1. Kii Pétrô a bi kal limut li bôt le li boñ?

BÔT ba nlôl i ngandak biloñ inyu kodba i Yérusalem, bôlôm ni bôda, ba ba mpot ngandak dilémb. Jam li hélha li bi bôña yokela. Bon ba Lôk Yuda ba bi bôdôl pot dilémb di bôt ba! Hala a bi hélés i bôt bana ngandak, ndi i mam Lôk Yuda i bé añle bo, ni i mam ñôma Pétrô a bi añle bo, ma bi kônde ki hélés bo. Ba bi kal bo le ba nla kôhna tohi ibale ba nhémle Yésu Kristô. I nwin unu, u bi lémél i bôt ba ngandak. Hala a bi tihba bo, kayéle ba bat le: “Kii di nlama boñ?” Pétrô a timbhe bo le: “Hiki wada nan a kôhna . . . sôble.”​—Minson mi baôma 2:37, 38.

2. Kii di ga nigil munu i yigil ini? (Béñge titii i lipep li bisu.)

² Hélha jam i bi bôña i mbus ha. I yokela nu, yom kiki bo 3 000 di bôt di bi kôs sôble, di yila banigil ba Kristô. I kel i nyen nson Yésu a bi yigle banigil bé u bi bôdôl, hala wee nson u yilha bôt bape banigil. I bôlô i, i nséla yak i len ini. Ndi i len ini, di nla bé kwélés mut inyu ngélé bisu, i nlélém kel a sôblana. Hala a nla yoñ ngandak sôñ, ngim mangéda nwii wada tole iloo ha. Ibale u niiga mut Bibel, u nyi le hala a ta bé jam li ntomb i yilha nye nnigil Kristô. Munu yigil ini, di ga tehe i mam u nla boñ inyu hôla nnigil Bibel i kôs sôble.

3. Kiki Matéô 28:19, 20 a nkal, kii nnigil Bibel a nlama boñ inyu kôs sôble?

³ Ilole mut a nigil Bibel a nkôs sôble, a nlama ndugi bii i mam a nigil i Bibel bibôñôl. (Añ Matéô 28:19, 20.)  I ngéda mut a nigil Bibel, a boñok i mam a nigil, Yésu a nkal le a yé kiki “mut pék” nu a ntém hisi ikétékété inyule a nsômbôl oñ ndap yé i ngii ngok. (Matéô 7:24, 25; Lukas 6:47, 48) Lelaa di nla hôla nnigil Bibel i bii i mam a nigil bisélél? Di béñge mam maa.

4. Lelaa u nla hôla nnigil Bibel i sal inyu kôs sôble? (Béñge minkéñék mi matila le “ Hôla nnigil Bibel i téé ngim mam a nsômbôl boñ, ni yônôs.”)

⁴ Hôla nye i téé ngim mam a nsômbôl yônôs. Inyuki di nlama boñ hala? Inyu tibil nok, di yoñ le hihéga hini: Ibale u nlama ke ntandaa liké, bebek u nla kit le w’a telep ngim bahoma inyu noi. Hala a ga boñ le liké li yidil bañ we. Hala nyen ibale nnigil Bibel a ntéé ngim mam a nlama boñ ilole a nsôblana, ndi a yônôs ki mo, hala a ga hôla nye i nok le a nla sôblana. Munu kaat ini le Niñ ilam i boga ni boga! gwélél i homa nunu le “Jam u nla boñ” inyu hôla nnigil Bibel i hol i pes mbuu. I mamélél ma hiki yigil, hôla nnigil Bibel i tehe lelaa i jam a ntéé le a mboñ, li ga hôla nye i boñ i mam Bibel i niiga nye. Ibale u nhoñol jam lipe nnigil Bibel a nla boñ, tila jo i homa nunu le “Jam lipe u nla boñ.” Bana lem i gwélél i homa kaat nunu inyu hôla nnigil Bibel i tehe mam a nlama boñ nano, ni ma a nla boñ i dilo di nlo.

5. Inoñnaga ni Markô 10:17-22, kii Yésu a bi bat ngwañ mañge wanda le a boñ, inyuki?

⁵ Hôla nnigil Bibel i héñha ngim bilem. (Añ Markô 10:17-22.) Yésu a bé yi le hala a bé ndutu inyu ngwañ mañge wanda unu, i nuñul nkus wé wonsôna. (Markô 10:23) Ndi to hala, Yésu a bi kal nye le a boñ hala. Inyuki? Inyule Yésu a bé gwés nye. Ngim mangéda, di nla kon  woñi i bat nnigil Bibel le a boñ mam a nigil, inyule di ntehe le a ta bé bebee i héñha. Inyu ngim bôt, i mbéda ngéda inyu boñ le ba héñha libak jap, ba yila mut yondo. (Kôlôsé 3:9, 10) Ndi ibale u mpala bôdôl kal nye i mam a nlama héñha, yak nye a nla pala bôdôl héñha. Ibale u mbana i nya nkwel ini ni nnigil Bibel, hala a ñunda le u ntôñ nye.​—Tjémbi 141:5; Bingéngén 27:17.

6. Inyuki di nlama bat nnigil Bibel mambadga ma ma ntinde nye i ti mahoñol mé?

⁶ I yé nseñ le di bat nnigil Bibel mahoñol mé inyu ngim jam. Gwélél nya mambagda i inyu yi too nnigil a nok i mam a nigil, too a nhémle mo. Ibale u gwé lem i boñ hala, i ga ba we jam li ntomb i kwel ni nye mu mam ma nlédél nye i boñ. I kaat ini le Niñ ilam i boga ni boga! i gwé ngandak mambadga ma ma ntinde nnigil Bibel i kal i yom i yé nye ñem. Kiki hihéga, yigil 04 i gwé mbadga ini le: “U nhoñol le kii Yéhôva a nôgda ngéda ba nsébél nye ni jôl jé?” Yigil 09 i gwé mbadga ini le: “Mambe mam u nla gwés kal Djob ikété masoohe?” I bibôdle, i ga béda nnigil Bibel ndék ngéda inyu ti mahoñol mé. Ndi u nla unda nye nlôñ Bibel tole titii mu i kaat inyu hôla nye.

7. Lelaa di nla tibil gwélél dihéga di bôt bape?

⁷ I ngéda nnigil Bibel a mal nok i mam a nlama boñ, yôñôl nye dihéga di bôt ba ba bi boma minlélém mi mandutu, inyu ti nye makénd. Kiki hihéga, ibale nnigil Bibel a gwé ndutu i ke makoda, u nla unda nye ini vidéô le Yéhôva a bi tôñ me. Inyu léba yo, kee i yigil 14, i homa le “Boñ nyiña.” Munu kaat ini le Niñ ilam i boga ni boga! ngandak gwigil i gwé dihéga di bôt munu homa nunu le “Kônde tém” tole “Boñ nyiña.” * Yoñ yihe le u hégha bañ nnigil ni mut numpe, u kalak kiki hihéga le: “Ibale a bi boñ hala, wee yak we u nla.” Nwas le nnigil nyemede nyen a nok hala. Pémés ngim mam i tôbôtôbô mu vidéô, i i nla hôla nye i noñ maéba ma Bibel. Bebek le u nla pôdôl nlôñ Bibel tole ngim jam i i mpôda mu i vidéô. Ibale pôla i nene, yigye lelaa Yéhôva a bi hôla i mut nu.

8. Lelaa u nla hôla nnigil i gwés Yéhôva?

⁸ Hôla nnigil Bibel i gwés Yéhôva. Lelaa u nla boñ hala? Hiki ngéda ni nigil, hôla nnigil Bibel i tehe bilem bi Yéhôva. Hôla ki nye i tehe le Yéhôva a yé Nyambe nu maséé, nu a nhôla i bôt ba ngwés nye. (1 Timôtéô 1:11; Lôk Héber 11:6) Unda nye le ibale a nôgôl maéba ma Bibel, hala a ga lona nye bisai; toñle nye le hala a ñunda le Yéhôva a ngwés nye. (Yésaya 48:17, 18) Kiki gwéha yé inyu Yéhôva i nkônde nan, hala a ga tinde nnigil i héñha bilem gwé bibe.​—1 Yôhanes 5:3.

9. Inoñnaga ni Markô 10:29, 30, kii i nla hôla nnigil i neebe nimis ngim mam inyu kôs sôble?

⁹ Inyu kôs sôble, nnigil Bibel a nlama ba bebee i nimis ngim mam. Kiki ngwañ mut di bôk di pôdôl, ngim banigil i nla nimis bigwel moo. Ibale bôlô yap i nkiha bé ni matiñ ma Bibel, ba nlama héñha  yo. Ngandak i nlama tjôô mawanda map ma ma ngwés bé Yéhôva. Inyu banigil bape, bôt bap ba lihaa bon ba bi tjôô bo. Yésu a bi kal le ngim bôt i ga neebe bé i boñ i nya bisesema i. Ndi a bi bôn le i bôt ba ga noñ nye, a ga wéha bé bo nyuu. A ga bom bo, a ti bo lihaa ikété ntôñ u Djob li li ga gwés bo. (Añ Markô 10:29, 30.) Lelaa u nla hôla nnigil Bibel i kôhna likébla li?

10. Kii ndémbél i Manuel i niiga bés?

¹⁰ Bot liwanda ni nnigil Bibel. I yé nseñ ngandak le u unda nnigil woñ le u ntôñ nye. Inyuki? Emble jam Manuel nu a nyééne i Méksikô a nkal. A nhoñol i ngéda a bé nnigil Bibel, a nkal le: “Hiki ngéda ilole yigil i mbôdôl, i mut a bé niiga me Bibel a bé bat me too me yé mbôô. A bé ti me makénd i kal nye to kii i yé me ñem, ibabé i kon woñi. Me bé nôgda toi le a bé tôñ me.”

11. Inyuki i yé loñge le di tégbaha ngéda ni i bôt di niiga Bibel?

¹¹ Tégbaha ngéda ni i mut u niiga Bibel, kiki Yésu a bé tégbaha ngéda ni banigil bé. (Yôhanes 3:22) Ibale nnigil Bibel a mbôdôl héñha ngim bilem, u nla naña nye i ndap yoñ i nyo tole i je ndék yom, tole i béñge JW Nkuu Biliñgeliñge. Ibale u naña nye téntén i ngéda bôt ba nlôôs mangand ma lisuk li nwii, a ga kon maséé ngandak inyule a ga nôgda bé le a yé nyetama. Kazibwe nu a nyééne i loñ Ugañda a nkal le: “I mam me nyi inyu Yéhôva, me bi nigil bé ndik mo i ngéda di bé nigil Bibel, ndi me bi nigil ki mo mu mangéda me bé tégbaha ni nwet a bé niiga me. Me bi tehe lelaa Yéhôva a ntôñ litén jé, me tehe ki maséé ma yé ikété ntôñ wé. I maséé ma mon ma bé béda me i niñ yem.”

12. Inyuki u nlama héñha bôt i ngéda u nke i tégbaha yigil i mut?

¹² Naña batéé likalô bape i yigil Bibel.  Ngim mangéda, u nla bana lem i ke wetama tole i kena nlélém mut yak nnigil Bibel. To ibale hala a ntééñga bé we, u hôya bañ le nnigil Bibel a ga tibil ôt nseñ ni yigil ibale u gwé lem i héñha batéé likalô u nkena nyoo. Dimitri nu a nyééne i loñ Môldawa a nkal le: “Hiki ntéé likalô nu a bé a lo i yigil yem, a bé a toñle me mam i nya numpe a bé ngi toñle me. Hala a bé hôla me i tehe mam mape me nla boñ inyu noñ maéba ma Bibel. Likoda li bisu me bi ke, li bi kônha bé me woñi inyule i bôt me bi tehe nyoo, ba bé ba ma tagbe i mbai yem.”

13. Inyuki di nlama hôla nnigil Bibel i lo makoda?

¹³ Hôla nnigil Bibel woñ i lo makoda. Inyuki a nlama lo makoda? Inyule Yéhôva a mbat le i bet ba ngwélél nye ba kodba; hala a ñunda le ba mbégés toi nye. (Lôk Héber 10:24, 25) Jam lipe li yé le, di meina ni lôk kéé i bôlôm ni i bôda, i nya yé le, ba nsôk ba yila kiki bôt bés ba lihaa. I ngéda di yé i makoda lôñni bo, a yé kiki bo le, di yé i boma i lihaa, di jek ntôñ ni bo. Ibale u nhôla nnigil Bibel i lo makoda, wee u yé i hôla nye i kôs sôble. Ndi i lo makoda i nla lédél nye. Lelaa ini kaat le Niñ ilam i boga ni boga! i yé le i hôla nnigil Bibel lo i makoda, to ibale ngim mam i nkéñ nye?

14. Lelaa u nla ti nnigil Bibel ngôñ i lo makoda?

¹⁴ Yigil 10 munu kaat ini le Niñ ilam i boga ni boga! i nla hôla we i ti nnigil Bibel makénd i lo makoda. Ilole i kaat ini i mpam, di bi ti yo ndék lôk kéé le, ba tégbaha gwigil mu; ba nkal le, i kaat i, i bi hôla bo ngandak i boñ le banigil bap ba lo makoda. Ndi hala a nkobla bé le, u nlama bem letee ni pam i yigil 10 inyu naña nye makoda. Ibale pôla i nene, naña nye i makoda; to ibale a nlo bé, u waa bañ boñ hala. Nlélém jam bé won u nkéñ banigil Bibel bobasôna i lo makoda, hiki mut a gwé yé ndutu. Jon yéñ yi kii i nkéñ nye, u tehe ki lelaa u nla hôla nye. To ibale a mpala bé lo makoda, u lehel bañ ñem. Bana mban, u kônde ki bem.

15. Kii i nla kônha nnigil Bibel woñi?

¹⁵ Baa wemede u nhoñol nga i woñi u bééna i ngéda u bé sômbôl yila Mbôgi Yéhôva? Bebek ha ngéda i, u bé hoñol le, u nla bé begee bot inyu ke likalô, bôt ba tehge. Tole bebek u bé kon woñi le, lihaa joñ ni mawanda moñ ba ga kolba we. Ibale hala, u nla tibil nok i yom nnigil Bibel a nôgda. Yésu nyemede a bi kal le, i nya makidik i, i nla kônha bape woñi. Ndi to hala, a bi kal banigil bé le, woñi u ane bañ bo, u kéñ bañ to bo njel i gwélél Yéhôva. (Matéô 10:16, 17, 27, 28) Lelaa Yésu a bi hôla banigil bé le ba kon bañ woñi i yoñ makidik ma? Lelaa yak we, u nla nigle nye?

16. Lelaa u nla niiga nye i añle bape ñañ nlam?

¹⁶ Ndék ni ndék, unda nye lelaa a nla añle bape ñañ nlam. I ngéda Yésu a bi om banigil bé i téé likalô, bebek le bomede ba bi kon woñi. Ndi a bi suhul woñi wap i ngéda a bi kal bo hee ba téé likalô, ni kii ba kal bôt. (Matéô 10:5-7) Lelaa u nla nigle Yésu? Hôla nnigil i yi imbe ngéda a nla añal ñañ nlam. Kiki hihéga, u nla bat nye too a nyi ngim mut i ga ba maséé i yi ngim jam Bibel i niiga. I mbus, hôla nye i kôôba, niiga nye lelaa  a nla kal i mut nu i jam li, ni ndék bibuk ndigi. Ibale hala a yé nseñ, u nla gwélél i bahoma bana le, “Bôt bape ba nkal le” ni “Bôt bape ba nla bat le” ba ba yé ikété kaat le Niñ ilam i boga ni boga! I ngéda ni nkôôba, hôla nye i tibil ngwélél Bibel inyu timbhe bôt, ni le a babaa bañ bôt i ngéda a ntimbhe bo.

17. Lelaa u yé le u gwélél Matéô 10:19, 20, 29-31 inyu hôla nnigil Bibel i bôdôl Yéhôva ñem?

¹⁷ Hôla nnigil Bibel i bôdôl Yéhôva ñem. Yésu a bi kal banigil bé le, Yéhôva a ga hôla bo, inyule a ngwés bo. (Añ Matéô 10:19, 20, 29-31.) Hôñlaha nnigil Bibel le Yéhôva a ga hôla nye. I ngéda u nsoohe lôñni nye, sima i mam a gwé ngôñ i boñ, hala a ga niiga nye i bôdôl Yéhôva ñem. Francis, nu a niñ i Pôlan a nkal le: “I nwet a bé nigil Bibel ni me a bééna lem i sima i mam me bééna ngôñ i boñ ikété masoohe. I ngéda me bi tehe kiki Yéhôva a ntimbhe masoohe mé, hala a tinde me i pala bôdôl soohe. Me bi nôgda le Yéhôva a bé timbhe me i ngéda me bé bat isañ wem bôlô dilo di noi inyu ke i makoda ni i makoda makeñi.”

18. Lelaa Yéhôva a ntehe biliya bikristen bi mboñ inyu niiga bape Bibel?

¹⁸ Yéhôva a ntôñ banigil Bibel ngandak. A nyi ki le bikristen bi niiga bo, bi mboñ biliya gwap gwobisôna i boñ le banigil ba kôôge nye bebee; biliya bi, bi nlémél nye, a ngwés ki bikristen bi. (Yésaya 52:7) To ibale u gwé bé mut u niiga Bibel i dilo dini, éga lôk kéé ipe i gwigil gwap, hala a ga boñ le u nla hôla banigil Bibel bap i hol ikepam i sôble.