1. Snonggaku ḇeryur ro Yerusalem sya rosai na sifrur kaku ya?

BAR bin ma snon sya sibor siryur ro Yerusalem ro abad randak ya. Srama ro sup ḇebor na, ma wos sena naḇesisye. Mura roi ḇeba oso isya ḇyejadi. Fyoro ḇa ido, raryur snonggaku Yahudi sya bisa sawos snonggaku ḇerama nansya wos manggun sena! Ḇape, roi ḇeba kaku wer iso rosai snonggaku Yahudi ansya ma Manwawan Petrus sikofen faro si na. Sikofenḇair ḇe raryur ansya snar bisa sikenem fyor sikyar faro Yesus Kristus. Ine nsun ro sisnesna mura sifuken ḇo soḇe, ”Rosaiso nari nkofrur ya?” Petrus kyarem faro si, ”Iḇye kada mkor fa mkosma [baptis].”​—Kis. 2:37, 38.

2. Rosai nari kawos ro farkarkor anine? (Mam sonin ḇero ḇarpon.)

² Roi ḇeḇejadi ḇeuser ya kako roi ḇeba rirya. Ro ras ḇemnis, indokada snonggaku ri 3.000 sebaptis ḇe manfamyan Kristus. Ro fafisu ani, ḇeso Yesus sya simbranser sasoser ḇyedi fa sḇe manfamyan. Fararur ḇeba ine imbran pdef isof ro baboine. Ro kirine, na kofrur snonggaku oso ḇyebaptis ḇeri ḇa ro oras ani. Fandun paik ḇeḇeso, ḇaido ro taun oser syadi, isof snonggaku oso ḇyebaptis. Kofrur manfamyan sya ine roi ḇepyan risya ḇa. Imbude manggundaw wakḇaḇir rarirya rofyor buk farkarkor Refo kuker snonggaku oso. Inja ro farkarkor anine, nari kawos moḇsa wafnoḇek ḇefarkor Refo Bedi isof ro dakḇebaptis.

3. Imnis Matius 28:19, 20 ya, rosai na ḇefarkor Refo ifrur ya insama dakḇebaptis?

³ Rofyor ḇefarkor Refo ya ḇyebaptis ḇaim, na ifrur kaku rosai fyarkor ro Refo ya. (Wasya Matius 28:19, 20.) Ifrur na ido, ine imnis raris ḇyai rodo kaku insama ḇyawes rum ro araref ḇedworen ro karui na bo, imnis raris ”snonkaku ḇefawi nananem” ro Yesus sararḇer ḇyena. (Mat. 7:24, 25; Luk. 6:47, 48) Rosai na kofrur fa kobukifnoḇek ḇefarkor Refo koḇedi? Mgorama kawos nyan rikyor anskoine.

4. Moḇsa kofnoḇek ḇefarkor Refo kobansya isof sakḇebaptis? (Mam kako kotak ” Wafnoḇek Ḇefarkor Refo ya fa Ifrur Roi Nane Wer”.)

⁴ Wafnoḇek ḇefarkor Refo Bedi fa ifrur roi iḇe ifrur ḇe ḇarpon na. Rosai ḇefnai fa ine fyandun? Wawasen pan wek oto fa imbe rwamura ḇe moḇ ḇebinggwan na. Insamaido wamor awer ma wambrus ḇa ro marandan ya, na wamnai koper ro moḇ ḇepyum ḇeḇeso na. Rarirya kako, ḇefarkor Refo kuker konya nya aw fa iḇe ifrur ḇepon na ma syewar fa ifrur kwar na ido, na fyawi ḇaḇebaptis ima roi bisa ifrur na. Buk kotak ”Wafrur Roi Nane Wer” ro syap Wasmai Payamyum Ḇekain Fyoro! Infa wafnoḇek ḇefarkor Refo Bedi fa isur ro rurya. Ro pupes farkarkor oser-oser Bedi, fasnaiḇair snar bisa ifrur farkarkor ḇyena kuker iso anun ro kotak ani. Imbe buk anun wer ido, bisa wafas ro bar ”Besena”. Isof ro kotak ani ido, Au kuker ḇefarkor Refo Bedi mumam kaḇer roi iḇe ifrur ḇepon na ma nari ifrur ro swaf iyama wer.

5. Imnis Markus 10:17-22 ya, rosai Yesus dor ro snon ḇenana oso fa dakfrur ya ma rosai ḇefnai ya?

⁵ Wafnoḇek ḇefarkor Refo Bedi fa ifrur fararwe imbude samswen ḇe i na. (Wasya Markus 10:17-22.) Yesus ifawi snar snonggaku ḇenana nari samswen kaku faro si fa sḇoḇ nana sena kam. (Mrk. 10:23) Ḇape, Yesus dor snon ḇenana ani fa fyadwer kenem ḇyena. Rosai ḇefnai ya? Snar Yesus iswar i. Fyorno ido, kofawi ḇefarkor Refo kobedi fandun fa fyadwer kenem ḇyena namnis kuker rosai fyarkor na, ḇape kodwarek manggun ko ma kokofenḇair yoḇ i ḇa snar komam fyasos i ḇaim fa ifrur roi ani. Imbo fyandun  swaf fa isawen kenem ḇeḇyeḇa ma nya kenem ḇebabo ya. (Kol. 3:9, 10) Ḇape kawos fasau na fa nasnaibos faro i ido, na fasau kaku fa fyadwer kenem ḇyena. Ma kofrur na ido, ine nfasnai koswar i.​—Mz. 141:5; Ams. 27:17.

6. Fainda risai kosmai ya fyor kobuk fakfuken ḇefrur fa kyara?

⁶ Fakfuken ḇefrur fa kyara iso fakfuken nari ḇefrur ḇefarkor Refo koḇedi ikofenḇair rosai ḇero karkara ḇyena faro roi fyarkor na. Buk fakfuken ḇerarya faro ḇefarkor ani insama wafawi rosai ikyar ma fyawi kaku na. Wafuken ker rosai ḇero karkara ḇyena ido, rofyor farkarkor ono nasya samswen ḇe i fa fyawi na ido, nari napyan fa wawos kuker i. Fakfuken ḇefrur snonggaku sya skara, nabor nasya ro syap Wasmai Payamyum Ḇekain Fyoro! Imnis raris, ro farkarkor 4 fakfuken isya ḇeradine ”Kwara ido, moḇsa na Yahwe ḇyaḇir rai fafisu kap snonsnon Ḇyedi?” Ma ro farkarkor 9, ”Rosai monda wamarisen wakofen ro nadi Bena?” Randak ya, ḇefarkor Refo Bedi imbude ikmom fa kyarem fakfuken ḇemnis rarirya na. Ḇape, bisa wafarkor i fa manggundi iso ḇemam knam ro mnuk-mnuk ma sonin anna.

7. Rariso koḇepake fawar ḇekaku na fa kofrur ḇefarkor Refo kobedi iryaḇ?

⁷ Rofyor ḇefarkor Refo Bedi ifawi kwar rosai ifrur kaku na, ḇuk fawar ro naek srar sya fa wafrur iryaḇ. Bisa wasrow vidio beser fawar ḇemnis na ro farkarkor ḇebor ro syap Wasmai Payamyum Ḇekain Fyoro!, isoine ro bar ”Swewar Kaku Wer” ḇaido ”Swewar Nabor Wer”. * Imnis raris ḇefarkor Refo Bedi iso fananjur ker ḇa ido, fasnai vidio Yahwe Iswar Aya, ḇero bar ”Swewar Nabor Wer” ro farkarkor 14. Ḇape waswarepen bukmnis i kuker ḇese sya awer, kuker wakofen radine, ”Bisa ifrur na ido, Au kako bisa wakfrur na.” Ḇefarkor Refo Bedi iso nari ḇekarauser ma ḇekarem ro manggundi. Inja, fyor myam vidio oser ya imnai, muyawos rariso snonggaku ḇero vidio ani ifrur rosai Refo fyarkor na. Imbude bisa mam faro mnuk oser ro Refo ḇefandun na ḇaido roi oso sifrur ro vidio ani. Besewar fa fasnaibos rariso Yahwe ifnoḇek snonggaku ani.

8. Moḇsa kofnoḇek ḇefarkor Refo kobedi fa iswar Yahwe I?

⁸ Wafnoḇek ḇefarkor Refo Bedi fa dakswar Yahwe I. Nyan ya rarso? Swewar swaf fa muyawos Yahwe rari-rari Ḇyena. Ḇefarkor Refo Bedi fandun fa fyawi snar Yahwe ima Allah bena aski ma Yahwe ḇyebarakas snonggaku ḇeswar I sya. (1 Tim. 1:11; Ibr. 11:6) Fasnai ḇe i fainda ḇyena rofyor isouser rosai Yahwe fyarkor na, ramnai wakofen ḇe i snar roi ani nfasnai Yahwe iswar i. (Yes. 48:17, 18) Iswar syadi faro Yahwe ido, nari imarisen kaku fa ifrur fararwe ḇefrur Yahwe imarisen.​—1 Yoh. 5:3.

9. Rosai ḇefnai fa asas ḇero Markus 10:29, 30 bisa nafnoḇek ḇefarkor Refo ya fa ibur roi riḇeso ismai na?

⁹ Insamaido bisa isur ma dakḇebaptis, ḇefarkor Refo fandun fa ibur roi ismai na. Raris snon ḇenana ḇeyap ḇepon ani, ḇefarkor Refo kobedi imbude fandun fa ibur roebor ismai na. Fararur ḇyena namnis kuker farkankin ḇero Refo ya ḇa ido, na syewar fararur ḇese. Ḇesewer ido, imbude na imnai ḇyebati kuker bati ḇesyom  Yahwe ḇa sya, ma nari kina ḇyansi sbinggwanburi snar simarisen Saksi Yahwe sya ḇa. Yesus ifawi roi sifrur nane napyan ḇa. Ḇape roi sifrur nane nadawer monda ḇa, snar Yesus ḇyeasas snonggaku ḇeso i sya nari ismai kina rohani ḇeswar i. (Wasya Markus 10:29, 30.) Moḇsa wafnoḇek ḇefarkor Refo sya fa saksmai barakas ḇepyum ine rai?

10. Rosai wafarkor ro Manuel fawar ḇyena ine?

¹⁰ Ḇebati faro ḇefarkor Refo Bedi. Ḇefarkor Refo Bedi fandun fa ḇyaḇir snar auma wafandun i. Rosai ḇefnai fa ine fyandun? Mam kada fawar ro Naek Manuel ḇeraker Meksiko rofyor fyarkor Refo kaker. Doḇe, ”Rofyor yafarkor ḇaime, na ḇebuk farkarkor ḇaido guru yedine ifuken abar yena. Inja na yamarisen yafawar rosai monda faro i. Yaḇaḇir iswar Aya kaku.”

11. Rosai fainda ya fyor kosewar swaf fa koḇebati kuker ḇefarkor Refo ya?

¹¹ Wasewar swaf fa ḇebati kuker ḇefarkor Refo Bedi, imnis raris Yesus ḇyebati kuker manfamyan ḇyesi. (Yoh. 3:22) Nasrow ido, wor ḇefarkor Refo ḇesur kwar ani ryama ḇe rum Bedi. Bisa wor i fa muyinem dur, munan kayam, ḇaido mumam JW Broadcasting^®. Ḇefarkor Refo ani nari imarisen, ma wor i fyor isya kyain ro manggundi, imnis raris rofyor bati ḇaido kina ḇyesi sisya sifrur ras ḇeba riḇeso ḇemnis ḇa kuker Refo fyarkor na. Naek Kazibwe ḇeraker Uganda doḇe, ”Yafarkor nabor ḇekur Yahwe fafisu yaḇebati kuker ḇebuk farkor Refo ya, inja na nufarkor Refo kayam monda ḇa. Rodine yamam Yahwe fyandun ma iswar kawasa Ḇyesi.”

12. Rosai ḇefnai kaku fa kor manbaryas ḇesesya fa siso ko fyor kobuk farkarkor Refo?

¹² Wor manbaryas ḇesesya fa sakso Au rofyor buk farkarkor Refo. Fyorno ido, kokara napyan syadi fa kobuk farkarkor ro manggun ko ḇaido kuker manbaryas oser irya ker. Ḇape, wor manbaryas ḇesesya fa sakso Au. Ine fyandun sasewar  rariryano, nari nun fainda faro ḇefarkor Refo kobedi. Naek Dmitrii ḇeraker Moldova doḇe, ”Ḇebuk farkarkor Refo ḇe Aya dor manbaryas oser-oser fa sakso ma sna nyan ḇardi fa sḇukifasnai roi oso. Inja bisa yamam farkarkor na ro nyan karkara nabore. Ma fyor yakso randak fananjur ya, yamai manggun ḇa kukro yamambir naek srar sya kwar.”

13. Rosai ḇefnai fa kanun ḇe ḇefarkor Refo koḇedi fa dakso fananjur ari na?

¹³ Wafnoḇek ḇefarkor Refo Bedi fa dakso fananjur ari. Rosai ḇefnai fa ine fyandun kaku? Snar Yahwe iwan kawasa Ḇyesi fa sfanjur kayamyam. (Ibr. 10:24, 25) Ono wer ido, naek srar koḇesya sima kina rohani koḇedi. Inja rofyor kofanjur kayamyam si, imnis raris kosya kan roḇean ḇeyanggir kayamyam. Fananjur ari ima nyan ḇefandun kaku insama ḇefarkor Refo koḇedi bisa dakḇebaptis. Ḇape randak ya, imbude syamswen ḇe i fa iso fananjur. Inja, moḇsa ḇukpyum syap Wasmai Payamyum Ḇekain Fyoro! fa bukfnoḇek i rai?

14. Rosai na kofrur na insama ḇefarkor Refo ya imarisen dakso fananjur ari?

¹⁴ Buk farkarkor 10 ro syap Wasmai Payamyum Ḇekain Fyoro! fa wafrur ḇefarkor Refo Bedi imarisen dakso fananjur. Fyor syap ine sisasyar na ḇaime, manbaryas ḇeḇeso ḇekir sya sor si fa sifrur ḇepon farkarkor ine. Bon ya, ḇefarkor Refo ḇebor sya simarisen sakso fananjur ari. Rarirya, wawaf awer isof ro farkarkor 10 ya imnai insape wor ḇefarkor Refo Bedi ḇe fananjur. Wor ma wanun ḇe i ḇesya kwar. Ḇefarkor Refo oser-oser sna samswen ḇardi. Inja, wasewar samswen rosai monda ḇefarkor Refo Bedi ismai na insama wafnoḇek i. Fyor iso fananjur ḇeri ḇa wafafko awer. Bekaḇaḇaḇ, ma wasusu awer.

15. Makakak rosai monda imbude ḇefarkor Refo ya ḇyaḇir na?

¹⁵ Waswarepen randak rofyor imbe wakḇe Saksi Yahwe na wakmgak rarirya ke? Imbude na kwara, ’Na jadi fa yaḇaryas ro rum ḇe rum ḇa.’ Ḇaido wamgak na kina ḇaido bati ḇesi sbinggwanbur Au ri. Iso roi wakḇaḇir ro randak ya ido, na wafawi rosai ḇefarkor Refo Bedi dakḇaḇir na. Yesus i kako ifawi kona sneḇaḇir ḇeraryan na. Ḇape, Yesus danun manfamyan ḇyesi insama makak ya nafrur awer si fa simnai suffarmyan ḇe Yahwe. (Mat. 10:16, 17, 27, 28) Rosai Yesus ifrur fa ifnoḇek si, ma moḇsa kakso Yesus nyan ḇyena rai?

16. Moḇsa kofarkor ḇefarkor Refo ani fa dakḇaryas rai?

¹⁶ Buk farkarkor ḇesya kwar ḇe ḇefarkor Refo Bedi fa dakkofenḇair rosai fyarkor kwar na. Ro fafisu iwara, Yesus manfamyan ḇyesi sakmgak kako fyor Yesus iwan si fa sbaryas. Ḇape Yesus ifnoḇek si kuker ikofen ḇe manfamyan ḇyesi faro mansei nari sbaryas ya ma rosai na sikofen na. (Mat. 10:5-7) Moḇsa wakso Yesus nyan ḇyena rai? Wakofenḇair ḇe ḇefarkor Refo Bedi faro mansei monda na byaryas ya. Wafuken pan i imbude oso isya myambir ḇo ḇemarisen ḇefawi roi Refo fyarkor na. Ramnai, fasnai nyan ḇepyan ḇe i fa fyawar na ḇe snonggaku ani. Ipyum ido, wafnoḇek i ḇeri ḇo mufrur fasasna kayam kuker mubuk bar ”Sia Soḇe” ma ”Sia Sifuken Au Radine” ḇero syap Wasmai Payamyum Ḇekain Fyoro! ḇefandun ya iso, wafarkor i fa byukpyum Refo ya kuker nyan ḇepyum ma kankarem ḇesamswen ḇa.

17. Rariso kobuk mnuk ḇero Matius 10:19, 20, 29-31 fa kobukifnoḇek ḇefarkor Refo koḇedi fa ikyar nako faro Yahwe I?

 ¹⁷ Wafnoḇek ḇefarkor Refo Bedi fa ikyar nako faro Yahwe I. Yesus dawos kakyar faro manfamyan ḇyesi snar Yahwe nari ifnoḇek si snar Yahwe iswar si. (Wasya Matius 10:19, 20, 29-31.) Wanunepen ḇefarkor Refo Bedi snar Yahwe nari ifnoḇek i kako. Rofyor benadi kuker i, wor Yahwe ifnoḇek i fa ifrur aw ḇyena. Rarirya ido, bisa fyarkor fa ikyar nako faro Yahwe. Naek Franciszek ḇeraker Polandia doḇe, ”Ḇebuk farkarkor Refo ya ḇyenadi ker Aya insama yafrur aw yena. Fafisu yamam Yahwe kyarem nadi ḇyena, mura Aya kako yakḇenadi. Yaḇaḇir fanfnoḇek ro Yahwe ḇyena fafisu yor cuti ro fararur ḇebabo yena insa bisa yakso fananjur ari ma yakso munara sarawrow.”

18. Rariso Yahwe sneḇaḇir Ḇyedi faro ḇebuk farkarkor Refo sya?

¹⁸ Yahwe iswar ma fyandun kaku faro ḇefarkor Refo koḇedi. I kako ḇyesyowi ma iswar faro ḇebuk farkarkor Refo sya, ḇefararur marḇak fa ḇefnoḇek snonggaku sya fa sfanam faro I. (Yes. 52:7) Ro kirine nwa ḇefarkor Refo ḇaim ido, bisa wakso manbaryas ḇese rofyor fyarkin farkarkor Refo. Rarirya, bisa wakfnoḇek ḇefarkor Refo sya fa sisur ma sakḇebaptis.