1. Ki bann disip Zezi ti dir en gran lafoul zot devret fer?

EN GRAN lafoul zonm ek madanm ti al Zerizalenm. Zot ti sorti dan diferan pei e zot ti koz diferan langaz. En keksoz ekstraordiner ti arive sa zour. Serten Zwif ti kapab koz langaz sa bann viziter. Me sa ki sa bann Zwif ti pe dir avek zot e sa ki zapot Pyer ti dir zot ti pli ekstraordiner. Sa lafoul ti aprann ki zot kapab ganny sove si zot demontre lafwa dan Zezi Kri. Zot ti vreman ganny touse avek sa mesaz e zot ti demande: “Ki nou devret fer?” Pyer ti reponn: “Zot tou batize.”​—Akt 2:37, 38.

2. Ki nou pou diskite dan sa lartik? (Vwar portre lo kouvertir.)

² Sa ki ti arive apre ti ekstraordiner. Apepre 3,000 dimoun ti batize sa zour e zot ti vin bann disip Kris. Sa ti konmansman sa travay pour fer disip ki Zezi ti’n donn son bann disip lord pour fer. Ozordi, son bann disip i ankor pe fer sa travay. Me nou pa kapab zis koz avek en dimoun pour detrwa erdtan e apre, sa dimoun in pare pour batize. I kapab pran plizyer mwan ouswa menm en lannen oubyen plis pour en etidyan Labib kapab batize. I en kantite travay pour ed en dimoun pour vin en disip Kris parey ou konnen si ou deza pe fer letid avek en dimoun. Dan sa lartik, nou pou vwar ki ou kapab fer pour ed ou etidyan Labib pour batize.

3. Dapre Matye 28:19, 20, ki en etidyan i bezwen fer pour progrese ziska batenm?

³ Avan en etidyan Labib i batize i bezwen aplik sa ki i pe aprann dan Labib. (Lir Matye 28:19, 20.) Ler en etidyan i aplik sa ki i pe aprann i vin parey sa “zonm pridan” dan  legzanp Zezi ki ti fouy dan fon pour fer son lakaz lo ros. (Mat. 7:24, 25; Lik 6:47, 48) Me ki mannyer nou kapab ed en etidyan pour aplik sa ki i pe aprann? Aprezan, annou vwar trwa keksoz ki nou kapab fer pour ed li.

4. Ki mannyer ou kapab ed en etidyan pour kontinyen fer progre pour li kalifye pour batize? (Vwar osi sa bwat “ Ed ou etidyan Labib pour met e atenn bann lobzektif.”)

⁴ Ed ou etidyan pour met bann lobzektif. Akoz ou devret fer sa? Annou vwar en legzanp. Meton, ou pe al fer en gran vwayaz dan loto. Petet, ou pou anvi vizit bann landrwa enteresan tou dilon semen avan ler ou ariv ou destinasyon akoz ou krwar ki sa vwayaz i tro long. Pareyman, ler en etidyan Labib i met bann lobzektif ki i kapab atenn dan en ptigin letan, i pou vwar ki i posib pour atenn sa lobzektif pour batize. Servi sa seksyon “Lobzektif” dan sa liv Viv ere pour touzour! pour ed ou etidyan pour met bann lobzektif. A lafen sak leson, koz avek ou etidyan lo ki mannyer sa lobzektif pou ed li aplik sa ki i pe aprann. Si ou ti a kontan ki ou etidyan i atenn en lot lobzektif, ou kapab ekri dan sa lespas ki anba “En lot lobzektif.” Tanzantan servi sa seksyon pour koz avek ou etidyan lo bann lobzektif ki i kapab atenn dan en ptigin letan e bann ki pou pran plis letan.

5. Dapre Mark 10:17-22, ki Zezi ti demann en zonm ris pour fer e akoz?

⁵ Ed ou etidyan pour fer bann sanzman. (Lir Mark 10:17-22.) Zezi ti konnen ki i ti pou difisil pour en zonm vann tou sa ki i ti annan. (Mark 10:23) Kantmenm sa, Zezi ti demann sa zonm pour fer sa gran sanzman. Akoz? Parski Zezi ti kontan li. Parfwa, nou kapab ezite pour ankouraz en etidyan pour aplik sa ki i pe aprann akoz nou santi ki  i pa ankor pare pour fer serten sanzman. I kapab pran letan pour en dimoun debaras li avek bann vye labitid e pour devlop sa nouvo personnalite. (Kol. 3:9, 10) Me si ou pa tarde pour koz avek ou etidyan konsernan en sanzman ki i bezwen fer, li osi i pa pou tarde pour konmans fer sa sanzman. Si ou fer sa, ou pou montre ki ou kontan li.​—Ps. 141:5, NWT; Prov. 27:17, NWT.

6. Akoz nou devret demann nou etidyan son lopinyon lo en topik?

⁶ I enportan pour demann nou etidyan son lopinyon lo en topik. Sa pou ed nou konnen ki i’n konpran e ki i krwar ladan. Si ou fer sa regilyerman, i pou pli fasil pour diskit lo bann keksoz ki kapab difisil pour li aksepte. Dan sa liv, Viv ere pour touzour! i annan bokou kestyon ki kapab ed ou konn lopinyon ou etidyan. Par egzanp, dan leson 04, i annan sa kestyon: “Ki mannyer ou krwar Zeova i santi ler ou servi son non?” Dan leson 09, i annan sa kestyon: “Ki serten keksoz ou ti a kontan priy lo la?” O konmansman, i kapab difisil pour ou etidyan reponn sa bann kestyon. Me ou kapab ed li par montre li ki mannyer pour reflesir lo bann verse ek bann portre dan sa liv.

7. Ki mannyer nou kapab servi leksperyans lezot pour ed nou etidyan?

⁷ Ler sa etidyan i konpran bann sanzman ki i bezwen fer, servi leksperyans lezot pour ed li fer sa bann sanzman. Par egzanp, si sa etidyan i vwar li difisil pour asiste renyon, ou kapab montre li sa video Jehovah Cared for Me ki dan seksyon “Fer plis resers” dan leson 14. Dan bokou bann leson ki dan liv Viv ere pour touzour!, i annan bann leksperyans dan sa seksyon “Al pli o profon” ouswa dan sa seksyon “Fer plis resers.” * Fer atansyon pour pa konpar ou etidyan avek en lot dimoun par dir, “Si i’n kapab fer sa, ou osi ou kapab.” O kontrer, les sa etidyan realiz sa pour li menm. Pour ou ed ou etidyan, ou kapab koz lo keksoz spesifik ki sa dimoun dan sa video in fer pour li aplik bann prensip Labib. Petet, ou kapab osi koz lo en verse enportan. Ler i posib, koz avek li lo fason ki Zeova in ed sa dimoun.

8. Ki mannyer nou kapab ed nou etidyan pour kontan Zeova?

⁸ Ed ou etidyan pour kontan Zeova. Ki mannyer? Rod loportinite pour ed ou etidyan aprann plis lo bann kalite Zeova. Ed ou etidyan konpran ki Zeova i en Bondye ere ki ed bann ki kontan li. (1 Tim. 1:11; Ebr. 11:6) Montre ou etidyan ki ler i aplik sa ki i pe aprann, sa pou anmenn byenfe pour li e eksplik li ki sa bann byenfe i montre ki Zeova i kontan li. (Iza. 48:17, 18) Anmezir ki son lanmour pour Zeova i ogmante, i pou pli anvi fer bann sanzman neseser.​—1 Zan 5:3.

9. Dapre Mark 10:29, 30, kwa ki kapab ed en dimoun pour fer bann sakrifis pour li kapab batize?

⁹ Pour en etidyan Labib progrese ziska batenm, i pou bezwen fer serten sakrifis. Parey sa zonm ki’n ganny mansyonnen pli boner, petet serten etidyan pou bezwen sakrifye bann keksoz materyel. Si zot louvraz pa an armoni avek  bann prensip Labib petet zot pou bezwen rod en lot louvraz. I kapab ki bokou pou bezwen aret frekant bann zanmi ki pa kontan Zeova. I annan osi ki zot fanmir i abandonn zot parski zot pa kontan Temwen Zeova. Zezi ti dir ki i kapab difisil pour serten dimoun fer sa bann sakrifis. Me i ti promet ki bann ki swiv li pa pou dezapwente. O kontrer, Zeova pou rekonpans zot par donn zot en fanmir ki kontan zot. (Lir Mark 10:29, 30.) Ki mannyer ou kapab ed ou etidyan Labib pour benefisye avek sa kado?

10. Ki ou aprann avek sa ki Manuel ti dir?

¹⁰ Vin zanmi avek ou etidyan. I enportan pour ou montre ou etidyan ki ou kontan li. Akoz? Remark sa ki Manuel, en frer ki reste Meksiko i dir. Manuel i dekrir lafason ki son ansenyan ti ed li, ler i ti ankor pe etidye Labib. I dir: “Avan sak letid, mon ansenyan ti demann mwan, konman mon sava. I ti ed mwan pour rilaks e i ti les mwan koz lo nenport keksoz. Mon ti santi ki i vreman kontan mwan.”

11. Ki byenfe nou etidyan i kapab gannyen ler i pas letan avek nou?

¹¹ Pas letan avek ou etidyan parey Zezi ti pas letan avek son bann disip. (Zan 3:22) Si ou etidyan Labib pe fer sanzman dan son lavi, petet ou kapab envit li kot ou pour en tas dite, pour en repa ouswa pour get enn nou progranm Televizyon JW. I kapab ki ou etidyan pou vreman apresye si ou envit li pandan letan ki son bann zanmi ek fanmir pe selebre bann lafet fo larelizyon parski i kapab ki dan sa bann letan i santi li tousel. Kazibwe, ki reste Uganda i dir: “Dan mon letid, mon’n aprann en kantite lo Zeova, me mon’n osi aprann en kantite lo li, ler mon’n pas letan avek mon ansenyan. Mon ti vwar ki kantite Zeova i kontan  son pep e ki zot ere. Sanmenm sa ki mon ti anvi dan mon lavi.”

12. Akoz nou devret anmenn diferan proklanmater pour vin fer letid Labib avek nou?

¹² Envit lezot proklanmater pour vin sa letid avek ou. Parfwa, nou kapab santi ki i pli fasil pour nou al en letid nou tousel oubyen pour anmenn menm proklanmater avek nou. Menm si i kapab pli fasil pour nou fer sa, i pou pli bon pour nou etidyan si nou anmenn diferan proklanmater avek nou. Dmitrii, ki reste Moldova i dir: “Sak proklanmater ki ti asiste mon letid ti eksplik keksoz dan diferan fason. Sa ti ed mwan pour vwar lezot fason ki mon ti kapab aplik sa ki mon ti pe aprann. Vi ki mon ti’n deza zwenn en kantite frer ek ser, mon pa ti tro kanmi ler mon ti asiste mon premye renyon.”

13. Akoz nou devret ed nou etidyan pour asiste renyon?

¹³ Ed ou etidyan Labib pour asiste renyon. Akoz? Parski Zeova i donn lord son bann adorater pour zwenn ansanm e sa i form parti nou ladorasyon. (Ebr. 10:24, 25) An plis, nou bann frer ek ser dan kongregasyon i vin parey nou fanmir. Ler nou dan renyon avek zot, i konmsi nou pe manz en bon repa ansanm. Ler ou ed ou etidyan Labib asiste renyon, ou pe ed li fer en keksoz vreman enportan pour li kapab batize. Me i kapab difisil pour li konmans asiste renyon. Ki mannyer sa liv Viv ere pour touzour! i kapab ed ou etidyan pour rezourd nenport problenm ki pe anpes li asiste renyon?

14. Ki mannyer nou kapab motiv nou etidyan pour asiste renyon?

¹⁴ Servi leson 10 dan sa liv Viv ere pour touzour!, pour ed ou motiv ou etidyan pour asiste renyon. Avan ki sa liv ti ganny konplete, serten proklanmater ti ganny demande pour servi sa leson avek zot bann etidyan. Zot ti dir ki sa ti mars vreman byen e in ed zot etidyan pour asiste renyon. Byensir, pa esper ziska leson 10 pour envit ou etidyan Labib pour asiste renyon. Envit li o pli vit posib e kontinyen fer li regilyerman. Diferan etidyan Labib i fer fas avek diferan problenm. Alor, port atansyon lo sa ki ou etidyan i bezwen e gete si ou kapab donn li led pratik. Pa bezwen dekouraze si i pran en pe letan avan i asiste renyon. Ou bezwen demontre pasyans me kontinyen envit li.

15. Kwa ki kapab fer nou etidyan per pour vin en Temwen Zeova?

¹⁵ Eski ou ti en pe per pour vin en Temwen Zeova? Petet ou ti santi ki ou pa ti pou zanmen kapab anons sa bon nouvel kazankaz ouswa ou ti per ki ou fanmir ouswa zanmi ti pou opoz ou. Si wi, ou kapab konpran lafason ki ou etidyan Labib i santi. Zezi ti dir ki serten dimoun ti pou annan sa menm lafreyer. Par kont, i ti ankouraz son bann disip pour pa les lafreyer anpes zot servi Zeova. (Mat. 10:16, 17, 27, 28) Ki mannyer Zezi ti ed son bann disip pour sirmont zot lafreyer? Ki mannyer nou kapab swiv son legzanp?

16. Ki mannyer nou kapab montre nou etidyan pour koz lo sa ki i pe aprann?

¹⁶ Kontinyen montre ou etidyan ki mannyer pour koz lo sa ki i pe aprann. I kapab ki bann disip Zezi ti per ler Zezi ti anvoy zot pour anons sa bon nouvel. Me Zezi ti dir zot kote pour ale e ki pour dir. (Mat. 10:5-7) Ki mannyer ou kapab swiv  legzanp Zezi? Ed ou etidyan pour vwar bann loportinite kot i kapab anons sa bon nouvel. Par egzanp, demann li si i konn en dimoun ki ti pou kontan pour aprann en lansennyman spesifik dan Labib. Apre, ed li pour prepar sa ki i pou dir par montre li ki mannyer pour koz lo sa laverite avek sa dimoun dan en fason senp. Pour fer sa, ou kapab servi sa seksyon “Serten dimoun i dir” ek “Serten dimoun i demande” ki dan liv Viv ere pour touzour! Ler ou fer sa, konsantre lo montre ou etidyan ki mannyer pour servi Labib pour donn bann larepons senp ki demontre respe pour sa dimoun.

17. Ki mannyer nou kapab servi Matye 10:19, 20, 29-31, pour ed nou etidyan annan konfyans dan Zeova?

¹⁷ Ed ou etidyan pour annan konfyans dan Zeova. Zezi ti dir son bann disip ki Zeova ti pou ed zot parski i kontan zot. (Lir Matye 10:19, 20, 29-31.) Fer ou etidyan rapel ki Zeova pou osi ed li. Ou kapab ed li pour depan lo Zeova par priy avek li konsernan son bann lobzektif. Franciszek, ki reste Lapolonny, i dir: “Mon ansenyan ti souvan mansyonn mon bann lobzektif dan son lapriyer. Ler mon ti vwar ki Zeova ti reponn son lapriyer, deswit mon ti konmans priye mwan osi. Mon ti santi ki Zeova ti ed mwan ler mon ti demann bann zour konze dan mon nouvo travay pour mwan asiste renyon ek lasanble.”

18. Ki mannyer Zeova i santi konsernan sa travay ki bann proklanmater i fer?

¹⁸ Zeova i vreman kontan nou bann etidyan Labib. I konnen ki bann proklanmater i fer en kantite zefor pour ed dimoun pour vin plis pros avek li e i vreman kontan zot pour sa travay ki zot pe fer. (Iza. 52:7) Si ou napa en letid Labib pour le moman, ou kapab ed bann etidyan Labib pour progrese ziska batenm ler ou asiste zot letid.