Мәсәлән, әсас ајәни вә ја һәмин инсанын атдығы конкрет бир аддымы вурғулаја биләрсиниз. Јери дүшәндә, Јеһованын һәмин инсана неҹә көмәк етдијини гејд един.

8. Шаҝирдин үрәјиндә Јеһоваја севҝи неҹә ојада биләрик?

⁸ Үрәјиндә Јеһоваја севҝи ојадын. Буну неҹә етмәк олар? Һәр фүрсәтдән истифадә едиб шаҝирдинизин диггәтини Јеһованын кејфијјәтләринә ҹәмләјин. Гој шаҝирдиниз ҝөрсүн ки, Јеһова Ону севәнләрә дајаг олан хошбәхт Аллаһдыр (1 Тим. 1:11; Ибр. 11:6). Шаҝирдинизә изаһ един ки, өјрәндикләринә әмәл етмәк онун хејринәдир, бу, Јеһованын она мәһәббәтинин изһарыдыр (Әшј. 48:17, 18). Шаҝирдин Јеһоваја мәһәббәти артдыгҹа, лазыми дәјишикликләр етмәк истәји дә артаҹаг (1 Јәһ. 5:3).

9. Марк 10:29, 30 ајәләринә әсасән, шаҝирдә гурбанлар вермәјә нә көмәк едә биләр?

⁹ Шаҝирд вәфтизә доғру ирәлиләмәк үчүн мүәјјән шејләри гурбан вермәлидир. Исанын јанына ҝәлән варлы адам кими, бәзи шаҝирдләрә дә мадди шејләри гурбан вермәк лазымдыр. Мәсәлән, шаҝирд Мүгәддәс Китаб  принсипләринә зидд олан ишдә ишләјирсә, ишини дәјишмәк лазым ҝәлә биләр. Бәзиләри Јеһованы севмәјән достларындан узаглашмалыдыр. Кимисинин дә аилә үзвләри Јеһованын Шаһидләрини севмир вә ола биләр ки, ондан үз дөндәрсинләр. Иса Мәсиһ демишди ки, бәзиләринә бу ҹүр гурбанлар вермәк чәтин олаҹаг. Амма вәд етмишди ки, онлар лазыми гурбанлар вериб онун ардынҹа ҝетсәләр, пешман олмајаҹаглар. Јеһова мүкафат олараг онлара севҝи долу руһани аилә бәхш едәҹәк. (Марк 10:29, 30 ајәләрини охујун.) Шаҝирдә бу ҝөзәл аиләнин ичиндә олмаға неҹә көмәк едә биләрсиниз?

10. Мануелин сөзләриндән нә өјрәнирик?

¹⁰ Шаҝирдинизлә достлашын. Шаҝирд сизин сәмими мәһәббәтинизи ҝөрмәлидир. Нәјә ҝөрә? Мексикада јашајан Мануел адлы гардаш онунла дәрс кечилән вахты хатырлајараг дејир: «Һәр дәрсдән әввәл мүәллимим мәндән һал-әһвал тутурду. Елә шәраит јарадырды ки, сыхылмајым, истәнилән мөвзу һагда раһат данышым. Онун һәгигәтән дә мәним гејдимә галдығыны һисс едирдим».

11. Бирҝә вахт кечирмәјимизин шаҝирдә һансы хејри дәјә биләр?

¹¹ Иса Мәсиһ давамчылары илә вахт кечирдији кими, сиз дә шаҝирдләринизлә вахт кечирин (Јәһ. 3:22). Әҝәр мүнасибдирсә, руһани ҹәһәтдән инкишаф едән шаҝирдинизи евинизә чај вә ја јемәк сүфрәсинә дәвәт едә биләрсиниз, јахуд бирликдә JW телевизијасынын ајлыг програмына баха биләрсиниз. Дост-танышлары бајрам гејд едән вахт шаҝирди евинизә дәвәт етсәниз, она чох хош олар, өзүнү тәнһа һисс етмәз. Угандада јашајан Казибве дејир: «Дејәрдим ки, дәрс заманы Јеһова һагда нә гәдәр шеј өјрәнмишәмсә, бир о гәдәр дә мүәллимимлә вахт кечирәндә өјрәнмишәм. Јеһованын Өз халгыны неҹә севдијини, онларын неҹә хошбәхт олдуғуну ҝөрдүм. Мән дә бу ҹүр һәјат истәјирдим».

12. Нәјә ҝөрә Мүгәддәс Китаб дәрсинә мүхтәлиф тәблиғчиләри дәвәт етмәлијик?

 ¹² Дәрсә мүхтәлиф тәблиғчиләри дәвәт един. Бәзән бизим үчүн дәрси тәк кечмәк вә ја ејни тәблиғчи илә әмәкдашлыг етмәк даһа раһат ола биләр. Амма вахташыры мүхтәлиф тәблиғчиләрлә дәрс кечмәјин шаҝирдә бөјүк көмәји дәјә биләр. Молдовада јашајан Дмитри дејир: «Мәнимлә дәрс кечмәјә ҝәлән һәр тәблиғчи дәрси өзүнәмәхсус тәрздә изаһ едирди. Бу мәнә мөвзуја мүхтәлиф јөнләрдән бахмаға көмәк едирди. Үстәлик, биринҹи дәфә јығынҹаға ҝәләндә елә дә чох сыхылмадым, чүнки чохларыны артыг таныјырдым».

13. Нәјә ҝөрә шаҝирдә јығынҹаға гатылмаға көмәк етмәлијик?

¹³ Ибадәт ҝөрүшләринә гатылмаға көмәк един. Бу нәјә ҝөрә ваҹибдир? Чүнки јығынҹагларда иштирак етмәк Јеһованын әмридир. Бу, ибадәтимизин бир һиссәсидир (Ибр. 10:24, 25). Үстәлик, баҹы-гардашлар бизим руһани аиләмиздир. Онларла бирликдә јығынҹагда оланда санки евдә ҝөзәл сүфрә архасында әјләшиб дадлы јемәк јејирик. Шаҝирдә јығынҹаға ҝәлмәјә көмәк етсәниз, ону вәфтизә апаран ән ваҹиб аддымлардан бирини атмаға көмәк етмиш олаҹагсыныз. Амма ола биләр ки, мүәјјән сәбәбләрә ҝөрә она јығынҹаглара ҝәлмәк чәтиндир. Ҝөрәсән «Әбәди хошбәхт һәјат!» китабы она бу саһәдә көмәк едә биләр?

14. Шаҝирди јығынҹаг ҝөрүшләриндә иштирак етмәјә неҹә тәшвиг едә биләрик?

¹⁴ «Әбәди хошбәхт һәјат!» китабынын 10-ҹу дәрсинин көмәјилә шаҝирдинизи јығынҹаға ҝәлмәјә тәшвиг едә биләрсиниз. Бу китаб дәрҹ олунмамышдан габаг тәҹрүбәли тәблиғчиләрдән бу дәрси сынагдан кечирмәк хаһиш олунду. Онлар гејд етмишдиләр ки, бу дәрсин көмәјилә шаҝирдләри јығынҹаг ҝөрүшләринә дәвәт етмәк чох јахшы алыныб. Тәбии ки, шаҝирди јығынҹаға дәвәт етмәк үчүн 10-ҹу дәрсә гәдәр ҝөзләмәк лазым дејил. Ону мүмкүн гәдәр тез дәвәт един вә мүтәмади олараг бунун ваҹиблијини вурғулајын. Һәр шаҝирдин өз чәтинлији вар. Буна ҝөрә дә мүәјјән един ки, шаҝирдинизә јығынҹаға ҝәлмәјә нә мане олур вә она неҹә көмәк едә биләрсиниз. Шаҝирдиниз тез бир заманда јығынҹаглара гатылмаса, руһдан дүшмәјин. Сәбирли олун, амма дәвәт етмәјә давам един.

15. Шаҝирдинизин һансы горхулары ола биләр?

¹⁵ Ола билсин, бир заманлар сиз өзүнүз Јеһованын Шаһиди олмаға горхмусунуз. Бәлкә дә, һеч вахт тәблиғ едә билмәјәҹәјинизи дүшүнүрдүнүз, јахуд аилә үзвләринизин, достларынызын сиздән үз дөндәрәҹәјинә ҝөрә нараһат идиниз. Әҝәр бу ҹүр һиссләр кечирмисинизсә, шаҝирдинизи баша дүшәрсиниз. Иса Мәсиһ билирди ки, бәзиләринин белә горхулары олаҹаг. Лакин Иса давамчыларыны хәбәрдар етмишди ки, горхуја гапылыб Јеһоваја хидмәтләрини дајандырмасынлар (Мәт. 10:16, 17, 27, 28). Бәс о, давамчыларына горхуларыны ашмаға неҹә көмәк етди вә биз онун нүмунәсиндән нә өјрәнә биләрик?

16. Шаҝирдә иманы һагда башгалары илә данышмағы неҹә өјрәдә биләрик?

¹⁶ Тәдриҹән шаҝирдинизә башгалары илә иманы барәдә данышмағы өјрәдин. Иса давамчыларыны тәблиғ етмәјә ҝөндәрәндә, ола билсин, онлар һәјәҹан кечирирдиләр. Амма Иса онлары көмәксиз гојмады, һарада тәблиғ етмәк, нә демәклә бағлы мәсләһәтләр верди (Мәт. 10:5—7). Биз дә  Иса Мәсиһдән өрнәк ҝөтүрәрәк шаҝирдимизә баша сала биләрик ки, о һарада тәблиғ едә биләр. Мәсәлән, сорушмаг олар ки, өјрәндији бу һәгигәтин танышлары арасындан кимә көмәји дәјә биләр. Сонра она бу һәгигәти садә шәкилдә демәјин јолуну ҝөстәрин. Јери дүшдүкҹә, «Әбәди хошбәхт һәјат!» китабындакы «Бәзи инсанлар дејир» вә «Бәзи инсанлар сорушур» адлы чәрчивәләр әсасында мәшг един. Бу заман шаҝирдинизә Мүгәддәс Китаб васитәсилә садә вә нәзакәтли ҹаваблар вермәји өјрәдин.

17. Мәтта 10:19, 20, 29—31 ајәләри васитәсилә шаҝирдә Јеһоваја етибар етмәјә неҹә көмәк едә биләрик?

¹⁷ Јеһоваја етибар етмәји өјрәдин. Иса давамчыларыны әмин етмишди ки, Јеһова онлары севир, буна ҝөрә дә онлара көмәк едәҹәк. (Мәтта 10:19, 20, 29—31 ајәләрини охујун.) Шаҝирдинизи Јеһованын она да көмәк едәҹәјинә әмин един. Јеһоваја ҝүвәнмәсинә көмәк етмәк үчүн онунла бирҝә мәгсәдләри барәдә дуа един. Полшада јашајан Франсишек дејир: «Мүәллимим һәмишә мәним мәгсәдләрим барәдә дуа едирди. Јеһованын онун етдији дуалара ҹаваб вердијини ҝөрәндә мән дә дәрһал дуа етмәјә башладым. Јығынҹагларда вә топлантыларда иштирак етмәк үчүн јени иш јеримдән иҹазә аланда Јеһованын мәнә неҹә көмәк етдијини ҝөрдүм».

18. Јеһова дәрс кечән тәблиғчиләрин әмәјинә неҹә јанашыр?

¹⁸ Мүгәддәс Китабы өјрәнән инсанлар Јеһова үчүн чох дәјәрлидир. Јеһова билир ки, инсанларын Она јахынлашмасына көмәк етмәк үчүн тәблиғчиләр неҹә бөјүк зәһмәт чәкир вә буна ҝөрә онлары чох севир (Әшј. 52:7). Әҝәр һал-һазырда һеч кимә дәрс кечмирсинизсә, башга тәблиғчиләрлә әмәкдашлыг едиб онларын шаҝирдләринин вәфтизә доғру ирәлиләмәсинә көмәк едә биләрсиниз.