1. Met néún Jesus kewe chón káé ra ereni eú watteen pwiin aramas ar repwe féri?

EÚ WATTEEN pwiin aramas ra sái ngeni Jerusalem iir seni sókkopaten fénú me ra eáni sókkopaten fós. A fis och mettóch mi ámáirú lón ena rán pún ekkóch chón Jus ra chék poputá le eáni án ekkena chón ekis fós. Ena mettóch a fókkun ámáirú ngeniir, nge a fen kon ámáirú minne ekkena chón Jus me aposel Petrus ra ereniir. Ra silei pwe ra tongeni kúna manaw ika ra lúkú Jesus Kraist. A fókkun chúng letiper ren ena pwóróus pwe iwe ra eis: “Met äm aipwe föri?” Iwe, Petrus a ereniir: “Ämi meinisin oupwe . . . papatais.”​—Föf. 2:37, 38.

2. Met sipwe káé lón ei lesen? (Ppii ewe sasing wóón péén.)

² A amwarar minne a fis mwirin. Ina epwe 3,000 aramas ra papatais lón chék ena rán, me wiliti néún Kraist chón káé. Ina poputáán ewe angang mi lap le álisi aramas le wiliti néún Jesus chón káé, ina ewe angang Jesus a ewisa ngeni néún kewe chón káé ar repwe féri. A sópwósópwóló ena angang tori iei. Lón ach ei fansoun, sise tongeni chék álisi emén an epwe papatais mwirin chék fitu awa. Neman epwe káé ren fitu maram, are pwal mwo nge eú ier, ika lap seni me mwen an epwe papatais. Ika ka kákkáé ngeni emén iei, iwe ka silei pwe a lamot angang weires lón ach álisi emén le wiliti néún Kraist chón káé. Lón ei lesen, sipwe káé met sia tongeni féri le álisi néúch chón káé an epwe wiliti emén chón káé mi papatais.

3. Met Mateus 28:19, 20 a apasa pwe mi lamot emén chón káé epwe féri pwe epwe feffeitá ngeni an epwe papatais?

³ Me mwen án emén chón káé epwe papatais, a lamot an epwe apwénúetá áitien Paipel kewe. (Álleani Mateus 28:19, 20.) Lupwen emén chón káé a apwénúetá minne a káé, epwe usun ewe “mwän mi tipachem” lón án Jesus we kapas áwewe ewe mi alóllóólaatiw an ttu lóngólóngun imwan we epwe aú wóón ewe achaw. (Mat. 7:24, 25; Luk. 6:47, 48) Ifa usun sipwe tongeni álisi emén chón káé le apwénúetá minne a káé? Sipwe pwóróus wóón ekkeei úlúngát mettóch sia tongeni féri.

4. Ifa usun sia tongeni álisi emén chón káé le akkachocho pwe epwe fich an epwe papatais? (Pwal ppii ewe pwóór “ Álisi Noum we Chón Káé le Akkóta Met Epwe Achocho Ngeni me Álisi le Tikeri.”)

⁴ Álisi noum we chón káé le isetiw met epwe achocho le tikeri. Pwata a lamot óm kopwe féri ena? Ekieki ei kapas áwewe: Áwewe chék, ika ka ssá ngeni eú leeni mi towau, eli kopwe mochen mwo kaúló ren ekkewe leeni mi lingéch. Ika kopwe féri ena, kopwe meefi pwe ese kon towau ewe leeni kopwe ssá ngeni. Pwal ina chék usun ren án emén chón káé isetiw ekkewe mettóch epwe achocho le tikeri ren ekis fansoun, iwe epwe kúna pwe a tufich an epwe tikeri an mochen papatais. Ren óm kopwe álisi noum we chón káé le feffeitá, néúnéú ewe kinikin “Achocho le Tikeri” lón ewe puk Enjoy Life Forever! * Lesópwólóón eú me eú lesen, oupwe pwóróusfengen wóón ifa usun minne mi makketiw ewe chón káé epwe achocho ngeni, epwe álisi le apwénúetá met a kerán káé. Ika ka mochen án noum we chón káé epwe achocho le tikeri pwal eú mettóch, iwe ka tongeni makkeei lón ewe kinikin “Pwal Ekkóch.” Kopwe kan néúnéú ena kinikin le pwóróus ngeni noum we  chón káé wóón ekkewe mettóch a mochen achocho le tikeri ren ekis fansoun, me wóón ekkewe mettóch epwe ekis ttam an epwe tikeriir.

5. Usun met Markus 10:17-22 a apasa, met Jesus a ereni ewe mwán mi pisekisek an epwe féri, me pwata?

⁵ Álisi noum we chón káé le féri ekkewe siwil lón manawan. (Álleani Markus 10:17-22.) Jesus a silei pwe epwe weires ngeni emén mwán mi pisekisek an epwe améméló meinisin pisekin kewe. (Mark. 10:23) Nge Jesus a ereni ena mwán an epwe féri eú watteen siwil lón manawan. Pwata? Pokiten a tongei. Fán ekkóch, eli sia pireir le ereni emén néúch chón káé an epwe apwénúetá minne a kákkáé pokiten sia meefi pwe esaamwo mmólnetá le siwil. A tongeni ttam me mwirin án aramas ekkesiwili manawer me pwilitalong wóór ekkewe napanap mi fé. (Kol. 3:9, 10) Nge ika ka mwittir fós ngeni usun eú mettóch mi lamot an epwe siwili, iwe epwe mwittir le poputá le siwililó. Óm pwóróus ngeni usun ena, a pwári pwe ka tongei.​—Kölf. 141:5, NW; SalF. 27:17.

6. Pwata a lamot ach sipwe eisini néúch we chón káé ika met an ekiek usun eú pwóróus?

⁶ A lamot ach sipwe eisini néúch we chón káé ika met an ekiek usun eú pwóróus. Óm féri ena epwe álisuk le silei met noum we chón káé a silei me lúkú. Ika ka féfféri ena, epwe mecheres óm kopwe áwewe ngeni ekkewe mettóch eli a weires an epwe lúkú. Lón ewe puk Enjoy Life Forever! a chómmóng ekkewe kapas eis mi efisi án ewe chón káé epwe ekieki eú pwóróus. Áwewe chék ren ei kapas eis lón lesen 04: “Met óm ekiek, epwe met meefien Jiowa atun ka néúnéú itan we?” Pwal ei kapas eis lón lesen 09: “Ikkefa ekkóch mettóch ka mochen iótek usur?” Me mwan, eli epwe weires ngeni noum we chón káé an epwe pélúweni ekkena kapas eis. Ka tongeni álisi le ekieki usun ekkewe wokisin me lios are sasing lón ewe puk.

7. Ifa usun sipwe tongeni néúnéúéchú ekkewe lesen usun pwóróusen manawen ekkewe ekkóch?

⁷ Lupwen noum we chón káé a fen weweiti met a lamot an epwe féri, pesei an epwe apwénúetá ren óm néúnéú ekkewe lesen usun pwóróusen manawen ekkewe ekkóch. Áwewe chék, ika a weires ngeni noum we chón káé an epwe fiffiti mwich, ka tongeni fichi ngeni ewe video itelapan Jehovah Cared for Me lón ewe kinikin “Pwal Och Pwóróus” lón lesen 14. Kopwe kúna ekkena esin pwóróus lón chómmóng ekkewe lesen lón ewe puk Enjoy Life Forever! lón ewe kinikin “Kúttafichi” are lón ewe kinikin “Pwal Och Pwóróus.” * Túmúnú pwe kete apépééi noum we chón káé ngeni pwal emén ren óm apasa: “Ika a tongeni féri, ka pwal tongeni.” Mut ngeni noum we chón káé an epwe pwisin ekieki ena. Nge kopwe fen fós ngeni usun ekkewe pwóróus mi álilliséch mi álisi ena emén lón ena video an epwe apwénúetá áitien Paipel kewe. Eli ka tongeni menlapei eú wokisin are och mettóch mi álilliséch eménna a fen féri. Ika mi tufich, menlapei ifa usun Jiowa a álisi ena emén.

8. Ifa usun sipwe tongeni álisi néúch we chón káé le tongei Jiowa?

⁸ Álisi noum we chón káé an epwe tongei Jiowa. Ifa usun? Kútta alen óm kopwe álisi le alapaaló an sile usun napanapen Jiowa kewe. Álisi an epwe weweiti pwe Jiowa, I emén Kot mi pwapwa, ewe mi álisi chókkewe mi tongei i. (1 Tim. 1:11, NW; Ipru 11:6) Áiti ngeni pwe epwe kúna feiéch ren an apwénúetá minne a káé. Me áwewe ngeni pwe ina alen án Jiowa pwár ngeni pwe a tongei. (Ais. 48:17, 18) Lapólóón án noum we chón káé tongei Jiowa,  epwe pwal ina lapólóón an mochen ekkesiwil.​—1 Joh. 5:3.

9. Met a tongeni álisi emén an epwe pennúkú ekkóch mettóch ren an epwe wiliti emén chón káé mi papatais me ren Markus 10:29, 30?

⁹ Ren án emén chón káé epwe feffeitá ngeni an epwe papatais, a lamot an epwe pennúkú ekkóch mettóch. Eli a lamot ngeni ekkóch chón káé ar repwe pennúkú mettóchun aion usun ewe mwán mi pisekisek sia fen fósun me mwan. Áwewe chék, ika ar angangen moni ese tipeeú ngeni án Paipel kewe kapasen emmwen, eli repwe pwal mwo nge siwili. Eli chómmóng repwe úkútiw le chiechi ngeni chiechier kewe rese tongei Jiowa. Eli ekkóch repwe lúkúsékúrú chón ar kewe famili rese sani Chón Pwáraatá Jiowa. Jesus a apasa pwe eli epwe weires ngeni ekkóch aramas ar repwe pennúkú ekkena esin mettóch. Nge a pwonei pwe chókkewe mi tapweló mwirin resap lichippúng. Jiowa epwe efeiéchúúr ren an fang ngeniir eú famili mi tong lein néún kewe aramas. (Álleani Markus 10:29, 30.) Ifa usun ka tongeni álisi noum we chón káé le kúna feiéch seni ena liffang mi aúchea?

10. Met ka káé seni pwóróusen Manuel?

¹⁰ Chiechi ngeni noum we chón káé. A lamot óm kopwe pwár ngeni noum we chón káé pwe ka tongei. Pwata? Iei pwóróusen Manuel seni Mexico. Iei alon atun a chemeni fansoun an a chúen emén chón káé: “Me mwen ám aupwe kan káé, ewe mi káé ngeniei a kan eisiniei pwóróusei. A álisiei ai upwe chék kinamwe le fós ngeni wóón ese lifilifil met. Ua meefi pwe a wesewesen tongeei.”

11. Ifa usun néúch kewe chón káé ra tongeni kúna álillis seni ach chiechi ngeniir?

¹¹ Chiechi ngeni noum kewe chón káé usun chék án Jesus chiechi ngeni chókkewe mi tapweló mwirin. (Joh. 3:22) Ika mi tufich, etiwa noum we chón káé mi feffeitá, ngeni imwom we pwe oupwe ún kofi, are mwéngéfengen, are katol eché me lein néúch kewe broadcast mi kan katowu iteiten maram. Eli noum we  chón káé epwe aúcheani óm etiwa, ákkáeúin atun chiechian kewe me chón an famili ra féri apwapwaan ekkewe ráninipin pwe eli a tipitipingaw. Iei alon Kazibwe seni Uganda: “Me rei, a chék taitap met ua káé usun Jiowa seni ewe mi wisen káé ngeniei atun ám káéfengen me ewe atun ám chiechifengen. Ua kúna úkúkún án Jiowa tongei néún kewe aramas, me úkúkún pwapwaar. Ina met ua mochen lón manawei.”

12. Pwata a lamot ach sipwe uwei pwal ekkóch chón afalafal le fitikich le káé ngeni emén chón káé?

¹² Uwei pwal ekkóch chón afalafal le fiti ewe káé. Fán ekkóch, eli sia meefi pwe a mecheres ach sipwe chék ló wóón pwisin ach, are uwei pwal chék ewe chón afalafal mi piin fiffitikich. Inaamwo ika eli epwe mecheres ach féri ena, nge epwe kon álilliséch ngeni néúch we chón káé ika sipwe uwei pwal ekkóch chón afalafal ar repwe fitikich fán ekkóch. Iei alon Dmitrii, seni Moldova: “Pokiten a sókkóló napanapen án emén me emén ekkewe chón afalafal mi fiti ai we káé áweweei ewe lesen, iwe a álisiei le kúna pwal ekkóch alen ai upwe apwénúetá minne ua kákkáé. Use pwal kon lien sáw atun ua kerán fiti ewe mwich, pokiten ua fen chuuri chómmóng me lein chón ewe mwichefel.”

13. Pwata a lamot ach sipwe álisi néúch we chón káé le fiti ekkewe mwich?

¹³ Álisi noum we chón káé le fiti ekkewe mwich. Pwata? Pokiten Jiowa a allúk ngeni néún kewe aramas ar repwe mwichfengen pún ina kinikinin ach fel ngeni. (Ipru 10:24, 25) Pwal och, pwiich kewe lón ewe mwichefel iir ach famili lón pekin ngún. Atun sia nóm rer lón ach kewe mwich, usun itá sia mwéngéfengen eú mwéngé mi anné lón imwach. Ika ka álisi noum we chón káé le fiti ekkewe mwich, ka kan álisi le féri och mettóch mi fókkun lamot pwe epwe tongeni papatais. Nge eli a weires ngeni an epwe poputá le fiffiti ekkewe mwich. Ifa usun ewe puk Enjoy Life Forever! epwe tongeni álisi noum we chón káé le pwákini ese lifilifil osukosuk mi eppeti le fiffiti ekkewe mwich?

14. Ifa usun sipwe tongeni pesei néúch we chón káé an epwe fiti ekkewe mwich?

¹⁴ Néúnéú ewe lesen 10 lón ewe puk Enjoy Life Forever! pwe epwe álisuk lón óm pesei noum we chón káé le fiti mwich. Me mwen án ena puk epwe katowu, ach we mwicheich a tingorei ekkóch chón afalafal mi lipwákéch, ar repwe sótun néúnéú ena lesen ngeni néúr kewe chón káé. Ra apasa pwe a mmen fókkun sópwéch me álilliséch. Ese pwal lamot óm kopwe witiwit tori lesen 10, iwe kopwap etiwa noum we chón káé an epwe fiti ach kewe mwich. Ika mi tufich, mwittir etiwa me sópweló le ekketiwa iteitan. A sókkóló án emén me emén chón káé osukosuk. Ina popun kopwe áfánni met a lamot ngeni noum we chón káé me ppii ifa usun ka tongeni awora álillis ngeni. Kosap lichippúng ika a ttam me mwirin an poputá le fiti mwich. Kopwe mosonottam me sópweló chék le ekketiwa.

15. Met a tongeni efisi án néúch we chón káé niwokkus?

¹⁵ Ka chemeni ewe atun ka ekis pireir le wiliti emén Chón Pwáraatá Jiowa? Eli ka meefi pwe kese fókkun tongeni afalafal imw me imw. Are eli ka niwokkus ren án chón óm famili are chiechiom kewe repwe oputok. Ika ina, ka tongeni weweiti meefien noum we chón káé. Jesus a erá pwe ekkóch ra tongeni eáni ena esin niwokkus. Iwe nge, a apéchékkúla néún kewe chón káé ar resap mut ngeni niwokkus an epwe aúkaretiw le akkangang ngeni Jiowa. (Mat. 10:16, 17, 27, 28) Ifa usun Jesus a álisi néún kewe chón káé le pworacho ngeni ar niwokkus?  Me ifa usun ka tongeni féri met Jesus a féri?

16. Ifa usun sia tongeni áiti ngeni néúch we chón káé an epwe ereni aramas usun an lúkú?

¹⁶ Ákkáiti ngeni noum we chón káé an epwe ereni ekkewe ekkóch usun an lúkú. Eli néún Jesus kewe chón káé ra niwokkus atun a tiiniireló pwe repwe afalafal. Nge Jesus a álisiir ren an ereniir ia repwe afalafal ie, me met repwe eáni afalafal. (Mat. 10:5-7) Ifa usun ka tongeni áppirú Jesus? Álisi noum we chón káé le silei ineet atun a tongeni afalafal. Áwewe chék, eisini ika a silei ié epwe tongeni kúna álillis seni eú pwóróus mi enlet seni Paipel. Iwe mwirin, álisi le ammólnatá met epwe apasa ren óm áiti ngeni ifa usun epwe áweweei ena pwóróus mi enlet fán mecheres. Ika mi tufich, oua tongeni asóssót ren óm néúnéú ekkeei kinikin “Ekkóch Ra Erá” me “Eli Emén Epwe Eis,” lón ewe puk Enjoy Life Forever! Atun ka féri ena, nefótófót wóón óm ákkáiti ngeni noum we chón káé an epwe néúnéú ewe Paipel le pélúweni án aramas kapas eis fán súfél me mecheres.

17. Ifa usun sia tongeni néúnéú Mateus 10:19, 20, 29-31 le álisi néúch we chón káé le lúkúlúk wóón Jiowa?

¹⁷ Álisi noum we chón káé le lúkúlúk wóón Jiowa. Jesus a alúkúlúkú néún kewe chón káé pwe Jiowa epwe álisiir pwe a tongeer. (Álleani Mateus 10:19, 20, 29-31.) Áchema ngeni noum we chón káé pwe Jiowa epwe pwal álisi. Ka tongeni álisi an epwe lúkúlúk wóón Jiowa ren ámi iótekfengen usun met ekkewe a mochen achocho le tikeri. Iei alon Franciszek seni Poland: “Fán chómmóng, ewe mi wisen káé ngeniei a kan apachaalong lón an kewe iótek ekkewe mettóch ua mochen achocho le tikeriir. Lupwen ua kúna ifa usun Jiowa a pélúweni an kewe iótek, iwe mwittir chék ua pwal poputá le iótek. Ua meefi pwe Jiowa a álisiei lupwen a lamot ai upwe asésé seni ai we mineféén angang pwe upwe fiti ekkewe mwich me mwichelap.”

18. Met meefien Jiowa usun ewe angangen asukul ekkewe Chón Kraist ra féri?

¹⁸ Jiowa a enletin tongei néúch kewe chón káé. A aúcheani án ekkewe Chón Kraist angang weires le asukula me álisi aramas le arap ngeni, me a tongeer ren ar angang weires. (Ais. 52:7) Ika ese wor ié ka kákkáé ngeni iei, ka chúen tongeni álisi ekkewe chón káé pwe repwe feffeitá ngeni ar repwe papatais ren óm fiffiti pwal ekkóch chón afalafal le káé ngeniir.