1. Finshi abasambi ba kwa Yesu baebele ibumba lya bantu ukucita?

 IBUMBA ilikalamba apali abaume na banakashi abafumine ku fyalo ifyalekanalekana abalelanda indimi ishalekanalekana, balilongene mu Yerusalemu. Kwali icintu icisuma icaibela icacitike. AbaYuda bamo batendeke ukulanda indimi isho abantu abafumine ku fyalo fimbi balelanda! Abantu abalongene balipapile ukumfwa abaYuda balelandila mu ndimi shabo. Lelo ifyo aba abaYuda no mutumwa Petro babasambilishe e fyacililenapo ukubapapusha. Babasambilishe ukuti nga batetekela Yesu Kristu e lyo bakapusuka. Ifyo babasambilishe fyalibafikile pa mutima. Na kuba balitemenwe ifyo babasambilishe ica kuti baipwishe abati: “Tucite shani?” Petro abebele ati: “Lapileni no kubatishiwa.”—Imil. 2:37, 38.

2. Finshi twalasambilila muli cino cipande? (Moneni icikope icili pa nkupo.)

² Ifyacitike pa numa fyali fya kupapusha. Abantu nalimo 3,000 balibatishiwe pali bulya bushiku no kuba abasambi ba kwa Kristu. Pali bulya bushiku e patendekele umulimo uukalamba uwa kulenga abantu ukuba abasambi uo Yesu aebele abasambi bakwe ukulabomba. Abasambi ba kwa Yesu balitwalilila ukubomba uyu mulimo ukufika na muno nshiku. Kwena muno nshiku umuntu te kuti abatishiwe pa numa ya kusambilila fye pa ma-awala ayanono. Lelo kuti casenda umweshi, umwaka, nelyo ukucilapo pa kuti afikepo ukubatishiwa. Pa kuti tulenge umuntu abe umusambi wa kwa Kristu, tulingile ukubomba na maka yesu yonse. Muli cino cipande twalasambilila pa fyo twingafwa umusambi wa Baibolo pa kuti afikepo ukubatishiwa.

3. Finshi ilembo lya kwa Mateo 28:19, 20 lilanda ukuti e fyo umusambi afwile ukucita pa kuti alunduluke no kubatishiwa?

³ Ilyo umusambi wa Baibolo ashilabatishiwa, afwile ukulacita ifyo alesambilila mu Baibolo. (Belengeni Mateo 28:19, 20.) Nga ca kuti umusambi alebomfya ifyo alesambilila, akaba ngo “muntu uwacenjela” uo Yesu alandilepo mu cilangililo, uwaimbile umufula ukufika panshi pa mwalala no kukuulapo ing’anda. (Mat. 7:24, 25; Luka 6:47, 48) Kuti twacita shani pa kuti twafwe umusambi ukulabomfya ifyo alesambilila? Lekeni tusambilile pa fintu fitatu ifyo twingacita.

4. Finshi twingacita pa kuti umusambi alunduluke no kubatishiwa? (Moneni na kabokoshi akaleti “ Muleafwa Umusambi Wenu Ukupanga Ifya Kucita no Kucita Ifyo Apanga.”)

⁴ Muleafwa umusambi wenu ukupanga ifya kucita. Cinshi mulingile ukucitila ifi? Katulangilile: Tutile muli pa bulendo kabili uko muleya kutali. Pa kuti tamunakile sana mulingile ukulaimininako mu ncende shimo ishisuma pamo nga mu ncende umwaba impili ishimoneka bwino sana e lyo ne mimana. Nga mwacita ifi, kuti mwapapa ifyo mwingafika bwangu uko muleya. Ifi fine e fyo caba na ku musambi wa Baibolo. Nga ca kuti apanga ukucita ifintu ifyo engakumanisha ukupwisha mu nshita iinono kabili acita ne fyo apangile, akamona ukuti kanshi no kubatishiwa kwine kuti abatishiwa. Kuti mwabomfya apatila “Ifyo Mwingacita” mu citabo citila Kuti Mwaba ne Nsansa Umuyayaya! pa kuti mwafwe umusambi ukulunduluka. Lyonse ilyo mwapwisha isambililo, mulelanshanya no musambi pa fyo ifyo apanga ukucita fingamwafwa ukubomfya ifyo asambilile mwi sambililo. Nga pali na fimbi ifyo mulefwaya umusambi akacite, kuti mwafilemba apatila “Fimbi.” Libili libili mulebomfya ici ciputulwa ukupitulukamo no musambi wenu mu fyo apanga ukucita ifyo engacita mu nshita iinono ne fyo engacita mu nshita iikalamba.

5. Finshi Yesu aebele umwaume uwa fyuma ukucita, ifyalembwa pali Marko 10:17-22, kabili cinshi amwebele ifi?

 ⁵ Muleafwa umusambi wenu ukwaluka. (Belengeni Marko 10:17-22.) Yesu alishibe ukuti calyafya ku wa fyuma ukushitisha fyonse ifyo akwata. (Marko 10:23) Lelo ifi fine e fyo Yesu aebele umwaume uwali ne fyuma ukucita. Cinshi amwebele ukucitila ifi? Pantu Yesu alimutemenwe. Inshita shimo kuti twalashimunuka ukukoselesha umusambi ukulakonka ifyo alesambilila, pantu kuti tulemona kwati inshita tailafika iya kuti aluke. Limo palapita inshita pa kuti umuntu aluke no kufwala ubuntu bupya. (Kol. 3:9, 10) Lelo nga mwaeba bwangu umusambi umo alekabila ukwaluka, akatendeka bwangu ukwaluka kabili ninshi mulelanga ukuti mwalimutemwa.—Amalu. 141:5; Amapi. 27:17.

6. Mulandu nshi tulingile ukwipushisha umusambi ifyo aletontonkanya pa fyo alesambilila?

⁶ Calicindama ukwipusha umusambi wesu ifyo aletontonkanya pa fyo tulesambilila. Nga mulecita ifi mukeshiba nga ca kuti umusambi wenu naumfwikisha ifyo mulesambilila, kabili nashininkisha ukuti fya cine. Lyonse nga muleipusha umusambi ifyo aletontonkanya, cikamwangukila ukulanshanya nankwe pa fintu ifingamukosela ukusumina. Mu citabo citila Kuti Mwaba ne Nsansa Umuyayaya! mwaliba amepusho ayengi ayengalenga umusambi alanda ifyo aletontonkanya ne fyo aleumfwa. Ku ca kumwenako, mwi sambililo 04 mwaba icipusho ca kuti: “Bushe mulemona ukuti Yehova omfwa shani nga mwabomfya ishina lyakwe?” Mwi sambililo 09 na mo mwaba icipusho citila: “Fintu nshi fimo ifyo mwingatemwa ukupepelapo?” Pa kubala, nalimo kuti cakosela umusambi wenu ukwasuka aya mepusho. Kanshi mulemusambilisha ukulatontonkanya sana pa malembo na pa fikope ifyaba mu citabo.

7. Kuti twabomfya shani amalyashi ayalanda pa fyo abantu bamo bacitile, ilyo tulesambilisha abasambi besu?

⁷ Umusambi wenu nga aumfwikisha ifyo alingile ukucita, kuti mwabomfya amalyashi ayalanda pa fyo bamo bacitile pa kumukoselesha ukulabomfya ifyo alesambilila. Ku ca kumwenako, nga ca kuti umusambi wenu tasangwa lyonse mu kulongana, kuti mwamutambisha vidio iitila Yehova alansakamana, iyaba apatila “Ishibilenipo na Fimbi,” mwi sambililo 14. Mu masambililo ayengi ayaba mu citabo citila Kuti Mwaba ne Nsansa Umuyayaya! mwaliba amalyashi ayengi ayengakoselesha umusambi nga mwaya apatila “Sambilileni na Fimbi” nelyo apatila “Ishibilenipo na Fimbi.” * Mwilalinganya umusambi ku bantu bambi no kumweba ukuti, “Balya nga balikumanishe ukucita ifi, ninshi na iwe teti ufilwe.” Umusambi umwine e ufwile ukwiluka ukutila kuti akumanisha ukucita ifyo mulemusambilisha. Lelo mulelanda pali fimo ifya-afwile umuntu balandilepo mu vidio ukubomfya ifyo Baibolo isambilisha. Nalimo kuti mwalanda pe lembo nelyo pa cintu cimo icacindama icalengele uo balandilepo muli vidio ukwaluka. Kabili mwilalaba ukulanda pa fyo Yehova ayafwile umuntu uuli muli vidio.

8. Finshi twingacita pa kuti tulenge umusambi atemwe sana Yehova?

⁸ Muleafwa umusambi wenu ukutemwa Yehova. Kuti mwamwafwa shani? Kuti mwamwafwa nga mulemusambilisha pa mibele ya kwa Yehova. Na kabili mulemwafwa ukwishiba ukuti Yehova ni Lesa wa nsansa kabili alatungilila abamutemwa. (1 Tim. 1:11; Heb. 11:6) Mulelondolwela umusambi ukuti ico Yehova amwebela ukulakonka ifyo alesambilila ni co alimutemwa, kabili akanonkelamo nga ca kuti alefikonka. (Esa. 48:17, 18) Umusambi nga atemwa sana Yehova akalafwaisha ukwaluka.—1 Yoh. 5:3.

9. Ukulingana na Marko 10:29, 30, finshi fingalenga umusambi aipeelesha ukuipusulako fimo pa kuti abatishiwe?

⁹ Pa kuti umusambi alunduluke no kubatishiwa, afwile ukuipusulako fimo. Nga filya cali ku mwaume wa fyuma uo tulandilepo, abasambi bamo nabo balakabila ukusha ifyuma. Nga ca kuti incito abomba yalipusana ne fyo amashinte ya mafunde ya mu Baibolo yalanda, nalimo kuti akabila ukuleka iyo incito no kufwaya imbi. Abasambi abengi bafwile ukuleka ukwangala ne fibusa ifyo baleangala na fyo ifishatemwa Yehova. E lyo bambi nabo kuti babakaana kuli balupwa lwabo abapata Inte sha kwa Yehova. Yesu atile nalimo te kuti canguke kuli bamo ukucita ifi twalandapo. Lelo alilaile ukuti bonse abasalapo ukuba abasambi bakwe, bakakwata ulupwa lwa ku mupashi ulwatemwana. (Belengeni Marko 10:29, 30.) Kuti mwa-afwa shani umusambi pa kuti na o akabe muli ulu lupwa lwa ku mupashi ulusuma nga nshi?

10. Finshi mulesambilila ku fyo abalesambilisha ba Manuel Baibolo balecita?

¹⁰ Mufwile ukuba ifibusa no musambi wenu. Calicindama ukulanga ukuti mwalibika amano ku musambi wenu. Cinshi cacindamina? Umfweni ifyo ba Manuel abekala ku Mexico balandile pa fyo cali ilyo balesambilila Baibolo. Batile: “Lyonse ilyo tushilatendeka ukusambilila, abalensambilisha Baibolo balenjipusha ifyo ifintu fili mu bumi bwandi. Balenkoselesha ukulanda fyonse ifili ku mukoshi. Ifi balecita fyalelenga ndemona ukuti balimbikileko amano.”

11. Finshi umusambi engasambililako nga mulekwatako inshita ya kuba pamo nankwe?

¹¹ Mulesangako inshita ya kuba pamo na basambi benu, nga filya Yesu alecita ku basambi bakwe. (Yoh. 3:22) Kuti mwaitako umusambi ku ng’anda ku mwenu pa kuti muliile pamo ifya kulya, nelyo ukutambila pamo programu ya cila mweshi iya JW Broadcasting®. Lelo kuti cacilapo ukuwama nga mwamwita ku ng’anda ku mwenu ilyo balupwa lwakwe na bantu bambi balesefya amaholide, pantu nalimo pali iyi inshita kuti atalalilwa. Ba Kazibwe abekala  ku Uganda batile: “Nalesambilila ifingi nga ndi pamo na balensambilisha Baibolo, nga filya fine caleba nga balensambilisha Baibolo. Nalimwene ifyo Yehova asakamana abantu bakwe e lyo ne fyo baba ne nsansa. Na ine nalefwaya ukuba ne nsansa nga bena.”

12. Cinshi tulingile ukwila na bakasabankanya abalekanalekana mu kutungulula isambililo?

¹² Muleya na bakasabankanya abalekanalekana mu kutungulula isambililo. Inshita shimo kuti mwamona kwati cili fye bwino ukuya fye mweka nelyo ukulaya fye na kasabankanya umo wine mu kutungulula isambililo. Nangu ca kuti ukucita ifi kwalyanguka, umusambi kuti alenonkelamo sana nga ca kuti tuleya na bakasabankanya abalekanalekana mu kumusambilisha Baibolo. Ba Dmitrii abekala ku Moldova batile: “Cila kasabankanya uwaleisa na balensambilisha Baibolo alelondolola ifyebo mu nshila iyaibela. Ici calelenga naishiba inshila ishingi isha kubomfeshamo ifyo nalesambilila. Na kabili nshaumfwile insoni ilyo naile mu kulongana pa muku wa kubalilapo, pantu nalishibe aba bwananyina abengi.”

13. Mulandu nshi tulingile ukulakoselesesha abasambi ukulasangwa mu kulongana?

¹³ Mulekoselesha umusambi wenu ukulasangwa mu kulongana. Mulandu nshi? Pantu Yehova afwaya abantu bakwe balelongana pamo ku kumupepa. Na kuba ukulongana lubali lwa kupepa Lesa. (Heb. 10:24, 25) Na kabili bamunyinefwe na bankashi lupwa lwesu ulwa ku mupashi. Kanshi nga tuli pa kulongana, ciba kwati tuli nabo pa ng’anda tuleliila pamo ifya kulya ifisuma. Nga ca kuti mulekoselesha umusambi ukulasangwa mu kulongana, ninshi mulemwafwa ukucita icintu icacindama sana icingalenga abatishiwa. Na lyo line, abasambi bamo kuti cabakosela ukutendeka ukulongana. Bushe icitabo citila Kuti Mwaba ne Nsansa Umuyayaya! kuti ca-afwa shani umusambi wenu ukucimfya amafya ayengalenga alafilwa ukwisa mu kulongana?

14. Finshi twingacita pa kuti tukoseleshe umusambi ukulaisa mu kulongana?

¹⁴ Kuti mwabomfya isambililo 10 mu citabo citila Kuti Mwaba ne Nsansa Umuyayaya! pa kukoselesha umusambi wenu ukulasangwa mu kulongana. Ilyo ici citabo cishilafuma, balyebele bakasabankanya bamo abaishiba sana ukusambilisha ukusambilila na basambi babo isambililo 10. Aba bakasabankanya batile ili isambililo lyalyafwile abasambi babo ukutendeka ukulongana. Lelo tamufwile ukulolela ukuti mukafike mwi sambililo 10 e lyo mukete umusambi ukwisasangwa mu kulongana. Mufwile ukutendeka bwangu ukumwita mu kulongana kabili tamufwile ukuleka. Apo amafya abasambi ba Baibolo bakwata yalapusanapusana, mulebika amano ku fyo cila musambi alekabila kabili mulemwafwa. Mwilafuupuka nga ca kuti umusambi akokola ukutendeka ukulongana. Lelo mulemutekanishisha kabili muletwalilila ukumwita mu kulongana.

15. Finshi fimo ifingalenga abasambi baba no mwenso?

¹⁵ Bushe muleibukisha ifyo mwali no mwenso wa kuba Inte ya kwa Yehova? Nalimo mwalemona kwati te kuti mubile imbila nsuma. Nelyo nalimo mwaletiina ukuti balupwa nelyo ifibusa fyenu bakulamukaanya. Nga ca kuti e fyo cali, kuti mwaishiba bwino icilelenga umusambi wenu abe no mwenso wa kucita fimo. Na Yesu alilandile ukuti abantu bamo balaba no mwenso. Na lyo line, akoseleshe abasambi bakwe ukukanaleka umwenso walenga baleka ukubombela Yehova. (Mat. 10:16, 17, 27, 28) Finshi Yesu acitile pa kuti afwe abasambi bakwe ukuleka ukuba no mwenso? Kabili kuti mwamupashanya shani?

16. Kuti mwasambilisha shani umusambi ukulaebako abantu bambi ifyo alesambilila?

¹⁶ Panono panono mulesambilisha umusambi wenu ukulaebako abantu bambi ifyo alesambilila.  Abasambi ba kwa Yesu bafwile balyumfwile umwenso ilyo abatumine ukuya mu kubila imbila nsuma. Lelo Yesu alibafwile ilyo abebele ukwakuya mu kushimikila ne fyo bali no kulandapo. (Mat. 10:5-7) Kuti mwapashanya shani Yesu? Muleafwa umusambi wenu ukwishiba abo engashimikilako. Ku ca kumwenako, kuti mwamwipusha nga ca kuti alishibako umo uwinganonkelamo nga amwebako fimo ifyo Baibolo isambilisha. Kabili kuti mwamulanga inshila iya-anguka iyo engabomfya pa kwebako abantu ifyo alesambilila. Nga mwamona ukuti nacilinga, kuti mwapitulukamo no musambi ukubomfya ifyebo ifiba apatila “Abantu Bamo Batila” nelyo apatila “Bamo Kuti Baipusha Abati,” mu citabo citila Kuti Mwaba ne Nsansa Umuyayaya! Ilyo mulepitulukamo mulebika sana amano ku kusambilisha umusambi ifyo engabomfya Baibolo pa kwasuka, e lyo ne fyo engasuka ukwabula ukukalifya abantu.

17. Kuti twabomfya shani ifyebo fyaba pali Mateo 10:19, 20, 29-31 ilyo tulekoselesha abasambi besu ukucetekela Yehova?

¹⁷ Mulekoselesha abasambi benu aba Baibolo ukucetekela Yehova. Yesu aebele abasambi bakwe ukuti apo Yehova alibatemenwe, ali no kulabafwa. (Belengeni Mateo 10:19, 20, 29-31.) Mule-eba umusambi wenu ukuti na o Yehova akulamwafwa. Nga mulelanda pa fyo umusambi apanga ukucita ilyo mulepepela pamo nankwe, mukalenga akacetekele sana Yehova. Ba Franciszek aba ku Poland batile: “Ilingi line abalensambilisha Baibolo nga balepepa, balelanda pa fyo napangile ukucita. Ilyo namwene ifyo Yehova ayaswike amapepo balepepa, na ine nalitendeke ukupepa. Nalimwene ifyo Yehova alengafwa nga nalomba ulusa ku ncito pa kuti nsangwe ku kulongana kwa pa cilonganino no kwa citungu.”

18. Bushe Yehova omfwa shani pa mulimo fwe Bena Kristu tubomba?

¹⁸ Yehova alibika sana amano ku basambi besu aba Baibolo. Alishiba ifyo ifwe fwe Bena Kristu tuibikilishako ukwafwa abantu ukuba ifibusa fyakwe, kabili alitutemwa pa fyo tubombesha. (Esa. 52:7) Nangu ca kuti tamwakwata abo musambilisha Baibolo pali ino nshita, kuti mwa-afwa abasambi ba Baibolo ukulunduluka no kubatishiwa, nga muleya na bakasabankanya bambi mu kutungulula amasambililo yabo aya Baibolo.