1. Jé beyé’é be Yésus be nga jô nkunda bôt éziñe na ô bo?

NKUNDA bôte, befam a binga, ô nga suane Jérusalem môs éziñ. Be mbe be so’o mesi mesi, be kobô’ô fe abui minkobô. Évemba jam é nga bobane môs ôte. Bejuif béziñe be nga taté na ba kobô minkobô mife. Bôte ve zu kam! Ve mam Bejuif bete be nga jô be, a mame nlômane Pierre ô nga kate bôte bese be mbe valé môs ôte, mme me nga dañe bo na be kam. Bôte bete be nga wô’ô na asu na be bi ényiñ, ba yiane buni Yésus Krist. Foé éte é nga nambe be aval e ne na, be nga sili Pierre a minlômane mife na: “Bia ye bo aya?” Nde Pierre a nga yalane be na: “Mi baptizôban mia bese.”​—Mam. 2:37, 38.

2. Jé bia zu yen ayé’é di? (Fombô’ô fôtô ya ékô’ôla.)

² Étua jam é nga bobane mvuse ya valé. Bôte bebé 3 000 be nga dubane môs ôte a bo beyé’é be Yésus. Nne ñhe ésaé ya bo beyé’é Yésus a nga jô Bekristene na be li’i be bo’ok, é nga taté valé. Ésaé éte é ngenan é boba’an azukui éyoñe ji. Ve melu mangane ma, bi vo’o kañete môt éyoñe te nje a dubane môs ôte ôbien. E wô’ô sili bengon, ngume mbu nge lôt, asu na ñyé’é Bible a duban. Nge wo wulu môt ayé’é, wo kôme yeme na asu na môt a duban, da sili abui ésaé. Ayé’é di, bia zu yen aval avé ô ne volô ñyé’é Bible wôé na a duban.

3. Matthieu 28:19, 20 a liti na beyé’é Bible ba yiane bo jé asu na be yaé nsisim a baptizôban?

³ Ôsusua na ñyé’é Bible a duban, a yiane taté tôñe mam  a maneya yé’é. (Lañe’e Matthieu 28:19, 20.) Éyoñe ñyé’é Bible a bo de, a funane “môt a ne fek” Yésus a nga jôô nye, nnye ate a nga taté fa’a si asu na a lôñe nda jé ako’o yôp. (Matthieu. 7:24, 25; Luc 6:47, 48) Aval avé ô ne volô ñyé’é Bible na a tôñe mam a yé’é? Bia zu yene mezene melal.

4. Aval avé bi ne volô beyé’é Bible na be yaé nsisim a nyoñe mbaptizô? (Fombô’ô fe nka’ale ô ne nlô ajô na “ Volô’ô beyé’é Bible na be bi minsôñan, a tôé mie.”)

⁴ Volô’ô ñyé’é Bible wôé na a bi minsôñan. Amu jé wo yiane de bo? Bi tame jô na wo kômesan ayabe dulu: Ô ne tyi’i na wé ke wo tebe bevôme wé yen abeñe biôm. Nalé é bo na dulu ete e yené wo tyi’ibi. Aval ete da da, éyoñe ñyé’é Bible a bili minsôñane mi ne tyi’ibi ya ji’a tôé, é yene na a ne ngule ya tôé nsôñane ya duban. Bela’ane kalate Bu’uban ényiñ nnôm éto! vôm a ne na “Jôm ô ne bo” asu na ô volô ñyé’é Bible na a yaé nsisim. Memane ya nlô ajô ôse, la’an a ñyé’é Bible wôé asu na a yen aval avé ngab éte é ne volô nye na a tôñe mam a te yé’é nlô ajô ôte. Nge ô bili nsôñan ôfe wo yi na ñyé’é Bible wôé a tôé, la’an a nye. Éyoñe mi maneya laan, éyoñe te nje a tili wô vôm a ne na “Nge ke.” Bo’ ô bela’ane ngab éte éyoñ ése ndemben ñyé’é Bible wôé a ye bi minsôñan a ne ji’a tôé, a mi mii nyoñe nye abui éyoñ.

5. Bela’ane Marc 10:17-22 asu na ô kate jame Yésus a nga jô nkukume môt éziñ na ô bo, a amu jé a nga jô nye nalé.

⁵ Volô’ô ñyé’é Bible wôé na a bo mintyendan ényiñe jé. (Lañe’e Marc 10:17-22.) Yésus a nga jô nkukume môt éziñe na ô bo beta ntyendan ényiñe jé. (Marc 10:23) A nga jô nye na a mane kuane biôme bié bise. Yésus a mbe a yeme’e na jam ete dé  bo angôndô ya ayaé asu môt ate, ve a nga jô nye na a bo de. Amu jé? Amu Yésus a mbe a nye’e nye. E wô’ô kui biyoñe biziñ na bi kate jô ñyé’é Bible na a bo mintyendane miziñ ényiñe jé, amu bia simesane na a ngenane teke bo nkômesane ya bo de. E wô’ô fo’o sili abui éyoñ asu na bôte béziñe be tyendé mbia mefulu map a jaé mfefé môt. (Beco. 3:9, 10) Ve nge bi ji’a kate nye mam a yiane tyendé ényiñe jé, nalé é volô nye na a ji’a bo mintyendane mia yian. Éyoñe wo bo nalé, wo liti na wo nyoñe ngab a nye.​—Bs. 141:5; Min. 27:17.

6. Amu jé bia yiane sili ñyé’é Bible minsili mia bo na a kulane mame me ne nye nlem été?

⁶ E ne mfi na bi bo bi sili’i beyé’é Bible minsili mia bo na be kulane mame me ne be nlem été. Bela’an avale minsili ete asu na ô yeme nge ñyé’é Bible wôé a kôme wô’ô mame mia yé’é, a nge a buni me. Nge ô bo de mban, nalé é bo wo tyi’ibi na ô laan a nye éyoñ a kate wô’ô ñye’elan éziñ. Kalate Bu’uban ényiñ nnôm éto! a bili avale minsili ete nya abuii. Éve’an é ne na, nlô ajô 4 ya kalate ate ô bili nsili ô too na: “Wo simesane na Yéhôva a wô’ôtan aya éyoñe bia belan éyôlé jé?” Nlô ajô 9 fe ô bili nsili ô too na: “Wo yi na ô ye’elan asu jé?” Atata’a, ñyé’é Bible wôé a ne yen ayaé ya yalan avale minsili ete. Ô ne volô nye na a fas a zene ya bifuse ya Kalate Zambe, a befôtô be ne kalate ate.

7. Aval avé bi ne belane minkañete mi bôte bevo’ asu na bi volô beyé’é Bible?

⁷ Éyoñe ñyé’é Bible a kômeya wô’ô jam a yiane bo, bela’ane minkañete mi bôte béziñ asu na ô ve nye nkômbane ya bo de. Éve’an é ne na, nge ñyé’é Bible wôé a kate tabe bisulan, ô ne nye liti vidéo a ne nlô ajô na Yéhôva a nyoñe njuk a ma, ngab é ne na “Mame mefe me ne volô wo” ya nlô ajô 14. Nya ajôô a ne na, ô ne yen avale minkañete ete abui minlô mejô ya kalate Bu’uban ényiñe nnôm éto!, ngab é ne na “Tuka’a fak” nge ke “Mam mefe me ne volô wo.” * Ve tabe’e ntyele ya ve’e ñyé’é Bible wôé a môte mfe. Te jô nye na: “Nge a nga kui na a bo de, wo fe ô ne de bo.” Jô’é na ñyé’é Bible émien a yene nalé. Ô ne ngôné mame méziñ me nga volô môte ya vidéo na a tôñe miñye’elane ya Bible. Ô ne tote éfuse ya Kalate Zambe éziñe nge ke ngume jam éziñe môt ate a nga bo. Éyoñ ése ô ne ngule ya bo de, liti’i aval avé Yéhôva a nga volô môt ate.

8. Aval avé bi ne volô beyé’é Bible na be tu’a nye’e Yéhôva?

⁸ Volô’ô ñyé’é Bible wôé na a nye’e Yéhôva. Aval avé ô ne bo de? Jeñe’e na ô ngôné mbamba mefulu me Yéhôva éyoñ ése mia yé’é. Volô’ô ñyé’é Bible wôé na a yene na Yéhôva a ne Zambe ya mevak, a na A su’u ba bese ba nye’e Nye. (1 Tim. 1:11; Beh. 11:6) Liti’i nye bibotan é bi nge a tôñe mam a yé’é, a na bibotane bite bi ne ndeme ya nye’ane Yéhôva. (És. 48:17, 18) Yeme’e na ñyé’é Bible wôé é dañe bi nkômbane ya bo mintyendane mia yian ényiñe jé, nge nye’an a nye’e Yéhôva ô ne ngul.​—1 Jean 5:3.

9. Bela’ane Marc 10:29, 30 asu na ô liti jam e ne volô ñyé’é Bible na a lume mame méziñe mvus asu na a duban.

⁹ Ñyé’é Bible a yiane nyum émien mam méziñ asu na a duban. Aval ane nkukume môte Yésus a nga jôô wô, e ne sili na  beyé’é Bible be kandan a biôme bi mo biziñ. Nge asu ésaé dap da lu’ane ki a miñye’elane ya Bible, ba yiane jeñ asu ésaé afe. E ne fe sili na abui ya be be e kandan a bemvôé bap ba kañe ki Yéhôva. Bevo’o ki be ne li’i étam amu bivuvumane biap bia vini Bengaa be Yéhôva. Yésus a nga jô na da ye bo ayaé asu bôte béziñe na be bo avale mintyendan ete. A nga ka’ale na, bôte bese ba tyi’i na ba tôñe nye, ba ye ke same môs éziñ, ve ba ye bi beta ma’an: Beta nda bôte ya nsisim. (Lañe’e Marc 10:29, 30.) Aval avé ô ne volô ñyé’é Bible wôé na a bu’ubane mbamba das ate?

10. Jam e nga kui Manuel da ye’ele bia jé?

¹⁰ Bo’o mvôé ñyé’é Bible wôé. E ne mfi na ô liti ñyé’é Bible wôé na wo nyoñe ngab a nye. Amu jé? Tame yene jame Manuel a jô. Mojañ ate a nyiñe Mexique. A simesan éyoñ a mbe ñyé’é Bible a jô’ô na: “Ôsusua na bia taté ayé’é Bible ese, ñye’ele wom a mbe a taté’é ma sili nge me ne mvo’é. Nalé a mbe a bôé ma nleme si, a ve ma nkômbane ya laane nye mame mese ma yi. Me mbe me kôme’e wô’ôtane na a nye’e ma.”

11. Amu jé e ne mfi na bi lôt éyoñ a beyé’é Bible bangan?

¹¹ Lôte’ éyoñ a beyé’é Bible bôé avale Yésus a mbe a bo’ok. (Jean 3:22) Nge ñyé’é Bible wôé a tatéya na a bo mintyendan ényiñe jé, ô ne bañete nye nda jôé na a zu di éfuse mbôñ, nge ke yene bingeñgeñ ya ngon. Ñyé’é Bible wôé a ne wô’ô avale mam ete mvaé e dañedañ biyoñ bemvôé bé a bivuvumane bié bia jeme mebô’ô ya émo. Kazibwe, mojañ éziñ a nyiñ Ouganda, a jô na: “Ane ô vaa ayé’é dam, ma simesane na me nga yé’é fe abui mam éyoñe me mbe me lôte’ éyoñ a ñye’ele wom. Me nga yen abim avé Yéhôva a nyoñe ngab a bebo bisaé bé, a aval avé be mbe mevak. Ma fe me mbe me yi’ na ényiñ jam é bo nalé.”

12. Amu jé e ne mfi na bi bo bi kele’ a bobejañe mevale meval éyoñe bia ke bo môt ayé’é?

 ¹² Bañete’e bekañete mbamba foé befe éyoñe wo ke bo ayé’é. Biyoñ biziñ, bi ne yene tyi’ibi ya ke étam, nge ke a ngume môt éziñ éyoñ ése bia ke bo môt ayé’é. Ve to’o bia yene jam ete tyi’ibi, bii dañe volô ñyé’é Bible wongan nge bia bo na a yene mesu mefe. Dmitrii, mojañ éziñ a nyiñe Moldavie, a jô na: “Môt ase ñye’ele wôm a mbe a za’a a nye a mbe a ye’ele’e ma mfefé jam. Nalé a nga volô ma na me yene mame mefe me ne tyendé ényiñe jam. Nde fe na, me nji dañe ko woñ éyoñ ôsu me nga tabe ésulan, amu me mbe me nga yem abui bobejañ a besita.”

13. Amu jé bia yiane volô beyé’é Bible na be tabe bisulan?

¹³ Volô’ô ñyé’é Bible wôé na a tabe bisulan. Amu jé jam ete e ne mfi? Amu Yéhôva a nga jô bebo bisaé bé na be bi fulu ya sulane vôme wua. A ne ngabe jia ya ékaña’a jangan. (Beh. 10:24, 25) Nde fe, bobejañ a besita be ne nda bôte jangan ya nsisim. Éyoñe bia tabe bisulan a be, a ne ve ane bi too nda jia, bi ja’a tebele wua. Éyoñe wo volô ñyé’é Bible wôé na a tabe bisulan, wo volô nye na a bo beta adaa abo asu mbaptizô. Ve jam ete e ne bo ayaé asu dé. Aval avé kalate Bu’uban ényiñ nnôm éto! a ne volô ñyé’é Bible wôé na a dañe minju’u mise mi ne kamane nye na a tabe bisulan?

14. Aval avé bi ne ve beyé’é Bible nkômbane ya tabe bisulan?

¹⁴ Bela’ane nlô ajô 10 ya kalate Bu’uban ényiñ nnôm éto! asu na ô ve ñyé’é Bible wôé nkômbane ya tabe bisulan. Ôsusua na ba kuli kalate ate, bobejañe ya Tin Ékôan be nga taté sili biwôlô bi bobejañe biziñ na bi belane nye a beyé’é Bible bap. Bekañete mbamba foé bete be nga jô na ékpwelé éte é ne angôndô ya akap, a na é nga volô beyé’é Bible bap na be taté na ba tabe bisulan. E ne été na bi nji yiane yange nlô ajô 10 asu na bi taté na bia bañete ñyé’é Bible wongan ésulan. Ajô ete, jika’a bañete nye, a bo’o de mban. Beyé’é Bible bese be nji bi avale minju’u da. Ajô te, jeñe’e na ô tu’a yeme miñyiane mi ñyé’é Bible wôé, a fas aval avé ô ne volô nye. Te ve’ele bili ate’e nge wo yene na ô jaéya bañete ñyé’é Bible wôé bisulan, ve teke ndoñ. Bo’o ôjibi a mbane ya bañete nye.

15. Jé é ne bo na beyé’é Bible be ko woñ?

¹⁵ Éyoñ ô mbe ô ngenane ñyé’é Bible, ye wo fe ô nga ko woñ ya bo Ngaa Yéhôva? Éko éziñ ô nga wô’ôtane ve ane wo ye ke bo ngule ya kañete môs éziñ. Nge ke na ô mbe ô ko woñ na bivuvumane biôé a bemvôé bôé bé tibili wo. Nge wo fe ô nga bi avale biyebe ete, ô ne yeme tebe été beyé’é Bible bôé. Yésus a mbe a yeme’e na bôte béziñe bé ko woñ ya bo beyé’é bé. Jôme te nje a nga kate beyé’é bé na be bo teke jô’é na woñ ô kamane be na be bo Yéhôva ésaé. (Mt. 10:16, 17, 27, 28) Aval avé Yésus a nga volô beyé’é bé na be dañe woñe wop? Aval avé ô ne tôñ éve’ela jé?

16. Aval avé bi ne yañele beyé’é Bible asu ésaé nkañete?

¹⁶ Yañele’e ñyé’é Bible wôé ôte’ete’ ôte’etek asu na a kate bôte bevo’o mam a yé’é. Beyé’é be Yésus fe be nga yiane ko woñ éyoñ a nga lôme be na be ke kañete. Ve Yésus a nga volô be. A nga kate be vôme ba yiane kañete, a foé ba yiane kañete. (Mt. 10:5-7) Aval avé ô ne vu Yésus? Volô’ô ñyé’é Bible wôé na a yeme vôm a  ne kañete. Sili’i nye nge a yeme môte mfe mejô me Zambe me ne volô mfa’a éziñ. Mvuse ya valé, bo’ané mone sisia asu na ô liti nye aval avé a ne kañete môt ate tyi’ibi. Nge nalé a yiane, ô ne fe belane kalate Bu’uban ényiñ nnôm éto! vôm a ne na “Bôte béziñ ba jô na” a “Môt a ne sili émien na.” Éyoñe wo yañele ñyé’é Bible wôé, jeñe’e na ô liti nye aval avé a ne belane Bible asu na a ve biyalane bi ne tyi’ibi ya wôk, évôvoé été.

17. Aval avé bi ne belane Matthieu 10:19, 20, 29-31 asu na bi volô beyé’é Bible na be tabe Yéhôva mebun?

¹⁷ Volô’ô ñyé’é Bible wôé na a tabe Yéhôva mebun. Yésus a nga jô beyé’é bé na Yéhôva é volô be amu A nye’e be. (Lañe’e Matthieu 10:19, 20, 29-31.) Kate’e ñyé’é Bible wôé na Yéhôva é volô fe nye. Ô ne volô ñyé’é Bible wôé na a tabe Yéhôva mebun nge wo kobô ajô minsôñane mié éyoñe mia nye mia ye’elane Yéhôva nsamba. Franciszek, mojañ éziñ a nyiñe Pologne, a jô na: “Ñye’ele wom a mbe a kobô’ô ajô minsôñane miam éyoñ a mbe a ye’ela’an. Éyoñe me nga yen ane Yéhôva a yalane meye’elane mé, mamiene fe me nga taté na ma ye’elane Yéhôva. Me nga yen ane Yéhôva a volô ma éyoñe me mbe me yiane’ ke ye’elane masa wom na a ve ma fane ya tabe bisulan a beta bitôkan.”

18. Aval avé Yéhôva a yen ésaé beye’ele Bible ba bo?

¹⁸ Yéhôva a nye’e beyé’é Bible nya abuii. A wô’ô fe mvaé éyoñ a yene ngul ése beye’ele ba ve asu na be volô bôte na be subu nye bebé. Jôme te nje be ne édima mise mé. (És. 52:7) Nge ô nji bi môte wo ye’ele Bible, ô ne volô beyé’é Bible bevo’ éyoñe wo ke tabe meyé’é map.