1. Ni enki eki abantu b’omu kinyigana c’okubanza bagambirwe kukora?

ABANTU bingi harimu abashija n’abakazi abari kuruga omu mahanga mingi kandi abari kugamba endimi ezitari kushushana bakaterenira hamwe. Eryo izoba hakabaho ecokutangaza. Bamwe omu Bayudaya bakabasa kugamba endimi z’abanyamahanga ababire babatayayire! Eco kikabatangaza munonga, konka ebi Abayudaya babagambire n’eby’entumwa Perero yabagambire bikakizaho kubatangaza. Obwo butumwa bukaba nibugamba ku babire barije kuhonoka bayereka ku nibikiriza Kristo. Bukahika abantu aha mutima catuma babuza ngu: “Tugire tuta?” Bakagambirwa ngu: ‘Mwena mubatizibwe.’—Byak 2:37, 38.

2. Ni enki eki twaza kushwijuma omuri eki kicweka? (Reba ekishushani c’aha kishembeso.)

² Ecabireho bwanyima na co nikitangaza! Abantu abari kuhika aha 3000 bakabatizibwa ahari eryo izoba baba abegi ba Kristo. Eyo akaba eri entandikiro y’omurimo g’okuhindura abantu abegi ogu Yesu yabire aragire abakurasi beye ngu bakore. Abakurasi beye bacakora ogo murimo n’omuri obu bwire. Omuri obu bwire tituri kubasa kuhika turi kuhindura omuntu akahika aha kubatizibwa omu bwire buce. Nikibasa kutwara amezi mingi ninga shi omwaka guri kurenga kugira ngu omwegi ahike aha kubatizibwa. Omurimo g’okuhindura abantu abegi nigwetenga amani mingi. Kandi haba hine abegi abu ori kwegesa omuri obu bwire eco nokimanya. Omuri eki kicweka, twaza kushwijuma ebi ori kubasa kukora kugira ngu okwase omwegi wawe wa Bibuli kuhika aha kubatizibwa.

3. Nk’oku biri kugambwa omuri Matayo 28:19, 20, ni enki eki omwegi witu wa Bibuli ashemerire kukora kugira ngu atunguke ahike aha kubatizibwa?

³ Omwegi wa Bibuli atakabatizibwe, ashemerire kubanza kuta omu nkora ebi Bibuli eri kwegesa. (Shoma omuri Matayo 28:19, 20.) Omwegi witu wa Bibuli yata omu nkora ebi ari kwega naba nk’‘omuntu w’obwenge’ omu cokureberaho ca Yesu owarimire hare akombeka enju yeye aha rukiri. (Mat 7:24, 25; Luk 6:47, 48) Ni bata oku turi kubasa kukwasa omwegi witu wa Bibuli kuta omu nkora ebi ari kwega? Reka turebe obuhabuzi bushatu.

4. Ni bata oku turi kubasa kukwasa omwegi wa Bibuli kutamu amani kugira ngu ahike aha kubatizibwa? (Nambwenu reba akashanduku akari kugira ngu, “ Kwasa omwegi wawe kweteraho entego n’okuzihikaho.”)

⁴ Kwasa omwegi wawe kweteraho entego. Ahabw’enki oshemerire kukikora? Yetegereze eki cokureberaho: Waba ori kutambura orugendo ruringwa, nobasa kusharamu kuguma ori kwemerera omu myanya mirungi etari emwe. Eco nikituma orugendo rwaba rugufu. Ni co kimwe, omwegi wa Bibuli yayeteraho entego ezi ari kubasa kuhikaho, nahika aho areba ku ari kubasa n’okuhika aha ntego y’okubatizibwa. Kugira ngu okwase omwegi wawe kweteraho entego, koresa akashanduku akari kugira ngu: “Entego,” akari omu kitabo Shemerererwa amagara ebiro byona! Aha kuhendera buri ishomo oganire n’omwegi wawe oku entego yeye erije kumukwasa kuta omu nkora ebi ari kwega. Waba ori kwenda ngu omwegi wawe agire eyindi ntego, oyihandike ahari kugira ngu: “Ebindi.” Burijo guma okorese ako kashanduku kugira ngu oganire n’omwegi wawe aha ntego zeye eziri kumara obwire buce n’eziri kumara obwire buringwa.

5. Nk’oku biri kugambwa omuri Mako 10:17-22, ni enki eki Yesu yagambire omushija w’omugiga, kandi ahabw’enki?

 ⁵ Kwasa omwegi wawe kukora empinduka ezigumire. (Shoma omuri Mako 10:17-22.) Yesu akaba namanya ku cabire kiragumire omushija w’omugiga kuguza ebi yabire atungire. (Mak 10:23) Konka, Yesu akagambira ogo mushija kukora empinduka egumire omu kubaho kweye. Ahabw’enki? Ahabw’okuba Yesu akamukunda. Hine obu turi kubasa kureka kuhiga omwegi ngu ate omu nkora ebi ari kwega ahakuba turi kuhurira atakahikize obwire bw’okukora empinduka. Nikitwara obwire kugira ngu abantu bajure omuntu owa kare, rero bajware omusya. (Kol 3:9, 10) Konka ku oratandike kuganira n’omwegi wawe aha mpinduka ezi ashemerire kukora bucari kare, natandika kuzikora. Eco nicereka ku ori kumukunda kandi ku ori kumufaho.—Zab 141:5; Enf 27:17.

6. Ahabw’enki tushemerire kukoresa ebibuzo ebiri kutuma omwegi yagamba oku ari kureba ebintu?

⁶ Ebibuzo ebiri kutuma omwegi yagamba oku ari kureba ebintu nibituma yagamba ebi ari kutekateka. Koresa ebibuzo nk’ebyo kugira ngu omanye ebi omwegi ari kwikiriza. Ku oragumizemu kukikora basyoya, nikija kutuma caborobera kuganira aha bintu ebiri kurebeka nk’ebigumire. Omu kitabo Shemerererwa amagara ebiro byona! harimu ebibuzo byingi ebiri kutuma omwegi yagamba oku ari kureba ebintu. Ecokureberaho: Omu ishomo rya 4 harimu ekibuzo ekiri kugira ngu: “Notekateka ngu Yehova nayehurira ata wakoresa izina ryeye?” Omu ishomo rya 9 harimu ekindi ekiri kugira ngu: “Ni biha bintu ebi ori kubasa kugamba omu shara?” Omu kubanza, omwegi nikibasa kumushaba kutekateka munonga kugira ngu abase kukugarukamu. Nobasa kumuyamba ori kumumanyiza kutekateka aha byahandikirwe n’ebishushani ebiri kubuganisa n’eco kibuzo.

7. Ni bata oku turi kubasa kukoresa ge enkuru z’ebyabireho?

⁷ Omwegi wa Bibuli yatandika kuta omu nkora ebi ari kwega, mwereke enkuru z’ebyabireho kandi omuhige kuzitoreza. Ecokureberaho: Omwegi wawe yaba atari kukunda kwija omu nterane, nobasa kumwereka vidiyo eri kugira ngu, Yehova akanfaho, omu kicweka ekiri kugira ngu, “Condoza,” omu ishomo rya 14. Omu mashomo agari omu kitabo Shemerererwa amagara ebiro byona!, noyija kushangamu enkuru nk’ezo omu kicweka ekiri kugira ngu, “Yega byingi” na “Condoza”. * Yetonde; otarigeranisa omwegi wawe n’ondijo ori kumugambira ngu, “obu ogu muntu yabibasize n’iwe nobibasa.” Reka omwegi abe ni we owabyerebera. Ahobwe, omugambire aha bintu ebyakwasize omuntu ori kugambwa omuri vidiyo kuta omu nkora ebi Bibuli eri kugamba. Nobasa kumugambira ecahandikirwe ninga shi ekintu kikuru ecamukwasize kubihikaho. Caba kiri kubasika, omwereke oku Yehova yakwasize ogo muntu.

8. Ni bata oku ori kubasa kukwasa omwegi kukunda Yehova?

⁸ Kwasa omwegi wawe kukunda Yehova. Nobasa kukikora bata? Gezaho kumukwasa kushoborocerwa emitwarize ya Yehova. Kwasa omwegi wawe kureba Yehova nka Ruhanga oyine okushemererwa kandi ku ari kukwasa abari kumukunda. (1 Tim 1:11; Heb 11:6) Yereka omwegi wawe ku arije kugasirwa yata omu nkora ebi ari kwega kandi omushobororere ku biri kwereka ku  Yehova ari kumukunda. (Isa 48:17, 18) Oku rukundo eyi omwegi wawe ari kukunda Yehova eri kukizaho kweyongera, ni ko ari kukizaho kugira ecetengo c’okukora empinduka.—1 Yoh 5:3.

9. Tukuratize ebiri omuri Mako 10:29, 30, ni enki ekiri kukwasa omuntu kweferereza kugira ngu abatizibwe?

⁹ Kugira ngu omwegi atunguke ahike aha kubatizibwa, naba ashemerire kugira ebi yayeferereza. Nk’omushija w’omugiga owu tugambireho, abegi ba Bibuli abamwe nibaba bashemerire kweferereza obutungi bwabo. Yaba emirimo eyi bari kukora etari kubuganisa n’emisinge ya Bibuli, nibabasa kuyireka. Abingi nibabasa kusharamu kwemereza abanywani abatari kukunda Yehova. Abandi nibabasa kwangwa n’ab’omu maka gabo abatari kukunda Abahamya ba Yehova. Yesu akagamba ku kigumire kukukora okweferereza nk’okwe. Konka akaraganisa ku abari kumukuratira batarije kwefuza. Omu mwanya gw’eco, Yehova nabahemba ari kubaha eka eri kubakunda y’eby’omwika. (Shoma omuri Mako 10:29, 30.) Ni bata oku ori kubasa kukwasa omwegi wawe wa Bibuli kugasirwa n’eco kiconco kirungi?

10. Ni enki eki ori kwegera aha byabire ahari Manuel?

¹⁰ Ba munywani w’omwegi wawe. Ni ec’omugasho kwereka omwegi wawe ku ori kumufaho. Ahabw’enki? Reba ebi mwenetata ori kwetwa Manuel, otwire omuri Mekisiko yagambire. Akagamba ebyamubireho acari omwegi wa Bibuli ati: “Mbere y’okwega, omwegesa wange akaba nambuza oku ndi. Akaba nankwasa kutuza kituma namweshanjuraho mugambira n’ebindi bizibu byange. Nkaba nindeba ari kunfaho.”

11. Ni bata oku abegi bitu bari kugasirwa ku turi kumara na bo obwire?

¹¹ Mara obwire n’abegi bawe ba Bibuli nk’oku Yesu yabumazire n’abegi beye. (Yoh 3:22) Omwegi wawe yaba ari kukora  empinduka, nobasa kumweta owawe munywa hamwe obushera, murya hamwe ebyokurya ninga shi mureba hamwe ekiganiro c’okwezi. Omwegi wawe nashemererwa ku ori kumweta omu bwire bw’ekihumuro ahu ari kubasa kuhurira ari wenka. Mwenetata Kazibwe otwire omuri Uganda akagamba ati: “Nyowe nkega byingi ahari Yehova omu bwire obu nabire nimara ndi n’omwegesa wange, nk’oku nabire ninkikora turi kwega. Nkerebera oku Yehova ari kufa aha bahereza beye n’oku bashemerirwe. Eco ni co eki nabire ninyetenga omu kubaho kwange.”

12. Ahabw’enki tushemerire kweta abandi baburizi ngu tuze kwegesa omwegi witu?

¹² Yeta abandi baburizi muze kwegesa hamwe omwegi wawe. Hine obu turi kubasa kuhurira corobi kuza kwegesa omwegi turi twenka, ninga shi kuguma turi kugendana n’omuburizi omwe kusha. N’obu hine obu turi kubasa kukikora, omwegi witu wa Bibuli nagasirwa ku turi kuguma turi kutwarayo abandi baburizi abatari bamwe ngu tumwegesa Bibuli turi hamwe. Mwenetata ori kwetwa Dmitrii, otwire omuri Moludova akagamba ngu: “Buri muburizi owabire nayija kunyegesa akaba nanshobororera omu buryo bw’omutano. Eco kikaba nikinkwasa kumanya obundi buryo obu ndi kubasa kuta omu nkora ebi ndi kwega. Nambwenu nkaba ntine enshoni nyingi ku nagire omu nterane obw’okubanza, ahakuba benetata na banyanyazi abingi nkaba nababwineho.”

13. Ahabw’enki tushemerire kukwasa omwegi wa Bibuli kwija omu nterane?

¹³ Kwasa omwegi wawe kwekwatanisa omu nterane. Ahabw’enki? Ahabw’okuba Yehova naragira abahereza beye kubuganira hamwe. Ni kimwe omu kuramya kwitu. (Heb 10:24, 25) Nambwenu, benetata na banyanyazi ni eka yitu y’eby’omwika. Twaba turi na bo omu nterane, nituba turi nk’abari kurira hamwe ebyokurya binuzire. Wakwasa omwegi wawe wa Bibuli kwekwatanisa omu nterane, noba wamukwasa kutera entambwe y’omugasho erije kumukwasa kuhika aha kubatizibwa. Konka kutera eyo ntambwe nikibasa kuba kimugumire. Ni bata oku ekitabo Shemerererwa amagara ebiro byona! kiri kubasa kukwasa omwegi wawe kusingura ebizibu byona ebi ari kubasa kubugana?

14. Ni bata oku turi kubasa kuhiga omwegi witu kwija omu nterane?

¹⁴ Koresa ishomo rya 10 ry’ekitabo Shemerererwa amagara ebiro byona!, ohige omwegi wawe kwija omu nterane. Ababurizi abamanyirire abashabirwe kukoresa eco kitabo mbere y’okukishohoza, bakagamba ku cabakwasize omu kuhiga abegi babo kwekwatanisa omu nterane. Konka otategereza ngu mubanze mwahika ah’ishomo ry’ikumi. Omwete omu nterane bucari kare kandi ogumizemu kumuhiga. Abegi ba Bibuli nibabugana ebizibu ebitari kushushana. Obwe rero, ogume ofe aha bi buri mwegi ari kwetenga, kandi orebe n’obuyambi obu ori kubasa kumuha. Otarihwa amani yamara obwire buringwa atakijire omu nterane. Gumizamu oyehangane, konka ogumizemu kumweta.

15. Ni buha bwoba obu abegi bitu bari kuba bine?

¹⁵ Mbehi noyijuka obwoba obu wabire oyine otakabire Omuhamya wa Yehova? Nobasa kuba wabire ori kwehurira nk’otari kwija kubasa kuburira omu misho ga bona. Ninga shi nobasa kuba wabire otinire ngu banywani bawe n’abanyabuzare bawe nibija kukuhakanisa. Yaba cakuhireho, nobasa kumanya oku omwegi wawe ari kwehurira hati. Yesu akagamba ku abantu bamwe bari kubasa kugira obwoba. Konka,  akahiga abakurasi beye ku batashemerire kwikiriza ngu obwoba bubazibire kuhereza Yehova. (Mat 10:16, 17, 27, 28) Ni bata oku Yesu yakwasize abakurasi beye kuhwa obwoba? Kandi shi ni bata oku ori kubasa kumutoreza?

16. Ni bata oku turi kubasa kukwasa omwegi witu kugambira abandi ebi ari kwega?

¹⁶ Gumizamu kumanyiza omwegi wawe kuburira. Entumwa za Yesu nizibasa kuba zagizire obwoba obu yazoherize kuburira. Konka Yesu akabakwasa ari kubagambira ah’okuburira n’ebi baragambe. (Mat 10:5-7) Ni bata oku ori kubasa kutoreza Yesu? Kwasa omwegi wawe kumanya ahu ari kubasa kuburira. Ecokureberaho: Mubuze haba hine omuntu owu ari kumanya ori kwenda kwega amazima g’omuri Bibuli. Rero, omukwase kutebekanisa ebi ari kubasa kugamba kandi omwereke oburyo bworobi obu ari kubasa kubigambamu. Caba kiri kubasika, nobasa kukoresa ebiri omu kitabo Shemerererwa amagara ebiro byona! ahari kugira ngu, “Abantu abamwe nibagamba ngu” na “Abantu abamwe nibabasa kukubuza ngu.” Waba ori kukikora basyoya, mwereke oku ari kubasa kukoresa Bibuli yaba ari kubagarukamu.

17. Ni bata oku turi kubasa kukoresa ebiri omuri Matayo 10:19, 20, 29-31 twaba turi kukwasa omwegi witu kwesiga Yehova?

¹⁷ Kwasa omwegi wawe kwesiga Yehova. Yesu akahamiza abegi beye ku Yehova yabire arije kubakwasa ahakuba ari kubakunda. (Shoma omuri Matayo 10:19, 20, 29-31.) Yijusya omwegi wawe ku na we Yehova arigumizamu kumukwasa. Nobasa kumukwasa kwesiga Yehova ori kushaba na we aha bikwatirine n’entego zeye. Mwenetata ori kwetwa Franciszek, otwire omuri Polandi akagamba ngu: “Omwegesa wange akagambira Yehova omu shara entego zange. Ku narebire oku Yehova yabire nagarukamu eshara z’omwegesa wange, nanye nkatandika kushaba. Nkaba nindeba obuyambi bwa Yehova, n’omu bwire obu nabire ninshaba oruhusya ngu nze omu kiterane ninga omu nterane.”

18. Ni bata oku Yehova ari kwehurira yareba omurimo ogu Abakristo bari kukora?

¹⁸ Yehova nafa munonga aha begi bitu ba Bibuli. Namanya oku Abakristo bari kutamu amani kugira ngu bakwase abantu kumuhika hihi kandi nakibakundira. (Isa 52:7) Waba otine omwegi wa Bibuli, nobasa kukwasa abegi ba Bibuli kutunguka bahika aha kubatizibwa ori kwekwatanisa n’abegesa b’abo omu kubegesa.