1. Ka hariñagubei lani Hesusu disipulugu houn saragu gürigia lun hadügün?

AWEIYASUHATIÑA meha saragu wügüriña hama würiña Herusaléun. Lídangiñetiña meha saragu ageiraü ani ámuñegueinarügüti meha hererun. Aba lasuseredun aban katei hanarimeti: sódini, aba hagumeserun fiu huríu ayanuha lidan ámuñegueinarügü iñeñein hou gürigia hagía. Lau sun lira, mama hayanuha amu iñeñein aweiridagüdübarun hanigi gürigia hagía, le aweiridagüdübarun hanigi le hariñagubei huríu luma le lariñagubei apostolu Féduru. Lidan burí le lariñagubei houn, ariñagati luagu gayara lan hasalbarun o hesefurun anhein híchiga hafiñen luagu Hesukrístu. Hingí lumutu dimurei ligía hanigi darí lun hálügüdahan: “Kaba san wadüga?”. Aba lóunabun Féduru: ‘Badisei humá kada aban hídangiñe’ (Adü. 2:37, 38).

2. Kaba san wariha lidan aturiahani le? (Ariha humóun iyawaü to luáguboun tidáü garüdia).

² Hanarimeti le asuseredubei weyu ligía, ladüga badiseitiña hóugiñe 3.000 gürigia, ítara liña hachülürün lun lani hamá Hesusu disipulugu. Ítara liña lagumeserun óunwenbu dasi le hadügübei lánigu Hesusu disipulu le lariñagubei houn lun hadügün. Chülüti dasi le darí lumoun sígulu wein aban. Lidan wadaani, úati buídurügü lan aban oura lun gayaraabei lan aranseeli lan aban gürigia lun labadiseirún. Lun gayara lan líderawagun aban aturiahati lun lachülürün lidoun badisei, másiñati mégeiwa lan kei burí hati, aban irumu o lóugiñe. Mégeiwati saragu áfaaguni lun hadügǘn disipulugu, subudi hamuti ha arufudahabaña tídangiñe Bíbülia katei le. Lidan aturiahani le, wakutihabei ka lan gayaraabei wadügüni lun wíderaguniña aturiahatiña Bíbülia lun habadiseirún.

3. Según Matéu 28:19, 20, ka lunbei ladügüni aturiahati lun labadiseirún?

³ Lubaragiñe labadiseirún aban aturiahati, mosu lawinwanduni le tarufudahabei Bíbülia (aliiha huméi Matéu 28:19, 20). Dan le ladügüni ítara, ítara liña kei aban “wügüri gunfurandati” le uágubei labahüdahan Hesusu le achíahabei hulili luagu dübü derebuguti lun labunún luban (Mat. 7:24, 25; Luk. 6:47, 48). Ariha wamá ǘrüwa katei le gayaraabei wadügün lun lawinwanduni aturiahati le lafurendeirubei.

4. Ida luba wíderaguni aturiahati lun lachülürün lumoun badisei? (Ariha huméi rekuáduru “ Íderagua waméi aturiahati lun libihini le úagubei láfaagua”).

⁴ Íderagua waméi aturiahati achülüra lumoun badisei. Ka uagu súdini lubéi katei le? Samina wamá luagu hénpulu le: anhein wadügüba lubéi aban aweiyasuhani díseti, háfuga wanúadirun lun wararamun lidan burí ítaga fulasu le hínsiñeti woun. Dan wadügüni ítara, masandi wamuti lidise aweiyasuhani. Dan le láfaagun aturiahati libihini liraüraü katei le lemegeirunbei lau lóufudagun ani ibihaléi, háfuga ménrengunbei lachülürün lumoun badisei. Gayaraati wayusuruni rekuáduru “Áfaagua humá lun” tídangiñe líburu Winwan humá lau ugundani lun wíderaguni aturiahati lun lawanserun. Lárigiñe wagumuchuni kada arufudahani, afuranguagüda waméi lun ka lan lánibei áfaaguni luma le wafurendeirubei. Anhein busén wabéi láfagun luagu amu katei, ínchaha waméi lun labürüdüni lidan fánreinti “Gayaraati giñe”. Meferidira waméi chansi le lidan waturiahan, íderagua waméi aturiahati lau wáguyuguagüdüni le gayaraabei libihini lau lóufudagun luma le gayaraabei libihini ámuñegü.

5. Según le lariñagubei Márükosu 10:17-22, ka lariñagubei Hesusu lun wügüri le rísibei, ani ka uagu?

⁵ Íderagua huméi aturiahati adüga asansiruni (aliiha huméi Márükosu 10:17-22). Ariñagati Hesusu lun aban gürigia rísiti lun laluguruni  sun lúmati, lau sun subudi lani hénrengubei lan lun (Mar. 10:23). Ka uagu lariñagei le lun? Ladüga línsiñe lun. Anihein dan hénrengu lan woun wariñaguni lun aturiahati lun lawinwanduni le lafurendeirunbei, ladüga saminatiwa maranserungili lan. Inarüni barǘ lan dan, lun wasansiruni wagaburi luma lun wadügün burí fui sánsiguaü lidan wabagari (Kol. 3:9, 10). Gama lumoun, ánhawa ayanuha luagu katei le, gayaraabei ladügüni asansiruni lau lóufudagun. Ánhawa ayanuha lun ítara, warufudubei hínsiñe lan gürigia le unbei wíchiga aturiahani woun (Sal. 141:5; Ari. 27:17).

6. Ka uagu súdini lubéi lun wadügün álügüdahani luagu le lasaminarubei aturiahati?

⁶ Súdiniti lun wálügüdaguni aturiahati ka lan lisaminanbei. Líderagubadiwa álügüdahani burí le, asubudirei ka lan gunfuranda lubéi luma ka lan lafiñerubei. Anhein hechu wabéi adügei, ménrenguntimabei woun lun wayanuha luagu burí katei létima hénrengubei ámuñegü. Dariwati saragu álügüdahani tidan líburu Winwan humá lau ugundani luagun ka lan uagu hasaminara gürigia. Kei hénpulu, álügüdahati arufudahani 04: “Ida liña funa san lasandiragun Heowá lungua dan le hayusuruni liri?”. Darí wamuti giñe álügüdahani le lidan arufudahani 09: “Ka hamuga katei uágubei habusenra hafurieidun?”. Dan lagumeserun, másiñati megei lan aturiahati líchugun dan lun lun lasubudiruni kaba lan lóunabagüle lun álügüdahani burí le. Gayaraati giñe wíderaguni asaminara luagu burí bérusu tídangiñeti Bíbülia luma tuagu iyawaü to áfuachuboun lidan aturiahani.

7. Ida luba wayusurun sügǘ lánina ibagari lun wíderaguni aturiahati?

⁷ Dan le gunfuranda lani aturiahati kaba lan ladüga, gayaraati wínchahani lun layusuruni le furendei láalibei lidan libagari. Anhein hénrengu lubéi lun lidin adamuridagua, gayaraati warufuduni bidéu le gíribei Bereseti san Heowá nau, le lídanbei fánreinti “Furendei humá amu katei” le áfuachubei lidan arufudahani 14. Gíbeti arufudahani burí tidan líburu Winwan humá lau ugundani anihein burí sügǘ lidan fánreinti “Sigí humá afurendeira” o lidan “Furendei humá amu katei”. * Mariñaga wamá lun aturiahati: “Anhein gayara lubalin ítaga gürigia, gayara hubéi giñe”. Ígira waméi lun ligía lan asubudirei katei le lungua. Ariñaga waméi lun ka lan íderagubalin gürigia le lídanbei bidéu lun lawinwanduni le tariñagubei Bíbülia, kei aban bérusu súdiniti o somu katei le ladügübei. Sagü wadarirun chansi íderagua waméi aturiahati arihei ida liña lan líderaguniña Heowá gürigia.

8. Ida luba wíderaguni aturiahati lun línsiñedun Heowá lun?

⁸ Íderagua waméi aturiahati lun línsiñedun Heowá lun. Sagá wamá dan lun wayanuha luagu ligaburi Heowá. Íderagua waméi aturiahati arihei aban lan Bungiu gúndaati Heowá ani anihein lan ñein súnwandan houn ha hínsiñehabutiña lun (1 Tim. 1:11; Ebü. 11:6). Arufuda waméi lun ida luba lan lasagarun buiti dan le lawinwanduni le lafurendeirubei ani afuranguagüda huméi aban lan lídangiñe ínsiñeni le larufudubei Heowá luagu (Isa. 48:17, 18). Eibu laganwoundun ínsiñeni le lasandirubei luagu Heowá, éibutimaame labusenrun ladügüni asansiruni le lemegeirunbei lidan libagari (1 Huan 5:3).

9. Según Márükosu 10:29, 30, kaba íderaguei aban gürigia lun ladügün sákürifisiu lun gayaraabei lan labadiseirun?

⁹ Lun gayara lan labadiseirún aturiahati lunti láfaagun saragu. Ítara kei wügüri le rísibei le buga uágubei wayanuha lidan párafu 5, másiñati  mosu lan hígiruni aturiahatiña línsiñe umegeguni houn. Másiñati giñe mosu lan hígiruni wadagimanu le ñein habéi anhein múaran lubéi luma le tarufudahabei Bíbülia. Gayaraati mosu lanme giñe hadüraaguni hamadagua hama gürigia ha máhuduragunbaña lun Heowá. Añahein amu híchuguña haduheñu lidere dan houn ha magundanbaña hau gefentiña luagu Heowá. Ariñagati Hesusu añaheinbaña lan gürigia güreweibei lan houn hadügüni sákürifisiu burí le. Gama lumoun füramaseti labinirubaña lan Heowá lani disipulugu hau íbirigu ha ítarabaña houn kei iduheñu (aliiha huméi Márükosu 10:29, 30). Ida luba wíderaguniña aturiahatiña lun hasagarun buiti lídangiñe lubuidun idewesei le?

10. Ka wafurendeirubei lídangiñe le lariñagubei Manuel?

¹⁰ Adüga wamá umadaguaü luma aturiahati. súdiniti lun warufuduni lun berese wamá lau. Ka uagu? Ariha waméi le lariñagubei aban íbiri Méhikuna le gíribei Manuel layanuhaña luagu meha dan le laturiahanbarun Bíbülia: “Lubaragiñe meha lagumeserun íbiri le íchugubei aturiahani nun íchiga aturiahani, aba burí lálügüdünina ida niña lan. Íderagua lumutina katei le lun darangilu nan luma lun nabahüdaha furumiñeguarügü katei lun. Sandí numuti meha luagu berese lan nau”.

11. Ka uagu buidu lubéi lun wásügürün dan hama aturiahatiña?

¹¹ Ítara kei meha lásügürün Hesusu dan hama lani disipulugu, sügǘ wamá giñe dan hama gürigia ha únbaña wíchiga aturiahani (Huan 3:22). Anhein lawanseruña lubéi aturiahati, gayaraati wagunbirahani wábiñoun ata gafe, eiga ó arihei programa le áfuridubei sagü hati lidan JW Broadcasting. Chóuruti leteingirubadiwa lan danme wagunbirahani lídantima lidaani fedu, dan le hasandirun hábuguarügüñanu lan. Ariñagati Kazibwe le awinwandubei Uganda: “Furendeitina saragu katei luagu Heowá dan násügürün dan luma íbiri le íchugubei aturiahani nun kéisigubeirügü dan larufudahan nun tídangiñe Bíbülia. Ariha numuti lueirin lebereserun Heowá hau lumutuniña luma ugundani le hasandirubei. Ligía meha nabusenrubei”.

12. Ka uagu buidu lubéi wanügün ámuñegueinarügü íbirigu dan woudin íchiga aturiahani?

 ¹² Agunbiraha wamaña ámuñegueinarügü íbirigu íchiga aturiahani. Másiñati ménrengun lan woun woudin wábuguarügü o luma ligiaméme íbiri. Íbini anihein lan dan buiti warihin lun, lasagaratimaba aturiahati buiti dan le wanügün ámuñegueinarügü íbirigu wámagua. Ariñagati Dimitri le awinwandubei Molüdáwia: “Kada íbiri le ñǘbuinbei luma numaisturun ámuñegueinarügüti ligaburi hafuranguagüdüni katei. Arufudati le nun, lun narihini katei lidan ámuñegueinarügü igaburi. Íderagua lumutina le lun maweirin lan nasandirun busiganu dan le nídinbei adamuridagua furumiñe, ladüga subudihaña saragu hádangiñe íbirigu dandu wügüriña kei würiña”.

13. Ka uagu lunti lubéi wíderaguni aturiahati lun lidin adamuridagua?

¹³ Íderagua waméi aturiahati lun lidin adamuridagua. Ka uagu? Ligía aban lídangiñe gumadi le líchugubei Heowá woun, aban giñe fánreinti lídangiñe wáhuduragun lun (Ebü. 10:24, 25). Lanwoun lira, ítara haña wíbirigu woun kei waduheñu lidan wáhuduragun lun Heowá. Dan le hama wamá lidan adamuridaguni, kéigubeirügü hamuga lídanñadiwa lan aban adineruni úara hama. Dan le wíderaguni aturiahati lun labasiihan adamuridagua wíderaguñein lun ladügün aban katei súdiniti lun labadiseirun. Lau sun lira, gayaraati ñeinbei lan somu katei adügüti lun madamuridagun lan. Ida luba wayusurunu líburu Winwan humá lau ugundani lun wíderaguni?

14. Ida luba wínchahani aturiahati lun labasiihan lidoun adamuridaguni?

¹⁴ Gayaraati wayusuruni aturiahani 10 tídangiñe líburu Winwan humá lau ugundani lun wínchahani aturiahati lun ladamuridagun. Lubaragiñe táfuridun líburu to, amuriahóuati hama íbirigu ha lǘhaña lidan inarüni lun hakutihani aturiahani le hama ha aturiahabaña hama, ani buiti lidin houn. Ítara liña, moun lumuti wagurabaha wachülürün lidoun aturiahani 10 lun wagunbirahani aturiahati lun lidin adamuridagua. Agunbiraha wamaña lau lóufudagun ani adüga waméi súnwandan. Kada aban hádangiñe ámuñegueinarügüti haturobulin. Ligíati, teni wamá lun le lemegeirun kada aban, samina wagíame ida luba lan wíderaguni. Mábürüha lan warüna ánhaña magumeserun adamuridagua lau lóufudagun. Gaguraasun wamá ani sigí wamá agunbirahaña.

15. Ka burí katei adügübei lun lanufudedun aturiahati?

¹⁵ Anhein haritagua wamagili lubéi dan le wagumeserubei aturiahoun Bíbülia, sanditiwa meha san anufudei lun wadügagun woungua gefentiñame luagu Heowá? Másiñati saminatiwa lan meha máfuridunbadiwa lan apurichiha muna tuagu muna. Másiñati giñe hanufudedagüda lumutiwa lan meha mínsiñebei lan houn waduheñu o houn wamadagu. Lidan kesi le, gunfuranda wamuti le lasandirubei aturiahati. Ariñagati Hesusu ñéinbaña lan gürigia asandirutiña anufudei le. Ruti le gurasu houn lani disipulugu lun mígiraguagüdün hamá houngua luéi lerederuni anufudei heseriwidun lun Heowá (Mat. 10:16, 17, 27, 28). Ida liña líderaguniña agañeirei anufudei? Ani ida luba wadügüni ligiaméme?

16. Ida luba wíderaguni aturiahati lun layanuha luagu le lafurendeirubei?

¹⁶ Arufudaha wamá murusun murusun lun aturiahati lun layanuha luagu le lafurendeirubei. Chóuruti belú lan anufudei houn lani Hesusu disipulugu dan le lóunahanbaliña apurichiha. Lau sun lira, íderagua lumutiña lau lariñagun houn kátaña lan lúnbaña hapurichihan luma kaba lan hariñaga (Mat. 10:5-7). Ida luba wáyeihani? Lau wíderaguni aturiahati arihei kaba lan un lapurichiha. Kei hénpulu, gayaraati  wálügüdüni anhein anihein lubéi somu gürigia le gayaraati lahuudun tarufudahan Bíbülia lun. Lárigiñe, íderagua waméi aranserei le gayaraabei lariñaguni lidan aban igaburi le ménrengunti lafuranguagüdüni inarüni. Danme gayara lan wasayahan luma, gayaraati wayusuruni fánreinti “Le hariñagubei fiu gürigia” luma “Álügüdahani le hadügübei fiu gürigia” tídangiñe líburu Winwan humá lau ugundani. Lidan awanha lan asayaha luma, teni wamá lun warufudahan lun ida luba lan layusurunu Bíbülia lun gayara lan lóunabuni álügüdahani lau lumenrengun.

17. Ida luba wayusuruni Matéu 10:19, 20, 29-31 lun wíderaguni aturiahati afiñera luagu Heowá?

¹⁷ Íderagua waméi aturiahati afiñera luagu Heowá. Ariñagati Hesusu houn lani disipulugu hínsiñe hamá lun Heowá ani ligía líderagubaña lubéi (aliiha huméi Matéu 10:19, 20, 29-31). Haritaguagüda waméi giñe aturiahati ñeinbei lan Heowá lurugabu. Gayaraabei giñe warufudahan lun lun lafiñerun luagu Heowá lau wafurieidun luma libügürü le labusenrubei libihin. Ariñagati Franciszek le awinwandubei Polonia: “Dan lafurieidun le íchugubei aturiahani numa, súnwandan layanuha luagu le nabusenrubei nibihin. Lau narihini lóunabuni Heowá lafurieidun, aba giñe nagumeserun afurieida. Sanditina íderagua láadina lan Heowá dan namuriahanbei luma lun lichugún üma nun lidan iseri nuadigimari lun gayaraabei lan nidin adamuridagua luma lun nidin lidan adamurini”.

18. Ida liña lasandiragun Heowá lungua lau sun le hadügübei íbirigu ha arufudahabaña tídangiñe Bíbülia?

¹⁸ Guentoti, anhein mama lubéi wíchuguña aturiahani tídangiñe Bíbülia? Gayaraagili san wíderaguniña aturiahatiña lun habadiseirun? Anha. Ida? Lau woudin úara hama amu íbirigu íchiga aturiahani. Furanguti warihini berese lan Heowá hau ha aturiahabaña Bíbülia wama. Gebegiti giñe sun le wadügübei lau wíderaguniña lun hayarafadun lun ani hínsiñetiwa giñe lun ladüga wíderaguniña (Isa. 52:7).